1. Maski Jiova kitelpia chikaualis, ¿toni kinkaua oksekin maj kichiuakan?

JIOVA kichijchiuak nochi tein onkak. Amo onkak okse aksa akin okachi tamatkej uan chikauak ke yejuatsin. Se tonal, Job kijtoj ke kiajsikamatik ke Dios ueli kichiua nochi tein kiixtalia. Amo teyi onkak tein amo uelis kichiuas (Job 42:2). Uan no, amo moneki maj aksa kipaleui. Maski ijkon, kinkaua oksekin maj tekitikan iuan. Ijkon kinnextilia ke kinteltasojta.

2. ¿Toni tekit tein motelneki Jiova kimakak Jesús?

² Dios yekinika kichijchiuak iKonetsin, Jesús. Ompa kimakak iKonetsin se tekit tein motelneki. Kikauak maj kipaleui keman kichijchiuak nochi okseki taman (Juan 1:1, 2, 18). Tatitanil Pablo kijtoj ke itechkopa Jesús “Dios kichijchiuak nochi okseki taman ne iluikak uan nikan taltikpak, tein se kiita uan tein amo ueli se kiita”. No kijtoj ke nochi okseki taman Dios kichijchiuak itechkopa yejua uan tein yejua ika yolpakiskia (Col.  1:15-17, TNM). Nejin kinextia ke Jiova kimakak Jesús se ueyi tatiochiualis keman kimakak se tekit tein motelneki uan kinmatiltij oksekin.

3. 1) ¿Toni kikauak Jiova maj kichiua Adán? 2) ¿Keyej kikauak Jiova maj Adán kipaleuiani?

³ Jiova no kikauani maj taltikpakneminij iuan titekitikan. Kemej neskayot, kikauak maj Adán kipaleuiani maj kintalili inintokay tapialmej (Gén. 2:19, 20). Tikyekmatij ke Adán semi kiyolpaktij kichiuas nejin tekit. Kuali kiitak keniuj tamatia sejse tapial uan toni kichiuaya, nejon kipaleuij maj kiajsini tokayit tein kitaliliskia. Jiova ueliskia kichiuas nejin tekit, porin yejuatsin kinchijchiuak tapialmej. Sayoj ke kemej kiteltasojtaya Adán, kikauak maj kipaleuiani. Uan no, kinauatij maj nejin taltikpak kichiuani maj mokepa se xochital (Gén. 1:27, 28). Sayoj ke satepan, Adán amo kinekikok iuan tekitis Jiova. Yejua ika, Adán uan nochin tiikoneuan semi titajyouianij (Gén. 3:17-19, 23).

4. ¿Akonimej tekitinij iuan Dios uan tapaleuianij maj mochiua tein yejuatsin kiixtalia?

⁴ Okachi satepan, Dios kikauak maj okseki taltikpakneminij iuan tekitikan. Kemej neskayot, Noé kichijchiuak se arca tein kipaleuiskia yejua uan ichankauan maj makisanij keman mochiuak Tetsaujkakiouit. Moisés kikixtij xolal Israel ompa Egipto. Josué kinuikak israelitas itech Tal tein Dios motenkaujka kinmakas. Salomón kichijchiuak templo tein moajsia Jerusalén. Uan María yejua akin kiiskaltij Jesús. Nejin itekitikauan Dios akin tatakamatkej uan miakej oksekinok iuan tekitinij yejuatsin uan tapaleuianij maj mochiua tein yejuatsin kiixtalia.

5. 1) ¿Toni tekit ueli tikchiuaj tinochin? 2) ¿Amo mochiuaskia nejin tekit komo amo tikpaleuiskiaj Jiova? (Xikonita taixkopin ipeujyan tamachtilis.)

⁵ Itech nejin tonalmej, Jiova techyoleua maj tikchiuakan nochi tein tiueliskej tein ika tikpaleuiskej itaixyekanalis. Onkak miak taman kemej uelis titapaleuiskej. Uan maski seki taman amo ueli tikchiuaj, tinochin ueli tikteixmatiltiaj iTekiuajyo Dios. ¿Amo mochiuaskia nejin tekit komo amo tikpaleuiskiaj Jiova? Kemaj mochiuaskia. Komo kinekiskia, yejuatsin ueliskia kinualnojnotsas taltikpakneminij ne iluikak. Uan Jesús kijtoj ke hasta ueliskia kichiuas maj tet kinixmatilti taltikpakneminij akoni Tekiuaj itech iTekiuajyo Dios (Luc. 19:37-40). Sayoj ke Dios kikaua maj iuan titekitikan (1 Cor. 3:9, TNM). Tatitanil Pablo kijkuiloj: “Tejuan tisentekititinemij iuan Dios. Ika ya nojon tamechontatautiaj xikselijtiyakan in teiknelilis de Dios uan ma amo nenkajtitiu san namopan” (tejuan tiktalilijkej cursivas; 2 Cor. 6:1). Se ueyi tatiochiualis titekitiskej iuan Jiova. Maj tikitakan seki taman tein kinextia keyej semi techyolpaktia.

6. ¿Keniuj momachiliaya iKonetsin Dios keman iuan tekitia iPopaj?

⁶ Tiitekitikauan Dios nochipa techyolpaktiani iuan titekitiskej. Achto ke Jesús ualaskia nikan taltikpak, tekitik iixpan Jiova kemej se tekitikej akin kimatia tel kuali kichiuas itekiuj. Yejua kimatia ke Dios semi kitasojtaya uan kijtoj: “Niyolpakia niyetos iixpan nochipaya” (Prov. 8:22, 30). Tekitis iuan iPopaj semi kiyolpaktij porin kichiuak miak taman uan porin kimatia ke kitasojtaya. ¿Uan tejuan? ¿No uelis ijkon timomachiliskej?

7. ¿Keyej tanojnotsalis techualkuilia miak yolpakilis?

⁷ Jesús kijtoj ke semi tiyolpakij keman titemakaj teisa uan no keman tikseliaj teisa (Hech. 20:35). Keman techmachtijkej tein Biblia tamachtia, semi tiyolpakkej. Sayoj ke keman  no tikinmachtiaj oksekin, no semi tiyolpakij. ¿Keyej? Porin tikitaj ke yejuan semi yolpakij keman kiajsikamatij tein Biblia tamachtia uan peuaj kiixmatij Dios. Techyolpaktia tikitaskej keniuj kipataj miak taman tein achto kichiuayaj uan kemej tamatiaj. Tikmatij ke keman mochiuaj itasojikniuan Dios ueli kichiaj nemiskej nochipaya (2 Cor. 5:20). Tein melauj, tanojnotsalis yejua tekit tein okachi moneki mochiuas uan tein okachi uelis techyolpaktis.

8. ¿Keniuj momachiliaj seki tokniuan keman tekitij iuan Jiova?

⁸ Keman tikinpaleuiaj oksekin maj kiixmatikan Jiova, tikmatij ke tikyolpaktiaj uan ke kipatiuita nochi chikaujkayot tein tikchiuaj. Nejin no semi techyolpaktia (xikonixtajtolti 1 Corintios 15:58). Se tokniuj kayot Italia akin itokay Marco kijtoua: “Amo ueli nikmelaua ika notajtoluan keniuj niyolpaki nikmakas Jiova tein okachi kuali uan amo nikmakas aksa akin kielkauas tekit tein nikchiuas”. Okse tokniuj no ompa kayot akin itokay Franco kijtoua: “Mojmostaj, Jiova kikui Biblia, amaixmej uan nechikolmej uan ika techelnamiktia ke techteltasojta. Maski tikitaskej ke amo semi teyi tikchiuaj, yejuatsin semi kipatiuita chikaujkayot tein tikchiuaj. Yejua ika, nitekitis iuan Dios semi nechyolpaktia uan kichiua maj nikita ke amo nenkaj ninemi”.

9. 1) ¿Keniuj mouikayaj Jiova uan Jesús? 2) ¿Keyej tel kuali mouikayaj Jiova uan Jesús?

⁹ Keman titekitij iuan aksa akin tiktasojtaj, okachi kuali timouikaj iuan. Okachi kuali tikixmatij ikualneskayouan uan tein kinemilia. Tikmatij toni kiixtalijtok kichiuas satepan uan toni kichiujtok tein kipaleuis maj kichiua nejon. Jesús tekitik iuan Jiova xa tel miak millones xiujmej achto ke ualaskia nikan taltikpak. Yejuan semi motasojtakej uan amo teyi uelia kinxelouaya. Yejua ika tikajsikamatij keyej Jesús kijtoj:  “Nejuatsin uan Notajtsin Dios tipouij san sesan” (Juan 10:30). Tikyekmatij ke yejuan tel kuali mouikayaj porin yolpakiaj sentekitiskej uan mosenpaleuiskej.

10. ¿Keyej tanojnotsalis techpaleuia maj okachi kuali timouikakan iuan Jiova uan iniuan tokniuan?

¹⁰ Jesús kitajtanij Jiova maj kinmatampauiani imomachtijkauan. ¿Keyej? Jesús kiluij: “Nomomachtijkauan ma poutinemikan sanse ijkon keme Tejuatsin uan Nejuatsin tisenpoutinemij sanse” (Juan 17:11). Keman tiktakamatij tein Dios techiluia itech Biblia uan titanojnotsaj, okachi kuali tikajsikamatij ikualneskayouan Jiova. Tikitaj ke titakuaujtamatiskej iuan uan tikchiuaskej tein yejuatsin technauatia yejua tein okachi kuali tein uelis tikchiuaskej. Uan komo timochikauaj timochiuaskej tiitasojikniuan, yejuatsin motokia touan (xikonixtajtolti Santiago 4:8). Tanojnotsalis no tapaleuia maj okachi kuali timouikakan iniuan tokniuan, porin tikitaj keniuj mochikauaj kiyolpaktiskej Jiova. Uan no, tikitaj ke kipanouaj ouijkayomej tein tejuan tikpanouaj, kinyolpaktia tein tejuan techyolpaktia uan kiixtaliaj kichiuaskej tein tejuan no tikixtaliaj. Yejua ika tisentekitij, tisenyolpakij uan tisentaxikouaj. Se tokniuj siuat kayot Gran Bretaña itokay Octavia kijtoua: “Nitekitis iuan Jiova nechpaleuia maj kuali nimouika iuan uan no iniuan nokniuan”. ¿Keyej? Yejua kimelaua ke porin itasojikniuan no kiixtalijtokej kichiuaskej satepan tein yejua kiixtalijtok. ¿Melauj ke no ijkon timomachiliaj?

11. ¿Keyej itech yankuik taltikpak okachi kuali iniuan timouikaskej tokniuan uan iuan Jiova?

¹¹ Tein melauj, axkan semi tiktasojtaj Jiova uan tokniuan. Sayoj ke itech Xochital okachiok tikintasojtaskej. Xikonnemili nochi ueyi tekit tein tiksenchiuaskej satepan. Tikinseliskej akin moajokuiskej uan tikinpaleuiskej maj kiixmatikan Jiova. Tikchiuaskej nejin taltikpak maj mokepa se xochital. Semi techyolpaktis tisentekitiskej uan yolik timochiujtiyaskej tiyektikej keman taixyekantos Cristo. Ijkon kemej panos sejse tonal okachi kuali timouikaskej iniuan tokniuan uan iuan Jiova. Amo tiomeyolouaj ke yejuatsin techmakas nochi tein tiknekiskej (Sal. 145:16).

12. ¿Keyej techpaleuia tanojnotsalis?

¹² Moneki timoyekpiaskej porin tinemij itech tonalmej keman Satanás taixyekantok uan titajtakouanij. Komo amo ijkon tikchiuaj, uelis peuas titanemiliskej uan tikchiuaskej tein kichiuaj oksekin akin amo kitekitiliaj Jiova. Yejua ika moneki tikyekpiaskej tokuali uikalis iuan. Sayoj ke moneki tikchiuaskej se ueyi chikaujkayot. Kemej yeskia tiajkuitokej itech se ueyiat sayoj ke tikixnamiktokej. Komo amo tiknekij maj techuika ueyiat, moneki tiajkuiskej ika nochi tochikaualis. Tanojnotsalis techpaleuia maj tikyekpiakan tokuali uikalis iuan Jiova. ¿Keyej? Porin keman ika titajtouaj Dios uan Biblia, sayoj titanemiliaj itech tein okachi kuali uan tein okachi moneki. Amo titanemilijtokej itech tein  kijtakoua totakuaujtamatilis (Filip. 4:8). Tanojnotsalis kichikaua totakuaujtamatilis porin techelnamiktia tein Dios motenkaujtok uan itanauatiluan. Uan no, techpaleuia maj tiksentokakan tikpiakan kualneskayomej tein techpaleuia maj amo techijtako Satanás uan tein kiixyekantok (xikonixtajtolti Efesios 6:14-17).

13. ¿Keyej semi kipatiuita tanojnotsalis se tokniuj kayot Australia?

¹³ Titanojnotsaskej, timomachtiskej uan tikinpaleuiskej tokniuan no techpaleuia maj tikyekpiakan tokuali uikalis iuan Jiova porin amo timoteltekipachouaj ika kuejmolmej tein tikpiaj. Se tokniuj kayot Australia itokay Joel kijtoua keyej semi kipatiuita tanojnotsalis. Kijtoua ke kipaleuia maj amo kielkaua ke akin amo kiixmatij Dios kipiaj uejueyi kuejmolmej. Uan no, nochipa kielnamiktia keniuj kipaleuia tein tayolmajxitia Biblia. Uan kijtoua: “Tanojnotsalis nechpaleuia maj niyolyemanik uan maj nitakuaujtamati iuan Jiova uan iniuan nokniuan”.

14. ¿Keniuj tikmatij ke Dios techpaleuia ika iespíritu?

¹⁴ Tanojnotsalis no kinextia ke Jiova techpaleuia ika iespíritu. Maj tikitakan se neskayot tein techpaleuis maj tikajsikamatikan. Xikonnemili ke aksa mitsonnauatia xikonxejxelouili takual taltikpakneminij akin nemij kampa ika tejuatsin tionnemi. Sayoj ke amo mitsontaxtauiti, ta tejuatsin tikonixtauas nochi tein ika tikonuikas. Uan no, tikonmati ke taltikpakneminij amo kinekij xikonuikili nejon takual uan ke sekin hasta mitsontauelitaskej porin tikonuikilia. ¿Kanachi tonalmej tiontaxikoskia itech nejon tekit? Xa niman tionmosenkauaskia uan amo tikonuikaskiaok takual. No ijkon, tejuan tikinuikiliaj taltikpakneminij itanauatil Dios. Tikuij totiempo uan totomin, uan taltikpakneminij techkejkelouaj oso hasta techtauelitaj. Sayoj ke ijkon kemej panouaj xiujmej tiksentokaj titanojnotsaj. ¿Melauj ke nejin kinextia ke Jiova techpaleuia ika iespíritu?

15. ¿Keyej tanojnotsalis se tekit tein motelneki?

¹⁵ Tanojnotsalis se tekit tein motelneki, porin tapaleuia maj mochiua tein Dios kiixtalijtok maj kiselikan taltikpakneminij. Jiova kinekia maj nemikan nochipaya, uan nejon amo mopatak keman Adán tajtakoj (Is. 55:11). Jiova kiualtitanik iKonetsin maj toka kitemakaki inemilis uan ijkon techijkuanilis tajtakol uan mikilis. Sayoj ke komo tiknekij maj inemilis Jesús techpaleui uan tiknekij tinemiskej nochipaya, moneki tiktakamatiskej Dios. Jesús kinmachtij taltikpakneminij tein Dios kineki maj kichiuakan, uan kinnauatij imomachtijkauan maj no tamachtikan nejon. Yejua ika titanojnotsaj uan tikinpaleuiaj oksekin maj mochiuakan itasojikniuan Dios. Keman ijkon tikchiuaj, titekitij iuan Jiova uan titapaleuiaj maj taltikpakneminij momakixtikan uan maj amo kipiakanok tajtakol nion maj momikilikan.

16. ¿Toni tiknextiaj keman titanojnotsaj?

 ¹⁶ Keman se taixyekankej itech taneltokalis kitajtanij Jesús katiyejua itanauatil Dios okachi moneki, Jesús kinankilij: “‘Xiktasojta moueyitekotsin Totajtsin Dios ika nochi moyolo, uan ika nochi motanejnekilis, uan ika nochi motanemililisʼ. Yejua ya nijin in kachi ueyi tanauatil uan de kachi kuika ueyi chikaualis. Uan ika ome tanauatil moneuilia keme ne achtopa tanauatil uan no kijtoa ijkuin: ‘Xiktasojta moknitsin ijkon keme tejuatsin timotasojta’” (Mat. 22:37-39). Keman titanojnotsaj uan tikinmachtiaj taltikpakneminij keniuj uelis kiseliskej nemilis nochipaya, tiknextiaj ke tikintasojtaj taltikpakneminij uan Jiova, ijkon kemej kijtoua nejin tanauatil (xikonixtajtolti Hechos 10:42). Tikmatij ke Jiova “kimonekiltia ke nochi in taltikpakuani ma makisakan de nintajtakoluan para ma ijkon kajsikamatikij in melauak Tajtoltsin de Dios” (1 Tim. 2:4).

17. ¿Keniuj tikonita tejuatsin tatiochiualis tein tikonpia tiontekitis iuan Jiova?

¹⁷ Uelis timoteltasojkamatiskej porin tikpiaj tatiochiualis titekitiskej iuan Jiova. Iuan titekitiskej techualkuilia miak yolpakilis, techpaleuia maj okachi kuali iuan timouikakan uan iniuan tokniuan, uan no techpaleuia maj tikyekpiakan tokuali uikalis iuan. Uan no, ijkon tiknextiaj ke tikintasojtaj Jiova uan tokniuan. Semanauak taltikpak timoajsij millones tiitekitikauan Dios, uan tinochin tataman tein tikpanouaj. Sayoj ke tinochin tikchiuaj nochi tein tiuelij itech tanojnotsalis, yeski titelpochmejok oso tixiuejkejya, tikpiaskej miak taman oso tikpanotoskej tatasojtilis, tichikaujkej oso amo semi tichikaujkej. Timomachiliaj kemej se tokniuj siuat kayot Francia, akin kijtoj: “Akin okachi tayekantok itech nochi tein onkak, akin kichijchiuak nochi tein tikitaj, Dios akin yolpaki, nechiluia: ‘Xiyouj uan xitajto. Xinechteixmatilti. Xikijto tein tikpia itech moyolo. Nejua nimitsmakas chikaualis, noTajtol, ininnepaleuil ángeles uan akin iuan titanojnotsas. Nimitsnextilis keniuj tikchiuas uan nimitsiluis tein tikchiuas keman monekis. Jiova techkaua maj tikchiuakan itanejnekilis uan maj iuan titekitikan. ¡Se ueyi tatiochiualis!”.