1-3. 1) ¿Keyej Jiova kitasojtaya Salomón, uan toni tatiochiualismej kimakak? 2) ¿Toni netajtanilmej tiknankiliskej itech nejin tamachtilis?

SALOMÓN semi telpochok katka keman peuak tekiuajti ompa Israel. Keman peujtiyaya itaixyekanalis, Jiova kiluij itech se takochitalis: “Xitajtani tein tikuelitaskia maj nimitsmaka”. Salomón kinankilij ke yejua sayoj katka se telpoch akin ayamo semi kipiaya tamatilis, yejua ika kitajtanij “se yolo tatakamatkej” (1 Rey. 3:5-10). Nejon tein tajtanik kinextij ke kiajsikamatia ke amo nochi uelia kichiuaya. Yejua ika Jiova semi kitasojtaya (2 Sam. 12:24). Kemej yejuatsin semi kiyolpaktij tein kitajtanij, kimakak “se yolo tamatkej uan taajsikamatkej” (1 Rey. 3:12).

² Keman tatakamatik, Salomón kiselij miak tatiochiualismej. Kichijchiuak se templo tein kiuikaskia “itokay Jiova iDios Israel” (1 Rey. 8:20). Kitelixmatkej porin kipiaya miak tamatilis tein Dios kimakak. Uan hasta kijkuiloj eyi amatajkuilolmej tein pouij itech Biblia. Semej yejua Proverbios.

³ Itech nejin amatajkuilol, ajsitoyaya cien ika motajtoua yolo. Kemej neskayot, Proverbios 4:23 kijtoua: “Okachi ke nochi taman tein tikyekpia, xikyekpia moyolo”. ¿Toni kijtosneki tajtol ‘yolo’ itech nejin tajkuilol? Tikitaskej itech nejin tamachtilis. No tiknankiliskej okseki ome netajtanilmej tein motelnekij: ¿Keniuj Satanás kitemoua kijtakos toyolo? ¿Uan keniuj uelis tikyekpiaskej? Komo tikajsikamatij itanankililuan nejin netajtanilmej techpaleuis maj tiksentokakan tiktakamatikan Dios.

4, 5. 1) ¿Toni kijtosneki tajtol ‘yolo’ itech Proverbios 4:23? 2) ¿Keniuj tikyekpiaskej toyolo tamati kemej tikyekpiaskej tonakayo?

⁴ Itech Proverbios 4:23, tajtol ‘yolo’ kiixnextia totanemililuan, tein tikmachiliaj, tein techolinia maj tikchiuakan teisa uan tein tiknejnekij. Nejin yejua kemej yekmelauj titamatij, amo tein tiknextiaj tapani.

⁵ Tikyekpiaskej toyolo tamati kemej ijkuak tikyekpiaj tonakayo. Kemej neskayot, komo amo tiknekij tikokolispeuaskej, moneki tikuaskej uan tikchiuaskej tein techchikauas. No ijkon, komo tiknekij maj chikauak tokuali uikalis iuan Jiova, moneki nochipa tikixtajtoltiskej Biblia uan amaixmej tein ika tajtouaj uan nochipa tiknextiskej ke titakuaujtamatij iuan Jiova. Tiknextiaj totakuaujtamatilis keman tikchiuaj tein timomachtiaj uan ika titajtouaj tein tikneltokaj (Rom. 10:8-10; Sant. 2:26). Uan no, kemej timoitaj uelis kichiuas maj tiknemilikan ke kuali tiyetokej, maski tein melauj, timokokouaj. No ijkon, tein tikchiuaj itech itekiyo Dios uelis kichiuas maj tiknemilikan ke chikauak moajsi totakuaujtamatilis, maski tein melauj peua tikpiaj amo kuali tanejnekilis (1 Cor. 10:12; Sant. 1:14, 15). Maj tikelnamikikan ke Satanás kineki maj titanemilikan kemej yejua. ¿Keniuj kitemoua kichiuas nejon, uan keniuj uelis timoyekpiaskej?

6. ¿Toni kineki Satanás, uan keniuj kitemoua kichiuas?

⁶ Satanás se taixnamikkej akin sayoj kitayekanaltia itanejnekilis. Amo kitakamati itanauatiluan Jiova uan kineki maj titanemilikan uan maj timonejnemiltikan kemej yejua. Kemej amo ueli techchikaujkauia, kitemoua maj ijkon tikchiuakan ika okseki taman. Kemej neskayot, kichiua maj timoajsikan iniuan akin tanemiliajya uan monejnemiltiajya kemej yejua (1 Juan 5:19). Kineki maj tikixtalikan iniuan tiyetoskej, maski tikmatij ke amo kuali tasojiknimej “techmajmauaske” ika inintanemilil uan kemej monejnemiltiaj (1 Cor. 15:33). Yejua nejon  tein kichiuak iuan tekiuaj Salomón, akin monamiktij iniuan miakej siuamej akin amo kiueyichiuayaj Jiova. Yejuan kitanemililpatakej uan yolik kichiujkej maj iyolo mouejkatiliani iuan Jiova (1 Rey. 11:3).

7. 1) ¿Keniuj Satanás no kimoyaua itanemilil? 2) ¿Keyej moneki timoyekpiaskej ika nejon?

⁷ Satanás kimoyaua itanemilil ika películas uan tein panoua itech televisión. Yejua kimati ke tikuelitaj tikakiskej tein kinpanoua taltikpakneminij uan ke nejon amo sayoj techixpetania, ta kipata totanemilil, tein tikmachiliaj uan kemej timonejnemiltiaj. Hasta Jesús kintapouiaya taltikpakneminij seki taman keman kinmachtiaya. Kemej neskayot, ika tajtoj samaritano akin yolkuali uan konet akin kiauilchiuak itomin (Mat. 13:34; Luc. 10:29-37; 15:11-32). Sayoj ke, akin kipiaj itanemilil Satanás no uelis kitetapouiskej teisa tein ika techijtakoskej. Yejua ika moneki timoyekpiaskej. Melauak ke moajsij películas uan seki taman tein panoua itech televisión tein uelis ika timoixpetaniskej uan techmachtiskej teisa uan amo kijtakos totanemilil. Yejua ika, maj tiknextikan kuali taixejekolis. Keman tikixpejpenaskej tein tikitaskej, maj timotajtanikan: “Ika nejin tein kipanoltiaj itech televisión oso película, ¿kitemouaj nechmachtiskej ke kuali yetok maj nikchiua tein amo kuali tein niknejneki?” (Gál. 5:19-21; Efes. 2:1-3). Komo tikitaj ke kimoyaua itanemilil Satanás, maj timouejkatilikan kemej yeskia tiktemoskiaj maj amo techmauakan se kokolis.

8. ¿Keniuj tetatmej uelis kinpaleuiskej ininkoneuan maj kiyekpiakan ininyolo?

⁸ Tetatmej, Satanás kineki kijtakos ininyolo nanmokoneuan, yejua ika moneki nankinyekpiaskej. Tikmatij ke nanmochikauaj maj amo kokolispeuakan. Kemej neskayot, nantachipauaj nanmochan uan  nankijkuaniaj nochi tein uelis namechkokolispeualtis. No ijkon, onkak películas, seki taman tein kipanoltiaj itech televisión, seki taman itech Internet uan tein ika mauiltiaj tein uelis kichiuas maj tanemilikan kemej Satanás, yejua ika moneki nankinyekpiaskej. Jiova namechnauatia xikinpaleuikan nanmokoneuan maj mochiuakan itasojikniuan (Prov. 1:8; Efes. 6:1, 4). Yejua ika, amo xiomeyolouakan nankiixtaliskej tanauatilmej tein mouikaj ika tein Biblia tayolmajxitia. Xikiniluikan toni uelis kiitaskej uan toni amo, uan xikinpaleuikan maj kiajsikamatikan keyej ijkon nankiixtaliaj (Mat. 5:37). Ijkon kemej moskaltijtiyaskej, xikinmachtikan maj ininselti kiixejekokan toni kuali uan toni amo kuali ijkon kemej kinextiaj itanauatiluan Dios (Heb. 5:14). Uan xikelnamikikan ke nanmokoneuan kintelpaleuis tein nankiniluiskej, sayoj ke okachiok tein kiitaskej ke nankichiuaj (Deut. 6:6, 7; Rom. 2:21).

9. ¿Toni kitemoua Satanás maj tiknemilikan, uan keyej tamouilil nejon tanemilil?

⁹ Satanás no kineki kijtakos toyolo keman kitemoua kichiuas maj titakuaujtamatikan itech inintamatilis taltikpakneminij uan amo itech itamatilis Dios (Col. 2:8). Kemej neskayot, kitemoua maj se kinemili ke moneki se motomintis. ¿Keyej tamouilil nejin tanemilil? Porin maski motomintiskej oso amo, akin ijkon tanemiliaj uelis kiteltayekanaltiskej kitaniskej tomin maski uelis kokolispeuaskej, amo semi yetoskej iniuan ininchankauan uan hasta amo kuali mouikaskejok iuan Dios (1 Tim. 6:10). Semi tiktasojkamatij maj toTajtsin akin tel tamatkej techpaleui maj tikitakan tomin ika taixejekolis (Ecl. 7:12; Luc. 12:15).

10, 11. 1) ¿Toni moneki tikchiuaskej tein ika tikyekpiaskej toyolo? 2) ¿Toni kichiuayaj tajpianij ne uejkauj, uan keniuj totanemilil uelis yeski kemej se tajpixkej?

¹⁰ Uelis tikyekpiaskej toyolo komo ueli tikitaj toni uelis kijtakos uan niman tikixtopeuaj. Tein kijtoua Proverbios 4:23 techelnamiktia tajpianij akin moajsiaj itech itonaluan tekiuaj Salomón. Yejuan tajpiayaj tepankuako itech altepet, uan komo kiitayaj ke motokiaya se taixnamikkej, niman tanejmachtiayaj. Nejin techpaleuia maj tikajsikamatikan toni moneki tikchiuaskej uan ijkon Satanás amo kijtakos totanemilil.

¹¹ Akin tajpiayaj tepankuako mopaleuiayaj iniuan akin tajpiayaj kaltenoj (2 Sam. 18:24-26). Yejuan kinyekpiayaj akin nemiaj ompa keman niman tatsakuayaj ijkuak motokiaya taixnamikkej (Neh. 7:1-3). Totanemilil tein tikmachtiaj ika Biblia * uelis yeski kemej se tajpixkej keman technejmachtis ijkuak Satanás kitemos kijtakos totanemilil, tein tikmachiliaj, tein techolinia oso tein tiknejnekij. Nochipa keman totanemilil technejmachtis, moneki tikakiskej uan kemej yeskia tiktatsakuiskej Satanás.

12, 13. ¿Toni xa tiknekiskej tikchiuaskej, sayoj ke toni moneki tikchiuaskej?

¹² Maj tikitakan se neskayot tein technextilis toni moneki tikchiuaskej uan ijkon Satanás amo techijtakos. Jiova techmachtiani ke moneki amo ika titajtoskej auilnemilis nion okseki taman  tein pitsotik (Efes. 5:3). Sayoj ke ¿toni tikchiuaskej komo akin iniuan titekitij oso iniuan timomachtiaj peua ika tajtouaj auilnemilis? Tikmatij ke moneki tikixtopeuaskej “amokuali nemilis uan [...] tanejnekilisme ten ualeutok iuan in taltikpakuani” (Tito 2:12). Yejua ika totanemilil uelis technejmachtis (Rom. 2:15). ¿Tikakiskej totanemilil uan kemej yeskia titatsakuaskej? Xa tiknekiskej tikinkakiskej oso tikitaskej taixkopimej tein kinextijtokej. Sayoj ke ijkuak moneki ika titajtoskej okse taman oso tikinkaujteuaskej.

¹³ Moneki tiyeskij tiyolchikaujkej uan ijkon amo itech titanemiliskej nion tikchiuaskej tein techchiualtisnekij akin iniuan titekitij oso iniuan timomachtiaj. Uelis tikyekmatiskej ke Jiova kiita ke timochikauaj tikixtopeuaskej itanemilil Satanás uan ke techmakas chikaualis uan tamatilis tein techpaleuis (2 Crón. 16:9; Is. 40:29; Sant. 1:5). ¿Keniuj no uelis tikyekpiaskej toyolo?

14, 15. 1) ¿Toni moneki tikauaskej maj kalaki itech toyolo, uan keniuj tikchiuaj? 2) ¿Keniuj Proverbios 4:20-22 techpaleuia maj tiktemokan maj okachi techpaleui tein tikixtajtoltiaj itech Biblia? (Xikonita kampa kijtoua “ Keniuj titanemiliskej”.)

¹⁴ Amo sayoj moneki tikixtopeuaskej amo kuali tanemililmej uan ijkon tikyekpiaskej toyolo, ta no moneki tikseliskej tein kuali. Maj oksepa itech titanemilikan altepet tein kiyoualouaya uejueyi tepamit. Akin tajpiaya kaltenoj tatsakuaya uan ijkon taixnamikkej amo kalakiskia. Sayoj ke kemansa monekia tatapos uan ijkon ueliskiaj kikalakiskej takual uan okseki taman tein ika ixpanoskiaj. Komo amo, ueliskiaj mayanmikiskej. No ijkon, moneki kemej yeskia tiktaposkej toyolo uan tikauaskej maj kalaki itamachtilis Jiova.

¹⁵ Itech Biblia, tikajsij itanemililuan Dios. Yejua ika, nochipa keman tikixtajtoltiaj, kemej titanemiliaj, tein tikmachiliaj uan kemej timonejnemiltiaj mouika ika itanemililuan. Techpaleuis tein tikixtajtoltiaj komo tikchiuaj ome taman. Yekinika, moneki tiktataujtiskej Jiova. Se tokniuj siuat kijtoua: “Achto ke nikixtajtoltis Biblia, niktajtania Jiova maj nechpaleui maj nikita ‘kualtsitsin taman’ tein kipia iTajtol” (Sal. 119:18). Ojpatika, moneki titanemiliskej itech tein tikixtajtoltiaj. Keman tikchiuaj nochi nejin, iTajtol Dios techyololinia uan peua tikpatiuitaj itanemilil Jiova (xikonixtajtolti Proverbios 4:20-22; Sal. 119:97).

16. ¿Keniuj techpaleuia tein moajsi itech JW Broadcasting? Xikonijto se neskayot.

¹⁶ No tikauaj maj itanemililuan Dios moajsikan totech keman tikitaj nochi tein moajsi itech JW Broadcasting^®. Seki namikuanij kijtouaj: “Tamachtilis tein kisa mejmetstika kinankiliani tonetataujtiluan. Techyolchikaua keman titayokoxtokej oso toselti timomachiliaj. Uan tochan nochipa tiktaliaj nekuikatilmej: keman titakualchiujtokej, titachipaujtokej oso sayoj titayitokej tsopekat”. Nejin tamachtilismej techpaleuiaj maj tikyekpiakan toyolo. Techmachtiaj maj titanemilikan kemej Jiova uan maj amo tiknekikan titanemiliskej kemej Satanás.

17, 18. 1) Kemej kijtoua 1 Reyes 8:61, ¿toni panoua keman tikchiuaj tein Jiova techmachtia? 2) ¿Toni techmachtia tein kipanok tekiuaj Ezequías? 3) Ika inetataujtil David tein moajsi itech Salmo 139:23, 24, ¿toni uelis tiktajtaniskej Jiova keman tiktataujtiaj?

¹⁷ Keman tikitaj ke semi techpaleuia tikchiuaskej tein kuali, totakuaujtamatilis mochikaua (Sant. 1:2, 3). Kuali timomachiliaj  porin tikchiuaj maj Jiova kiyolpakti kijtos ke tiikoneuan, uan okachi tiknekij tikyolpaktiskej (Prov. 27:11). Keman tikpanouaj se ouijkayot ueli tiknextiaj ke senkis tikixtalijtokej tiktekitiliskej (Sal. 119:113). Tiknextiaj ke tikteltasojtaj Jiova uan ke senkis tikixtalijtokej tiktakamatiskej itanauatiluan uan tikchiuaskej tein kineki (xikonixtajtolti 1 Reyes 8:61).

¹⁸ Melauak ke tinochin timopolouaj porin titajtakouanij. Keman timopoloskej, maj tikelnamikikan tein kipanok tekiuaj Ezequías. Yejua mopoloj, sayoj ke moyolnonotsak uan kisentokak kitekitilij Jiova “ika se yolo ajsitok” (Is. 38:3-6; 2 Crón. 29:1, 2; 32:25, 26). Yejua ika, maj amo tikauakan maj Satanás kipitsotili totanemilil. Maj tiktajtanikan Jiova maj techpaleui maj tikpiakan “se yolo tatakamatkej” (1 Rey. 3:9; xikonixtajtolti Salmo 139:23, 24). Uelis tiksentokaskej tiktakamatiskej Jiova komo nochipa tiktemouaj tikyekpiaskej toyolo.