1, 2. 1) ¿Keyej taixejekol maj Jesús technextiliani maj tikelnamikikan imikilis kemej amo ouij techkisas? 2) ¿Katiyejua ikualneskayouan Jesús ika titajtotij?

¿UELI tikonijtoua toni mochiua xijxiujtika keman tikelnamikij imikilis Cristo? Xa kemaj, porin itech nejin nechikol amo mochiua nion mokui miak taman. Sayoj ke, xa aksa tajtanis: “Komo nejin nechikol motelneki, ¿keyej tel amo miak taman mochiua?”.

² Keman Jesús nemik nikan taltikpak nochipa tamachtij miak taman tein motelneki ika amo miak tajtolmej uan kemej amo ouij kiajsikamatiskiaj (Mat. 7:28, 29). No ijkon, technextilij keniuj tikelnamikiskej imikilis kemej amo ouij techkisas, sayoj ke kemej tiknextiskej poujkaitalis. Maj tikitakan ika nejmachkayot tein mochiua itech nejin nechikol uan no seki taman tein kichiuak uan kijtoj Jesús. Nejin techpaleuis maj okachi kuali tikajsikamatikan iyolyemanilis, iyolchikaualis uan inetasojtalis. Uan no, tikitaskej keniuj okachi kuali tikchiuaskej kemej yejua.

3. Keman tikixtajtoltiaj Mateo 26:26-28, ¿keyej tikijtouaj ke amo moneki mochiuas miak taman keman moelnamiki imikilis Jesús, uan toni kiixnextiaj pantsin uan vino?

³ Jesús kiixtalij maj moelnamiki imikilis keman moajsia iniuan once itatitaniluan akin amo kikaujkej. Sayoj kikuik pantsin tein amo kipiaya tein ika xokoyas uan vino tein mokaujka satepan ke kichiujkaj Pascua (xikonixtajtolti Mateo 26:26-28). Kiniluij tatitanilmej ke nejin ome taman tein amo ouij se kiajsia kiixnextiayaj inakayo tein amo kipiaya  tajtakol uan iesyo, tein tepitsin satepan ininka kitemakaskia. Tatitanilmej xa amo kimoujkaitakej maj itech nejin yankuik nechikol amo mokuini nion mochiuani miak taman. ¿Keyej amo?

4. ¿Toni tein Jesús kiyolmajxitij Marta techpaleuia maj tikajsikamatikan keyej amo mokui miak taman keman tikelnamikij imikilis?

⁴ Maj tikelnamikikan se taman tein panok seki metsti achto, keman Jesús eyi xiuitya tanojnotstinemia. Keman kinkalpanojtoya Lázaro, Marta uan María, akin katkaj itasojikniuan, peuak kinmachtia. Maski Marta ompa yetoya, tel amo kemantia porin kichijchiuilijtoya miak takual itakalpanojkauj akin kiteltasojtayaj. Sayoj ke Jesús kiluij ika netasojtalis ke amo nochipa moneki se kichijchiuas miak takual (Luc. 10:40-42). Satepan, seki hora achto ke kitemakaskia inemilis, no kichiuak nejon tein kiyolmajxitij Marta. Kichiuak se takualis kampa amo kikuik miak taman. ¿Toni techmachtia nejin kemej tamati Jesús?

5. ¿Toni techmachtia kemej tamati Jesús maj amo mochiua nion mokui miak taman keman tikelnamikij imikilis, uan keniuj nejin mouika ika tein kijtoua Filipenses 2:5-8?

⁵ Nochi tein Jesús kichiuak uan kijtoj kinextij ke katka yolyemanik. Yejua ika youak achto ke kimiktiskiaj kinextij nejin kualneskayot (Mat. 11:29). Kimatia ke yaya kitemakati okachi ueyi netetayokolil tein motemakani uan ke Jiova kiajokuiskia uan kiixtaliskia kemej Tekiuaj ompa iluikak. Maski ijkon, amo kitemoj maj kiitanij kemej se ueyichiujkej porin amo tajtanik maj mochiua miak taman keman moelnamiki imikilis. Okachi kuali, kiniluij imomachtijkauan maj kielnamikinij xijxiujtika ika se nechikol kampa amo mochiua nion mokui miak taman (Juan 13:15; 1 Cor. 11:23-25). Ijkon senkis kinextij ke amo moueyinekia. Semi techyolpaktia maj yolyemanilis poui itech ikualneskayouan toTekiuaj akin moajsi iluikak (xikonixtajtolti Filipenses 2:5-8, TNM).

6. ¿Keniuj uelis tiyeskij tiyolyemankej kemej Jesús keman tikpiaj ouijkayomej?

⁶ ¿Keniuj uelis tiyeskij tiyolyemankej kemej Jesús? Komo tiktemouaj tikchiuaskej tein kinpaleuis oksekin uan amo tiktayekanaltiskej tein tejuan techpaleuis (Filip. 2:3, 4). Maj itech titanemilikan tein kichiuak youak achto ke kimiktiskiaj. Maski kimatia ke kiteltajyouiltiskiaj, okachi kitekipachoj tayokol tein kimachiliskiaj  itatitaniluan. Yejua ika, nejon youak kinmachtij, kinyolchikauak uan kinyolseuij (Juan 14:25-31). Kinextij ke okachi kitekipachoua maj oksekin kuali yetokan. Tel kuali neskayot techkauilij kemej moneki tiknextiskej yolyemanilis.

7. ¿Keniuj kinextij Jesús ke tel yolchikauak katka tepitsin satepan ke kipeualtij iTakualis toTekotsin?

⁷ Tepitsin satepan ke kipeualtij iTakualis toTekotsin, Jesús kinextij ke tel yolchikauak katka. ¿Keniuj? Kiixtalij kichiuas tein Dios kinekia maski kimatia ke nejon kichiuaskia maj mopinaujti porin kipantiskiaj ke kiuijuikaltijka Dios uan kimiktiskiaj (Mat. 26:65, 66; Luc. 22:41, 42). Senkis kitakamatik Dios uan kiueyitalij itokay, kinextij ke kinamiki taixyekanas uan kichiuak maj taltikpakneminij akin moyolnonotsaskej uelikan nemikan nochipaya. Uan no, kinnejmachtij imomachtijkauan toni ouijkayomej kipanoskiaj.

8. 1) ¿Toni kiniluij Jesús itatitaniluan? 2) Satepan ke Jesús momikilij, ¿keniuj kinextijkej itatitaniluan ke kisentokayaj kinextiayaj yolchikaualis kemej yejua?

⁸ Jesús no kinextij yolchikaualis keman amo kitayekanaltij tein kitekipachouaya, ta kitemoj kinpaleuis itatitaniluan. Satepan ke kiluij Judas maj kisani, kipeualtij se takualis tein kinelnamiktiskia akin yeskiaj taixpejpenalmej tatiochiualismej tein kiualkui iesyo tein kitoyauak uan pouiskej itech yankuik netenkaualis (1 Cor. 10:16, 17). Kemej kinekia kinpaleuis maj nochipa tatakamatinij uan maj ueliskiaj yetoskej iuan ompa iluikak, kiniluij tein yejua uan iTajtsin kichiayaj maj kichiuanij (Juan 15:12-15). No kiniluij toni ouijkayomej kijyouiskiaj. Ompa kiniluij maj  yeskiaj yolchikaujkej kemej yejua (Juan 16:1-4a, 33). Miak xiujmej satepan, yejuan kisentokayaj kichiuayaj kemej Jesús. Kinextiayaj yolchikaualis uan motemakayaj tajyouiskej ininka oksekin (Heb. 10:33, 34).

9. ¿Keniuj uelis tiyeskij tiyolchikaujkej kemej Jesús?

⁹ Axkan, no tiknextiaj yolchikaualis kemej Jesús. Kemej neskayot, keman tikinpaleuiaj tokniuan akin kintajyouiltiaj oso hasta kintsakuaj porin kitekitiliaj Jiova. Ijkuak, moneki timochikauaskej tikinpaleuiskej. Uelis tiktataujtiskej Jiova maj kinpaleui uan tikintajtouiskej ininixpan tekiuanij (Filip. 1:14; Heb. 13:19). No tiknextiaj ke tiyolchikaujkej keman tiksentokaj titanojnotsaj “ika miak yolchikaualis” (Hech. 14:3). Ijkon kemej Jesús, tikixtalijtokej tikteixmatiltiskej tein kichiuas iTekiuajyo Dios maski techixnamikiskej uan techtajyouiltiskej. Sayoj ke ¿toni uelis tikchiuaskej komo kemansa tikmachiliaj ke amo semi tiyolchikaujkej?

10. ¿Toni moneki tikchiuaskej semanas achto ke tikelnamikiskej imikilis Jesús, uan keyej?

¹⁰ Techpaleuis maj okachi tiyolchikaujkej komo itech titanemiliaj tein tikchiaj tikseliskej porin Jesús kitemakak inemilis (Juan 3:16; Efes. 1:7). Itech semanas achto ke tikelnamikiskej imikilis, uelis tikchiuaskej seki taman tein techpaleuis maj okachiok tiktasojkamatikan inemilis tein kitemakak. Maj tikixtajtoltikan tein ixyetok moixtajtoltis itech nejon tonalmej uan maj titanemilikan ika nejmachkayot itech tein panok achto ke kimiktiskiaj. Nejin techpaleuis keman moelnamikis imikilis, porin okachi kuali tikajsikamatiskej tein kijtosneki pantsin uan vino uan netetayokolil tein kiixnextiaj tein amo moajsi okse kemej yejua. Keman  tikajsikamatij tein Jesús uan Jiova toka kichiuanij, ijkon kemej tatiochiualismej tein techualkuilia tejuan uan akin tikintasojtaj, okachiok tikneltokaj ke mochiuas tein tikchiaj uan okachiok tikixtaliaj titaxikoskej ika yolchikaualis hasta keman ejkos tamilis (Heb. 12:3).

11, 12. ¿Toni tikitakejya itech nejin párrafos?

¹¹ Tikitakejya ke iTakualis toTekotsin amo sayoj techelnamiktia ke inemilis Jesús tein kitemakak kitelpia ipatiuj, ta no kinextia iyolyemanilis uan iyolchikaualis. Semi tiktasojkamatij maj kisentoka kinexti nejin kualtsitsin kualneskayomej axkan ke techtajtouia kemej toTayekankatiopixkauj ompa iluikak (Heb. 7:24, 25). Tiknextiskej ke yekmelauj timotasojkamatij komo nochipa tikelnamikij imikilis kemej yejua tanauatij (Luc. 22:19, 20). Tikchiuaj xijxiujtika itech tonal tein kinamiki tonal 14 metsti judío nisán, tonal tein okachi moneki itech nochi xiuit.

¹² Keman titanemiliaj ke itech iTakualis toTekotsin amo mochiua nion mokui miak taman, tikitaj se kualneskayot tein kiolinij Jesús maj toka momikili. Keman nemik nikan taltikpak nochipa kinextij. Maj tikitakan katiyejua katka.

13. ¿Keniuj Juan 15:9 uan 1 Juan 4:8-10 kimelauaj netasojtalis tein Jiova uan Jesús kinextiaj, uan akonimej kinpaleuia nejon netasojtalis?

¹³ Itech nochi tein kichiuak, Jesús senkis kinextij ueyi netasojtalis tein Jiova techpialia (xikonixtajtolti Juan 15:9; 1 Juan 4:8-10). Uan tein okachi moneki, netasojtalis kiolinij maj toka momikiliani. Komo titaixpejpenalmej oso tipouij iniuan ‘okseki ichkamej’, techpaleuia netasojtalis tein Jiova uan iKonetsin technextilijkej ika nejon netetayokolil (Juan 10:16; 1 Juan 2:2). No maj tikitakan keniuj kemej mochiua iTakualis toTekotsin monextia ke Jesús kintasojta uan kinajsikamati imomachtijkauan.

14. ¿Keniuj kinextij Jesús ke kintasojta imomachtijkauan?

¹⁴ Kemej tikitakejya, Jesús amo kinnauatij itatojtokakauan taixpejpenalmej maj kichiuanij miak taman keman kielnamikiskiaj imikilis, ta sayoj se takualis kampa amo kikuiskiaj miak taman. Ijkon kemej panouanij xiujmej, kielnamikinij imikilis xijxiujtika maski kipanotoyaj tataman ouijkayomej, kemansa hasta keman tsaktoyaj (Apoc. 2:10). ¿Uelik kitakamatkej Jesús? Kemaj.

15, 16. ¿Keniuj kichiuanij iTakualis toTekotsin seki tokniuan maski tsaktoyaj?

¹⁵ Akin yekmelauj kichiuaj kemej Cristo nochipa mochikauanij kielnamikiskej imikilis kemej yejua tanauatij, maski kemansa ouij tein kipanotokej. Maj tikitakan ineskayo tokniuj Harold King. Kemej kitsakkej ompa China uan iselti yetoya, monekia kitemos keniuj kielnamikis imikilis Cristo. Ika tein kipiaya, ichtaka kichijchiuaya tein kikuiskia kemej pantsin uan vino. Uan no mochikauaya kiixejekos kemanian mochiuaskia. Keman ajsia nejon tonal, kampa tsaktoya mokuikatiaya, kichiuaya netataujtil uan kitemakaya se tanojnots.

¹⁶ Maj tikitakan okse neskayot. Itech Ojpatika Ueyi Neteuilis, seki tokniuan siuamej akin tsaktoyaj kampa kintajyouiltiayaj uan kinteltekitiltiayaj kichiujkej iTakualis toTekotsin maski ueliskiaj kinmiktiskej. Kemej amo moneki miak taman keman mochiua nejin nechikol, uelik ichtaka kichiujkej. Yejuan kijtouaj: “Tikyoualojkej se banco tein tikpantalilijkej  se tilmaj istak, kampa tiktalijkej pantsin uan vino. Kemej ika tit ueliskiaj kimatiskej toni tikchiujtoyaj, timotauilijkej ika se vela. [...] Oksepa timotenkaujkej iuan toTajtsin ke tiksentokaskiaj tikueyitaliskiaj itokay ika nochi tochikaualis”. ¡Kinextijkej ke semi takuaujtamatiaj iuan Jiova! Uan nesi inetasojtalis Jesús keman ueli tikelnamikij imikilis maski timoajsiskej itech se ouijkayot.

17. ¿Toni kuali maj timotajtanikan?

¹⁷ Keman motokijtos tonal keman tikelnamikiskej imikilis Jesús, kuali maj timotajtanikan: “¿Keniuj uelis okachi kuali niknextis inetasojtalis Jesús? ¿Okachi niktemoua maj tokniuan kuali yetokan? ¿Nikchia maj nochi kuali kichiuakan, oso nikajsikamati ke amo nochi ueli kichiuaj?”. Maj nochipa tikchiuakan kemej Jesús uan maj titeajsikamatikan (1 Ped. 3:8).

18, 19. 1) ¿Toni uelis tikyekmatiskej? 2) ¿Toni tionmochikauas tikonchiuas?

¹⁸ Amo uejkaua, amo monekisok tikelnamikiskej imikilis Jesús. Keman “moualuikas” itech okachi ueyi tajyouilis, kinuikas taixpejpenalmej akin yetoskejok nikan taltikpak. Ijkuak, amo tikelnamikiskejok imikilis (1 Cor. 11:26; Mat. 24:31).

¹⁹ Uelis tikyekmatiskej ke hasta keman amo tikchiuaskejok iTakualis toTekotsin, techyolpaktis tikelnamikiskej nejin nechikol kemej se taman kampa monextij okachi kuali neskayot ika yolyemanilis, yolchikaualis uan netasojtalis. Tikmatij ke akin moajsikej itech nejin nechikol kintapouiskej tein mochiuaya akin nemiskej keman amo mochiuasok. Semi kinpaleuis kikakiskej nejin. Sayoj ke, komo tiknekij maj axkan techpaleui, moneki timochikauaskej tiyeskij tiyolyemankej, tiyolchikaujkej uan titetasojtaskej kemej Jesús. Komo tikchiuaj, tikmatij ke Jiova techtatiochiuis (2 Ped. 1:10, 11).