SYLVIANA, se precursora akin kipia 27 xiujmej, kijtoua: “Keman notasojikniuan kijtouayaj ke semi kinyolpaktiaya tapaleuijtoskej kampa monekij okachi precursores niktelnekia no ijkon nimomachilis. Sayoj ke nikitaya ke amo niueliskia”.

¿Kemansa tionmomachiliani kemej Sylviana? ¿Tikonuelitaskia tiontapaleuitiuj kampa monekij okachi tanojnotsanij, sayoj ke tionmotajtania ox se tonal tionuelis? Komo ijkon, ¡amo xionmosenkaua! Jiova kinpaleuiani tel miakej tokniuan maj amo teyi kintsakuiliok maj okachi tanojnotsakan. ¿Keniuj? Maj tikitakan tein panoua itech ueyi altepet Madagascar, naujpatika tal tein okachi ueyi tein moajsi tatajko ueyiat.

Itech majtakti xiujmej tein panouanij, panoua 70 precursores uan tanojnotsanij akin kayomej itech 11 uejueyi altepemej * mokaltalianij itech nejin ueyi altepet tein poui África, kampa tel miakej kipoujkaitaj Biblia. Uan no, miakej tanojnotsanij kayomej Madagascar mokaltalianij kampa moneki maj okachi motapaleui maj motanojnotsa itech nejin ueyi altepet. ¿Tikonuelitaskia tikonixmatis sekin?

Louis uan Perrine, seki namikuanij kayomej Francia akin kipiaj panoua treinta xiujmej, mokaltalitoj Madagascar. Miak xiujmej kinemilijtoyaj tanojnotsatiuij okse ueyi altepet, sayoj ke Perrine omeyolouaya. Yejua kijtoua: “Nikmouiliaya tein amo nikixmatia. Nechtekipachouaya nikinkauas nochankauan, nechikol, tochan, toxolal uan tein mojmostaj tikchiuayaj. Tein melauj, tein okachi monekia nikixnamikis yejua tein nikmouiliaya”. Sayoj ke itech xiuit 2012, Perrine moyolchikauak, yejua ika Louis uan yejua mokalpatakej. ¿Keniuj momachilia axkan? Yejua kijtoua: “Keman itech nitanemilia tein tikpanouanij, ueli nikijtoua ke notakuaujtamatilis mochikauani keman nikitani keniuj Jiova techpaleuia”. Uan Louis kijtoua: “¡Xionmonemili! Majtakti akin tikinmachtiayaj ika Biblia ualajkej keman yekinika tikelnamikkej imikilis Cristo satepan ke tiejkokej Madagascar”.

 ¿Toni kinpaleuij maj moyolchikauanij mokauaskej kampa tapaleuijtoyaj keman kipanokej ouijkayomej? Kitajtanijkej Jiova maj kinpaleuiani maj taxikouanij. Louis kijtoua: “Tikajsikamatkej ke Jiova technankiliaya tonetataujtiluan uan ke techmakaya iyolseuilis. Ijkon, uelik okachi itech titanemilijkej nochi tein kuali tein tikpanouayaj itech totanojnotsalis. Uan no, totasojikniuan ompa Francia techtitanilijkej correos electrónicos uan amamej kampa techyolchikauayaj maj amo timosenkauanij” (Filip. 4:6, 7; 2 Cor. 4:7).

Jiova kintatiochiuij Louis uan Perrine porin taxikojkej. Louis kijtoua: “Itech metsti octubre xiuit 2014 tikselitoj Tamachtilis ika Biblia tein kiseliaj Tokniuan Namikuanij ompa Francia. * Tikseliskej nejon tamachtilis se inetetayokolil Jiova tein amo keman tikelkauaskej”. Nejin namikuanij semi yolpakkej porin keman tamik tamachtilis kintitankej maj oksepa tapaleuitij Madagascar.

Didier uan Nadine, seki namikuanij kayomej Francia, kipiayaj panoua 50 xiujmej keman mokaltalitoj Madagascar itech xiuit 2010. Didier kijtoua: “Keman tikatkaj titelpochmejok tikatkaj tiprecursores, uan satepan tikiniskaltijkej eyi tokoneuan. Keman moskaltijkej, tiknemilijkej ox ueliskia titapaleuitiuij itech okse ueyi altepet”. Nadine kijtoua: “Nimotsakuiliaya porin niknemiliaya ke tel uejka niyetoskia kampa moajsiaj nokoneuan, sayoj ke yejuan techiluijkej: ‘Komo nanyouij nantanojnotsatij okse ueyi altepet, ¡semi nantechyolpaktiskej!’. Inintajtoluan techyolchikaujkej maj tiyanij. Maski tel uejka tinemij, ueli miakpa iniuan titajtouaj, uan nejon techyolpaktia”.

Didier uan Nadine ouij kinkisak momachtiskej tajtol malgache. Nadine ixuetska keman kijtoua: “Amo tikpiajok 20 xiujmej”. ¿Toni kinpaleuij maj uelinij tajtol? Yekinika, yajkej itech se nechikol itech tajtol francés. Satepan, keman kiitakej ke ueliskiajya, mopatakej itech se nechikol itech tajtol malgache. Nadine kijtoua: “Itech tanojnotsalis tikinajsij miakej akin kiteluelitaj momachtiskej Biblia uan techtasojkamatiliaj porin tikinkalpanouaj. Yekinika niknemiliaya ke nitakochitstoya. Semi nechyolpaktia niyeski niprecursora itech nejin altepet. Keman nimeua kualkampa, niknemilia: ‘¡Tel kuali, axkan nitanojnotsati!’”.

Didier nochipa uetska ijkuak kielnamiki keman peuak momachtia tajtol malgache. Yejua kijtoua: “Se tonal nikixyekantoya se nechikol uan amo nikajsikamatia inintanankililuan tokniuan. Sayoj uelia nikintasojkamatiliaya. Ompa, satepan ke se tokniuj siuat tanankilij uan niktasojkamatilij, akin tokotsyetoyaj iikampa peuak kemej yeskia nechiluisnekiaj teisa. Kinekiaj nechmatiltiskej ke nejon amo yejua katka tanankilil. Niman nikauak maj okse tokniuj takat tanankiliani uan yejua kuali tanankilij. Kemaj, yejua nejon nikchia”.

Itech se ueyi nechikol tein mochiuak itech xiuit 2005, Thierry uan inamik, Nadia, kiitakej tamouisol Maj timochikauakan tikajsiskej okseki tekimej tein ika tikueyichiuaskej Dios, kampa moneskayotij tein kipanok Timoteo. Nejin ajsik itech ininyolo uan okachi kinekkej tapaleuitiuij kampa monekiaj okachi tanojnotsanij. Thierry kijtoua: “Keman tamik tamouisol uan timomataxkalojtoyaj, nikiluij nonamik: ‘¿Kani tiyaskej tejuan?’. Uan yejua nechnankilij ke no yejua nejon kinemilijtoya”. Tepitsin satepan peuak kichiuaj tein kinpaleuiskia maj kichiuanij tein kiixtalijtoyaj. Nadia kijtoua: “Yolik tikaujtiyajkej miak taman tein tikpiayaj. ¡Satepan, nochi akia itech naui maletas!”.

Ajsikej Madagascar itech xiuit 2006 uan niman kinyolpaktij tanojnotsalis. Nadia kijtoua: “Kemej technankiliaj taltikpakneminij keman tikinnojnotsaj semi techyolpaktia”.

Sayoj ke, chikuasen metsti satepan, nejin namikuanij kipanokej se ueyi ouijkayot. Imomaj Nadia, Marie-Madeleine, akin nemia Francia, uetsik, mokuatamotak uan momanekuiloj. Satepan ke iuan tajtojkej itapajtijkauj, Thierry uan Nadia kitajtanijkej Marie-Madeleine ox kinekia iniuan nemitiuj Madagascar. Maski kipiaya 80 xiujmejya, ika miak pakilis yajki iniuan. ¿Keniuj kiita nemis itech okse ueyi altepet? Yejua kijtoua: “Kemansa nechouijmaka nimomatis, sayoj ke, maski amo ueli nikchiua seki taman, nikmachilia ke semi nitapaleuia itech nechikol. Uan tein okachi nechyolpaktia yejua ke nosiuapil uan inamik ueli kisentokaj tanojnotsaj kampa taltikpakneminij semi tekakij”.

Riana, se tokniuj telpoch akin kipia 22 xiujmej, moskaltij itech altepet Alaotra Mangoro, itonalkisayampa Madagascar. Kemej katka se tel kuali momachtijkej, kinekia kiselis se ueyi nemachtil. Sayoj ke, satepan ke momachtij Biblia, kipatak tein kinemiliaya. Yejua kiixtalij achto motamimachtis itech se tamachtiloyan uan motenkauak iuan Jiova ke komo kipanoltiaya examen tein ika tami, mochiuaskia precursor. Satepan ke kisak kaltamachtiloyan, kichiuak tein motenkaujka. Yajki kampa nemia se precursor, kitemoj se tekit kampa tekitiskia sayoj seki tonalmej uan mochiuak precursor. Riana kijtoua: “Yejua tein okachi kuali tein nikixtaliani”.

Sayoj ke, ichankauan amo kiajsikamatiaj keyej kiixtalijka amo momachtisok. Yejua kijtoua: “Nopopaj, notío uan itía nopopaj kinekiaj maj niyani universidad. Sayoj ke amo nikauaskia tekit kemej precursor ika okse taman”. Tepitsin satepan, Riana kinekik mokalpatas kampa monekiaj okachi tanojnotsanij. ¿Keyej? Yejua kijtoua: “Seki tachtekinij kalakkej nochan uan kiuikakej miak taman. Nejon kichiuak maj niknemiliani tein Jesús tayolmajxitij keman kijtoj maj se kisentili ‘ricojyot ne iluikak’. Yejua ika nikixtalij nimochikauas okachi niksentilis netetayokolilmej tein techmaka Dios” (Mat. 6:19, 20). Riana mokalpatak kampa ika sur ompa Madagascar, kampa tauaktok kampa nemij akin moixmatij kemej antandroy. Nejon xolal moajsi 1,300 kilómetros uejka kampa nemia. ¿Keyej tel uejka yajki?

Se metsti achto ke kitachtekiskiaj, Riana peujka kinmachtia ika Biblia ome takamej antandroy. Momachtij kijtos seki taman itech inintajtol uan inintech tanemilij nochin akin tajtouaj nejon tajtol uan ayamo kinmatiltiayaj tein kichiuas iTekiuajyo Dios. Yejua kijtoua: “Niktajtanij Jiova maj nechpaleuiani maj niyani kampa motajtoua tajtol tandroy”.

Niman keman mokalpatak, amo kiajsia tekit. Se takat kiluij: “¿Keyej tiualaj? Akin nikan nemij kitemotij tekit kampa tiualeuak”. Ome semana satepan, Riana yajki ueyi nechikol tein uejkaua eyi tonal. Kemej amo semi kipiayaok tomin, motajtaniaya toni kichiuaskia. Tonal domingo, se tokniuj takat kitalij se taman itech isaco. Katka tomin tein kiajsiskia maj mokepa kampa nemij antandroy uan tein ika ueliskia peuas kinamakas yogur. Yejua kijtoua: “Nikmachilij ke Jiova nechmapaleuij keman monekia. Axkan ueliskia niksentokas nikinpaleuis nochin nejon taltikpakneminij akin  ayamo kiixmatiaj yejuatsin”. No onkaya miak tekit itech nechikol. Yejua no kijtoua: “Nechixtaliayaj maj niktemaka se tanojnots ojome semanas. Jiova nechmachtijtoya ika inechikol”. Axkan, Riana kisentoka kinmachtia tein kichiuas iTekiuajyo Dios akin tajtouaj tandroy uan kinekij kiixmatiskej Jiova.

Jiova motenkaua kintatiochiuis akin mochikauaj kitekitiliskej (Is. 65:16). Keman timochikauaj maj amo teyi techtsakuili maj okachi titanojnotsakan, tikseliaj tatiochiualismej. Kemej neskayot, Sylviana, kayot Madagascar akin ika titajtojkej yekinika, kiitaya ke amo ueliskia tapaleuitiuj kampa monekij okachi tanojnotsanij. ¿Keyej ijkon momachiliaya? Yejua kijtoua: “Kemej noopochmets chiknaui centímetro okachi tokotstik ke noyekmets, nikoxojtaktsa uan niman nisioui”.

Maski ijkon, itech xiuit 2014 Sylviana yajki iuan Sylvie Ann, okse ichpoch precursora itech inechikol, itech se xolalkonet tein moajsi 85 kilómetros uejka kampa nemi. Maski kitsakuiliaya seki taman, Sylviana uelik kichiuak tein kiixtalijtoya. Uan no, kiselij se kualtsin tatiochiualis. Yejua kijtoua: “Se xiuit satepan ke nimokalpatak, Doratine, se temomaj akin nikmachtij ika Biblia, moauij itech ueyi nechikol tein uejkaua se tonal”.

Tein techtapouiaj nejin tokniuan techmachtia ke komo timochikauaj maj amo teyi techtsakuili maj okachi titanojnotsakan, tikitaskej ke melauak nejin tein Jiova techiluia: “Nejua nimitschikauas, kemaj, nejua nimitspaleuis” (Is. 41:10). Nejin kichikauas tokuali uikalis iuan. Uan no, komo ika pakilis timotemakaj titapaleuiskej itech toaltepeuj oso itech okse ueyi altepet, techpaleuis keman tikchiuaskej tekimej tein monekis itech yankuik taltikpak. Didier, akin achto ika titajtojkej, kijtoua: “Se tapaleuis kampa monekij okachi tanojnotsanij tepaleuia maj se kichiua tein moneki tein tepaleuis satepan”. Tikchiaj maj amo uejkaua okachi tokniuan ika pakilis motemakakan kiseliskej nejin tein kinpaleuis.