ITECH tonal 24 metsti enero xiuit 2018, se miércoles kualkan, kinmatiltijkej akin tekitij Betel ompa Estados Unidos uan Canadá ke tokniuj Kenneth Cook, peuak poui iniuan Oloch Taojtokaltianij akin kinixyekanaj iTaixpantijkauan Jiova.

Tokniuj Cook yolik uan moskaltij Pensilvania (Estados Unidos). Se telpoch akin iuan momachtiaya secundaria kimachtij tein melauak tepitsin achto ke kisaskiaj kaltamachtiloyan uan moauij itech tonal 7 metsti junio xiuit 1980. Mochiuak precursor regular itech tonal 1 metsti septiembre xiuit 1982. Ome xiuit satepan, kiyoleujkej maj tekiti Betel. Peuak tekiti Wallkill (Nueva York) itech tonal 12 metsti octubre xiuit 1984.

Itech veinticinco xiujmej, tokniuj Cook kichiuak tataman tekimej kampa kiamakixtiaj amaixmej uan kampa kinixyekanaj akin tekitij Betel. Itech xiuit 1996, monamiktij iuan se tokniuj akin monotsa Jamie, akin iuan peuak tekiti ompa Wallkill. Itech metsti diciembre xiuit 2009, kintitankej Patterson itech Kalmej kampa iTaixpantijkauan Jiova Kitemakaj Tataman Tamachtilis, kampa tokniuj Cook peuak tekiti kampa kinankiliaj ininnetajtaniluan akin kiixtajtoltiaj amaixmej. Itech metsti abril xiuit 2016, satepan ke mokepkaj seki tonalmej ompa Wallkill, tokniuan Cook kintitankej Brooklyn. Uan makuil metsti satepan, kintitankej itech ueyi kali kampa techixyekanaj tein moajsi Warwick. Itech metsti enero xiuit 2017, kiixtalijkej tokniuj Cook kemej inintapaleuijkauj Akin Kiixyekanaj tein Moijkuiloua itech Amaixmej akin kinpaleuiaj Oloch Taojtokaltianij.