1, 2. ¿Toni kiniluia se ángel seki siuamej akin yetoyaj kampa kitalijkaj Jesús uan toni kinnauatia Jesús?

KUALKAMPA itech tonal 16 metsti nisán, xiuit 33, seki siuamej akin itekitikauan Dios akin semi tayokoxtokej youij kiitatij kampa kitalijkej Jesús satepan ke ome tonal momikilijkaya, yejuan kinekij kitaliliskej inakayo Jesús xiuit uan aceite tein ajuiyak. Sayoj ke semi momoujtiaj keman amo kiajsij. Se ángel kiniluia nejin siuamej ke Jesús moajokuik uan no kiniluia: “Yekintsin [...] namechyekanati hasta ne Galileajkopaka uan ompa nankitaske” (Mat. 28:1-7; Luc. 23:56; 24:10).

² Satepan ke nejin siuamej peuaj ojtokaj, Jesús motokia kampa yejuan uan kiniluia: “Xiyakan xikinnejmachtitij nokniuan de ke moneki ma xiyakan tech ne pueblo Galileajkopaka uan ompa nannechitaske” (Mat. 28:10) Jesús moneki kinnauatis itatojtokakauan seki taman tein semi moneki, yejua ika iniuan monechikoj niman ke moajokuik.

3, 4. ¿Keyej tikijtouaj ke Mateo 28:19, 20 amo sayoj tatitanilmej monekia kitakamatiskej? (Xikonita taixkopin ipeujyan amaix.)

³ (Xikonixtajtolti Mateo 28:16-20). Keman Jesús kinnechikoj itatojtokakauan ika tajtoj tekit tein yejuan ijkuak kichiuaskiaj, se tekit tein axkan no tikchiujtokej. Jesús kiniluij: “Xiyakan [...] uan xikinnextilikan nochi in taltikpakuani [...] ma mochiuakan nomomachtijkauan. [...] Uan xikinmachtikan de ke ma tatakamatikan”.

⁴ Jesús kineki maj nochin itatojtokakauan tanojnotsakan. Amo sayoj kinnauatij once tatitanilmej akin amo kikauayaj maj kichiuakan nejon tekit. ¿Keniuj tikmatij?  Maj titanemilikan itech nejin: ¿sayoj tatitanilmej yetoyaj iuan Jesús itech tepet ompa Galilea keman yejua tanauatij maj kinchiuakan imomachtijkauan? Amo. Maj tikelnamikikan ke ángel kiniluij siuamej: “Nankitaske [ne Galileajkopaka]”. Nejon kijtosneki ke siuamej no ompa yetoskiaj. Uan no, tatitanil Pablo kijtoj ke Jesús “monextito inixpan keme makuil ciento tokniuan taneltokani” (1 Cor. 15:6). ¿Kani monechikojkaj nejon tokniuan keman Jesús monextij?

5. ¿Toni techmachtia tein kijtoua 1 Corintios 15:6?

⁵ Onkak keyej tikneltokaskej ke itech 1 Corintios 15:6, Pablo no ika tajtojtoya keman Jesús kinnechikoj imomachtijkauan ompa Galilea kemej kijtoua Mateo capítulo 28. ¿Keyej ijkon tikijtouaj? Yekinika, porin itatojtokakauan Jesús okachi miakej katkaj galileos. Yejua ika, okachi kuali katka maj mosentilianij itech se tepet ompa Galilea uan amo itech se kali ompa Jerusalén. Ojpatika, satepan ke Jesús moajokuik monechikojkaya iniuan once itatitaniluan itech se kali ompa Jerusalén. Komo Jesús kinekiskia sayoj kinnauatis itatitaniluan maj tanojnotsakan uan maj kinchiuakan imomachtijkauan, kiniluiskiaya ompa Jerusalén uan amo monekia kiniluisok yejuan, siuamej uan oksekin maj monechikouanij iuan ompa Galilea (Luc. 24:33, 36).

6. ¿Keniuj kinextia Mateo 28:20 ke no moneki tikinchiuaskej axkan imomachtijkauan Cristo uan keniuj tikchiujtokej?

⁶ Maj tikitakan expatika taman keyej tikneltokaj ke Jesús amo sayoj kinnauatij 11 itatojtokakauan akin amo kikauayaj maj kinchiuakan imomachtijkauan. ¿Keniuj tikmatij? Porin keman Jesús kintaminauatij itatojtokakauan tein monekia kichiuaskej, kiniluij: “Niyetok namouan nochi tonalmej hasta itamiampa nochi tein mochiujtok itech taltikpak” (Mat. 28:20, TNM). Ijkon kemej Jesús kijtoj, axkan miakej kinchiujtokej imomachtijkauan Cristo. Xijxiujtika ajsitokya 300,000 taltikpakneminij moauiaj kemej itaixpantijkauan Jiova uan mochiuaj imomachtijkauan Cristo. ¡Semi kuali tein mochiujtok!

7. ¿Toni ika titajtotij uan keyej?

⁷ Miakej akin momachtiaj Biblia moauiaj. Sayoj ke sekin akin tikinmachtiaj kimouiliaj mochiuaskej imomachtijkauan Cristo. Kiuelitaj momachtiskej sayoj ke amo kiixtaliaj moauiskej. Tiknekij tikpaleuiskej akin tikmachtijtokej ika Biblia maj kichiua tein momachtia uan maj mochiua imomachtijkauj Cristo. Itech nejin tamachtilis ika titajtoti keniuj uelis tikpaleuiskej akin tikmachtiaj maj kitasojta Jiova uan maj kiixtali moauis. ¿Keyej moneki maj ika titajtokan? Porin satepan uelis monekis tikixejekoskej ox tiksentokaskej tikmachtiskej oso amo.

8. ¿Keyej uelis techouijmakas tikinpaleuiskej akin tikinmachtiaj maj kitasojtakan Jiova?

⁸ Jiova kineki maj taltikpakneminij kitekitilikan porin kitasojtaj. Yejua ika, moneki tiktemoskej tikinpaleuiskej akin tikinmachtiaj maj kiajsikamatikan ke Jiova semi ininka motekipachoua sejsemej uan ke semi kintasojta. Tiknekij tikinpaleuiskej maj kiitakan Jiova kemej “ininpopaj mikakaualmej uan akin kinmatampauia siuamej akin amo nemiok inintakauj” (Sal. 68:5). Keman akin tikinmachtiaj Biblia kiitaskej ke Dios semi kintasojta, xa yejuan no peuaskej kitasojtaskej. Sekin uelis kinouijmakas kiitaskej Jiova kemej  se tePopaj tetasojtakej porin ininpopaj amo kinnextiliaya ke kintasojtaya (2 Tim. 3:1, 3). Keman titamachtiskej, maj okachi tiknextikan ikualneskayouan Jiova. Maj tikinpaleuikan maj kiajsikamatikan ke Dios akin tetasojta kineki maj tinemikan nochipaya uan ke yejuatsin kitemoua kinpaleuis maj kiselikan nejon. ¿Toni uelisok tikchiuaskej?

9, 10. ¿Ika katiyejua amatajkuilolmej moneki ika titamachtiskej uan keyej?

⁹ Maj tiktekitiltikan amatajkuilol ¿Toni techmachtia Biblia? uan Xiksentokakan itech inetasojtalis Dios. Nejin amatajkuilolmej chijchiujtokej kemej techpaleuiskej maj kuali titamachtikan. Kemej neskayot, amatajkuilol Techmachtia itech capítulo 1 kinankilia nejin netajtanilmej: ¿Kiita Dios tein techpanoua? ¿Keniuj momachilia Dios keman kiita ke titajyouiaj? Uan Dios kineki xikonixmati. No tikpiaj amatajkuilol Inetasojtalis Dios, ¿keniuj techpaleuis? Nejin amatajkuilol kipaleuis akin tikmachtiaj maj kiajsikamati ke komo kichiua tein Biblia tayolmajxitia okachi kuali nemis uan motokis iuan Jiova. Maski  tikinmachtianijya oksekin ika nejon amatajkuilolmej, moneki maj kuali timomachtikan achto ke titamachtitiuij, ijkon tikinpaleuiskej akin tikinmachtiaj maj kichiuakan tein ayamo kichiuaj.

¹⁰ Sayoj ke maj tiknemilikan ke akin tikmachtiaj kineki ika tajtos se tamachtilis tein amo moajsi itech amaixmej tein ika titamachtiaj. Xa uelis tikiluiskej maj iselti kiixtajtolti nejon tamachtilis uan maj tiksentokakan tikmachtikan ika Techmachtia oso Inetasojtalis Dios.

11. ¿Kemanian moneki tipeuaskej tikchiuaskej netataujtil iuan akin tikmachtiaj uan keniuj uelis tikpaleuiskej maj kiita ke semi moneki?

¹¹ Maj tikchiuakan netataujtil achto ke titamachtiskej. Niman keman uelis maj tipeuakan tikchiuakan netataujtil achto ke titamachtiskej uan keman timatamiskej. Moneki tikpaleuiskej akin tikmachtiaj maj kiita ke uelis tikajsikamatiskej tein Biblia kijtoua sayoj komo techpaleuia iespíritu Dios. Ika Santiago 1:5 seki tokniuan kiniluiaj akin kinmachtiaj keyej tikchiuaj netataujtil keman titamachtiaj. Ompa kijtoua: “Komo aksame tokniuan taneltokani kipoloaj in kuali taixejekolis, ijkuakon ma kitajtanilikan Totajtsin Dios uan Yejuatsin kinmakas ne tamachilis ten kinpoloaj”. Satepan kintajtaniaj: “¿Keniuj uelis tiktajtaniskej Dios maj techmaka itamatilis?”. Akin tikmachtiaj xa kiitas ke tikseliskej sayoj komo tiktajtaniliaj Dios.

12. ¿Keniuj ika Salmo 139:2-4 uelis tikpaleuiskej akin tikmachtiaj maj okachi kuali motataujti?

¹² Maj tikmachtikan maj kichiua netataujtil. Maj tikiluikan akin tikmachtiaj ke Jiova kineki maj kitapoui tein kimachilia. Maj tikmelauilikan ke keman tiktataujtiaj uelis tikiluiskej Jiova keniuj timomachiliaj uan no uelis tikiluiskej tein amo akin tikiluiskiaj. Tein melauj, Jiova ipa kimatia nochi tein tiknemiliaj (xikonixtajtolti Salmo 139:2-4). No uelis tikiluiskej akin tikmachtiaj maj kitajtani Dios maj kipaleui maj kipata amo kuali tanemililmej uan maj kikaua tachiualismej tein Dios amo kiyolpaktiaj. Kemej neskayot, maj tiknemilikan ke se akin tikmachtiaj kiuelita yetos itech se iluit tein akin kichiuaj kemej Cristo amo moneki kichiuaskej. Yejua kimati ke nejon amo moneki kichiuas, sayoj ke kisentoka kiuelita. Maj tikiluikan maj kitapoui Jiova keniuj momachilia uan maj kitajtani maj kipaleui maj kitasojta sayoj tein yejuatsin kitasojta (Sal. 97:10).

13. 1) ¿Keyej moneki niman tikinyoleuaskej akin tikinmachtiaj maj yakan nechikolmej? 2) ¿Keniuj uelis tikpaleuiskej se akin tikmachtiaj maj kuali momachili keman yas nechikol?

¹³ Maj niman tikyoleuakan maj youi nechikolmej. Tein kikakis itech nechikol uan tein ompa kiitas akin tikmachtiaj uelis kiolinis maj kitekitili Jiova. Uelis tiknextiliskej video ¿Keniuj tikchiuaj tonechikoluan? uan maj tikyoleuakan maj touan youi. Maj tikiluikan ke uelis tikpaleuiskej maj ajsi kampa timonechikouaj. Maj tikinyoleuakan okseki tokniuan maj touan yakan keman tikmachtitij. Ijkon, kinixmatis okseki tokniuan uan okachi kuali momachilis keman yas nechikol.

14. ¿Toni kiolinis akin tikmachtiaj maj kitekitili Jiova?

¹⁴ Tiktemouaj tikinpaleuiskej akin tikinmachtiaj Biblia maj kitekitilikan Jiova (Ef. 4:13). Keman se taltikpaknenkej peua momachtia xa okachi kiyolnotsas kimatis keniuj kipaleuis. Sayoj ke keman peua okachi kitasojta Jiova, xa peuas kinemilis keniuj kinpaleuis oksekin hasta tokniuan itech nechikol (Mat. 22:37-39).  Keman tikitaskej ke uelis, maj tikiluikan akin tikmachtiaj ke uelis tikpaleuiskej iTekiuajyo Dios ika tomin.

15. ¿Keniuj uelis tiknextiliskej akin tikmachtiaj maj kiyektali se kuejmol?

¹⁵ Maj tiknextilikan keniuj uelis kiyektalis se kuejmol. Kemej neskayot, maj tikijtokan ke akin tikmachtiaj akin tanojnotsaya uan ayamo moauia, techiluia ke se tokniuj kiyolkokoj. Maj amo tikiluikan ke yejua itajtakol oso tokniuj, ta maj tikmelauilikan toni kijtoua Biblia ke moneki kichiuas. Maj tikiluikan ke uelis kitapojpoluis tokniuj uan kielkauas tein panok oso komo amo ueli, moneki maj iuan tajto akin kiyolkokoj sayoj ke keman kichiuas moneki kuali kinojnotsas uan maj kualtakat porin ijkon kuali mouikaskej (no xikonita Mateo 18:15). Maj tikpaleuikan maj achto momachti tein kiluis tokniuj. Maj tiknextilikan keniuj kitekitiltis JW Library^®, Nepaleuil tein ika momachtiaj itaixpantijkauan Jiova uan jw.org^® kampa timoteixmatiltiaj, ompa momachtis maj kiita keniuj kimelauas se kuejmol. Komo achto ke moauis kimati keniuj kiyektalis se kuejmol tein kipias iuan se tokniuj, kuali mouikas iniuan tokniuan satepan ke moauis.

16. ¿Keyej semi kuali komo tikinyoleuaj okseki tokniuan keman titamachtitij?

¹⁶ Maj tikinyoleuakan okseki tokniuan uan tokniuj takalpanojkej keman titamachtitij. ¿Keyej? Seki taman tikitakejya itech párrafo 13 uan no porin xa okseki tokniuan uelis kipaleuiskej itech seki taman tein tejuan amo tiuelij. Kemej neskayot, maj tikijtokan ke akin tikmachtiaj mochikauani amo tachichinasok, sayoj ke amo uelini. Maj tikyoleuakan se tokniuj akin no ijkon kipanok, yejua uelis kiyolmajxitis seki taman tein kipaleuis. Komo amo kuali timomachiliaj titamachtiskej iixpan se tokniuj akin kuali tamachtia, maj tikiluikan maj yejua tamachti. Akin tikmachtiaj uelis kipaleuis kimatis tein tokniuan kipanouanij. Maj tikelnamikikan ke tein tiktemouaj yejua maj kitekitili Jiova.

17, 18. ¿Toni techpaleuis maj tikixejekokan ox tikmachtiskejok se taltikpaknenkej?

¹⁷ Komo akin tikmachtiaj amo kichiua tein momachtia, ejkos tonal keman monekis timotajtaniskej: “¿Amo monekiok nikmachtis?”. Achto ke tikixtaliskej tein tikchiuaskej, moneki kuali tikitaskej ox taltikpaknenkej ijsiujka kiajsikamati teisa. Sekin niman kichiuaj tein momachtiaj uan oksekin amo. Maj timotajtanikan: “¿Mochikaujtok kichiuas tein Jiova kiyolpaktia? Niman ke kiajsikamati teisa, ¿mochikaua ijkon kichiuas?” (Mat. 28:20). Xa se akin tikmachtiaj amo niman kichiuas nochi tein kijtoua Biblia. Sayoj ke moneki kipatatiyas seki taman tein amo kuali tein kichiua.

¹⁸ Sayoj ke, ¿toni moneki tikchiuaskej  komo akin tikmachtianijya miak tiempo amo kinextia ke kipatiuita nemachtil? Maj tiknemilikan nejin: se akin tikmachtiaj motamimachtijya amatajkuilol Techmachtia, uan xa hasta peuakya momachtia amatajkuilol Inetasojtalis Dios, sayoj ke ayamo yajtok nion se nechikol nion no keman moelnamiki imikilis Cristo. Miakpa amo momachtia porin kijtoua ke kichiuati teisa. Komo akin tikmachtiaj ijkon kichiua moneki iuan titajtoskej uan tikiluiskej ke amo tikmachtiskejok. *

19. ¿Toni uelis tikiluiskej akin kinextia ke amo kipatiuita momachtis uan itech toni moneki titanemiliskej?

¹⁹ Uelis tiktajtaniskej: “¿Toni kichiua maj mitsonouijmaka tionmochiuas itaixpantijkauj Jiova?”. Akin tikmachtiaj uelis tanankilis: “Nikuelita nimomachtis Biblia sayoj ke amo keman nimochiuas itaixpantijkauj Jiova”. Komo ijkon tanemilia satepan ke tikmachtijkejya miak tiempo, ¿tikijtoskiaj ke moneki maj tiksentokakan tikmachtikan? Sayoj ke no, xa ijkuak techiluis tein kitsakuilia maj amo kitekitili Dios. Kemej neskayot, xa kinemilia ke amo keman uelis tanojnotsas kajkalpan. Keman tikmatiskejya keniuj momachilia uelis tikmatiskej keniuj tikpaleuiskej.

20. ¿Keniuj Hechos 13:48 uelis techpaleuis maj tikixejekokan ox tiksentokaskej tikmachtiskej se taltikpaknenkej?

²⁰ Tetayokoltij tikijtoskej ke sekin akin tikinmachtiaj Biblia kichiuaj kemej israelitas itech itonaluan Ezequiel. Keman Jiova kijtoj tein kichiuayaj, kiluij Ezequiel: “Yejuan mitsitaj kemej akin kualtsin mokuikatia iixpan akin kitasojta uan kemej akin semi kualtsin tatsotsona. Kikakiskej tein tikiniluis, sayoj ke amo kichiuaskej” (Ezeq. 33:32). Uelis techouijmakas tikiluiskej akin tikmachtiaj ke amo tikmachtiskejok, sayoj ke tikmatij ke “amo uejkauas ok uan moualuikas Cristo” (1 Cor. 7:29). Yejua ika amo moneki tikmachtiskejok akin amo kinextia ke kineki kitekitilis Dios, ta okachi kuali maj tikintemokan akin kinextiaj ke kinekij kiseliskej “nemilis nochipaya” (xikonixtajtolti Hechos 13:48, TNM).

21. ¿Katiyejua texto mokuis itech xiuit 2020 uan toni techpaleuis maj tikchiuakan?

²¹ Texto tein mokuis itech xiuit 2020, techpaleuis maj tiknemilikan keniuj okachi kuali uelis tikinchiuaskej imomachtijkauan Cristo. Kijtoua seki taman tein Jesús kijtoj keman monechikoj iniuan itatojtokakauan itech se tepet ompa Galilea. Kijtoj: ‘Xiyakan [...,] xikinchiuakan nomomachtijkauan. Uan xikinauikan’ (Mat. 28:19).