1, 2. 1) ¿Keniuj sekin kiitaj maj toselti tiuelikan titaixpejpenakan? 2) ¿Toni tamachtia Biblia? 3) ¿Toni netajtanilmej tiknankiliskej?

SE SIUAT akin monekia kiixpejpenas se taman kiluij se itasojikniuj: “Amo xikchiua maj nitanemili, sayoj xinechilui toni nikchiuas. Okachi amo ouij”. Nejin siuat kinekia maj okachi kuali kiluianij toni monekia kichiuas uan amo kikuis se kualtsin netetayokolil tein Dios techmakatok: se iselti se taixpejpenas. ¿Uan tejuan? ¿Tikuelitaj toselti titaixpejpenaskej, oso tiknekij maj okachi kuali oksekin toka taixpejpenakan? ¿Tikpatiuitaj maj toselti tiuelikan titaixpejpenakan?

² Taltikpakneminij tataman kemej kiitaj maj toselti tiuelikan titaixpejpenakan. Sekin kijtouaj ke nejon amo ueli tikchiuaj porin Dios kiixtalijya tein tikchiuaskej. Oksekin kijtouaj ke ueli yekmelauj toselti titaixpejpenaj komo ueli tikchiuaj nochi tein tiknekij. Sayoj ke Biblia tamachtia ke Jiova techchijchiuak kemej uelis toselti titaixpejpenaskej ika tamatilis (xikonixtajtolti Josué 24:15). Uan no, Biblia kinankilia nejin netajtanilmej: ¿Ixyetok hasta kani  uelis toselti titaixpejpenaskej? ¿Keniuj moneki tiktekitiltiskej nejin netetayokolil? ¿Keniuj tiknextiaj ika tein tikixpejpenaj ke yekmelauj tiktasojtaj Jiova? ¿Keniuj tiknextiaj ke tikpoujkaitaj tein oksekin kiixpejpenaj?

3. ¿Keniuj taixpejpena Jiova?

³ Sayoj Jiova ueli kichiua nochi tein kineki, sayoj ke uelis techmachtis miak taman kemej taixpejpena. Kemej neskayot, yejuatsin kiixpejpenak xolal Israel maj yeskia iaxka (Deut. 7:6-8). Kiixpejpenak porin kinekia kichiuas tein motenkaujka iuan itasojikniuj, Abrahán (Gén. 22:15-18). Uan no, nochipa taixpejpena ika netasojtalis uan ika melaujkayot. Ijkon kinextij keman kinmelauak israelitas akin amo kitakamatiaj. Keman yejuan yekmelauj moyolnonotsayaj, Jiova kinnextiliaya netasojtalis uan teiknelilis. Yejuatsin kijtoj: “Nikpajtis inintakajkayaualis. Nikintasojtas ijkon kemej nikixpejpenak” (Os. 14:4). Kemej tikitaj, Jiova taixpejpena kemej uelis kinpaleuis oksekin. ¡Tel kuali neskayot techkauilia!

4, 5. 1) ¿Akoni yekinika kiselij netetayokolil maj ueli iselti taixpejpena, uan keniuj taixpejpenak? 2) ¿Toni moneki timotajtaniskej tinochin?

⁴ Jiova kiixpejpenak kinchijchiuas ángeles uan taltikpakneminij kemej uelis ininselti taixpejpenaskej. Yekinika kichijchiuak Jesús uan kichijchiuak kemej yejuatsin tamati. Jesús yejua akin yekinika kiselij netetayokolil maj ueli iselti taixpejpena (Col. 1:15). ¿Keniuj taixpejpenak Jesús? Achto ke ualaskia nikan taltikpak, kiixpejpenak amo kikauas Dios uan amo kipaleuis Satanás keman taixnamikik. Uan keman nemik nikan taltikpak, kiixpejpenak kiixtopeuas tein Satanás ika kiyejyekoj (Mat. 4:10). Uan no, youak achto ke momikiliskia kitataujtij iTajtsin uan kiyekiluij ke kinekia kichiuas tein yejuatsin kinekia. Yejua kiluij: “Notajtsin, takan tikonmonekiltia, xinechajchiuilis nijin tajyouilis ten nikijyouiti ya. Pero ma amo mochiua keme nejua nikneki. Ta, ma mochiua keme Tejuatsin tikonmonekiltia” (Luc. 22:42). ¿Uelis tikchiuaskej kemej Jesús uan titaixpejpenaskej kemej tikueyitaliskej Jiova uan tikchiuaskej itanejnekilis?

⁵ Kemaj, uelis tikchiuaskej kemej Jesús porin tejuan no tichijchiujtokej kemej tamati Dios (Gén. 1:26). Sayoj ke tejuan amo ueli tikchiuaj nochi tein tiknekij ijkon kemej Jiova. Biblia kimelaua ke yejuatsin kiixtaliani hasta kani uelis toselti titaixpejpenaskej uan kichia maj tikpoujkaitakan nejon. Kemej neskayot, siuamej moneki kipoujkaitaskej tanauatil tein kipia ininnamik, uan konemej moneki kintakamatiskej inintatuan (Efes. 5:22; 6:1). Yejua ika tinochin moneki timotajtaniskej: “¿Nikpoujkaita tein Dios kiixtalij hasta kani uelis toselti titaixpejpenaskej?”. Kemej tiknankiliskej nejin netajtanil kinextis ox uelis tinemiskej nochipaya.

6. Xikonmelaua ika se neskayot keyej motelneki maj ixyeto hasta kani uelis toselti titaixpejpenaskej.

⁶ Kemej ixyetok hasta kani uelis toselti titaixpejpenaskej, ¿uelis tikijtoskej ke yekmelauj toselti tiuelij titaixpejpenaj?  Kemaj. ¿Keyej? Porin keman ixyetok hasta kani uelis tikchiuaskej teisa techmatampauia. Maj tikitakan nejin neskayot. Maj tiknemilikan ke tikixtaliaj tiyaskej itech tocarro itech se xolal tein tel uejka moajsi, sayoj ke amo ixyetok keniuj moneki se kinejnemiltis carros itech ojti. Taltikpakneminij youij kampa ika kinekij uan kitsikuinaltiaj inincarro kemej kinekij. ¿Tiyolseujtiyaskiaj? Amo. Ika nejin neskayot moita ke moneki ixyetos hasta kani uelis tikchiuaskej teisa, porin nejon techpaleuis maj tiyolpakikan ika tein tikixpejpenaskej. Maj tikitakan seki neskayomej itech Biblia tein kinextiaj ke techpaleuia keman Jiova kiixtalia hasta kani uelis toselti titaixpejpenaskej.

7. 1) Xikonijto keyej Adán amo chijchiujtoya kemej tapialmej. 2) ¿Keniuj kuali taixpejpenak Adán?

⁷ Yekinika taltikpaknenkej akin Jiova kichijchiuak yejua Adán. Yejuatsin kimakak netetayokolil maj iselti ueli taixpejpena, ijkon kemej kinmakaka ángeles. Sayoj ke tapialmej amo kinmakak nejin netetayokolil. ¿Keniuj kuali taixpejpenak Adán? Jiova kinauatij maj kintalili inintokay tapialmej uan yejua kichiuak nejon tekit. Biblia kijtoua ke Dios kiuikilij tapialmej uan ijkon yejua ueliskia kinitas uan kintalilis se tokayit tein kinnamikiskia. Jiova amo kipatak nion se tokayit, ta kipoujkaitak tein Adán kiixpejpenak (Gén. 2:19).

8. ¿Keniuj Adán amo kuali taixpejpenak, uan toni kiualkuik nejon?

⁸ Jiova kinauatij Adán maj kichiuani maj nochi taltikpak mochiuani se xochital. Dios kiluij: “Xikinpiakan konemej uan ximomiakilikan, ximomoyauakan noyampa taltikpak uan xikixyekanakan, uan xikinixyekanakan amichimej tein moajsij itech ueyiat uan tapialmej tein patanij iluikak uan nochi tein yoltok tein moolinia itech taltikpak” (Gén. 1:28). Sayoj ke Adán kiixpejpenak amo kipoujkaitas tein Jiova kiixtalijka ke amo ueliskia kichiuas. Yejua ika kikuaj takilot tein kinauatijka maj amo kikua. Kemej Adán amo kuali taixpejpenak, taltikpakneminij tajyouianij tel miak xiujmejya (Rom. 5:12). Maj nochipa tikelnamikikan tein tel amo kuali tein kiualkuik tein kiixpejpenak Adán. Nejon techpaleuis maj kuali titaixpejpenakan uan maj tikpoujkaitakan tein Jiova kiixtalij ke amo uelis tikchiuaskej.

9. ¿Toni kinkauak Jiova maj kichiuanij israelitas, uan toni motenkaujkej yejuan?

⁹ Adán uan Eva tinochin techpanoltilijkej tajtakol uan mikilis. Sayoj ke ueliok toselti titaixpejpenaj. Nejin tikitaj ika tein Jiova kichiuak iuan xolal Israel. Yejuatsin kinkauak israelitas maj kiixpejpenanij ox kinekiaj yeskij iaxkauan oso amo (Éx. 19:3-6). Yejuan kinekkej yeskij ixolal uan kipoujkaitaskej tein yejuatsin kiniluij ke amo ueliskia kichiuaskej. Israelitas motenkaujkej: “Nochi tein Jiova kijtoj, ika miak pakilis tikchiuaskej” (Éx. 19:8). Sayoj ke satepan amo kichiujkej kemej motenkaujkaj. Nejon techmachtia se taman tein motelneki. Moneki nochipa tikpatiuitaskej maj toselti tiuelikan titaixpejpenakan, kuali timouikaskej iuan Jiova uan tiktakamatiskej itanauatiluan (1 Cor. 10:11).

10. ¿Toni neskayomej kinextiaj ke taltikpakneminij tajtakouanij uelis kiueyitaliskej Jiova ika tein kiixpejpenaskej? (Xikonita taixkopin ipeujyan tamachtilis.)

 ¹⁰ Hebreos capítulo 11 ininka tajtoua 16 takamej uan siuamej akin kiixpejpenkej kipoujkaitaskej hasta kampa Jiova kinkauaya maj ininselti taixpejpenanij. Kemej kuali taixpejpenkej, kiselijkej miak tatiochiualismej uan kichiayaj kiseliskej se kualtsin netetayokolil satepan. Kemej neskayot, Noé kipiak chikauak takuaujtamatilis uan kiixpejpenak kitakamatis Dios keman kinauatij maj kichijchiua se arca uan ijkon kinmakixtis ichankauan uan akin nemiskiaj satepan (Heb. 11:7). Abrahán uan Sara kitakamatkej Dios ika yolpakilis uan yajkej itech tal tein yejuatsin motenkaujka kinmakas. Maski ueliskiajok “mokuepaske ne inchankopaka” itech xolal Ur, okachi itech tanemilijkej tein Dios motenkaujka kinmakas. Biblia kijtoua ke yejuan “kiyolnejnektinemiaj kalyetinemiske kampa se kachi kuali mouiskapueblo” (Heb. 11:8, 9, 13, 15, 16). Moisés kiixtopeuak nochi tein kipiaya ipatiuj ompa Egipto uan “kachi kiyolnejnekik ma no tajyouijtinemi ijkon keme tajyouitinemij ipueblojkauan de Dios. Uan Moisés amo no kiyolnejnekik mopakiltijtinemis tech in tajtakolnemilis ten uejkauas sayo para seki tonalme san” (Heb. 11:24-26). Maj titakuaujtamatikan kemej nejin itekitikauan Dios uan maj tiknextikan ke tikpatiuitaj maj toselti tiuelikan titaixpejpenakan keman tikchiuaskej itanejnekilis Dios.

11. 1) ¿Toni uelis tikchiuaskej tein kitelpia ipatiuj komo kuali titaixpejpenaj? 2) ¿Toni mitsonolinia kuali xiontaixpejpena?

¹¹ Xa tikitaskej ke okachi amo ouij tikauaskej maj okse taltikpaknenkej toka taixpejpena. Sayoj ke komo ijkon tikchiuaj, amo tikpiaskej se tatiochiualis tein kitelpia ipatiuj. ¿Toni nejon? Biblia kimelaua itech Deuteronomio 30:19, 20 (xikonixtajtolti). Itech versículo 19 moijtoua ke Dios kiniluij israelitas toni ueliskia kiixpejpenaskej. Uan versículo 20 kijtoua ke ika tein kiixpejpenaskiaj ueliskiaj kinextiliskej Jiova ke yekmelauj kiteltasojtayaj. Tejuan no ueli tikixpejpenaj ox tiknekij tikueyichiuaskej Jiova. Komo tikixtaliaj nejon, uelis tikueyitaliskej Jiova uan tiknextiliskej ke tikteltasojtaj ika netetayokolil tein techmakak.

12. ¿Toni amo keman tiknekij tikchiuaskej ika netetayokolil tein Jiova techmakak?

¹² Maj tiknemilikan ke tiktayokoliaj se totasojikniuj se taman tein kitelpia ipatiuj. ¿Keniuj timomachiliskiaj komo kitamotaskia itech tajsol oso hasta ika kinijtakoskia oksekin? ¿Melauj ke techyolkokoskia? Kemej Jiova techkaua maj toselti titaixpejpenakan, tikmatij ke kiyolkokoua kiitas ke sekin amo kuali taixpejpenaj oso kiixpejpenaj kinijtakoskej oksekin. Biblia kijtoua ke itech itamian tonalmej taltikpakneminij amo motasojkamatiskiaj (2 Tim. 3:1, 2). Sayoj ke tejuan amo tiknekij ijkon titaixpejpenaskej nion tiknextiskej ke amo timotasojkamatij. Komo ijkon, ¿keniuj uelis  tiknextiskej ke tiktasojkamatij maj Jiova techkaua maj toselti tiuelikan titaixpejpenakan? ¿Uan keniuj uelis kuali tiktekitiltiskej nejin netetayokolil?

13. ¿Keniuj uelis kuali titaixpejpenaskej?

¹³ Tinochin ueli tikixpejpenaj akonimej iniuan timouikaskej, keniuj timotilmajtiskej uan timochijchiuaskej, uan keniuj timoixpetaniskej. Sayoj ke moneki timoyekpiaskej uan amo tiknemiliskej ke kemej toselti tiuelij titaixpejpenaj uelis tikchiuaskej tein amo kiyolpaktia Dios oso tikchiuaskej tein kichiuaj akin amo kitekitiliaj (xikonixtajtolti 1 Pedro 2:16). Maj amo tikixpejpenakan tikchiuaskej tein amo kuali, ta moneki tikixpejpenaskej tein techpaleuis maj tiktakamatikan nejin tayolmajxitilis: “Xikchiutiyakan sayo para ma xikueyikualnextikan Totajtsin Dios” (1 Cor. 10:31; Gál. 5:13).

14. ¿Keyej moneki titakuaujtamatiskej iuan Jiova keman titaixpejpenaj?

¹⁴ Jiova techiluia: “Nejua, Jiova, nimoDios, Akin mitsmachtia tein tejua mitspaleuis, Akin mitsixyekana itech ojti kampa moneki tinejnemis” (Is. 48:17). Komo titakuaujtamatij iuan Jiova, tikpoujkaitaskej tein yejuatsin kiixtalijtok ke amo uelis tikchiuaskej uan kuali titaixpejpenaskej. Ika yolyemanilis tikijtoskej ke taltikpaknenkej “amo iaxka iojtokalis. Amo iaxka taltikpaknenkej akin nejnentok nion kiyekanas itaksalis” (Jer. 10:23). Adán uan israelitas akin amo tatakamatkej amo kinekkej kipoujkaitaskej tein Jiova  kiniluijka ke amo ueliskia kichiuaskej, ta kiixpejpenkej takuaujtamatiskej itech ‘inintaajsikamatilis’. Maj amo tikchiuakan kemej yejuan. Maj titakuaujtamatikan iuan Jiova ika nochi toyolo uan amo totech (Prov. 3:5).

15. ¿Toni techmachtia Romanos 14:12?

¹⁵ Oksekin no ueli ininselti taixpejpenaj uan moneki tikpoujkaitaskej nejon. ¿Keyej? Porin tinochin techmakakej nejon netetayokolil. Yejua ika, moajsikamati maj okseki tokniuan amo taixpejpenakan kemej tejuan. Nejin uelis panos hasta itech seki taman tein mouika ika totaueyichiualis uan kemej timonejnemiltiaj. Maj tikelnamikikan tein tayolmajxitia Romanos 14:12 (xikonixtajtolti). Nejin tajkuilol techmachtia ke tisejsemej akin tikchiuaj kemej Cristo titanankiliskej ika tein tikchiuaskej. Komo tikajsikamatij nejin, tikpoujkaitaskej tein oksekin kiixpejpenaskej.

16, 17. 1) ¿Keyej mochiuak se kuejmol iniuan tokniuan akin nemiaj Corinto? 2) ¿Keniuj kinpaleuij Pablo? 3) ¿Toni techmachtia nejon?

¹⁶ Maj tikitakan se neskayot itech Biblia tein kinextia keyej moneki tikpoujkaitaskej tein tokniuan kiixpejpenaj. Tokniuan akin nemiaj Corinto amo motenkauayaj ox ueliskiaj kikuaskej nakat tein monamakaya satepan ke kinmaktiliayaj tiotsitsin. Sekin kikuayaj nejon nakat uan amo kinkuejmolouaya inintanemilil, porin kimatiaj ke tiotsitsin amo yoltokej. Sayoj ke akin kinueyichiuayaj tiotsitsin achto ke mochiuaskiaj itatojtokakauan Cristo kinemiliayaj ke komo kikuayaj nejon nakat kemej yeskia kinueyichiujtoyaj tiotsitsin (1 Cor. 8:4, 7). Nejin mochiuak se ueyi kuejmol uan hasta ueliskia kichiuas maj tokniuan moxexelouanij. ¿Toni kichiuak Pablo tein ika kinpaleuij maj kiyektalianij nejin kuejmol?

¹⁷ Yekinika, Pablo kinelnamiktij ke takual amo kichiuaya maj okachi kuali mouikanij iuan Dios (1 Cor. 8:8). Ompa, kinnejmachtij ke maski yejuan ininselti ueliaj taixpejpenayaj, monekia kiyekitaskej maj amo kichiuanij tein kikuejmoloskia inintanemilil akin amo yekyolmajsitoyaj (1 Cor. 8:9). Satepan kiniluij akin amo yekyolmajsitoyaj maj amo kinijijtouanij akin kiixpejpenayaj kikuaskej nejon nakat (1 Cor. 10:25, 29, 30). Kemej tikitaj, nejin katka se taman tein motelnekia tein mouikaya ika inintaueyichiualis, uan sejse tokniuj monekia kiixpejpenas toni kichiuaskia. ¿Amo moneki maj tejuan no tikpoujkaitakan tein tokniuan kiixpejpenaj hasta itech seki taman tein amo motelneki? (1 Cor. 10:32, 33.)

18. ¿Keniuj tiknextiskej ke tikpatiuitaj netetayokolil maj toselti tiuelikan titaixpejpenakan?

¹⁸ Maj toselti tiuelikan titaixpejpenakan se netetayokolil tein Jiova techmaka uan techpaleuia maj yekmelauj tiyolpakikan (2 Cor. 3:17). Tikpatiuitaj nejin netetayokolil porin techkaua maj tiknextikan ika tein tikixpejpenaj ox tiktasojtaj Jiova. Maj tikixpejpenakan tein kiueyitalis uan maj tikpoujkaitakan tein oksekin kiixpejpenaskej. Ijkon tiknextiskej ke tikpatiuitaj tel kualtsin netetayokolil tein Jiova techmaka.