1. ¿Keyej tikijtouaj ke axkan mochiujtok seki taman tein motelneki?

AXKAN mochiujtok seki taman tein motelneki. Ijkon kemej moijtojka itech Biblia, Jiova kinsentilijtok tel miakej akin ualeuaj noyampa taltikpak. Yejuan tamatij kemej “se altepet tel chikauak” kampa pouij panoua chikueyi millones akin yolpakij uan “kitekitilijtokke Totajtsin Dios youalitonal” (Is. 60:22; Apoc. 7:9, 15). Amo keman moajsinij tel miakej akin kitasojtaj Dios uan oksekin.

2. ¿Toni taman netasojtalis kinextiaj akin amo itasojikniuan Dios? (Xikonita taixkopin ipeujyan tamachtilis.)

² Sayoj ke itech Biblia no moijtoj ke itech totonaluan, akin amo itasojikniuan Dios kinextiskiaj se amo kuali netasojtalis, se tein kichiua maj kitayekanaltikan inintanejnekilis. Tatitanil Pablo kijkuiloj ke itech itamian tonalmej, miakej motasojtatinemiskiaj sayoj yejuan, yeskiaj xijxikuimej ika tomin uan sayoj kitemoskiaj moyolpaktiskej uan amo kitemoskiaj keniuj kiyolpaktiskej Dios (2 Tim. 3:1-4). Nejin netasojtalis semi taman ke netasojtalis tein se kipialia Dios. Amo kichiua maj taltikpakneminij yolpakikan kemej kinekiskiaj, ta maj sayoj inintech tanemilikan uan kinualkuilia ouijkayomej nochin taltikpakneminij.

3. ¿Toni tikitaskej itech nejin tamachtilis, uan keyej?

 ³ Pablo kimatia ke tel miakej kinextiskiaj netasojtalis tein kichiua maj se kitayekanalti se itanejnekilis uan ke ueliskia techijtakos akin tikchiuaj kemej Cristo. Yejua ika techyolmajxitij maj amo timouikakan iniuan akin kinextiaj nejin netasojtalis (2 Tim. 3:5). Melauak ke amo uelis senkis amo tikinnotsaskej. Komo ijkon, ¿toni techpaleuis maj amo titanemilikan kemej yejuan uan maj timochikauakan tikyolpaktiskej Jiova, Dios akin tetasojta? Maj tikitakan keniuj taman netasojtalis tein Dios kineki maj tiknextikan uan netasojtalis tein ika motajtoua itech 2 Timoteo 3:2-4. Nejin techpaleuis maj timoitakan uan maj tikitakan keniuj uelis tiknextiskej netasojtalis tein kichiuas maj yekmelauj tiyolpakikan.

4. ¿Keyej kuali yetok maj timotasojtakan?

⁴ Pablo kijkuiloj ke taltikpakneminij “motasojtatinemiske yejuan san”. ¿Kijtosneki nejin ke amo kuali yetok maj se motasojta? Amo. Totech yetok maj timotasojtakan uan moneki ijkon tikchiuaskej. Ijkon techchijchiuak Jiova. Jesús kijtoj: “Xiktasojta mokniu ijkon keme tejua timotasojta” (tejuan tiktalilijkej cursivas; Mar. 12:31). Komo amo timotasojtaj, amo uelis tikintasojtaskej oksekin. Uan no, Biblia kijtoua: “Teyokichuan ma kintasojtatinemikan ninsiuauan ika ne tetasojtalis tenika cada se teyokich mopialitinemi uan motasojtatinemi. Porin ne teyokich ten kitasotajtinemi isiuatsin, [...] motasojtatinemi yejua san mismo. Uan amo aken kitauelitstinemi de yejua itakayo san. Ta, cada se tagat motasojtatinemi kuak motekipanoa uan moyekpia” (tejuan tiktalilijkej cursivas; Efes. 5:28, 29). Yejua ika semi kuali maj timotasojtakan.

5. ¿Toni kichiuaj akin sayoj yejuan motasojtaj?

⁵ Netasojtalis tein sayoj se yejua se mopialia tein ika motajtoua itech 2 Timoteo 3:2 amo taixejekol nion tapaleuia. Kichiua maj se kitayekanalti se itanejnekilis. Akin sayoj yejuan motasojtaj kinemiliaj ke nochi ueli kichiuaj (xikonixtajtolti Romanos 12:3). Amo ininka motekipachouaj oksekin, ta sayoj inintech. Uan keman teisa amo kuali kisa, kintajtakoltiaj oksekin. Yejuan amo yekmelauj yolpakij.

6. ¿Toni panoua keman taltikpakneminij kitasojtaj Dios?

⁶ Seki motelmachtianij kinemiliaj ke Pablo yekinika ika tajtoj netasojtalis tein sayoj se yejua se mopialia porin nejon kichiua maj se kinexti okseki taman tein amo kuali tein satepan kijtoj. Sayoj ke, netasojtalis tein Dios kineki maj tiknextikan kichiua maj tikpiakan kualtsitsin kualneskayomej. Nejin mouika iuan yolpakilis, yolseuilis, maj amo se yolijsiui, kualtakayot, yolkualtakayot, takuaujtamatilis, yolnejmachkayot uan maj ueli se motsakuili (Gál. 5:22, 23). Semej akin kijkuiloj salmos, kijtoj: “¡Yolpaki xolal tein iDios yejua Jiova!” (Sal. 144:15). Jiova se Dios akin yolpaki, uan itekitikauan no yolpakij. Uan no, yolpakij porin kinpaleuiaj oksekin, amo kemej akin sayoj yejuan motasojtaj uan sayoj kinemiliaj kiseliskej okachi taman (Hech. 20:35).

7. ¿Toni netajtanilmej techpaleuiskej maj tikmatikan ox okachi tiktasojtaj Dios?

⁷ ¿Keniuj uelis tikmatiskej ox okachi timotasojtaj tejuan ke Dios? Maj itech titanemilikan nejin tayolmajxitilis: “Amo [...] teyi xikchiuakan tech namonemilis tenika nanmoueyichiuaske san. Ta, [...] xinentinemikan ika ne yolyemanalis. Uan no nikneki ma xikpouakan in oksekin tokniuan taneltokani ke yejuan kachi ueyi chiuanime uan [...] amo xiktemojtinemikan de keniu nanmopaleuijtinemiske namejuan san.  Ta, kachi ok xiktemojtinemikan de keniu xikinpaleuijtiyakan oksekin” (Filip. 2:3, 4). Uelis timotajtaniskej: “¿Niktakamati nejin tayolmajxitilis? ¿Yekmelauj nimochikaua nikchiuas itanejnekilis Dios? ¿Niktemoua keniuj nikinpaleuis oksekin itech nechikol uan itech tanojnotsalis?”. Kemansa ouij techkisa tikinpaleuiskej oksekin. Xa monekis semi timochikauaskej uan tikauaskej seki taman tein tikuelitaj. Sayoj ke amo onkak okse taman tein okachi techyolpaktis ke tikmatiskej ke tikpiaj itatiochiualis akin okachi Ueyichiujkej.

8. ¿Toni kichiuanij seki tokniuan porin kitasojtaj Dios?

⁸ Kemej seki tokniuan kitasojtaj Dios uan kinekij okachi kitekitiliskej, kikauanij tekimej tein ika ueliskia kitaniskej miak tomin. Tokniuj Ericka, akin tapajtijkej, amo kitayekanaltij nejon tekit, ta mochiuak precursora uan tapaleuiani iuan inamik itech miak uejueyi altepemej. Yejua kijtoua: “Tikpanouanij miak taman itech tanojnotsalis itech okseki tajtolmej uan timochiuanij tiinintasojikniuan miakej. Nochi nejin kichiuani maj tiyolpakikan”. Ericka tekitiok kemej tapajtijkej, sayoj ke itonaluan uan ichikaualis okachi kikui keman kinmachtia taltikpakneminij maj kiixmatikan Jiova uan kinpaleuia tokniuan. Yejua kijtoua ke nejon okachi kiyolpaktia uan kichiua maj kuali momachili.

9. ¿Keyej amo ueli yolpakij akin kitasojtaj tomin?

⁹ Pablo no ininka tajtoj akin “xijxikuintinemiske ika tomin”. Seki xiujmej achto, se precursor kayot Irlanda ika tajtoj Dios iuan se takat. Nejin takat kikixtij itomineualoni, kikuik seki tomin uan kijtoj: “¡Yejua nejin nodios!”. Maski xa amo kijtoskej, miakej tanemiliaj kemej nejin takat. Kitasojtaj tomin uan tein uelis kikouaskej ika. Sayoj ke Biblia tanejmachtia: “Akin kitasojta plata amo keman kuali momachilis ika plata, nion akin kitasojta tomin ika tein kitani” (Ecl. 5:10). Akin kitasojtaj tomin nochipa kinekiskej okachi uan nochipa yejua kitemojtoskej. Sayoj ke nejin sayoj kinualkuilis “miak tataman ouijkayome” (1 Tim. 6:9, 10).

10. ¿Toni kijtoua Biblia keman ika tajtoua tomin uan tatasojtilis?

¹⁰ Melauak ke tinochin moneki tikpiaskej tomin, porin techpaleuia (Ecl. 7:12). Sayoj ke ¿uelis aksa yolpakis komo sayoj kipia tein ika moixpanoltis? Kemaj (xikonixtajtolti Eclesiastés 5:12). Agur, ikoneuj Jaqué, kitajtanij Dios: “Amo xinechmaka tatasojtilis nion tominpialis. Sayoj xinechkaua maj nikmajseua tein ixyetok maj nikua”. Amo teouijmaka se kiajsikamatis keyej amo kinekia kitelpanos tatasojtilis. Yejua kimelauak ke amo kinekia maj nejon kiuikani maj tachteki, porin ijkon amo kiueyitaliskia Dios. Sayoj ke ¿keyej amo kinekia tominpias? Yejua kijtoj: “Ijkon amo senkis nikpias nochi uan nimitsixtopeuas uan nikijtos: ‘¿Akoni Jiova?’” (Prov. 30:8, 9). Xa tikinixmatij sekin akin itech takuaujtamatij tomin uan amo iuan Dios.

11. ¿Toni kijtoj Jesús keman ika tajtoj tomin?

¹¹ Akin kitasojtaj tomin amo uelij kiyolpaktiaj Dios. Jesús kijtoj: “Amo aken uelis kintekitilis ome patrones, porin [...] kitauelitas se patrón uan kitasojtas in okse, oso kimouistilis se patrón uan amo kiueyichiuas in okse. Amo aken uelis kintekitilis [...] Dios uan in ricojyot”. Achto kijtojka: “Amo xiksentilikan namoricojyo nikan taltikpak kampa namotilma kitetektokke in okuilinme uan namotomin poxkautok uan kampa in tachtekini tekalijtik kalakij uan kuikaj ten nesi. Ta, kachi kuali xiksentilikan namoricojyo tech ne eluiyaktsinko kampa in okuilinme amo ueli kitejtekiske, nion no poxkauis den namoaxka, uan  nion no tachtekini uelis mitskalijtikkalakiske uan kuikaske ten moaxka” (Mat. 6:19, 20, 24).

12. ¿Keyej okachi amo ouij se kitekitilis Dios komo amo se kipia miak taman? Xikonijto se neskayot.

¹² Miakej kiitanij ke komo amo kipiaj miak taman amo sayoj okachi yolpakij, ta no ueli okachi kitekitiliaj Jiova. Ompa Estados Unidos, se tokniuj takat akin monotsa Jack kipiaya se ueyi kali uan se tanamakaloyan, sayoj ke kinnamakak porin kinekia tekitis kemej precursor iuan inamik. Yejua kijtoua: “Ouij techkisak tikauaskej kualtsin kali uan tal tein tikpiayaj. Sayoj ke nikijtoua ke, miak xiujmej, nimokepaya kalijtik uan amo kuali nimomachiliaya porin nikpanouaya kuejmolmej itech tekit. Sayoj ke, nonamik, akin precursora, nochipa tel yolpakia. Yejua kijtouaya: ‘Nikpia okachi kuali teko akin uelis moajsis’. Axkan ke no niprecursor, tiomen sayoj se tiktekitiliaj, Jiova”.

13. ¿Toni techpaleuis maj tikmatikan keniuj yekmelauj tikitaj tomin?

¹³ ¿Toni techpaleuis maj tikmatikan keniuj yekmelauj tikitaj tomin? Moneki timotajtaniskej uan titanankiliskej kemej yekmelauj titanemiliaj: “¿Niknextia ke yekmelauj nikneltoka tein Biblia kijtoua ika tomin? ¿Okachi niktayekanaltia niktanis tomin? ¿Okachi ika nimotekipachoua tomin uan okseki taman ke kuali nimouikas iuan Jiova uan oksekin? ¿Yekmelauj nitakuaujtamati ke Jiova nechmakas tein nechpoloua?”. Uelis tikyekmatiskej ke Dios amo keman kinkauas akin iuan takuaujtamatij (Mat. 6:33).

14. ¿Keniuj moneki se kiitas se moyolpaktis?

¹⁴ Kemej achtook moijtojka, axkan miakej “sayo kitemojtinemij kenin moyolpaktijtinemiske”. Ijkon kemej tikmatij ke uelis timotasojtaskej uan tiktemoskej tomin ika taixejekolis, no tikmatij ke uelis timoyolpaktiskej ika taixejekolis. Sekin kinemiliaj ke moneki senkis amo moyolpaktiskej, sayoj ke amo yejua nejon tein tamachtia Jiova. Biblia kiniluia itekitikauan Dios akin amo kikauaj: “Xiyouj, xikmajseua motakual ika yolpakilis uan xitayi movino ika se kuali yolo” (Ecl. 9:7).

15. ¿Toni kijtosneki tajtolmej “sayo kitemojtinemij kenin moyolpaktijtinemiske”?

¹⁵ Itech 2 Timoteo 3:4 ininka motajtoua akin senkis amo kitemouaj Dios. Maj  tikitakan ke nejin tajkuilol amo kijtoua ke yejuan kitemoskiaj moyolpaktiskej okachi ke “kiyolpaktijtinemiske Dios”, porin nejon kiteajsikamatiltiskia ke tepitsin kitasojtaskiaj. Tajkuilol kijtoua ke “sayo kitemojtinemij kenin moyolpaktijtinemiske pero amo kitemojtinemij kenin para kiyolpaktijtinemiske Dios”. Se motelmachtijkej kijtoua ke nejin tajkuilol “amo kijtosneki ke yejuan no tepitsin kitasojtaj Dios. Kijtosneki ke senkis amo kitasojtaj”. Nejin senkis kinnejmachtia akin kiteltemouaj moyolpaktiskej. Tajtolmej “sayo kitemojtinemij kenin moyolpaktijtinemiske” kuali kinixnextia akin “mopakiltijtinemij ok tech nintanejnekilis” (Luc. 8:14).

16, 17. ¿Keniuj kinextij Jesús tein kijtosneki se moixpetanis?

¹⁶ Jesús kinextij toni kijtosneki se moixpetanis ika taixejekolis. Yejua yajka se “nenamiktilis” uan se ueyi tatakualis (Juan 2:1-10; Luc. 5:29). Keman tamik vino itech nenamiktilis, ika se ueyi tachiualis at kikepak vino. Uan okse tonal, keman taltikpakneminij kijijtojkej porin takuaya uan tatayia, senkis kinextij ke amo taixejekol kemej tanemiliayaj (Luc. 7:33-36).

¹⁷ Maski ijkon, Jesús amo kitayekanaltij moixpetanis. Yejua kitayekanaltij kichiuas tein Jiova kinauatijka uan mochikauak kinpaleuis oksekin. Motemakak tajyouis uan momikilis itech se kouit uan ijkon miakej ueliskiaj makisaskej. Nochin itatojtokakauan kiniluij: “Nantatiochiualme namejuan kuak namechuijuikaltiske uan kuak namechtajyouiltiske uan kuak namechijtouiliske miak xolopijyot porin nantakuautamatij itech Nejuatsin notokay. Ijkuakon ximoyolpaktikan uan ximouelitakan porin se tonal nankiseliske se ueyi ne tetayokolil nepa eluiyaktsinko. Uan ijkon keme namechtauelitaj axkan, no ijkon kintauelitatiualajke nitanauatijkauan de Dios ten nemikoj ne achtopa” (Mat. 5:11, 12).

18. ¿Toni netajtanilmej techpaleuiskej maj tikmatikan ox tikteltayekanaltiaj timoixpetaniskej?

¹⁸ ¿Toni techpaleuis maj tikmatikan ox tikteltayekanaltiaj timoixpetaniskej? Maj timotajtanikan: “¿Okachi niktayekanaltia neixpetanilis ke nechikolmej uan tanojnotsalis? ¿Nimotemaka nikauas seki taman tein nikuelita porin nikneki niktekitilis Dios? Keman nikixpejpena tein ika nimoixpetanis, ¿nimotajtania ox kiyolpaktis Jiova?”. Komo yekmelauj tiktasojtaj Dios, amo sayoj amo tikchiuaskej tein tikmatij ke amo kuali yetok, ta no tein tiknemiliaj ke xa amo kiyolpaktis (xikonixtajtolti Mateo 22:37, 38).

19. ¿Akonimej amo keman uelis yekmelauj yolpakiskej?

¹⁹ Nochi tein Satanás kiixyekantok kintajyouiltiani taltikpakneminij kemej chikuasen mil xiujmejya. Axkan ke tinemij itech itamian tonalmej, tel miakej sayoj inintech tanemiliaj, kitayekanaltiaj tomin uan moixpetaniskej. Kitayekanaltiaj inintanejnekilis uan tein uelis kipiaskej. Yejuan amo keman uelis yekmelauj yolpakiskej. Sayoj ke, Biblia kijtoua: “Yolpaki akin kipia iDios Jacob kemej itapaleuijkauj, akin mochia itech iDios, Jiova” (Sal. 146:5).

20. ¿Keniuj mitsonualkuiliani yolpakilis tikontasojtas Dios?

²⁰ Tiitekitikauan Jiova yekmelauj tiktasojtaj. Uan xijxiujtika, okachi taltikpakneminij no kiixmatij uan kitasojtaj. Nejin kinextia ke iTekiuajyo Dios taixyekantok uan ke amo uejkaua kiualkuis tatiochiualismej tein nion ueli tiknemiliaj. Tikchiuaskej itanejnekilis Jiova uan tikmatiskej ke tikyolpaktijtokej uelis yekmelauj techyolpaktis axkan uan nochipaya. Itech okse tamachtilis, tikitaskej tein amo kuali tein mochiua keman se kitayekanaltia se itanejnekilis uan kualneskayomej tein kinextiaj itekitikauan Jiova.