TAMACHTILIS 4
Keyej timosentiliaj keman moelnamiki imikilis Cristo
“Xiksentokakan xikchiujtokan nejin uan ika xinechelnamikikan” (LUC. 22:19, TNM).
NEKUIKATIL 20 Tiktemakak motasojKonetsin
TEIN MOITAS *
1, 2. 1) ¿Kemanian okachi tikelnamikij aksa akin momikilij akin semi tiktasojtayaj? 2) ¿Toni kichiuak Jesús youak achto ke momikiliskia?
MASKI aksa akin tiktasojtayaj uejkaujya momikilij, nochipa tikelnamikij, okachiok keman ajsi tonal keman momikilij.
2 Nochi xiujmej, itech nochi taltikpak, millones taltikpakneminij timosentiliaj itech tonal keman moelnamiki imikilis Jesucristo, akin semi tiktasojtaj (1 Ped. 1:8). Ijkon tikelnamikij akin techmakixtij itech tajtakol uan mikilis keman kitemakak inemilis (Mat. 20:28). Jesús kinekia maj imomachtijkauan kielnamikinij imikilis. Youak achto ke momikiliskia, kichiuak se takualis uan kitemakak nejin tanauatil: “Xiksentokakan xikchiujtokan nejin uan ika xinechelnamikikan” (Luc. 22:19, TNM).
3. ¿Toni tikitaskej itech nejin tamachtilis?
3 Millones taltikpakneminij mosentiliaj keman moelnamiki imikilis Cristo. Akin mosentiliaj nejon tonal, sayoj sekin kichiaj yaskej iluikak. Oksekin, akin okachi miakej, kichiaj nemiskej nikan taltikpak. Itech nejin tamachtilis tikitaskej miak taman tein kichiua maj akin yaskej iluikak uan akin nemiskej nikan taltikpak mosentilikan nochi xiujmej keman moelnamiki imikilis Cristo. No tikitaskej keyej techpaleuia nejon nechikol. Yekinika maj tikitakan seki taman tein kichiua maj tokniuan taixpejpenalmej mosentilikan nejon tonal.
KEYEJ MOSENTILIAJ TOKNIUAN TAIXPEJPENALMEJ
4. ¿Keyej tokniuan taixpejpenalmej kikuaj pan uan tayij vino keman moelnamiki imikilis Cristo?
4 Se taman tein kichiua maj tokniuan taixpejpenalmej mosentilikan xijxiujtika keman moelnamiki imikilis Cristo yejua ke kikuaj pan uan tayij vino. ¿Keyej ueli kichiuaj nejon? Uelis tiknankiliskej nejin netajtanil komo tikelnamikij tein kichiuak Jesús youak achto ke momikiliskia. Satepan ke kichiujkej Pascua, Jesús kiixtalij maj mochiua tein axkan moixmati kemej iTakualis toTekotsin. Kinpanoltilij pan uan vino 11 itatitaniluan akin amo kikaujkaj uan kiniluij maj kikuanij uan maj tayinij. No ika tajtoj ome netenkaualismej: yankuik netenkaualis uan netenkaualis ika Tekiuajyot (Luc. 22:19, 20, 28-30). * Nejon ome netenkaualis tapaleuij maj nejon tatitanilmej uan okseki tokniuan mochiuakan tekiuanij uan tiopixkamej ompa iluikak (Apoc. 5:10; 14:1). Tokniuan taixpejpenalmej akin yetokejok nikan taltikpak moajsij itech nejin ome netenkaualismej, uan yejua ika sayoj yejuan ueli kikuaj pan uan tayij vino keman moelnamiki imikilis Cristo.
5. ¿Toni kimatij tokniuan taixpejpenalmej ika nechialis tein kipiaj?
5 Okse taman tein kichiua maj tokniuan taixpejpenalmej mosentilikan keman moelnamiki imikilis Cristo yejua ke ueli itech tanemiliaj tein kichiaj kiseliskej. Jiova kinmakak se kualtsin nechialis: maj nemikan iluikak uan maj amo kemanok momikilikan, maj tekiuajtikan iuan Jesucristo akin oksepa nemik uan iniuan okseki tokniuan taixpejpenalmej uan tein okachi kualtsin, maj yetokan iixpan Jiova (1 Cor. 15:51-53; 1 Juan 3:2, TNM). Tokniuan taixpejpenalmej kimatij ke kinixpejpenkej maj kiselikan nejin tatiochiualismej, sayoj ke moneki kisentokaskej kitakamatiskej Jiova hasta keman momikiliskej (2 Tim. 4:7, 8). Semi yolpakij keman itech tanemiliaj tein uelis kiseliskej (Tito 2:13). ¿Uan keyej ‘okseki ichkamej’ no mosentiliaj keman moelnamiki imikilis Cristo? (Juan 10:16). Maj tikitakan seki taman.
KEYEJ MOSENTILIAJ OKSEKI ICHKAMEJ
6. ¿Keyej okseki ichkamej mosentiliaj nochi xiujmej keman moelnamiki imikilis Cristo?
6 Okseki ichkamej amo kikuaj pan nion tayij vino, sayoj ke no mosentiliaj ika yolpakilis keman moelnamiki imikilis Cristo. Itech xiuit 1938 yekinika kinyoleujkej akin kichiaj nemiskej nikan taltikpak maj no mosentilikan itech nejon nechikol. Itech amaix La Torre del Vigía metsti abril xiuit 1938 moijtoj ke “kinamiki” maj okseki ichkamej “moajsikan itech nejon nechikol uan maj kiitakan tein mochiua”. Uan no moijtoj: “Ijkuak moneki yolpakiskej uan kinamiki maj yolpakikan”. Okseki ichkamej mosentiliaj ika yolpakilis keman moelnamiki imikilis Cristo, ijkon kemej kichiuaj akin kinyoleuaj maj mosentilikan keman aksa monamiktia.
7. ¿Keyej okseki ichkamej kinekij kikakiskej tanojnots tein motemaka keman moelnamiki imikilis Cristo?
7 Okseki ichkamej no itech tanemiliaj tein kichiaj kiseliskej. Kinekij kikakiskej tanojnots tein motemaka keman moelnamiki imikilis Cristo porin ika tajtoua tein kichiuaskej Cristo uan 144,000 keman tekiuajtiskej Mil Xiujmej. Tokniuan taixpejpenalmej kinixyekanas ininTekiuaj Jesucristo keman kichiuaskej maj taltikpak mochiua se Xochital uan kinpaleuiskej taltikpakneminij maj amo tajtakolejkejok. Millones akin mosentiliaj keman moelnamiki imikilis Cristo semi yolpakij keman itech tanemiliaj tonal keman mochiuas tein Jiova kijtoj, kemej tein moajsi itech Isaías 35:5, 6; 65:21-23 uan Apocalipsis 21:3, 4. Keman kinemiliaj ke moajsijya itech yankuik taltikpak iniuan ininchankauan, okachi takuaujtamatij ke kiseliskej tein kichiaj uan kinekij kisentokaskej kitekitiliskej Jiova (Mat. 24:13, TNM; Gál. 6:9).
8. ¿Keyej okseki ichkamej no mosentiliaj keman moelnamiki imikilis Cristo?
8 Okseki ichkamej no mosentiliaj keman moelnamiki imikilis Cristo porin kinekij kinnextiliskej tokniuan taixpejpenalmej ke kintasojtaj uan ke kinpaleuiaj. Itech iTajtol Dios moijtojka ke tokniuan taixpejpenalmej uan akin kichiaj nemiskej nikan taltikpak sentekitiskiaj. Maj tikitakan seki tajkuilolmej tein kinextiaj nejon.
9. Kemej kijtoua Zacarías 8:23, ¿keniuj okseki ichkamej kinitaj tokniuan taixpejpenalmej?
9 (Xikonixtajtolti Zacarías 8:23). Nejin tajkuilol kualtsin kimelaua keniuj okseki ichkamej kinitaj tokniuan takamej uan siuamej taixpejpenalmej. Keman kijtoua “se judío” uan “namouan” ininka tajtojtok tokniuan taixpejpenalmej akin yetokejok nikan taltikpak (Rom. 2:28, 29). “Majtakti takamej akin tajtouaj tataman tajtolmej” kinixnextiaj okseki ichkamej. Yejuan kemej yeskia mokitskiaj inintech tokniuan taixpejpenalmej porin nochipa kinpaleuiaj uan iniuan kiueyichiuaj Jiova. Keman moelnamiki imikilis Cristo, okseki ichkamej kinextiaj ke kinpaleuiaj tokniuan taixpejpenalmej keman iniuan mosentiliaj nejon tonal.
10. ¿Keniuj kichiuani Jiova tein kijtoua Ezequiel 37:15-19, 24, 25?
10 (Xikonixtajtolti Ezequiel 37:15-19, 24, 25). Jiova kichiuani tein kijtouaj nejin tajkuilolmej porin tokniuan taixpejpenalmej uan okseki ichkamej kualtsin sentekitij. Nejin tajkuilolmej ika tajtouaj ome koujmej. Akin kichiaj nemiskej iluikak kemej yeskiaj kouit “tein iaxka Judá” (kalyetouanij kampa kinixpejpenayaj akin tekiuajtiskiaj Israel). Uan akin kichiaj nemiskej nikan taltikpak kemej yeskiaj kouit “tein iaxka Efraín”. * Jiova kinsentiliskia uan mochiuaskiaj “sayoj se kouit”. Nejin kijtosneki ke sentekitiskiaj ika itaixyekanalis inintekiuaj, Cristo Jesús. Xijxiujtika, keman moelnamiki imikilis Cristo, tokniuan taixpejpenalmej uan okseki ichkamej amo moxexelouaj, ta mosentiliaj kemej sayoj ‘se sen oloch yetolis de ichkamej’ ika “sayo se tapixke” (Juan 10:16).
11. ¿Itech toni okachi tapaleuiaj “ichkame” tein ininka motajtoua itech Mateo 25:31-36, 40?
11 (Xikonixtajtolti Mateo 25:31-36, 40). “Ichkame” tein ininka motajtoua itech nejin tajkuilolmej kinixnextiaj taltikpakneminij yolmelaujkej akin nemij itech nejin itamian tonalmej uan kichiaj nemiskej nikan taltikpak, tein kijtosneki, okseki ichkamej. Yejuan nochipa kinpaleuiaj tokniuan taixpejpenalmej akin yetokejok nikan taltikpak, oso iikniuan Cristo. Okachi kinpaleuiaj itech se ueyi tekit tein kipiaj: kiteixmatiltiskej iTajtol Dios itech nochi taltikpak uan tamachtiskej (Mat. 24:14; 28:19, 20).
12, 13. ¿Keniuj okseki ichkamej no kinpaleuiaj iikniuan Cristo?
12 Nochi xiujmej, achto ke moelnamikis imikilis Cristo, okseki ichkamej kinpaleuiaj tokniuan taixpejpenalmej. ¿Keniuj? Keman kinyoleuaj taltikpakneminij maj mosentilikan nejon tonal, se taman tein mochiua itech nochi taltikpak (xikonita recuadro “ ¿Tikonnemilijya toni tikonchiuas keman moelnamikis imikilis Cristo?”). Okseki ichkamej kichiuaj nochi tein monekis keman moelnamikis imikilis Cristo, maski itech ininnechikol amo onkakej tokniuan taixpejpenalmej. Yejuan semi kinyolpaktia ijkon kinpaleuiskej iikniuan Cristo. Kimatij ke nochi nepaleuil tein kinmakaj tokniuan taixpejpenalmej, Jesús kiita ke kemej yeskia yejua kipaleuiaj (Mat. 25:37-40).
13 Komo tikchiaj tinemiskej iluikak oso nikan taltikpak, ¿keyej moneki timosentiliskej keman moelnamiki imikilis Cristo?
KEYEJ TIMOSENTILIAJ KEMAN MOELNAMIKI IMIKILIS CRISTO
14. ¿Keniuj Jiova uan Jesús technextilianij ke semi techtasojtaj?
14 Porin tiktasojkamatij netasojtalis tein Jiova uan Jesús technextiliaj. Jiova technextiliani ika miak taman ke semi techtasojta. Sayoj ke okachi technextilij inetasojtalis keman kiualtitanik iKonetsin maj toka tajyouiki uan momikiliki (Juan 3:16). Jesús no kinextij ke techtasojta keman kitemakak inemilis (Juan 15:13). Melauj ke amo keman uelis tikinixtauiliskej nochi tein toka kichiuanij porin techtasojtaj, sayoj ke uelis tikinnextiliskej ika tein tikchiuaj ke timotasojkamatij (Col. 3:15). Keman timosentiliaj keman moelnamiki imikilis Cristo, tiktasojkamatij ininnetasojtalis uan tikinnextiliaj ke no tikintasojtaj.
15. ¿Keyej tokniuan taixpejpenalmej uan okseki ichkamej semi kitasojkamatij inemilis Jesús tein kitemakak?
15 Porin semi tiktasojkamatij inemilis Jesús tein kitemakak (Mat. 20:28). Tokniuan taixpejpenalmej kipatiuitaj inemilis Jesús tein kitemakak porin ijkon ueli kichiaj nemiskej ompa iluikak. Uan kemej itech takuaujtamatij, Jiova kinita ke yolchipaujkej uan kinselia kemej ikoneuan (Rom. 5:1; 8:15-17, 23). Okseki ichkamej no kipatiuitaj inemilis Jesús tein kitemakak porin kemej itech takuaujtamatij, ueli kiseliaj itatiochiualis Dios, ueli kitekitiliaj uan uelis makisaskej itech okachi ueyi tajyouilis (Apoc. 7:13-15). Keman tokniuan taixpejpenalmej uan okseki ichkamej mosentiliaj nochi xiujmej keman moelnamiki imikilis Cristo, kinextiaj ke kitasojkamatij inemilis tein kitemakak.
16. ¿Keyej no timosentiliaj keman moelnamiki imikilis Cristo?
16 Porin tiknekij tiktakamatiskej Jesús. Komo tikchiaj tinemiskej iluikak oso nikan taltikpak, tinochin tiknekij tiktakamatiskej tanauatil tein Jesús kitemakak youak keman kiixtalij maj moelnamiki imikilis: “Xiksentokakan xikchiujtokan nejin uan ika xinechelnamikikan” (1 Cor. 11:23, 24, TNM).
KEYEJ TECHPALEUIA TIMOSENTILISKEJ KEMAN MOELNAMIKI IMIKILIS CRISTO
17. ¿Keyej techpaleuia maj okachi timotokikan iuan Jiova keman tikelnamikij imikilis Cristo?
17 Porin kichiua maj okachi timotokikan iuan Jiova (Sant. 4:8). Kemej tikitakejya, timosentiliskej keman moelnamiki imikilis Cristo techpaleuia maj itech titanemilikan tein Jiova kijtoua ke tikseliskej uan ueyi netasojtalis tein technextiliani (Jer. 29:11; 1 Juan 4:8-10). Senkis titakuaujtamatij ke tikseliskej tein tikchiaj uan ke Jiova nochipa techtasojtas. Keman itech titanemiliaj nejin, okachi tiktasojtaj Jiova uan okachi kuali timouikaj iuan (Rom. 8:38, 39).
18. ¿Keniuj techpaleuia komo itech titanemiliaj tein Jesús kichiuak?
18 Porin techolinia maj tikchiuakan kemej Jesús (1 Ped. 2:21). Seki tonalmej achto ke tikelnamikiskej imikilis Cristo, tikixtajtoltiaj itech Biblia tein kichiuak itech semana keman momikiliskia, tein panok keman momikilij uan keman oksepa nemik. Ompa, tanojnots tein motemaka youak keman tikelnamikij imikilis Cristo, techelnamiktia ke Jesús semi techtasojta (Efes. 5:2; 1 Juan 3:16). Keman tikixtajtoltiaj tein Jesús kichiuak uan itech titanemiliaj, techolinia maj tiksentokakan tinemikan “ijkon keme Cristo chipaukanemik” (1 Juan 2:6).
19. ¿Toni techpaleuis maj tiksentokakan kuali timouikakan iuan Dios?
19 Porin kichiua maj tiksentokakan tiknekikan kuali timouikaskej iuan Jiova (Jud. 20, 21). Keman timochikauaj tiktakamatiskej Jiova, tikueyitaliskej itokay uan tikyolpaktiskej techpaleuia maj tiksentokakan kuali timouikakan iuan (Prov. 27:11; Mat. 6:9; 1 Juan 5:3). Keman timosentiliaj keman moelnamiki imikilis Cristo techpaleuia maj mojmostaj tikiluikan Jiova ika tein tikchiuaj: “¡Nikneki nochipa kuali nimouikas mouan!”.
20. ¿Keyej moneki timosentiliskej keman moelnamikis imikilis Cristo?
20 Komo tikchiaj tinemiskej iluikak oso nikan taltikpak, xijxiujtika moneki timosentiliskej keman moelnamiki imikilis Cristo. Ijkon tikelnamikij Jesucristo, akin semi tiktasojtaj. Uan no, tikelnamikij ueyi netasojtalis tein Jiova technextilij keman kitemakak iKonetsin maj techmakixti. Itech nejin xiuit, tikelnamikiskej imikilis Cristo viernes 15 metsti abril xiuit 2022. Tiktasojtaj Jiova uan iKonetsin. Yejua ika, keman moelnamikis imikilis Jesús amo tikchiuaskej okse taman, ta tietoskej itech nechikol tein mochiuas nejon tonal.
NEKUIKATIL 16 Xikueyitalikan Dios porin kiixtalij Jesús
^ Komo tikchiaj tinemiskej iluikak oso itech Xochital nikan taltikpak, nochi xiujmej tiknekij timosentiliskej keman moelnamikis imikilis Cristo. Itech nejin tamachtilis tikitaskej ika Biblia keyej moneki timosentiliskej nejon tonal uan keniuj techpaleuia komo tikchiuaj.
^ Okachi ika motajtoua yankuik netenkaualis uan netenkaualis ika Tekiuajyot itech tamachtilis “Mochiuaskej ‘tekiuanij uan tiopixkamej’”, tein kisak itech amaix Tanejmachtijkej 15 metsti octubre xiuit 2014, páginas 15 hasta 17.
^ Okachi momelaua tein kijtosnekij nejin ome koujmej tein ika tajtoua Ezequiel capítulo 37 itech taxelol “Tein tajtanij akin taixtajtoltiaj”, tein kisak itech amaix Tanejmachtijkej julio 2016 página 31 uan 32.
