Xikontekitili Jiova ika yolpakilis
¿ITECH katiyejua tonal tikonijtoskia tejuatsin ke okachi tionyolpakik? Sekin kijtoskej ke tonal keman monamiktijkej. Oksekin ke tonal keman yolik yekinika ininkonetsin. Sayoj ke tikyekmatij ke tejuatsin tikonita ke tonal tein okachi moneki uan keman okachi tionyolpakik yejua tonal keman tionmoauij. Tokniuan yolpakkej keman mitsonitakej tikonnextij ke tikontasojta Dios ika nochi moyolo, monemilis, motanemilil uan mochikaualis (Mar. 12:30).
Tikyekmatij ke itech tonal keman tionmoauij hasta axkan, tikonpanouani miak taman itech itekiyo Jiova tein mitsonualkuilia yolpakilis. Sayoj ke seki tokniuan amo semi kinyolpaktiaok kitekitiliskej Dios. ¿Keyej ijkon momachiliaj? ¿Keyej moneki tiksentokaskej tiktekitiliskej Dios ika yolpakilis? Maj tikitakan.
KEYEJ SEKIN AMO YOLPAKIJOK
Kuali tanauatilmej ika iTekiuajyo Dios techtelyolpaktia, porin Jiova motenkaua ke amo uejkaua nejon Tekiuajyot kitamis tein amo kuali tein mochiujtok itech nejin taltikpak uan kiualkuis se xochital. Sofonías 1:14 kijtoua: “Iueyi tonal Jiova amo uejka yetok”. Maski ijkon, xa tiknemiliskej ke itonal Jiova okachi uejkaua ke tein tikchiayaj. Komo ijkon titanemiliaj, uelis tikpoloskej yolpakilis uan amo semi tiktekitiliskejok Dios kemej achto (Prov. 13:12).
Keman timosentiliaj iniuan tokniuan techpaleuia maj tiktekitilikan Dios ika yolpakilis. Tein melauj, xa se taman tein techolinij maj timochiuakan tiitaixpantijkauan Jiova yejua keman tikitakej ke itekitikauan Dios kuali monejnemiltiaj (1 Ped. 2:12). Sayoj ke komo se tokniuj kichiua teisa tein amo kuali, uelis tiyolkuetauiskej uan amo tiyolpakiskejok.
Okse taman tein uelis kichiuas maj tiyolkuetauikan yejua keman tiknekij tikpiaskej okachi miak taman uan okachi tomin. Satanás uan akin kinixyekana kinekij kichiuaskej maj tikneltokakan ke moneki tikouaskej seki taman tein yekmelauj amo techpoloua. Sayoj ke maj tikelnamikikan tein kijtoj Jesús: “Amo aken uelis kintekitilis ome patrones, porin komo ijkon kichiua, ijkuakon yejua kitauelitas se patrón uan kitasojtas in okse, oso kimouistilis se patrón uan amo kiueyichiuas in okse. Amo aken uelis kintekitilis nijin ome patrones sepa san, ijkon keme Totajtsin Dios uan in ricojyot de nikan taltikpak” (Mat. 6:24). Komo tiktemouaj tikpiaskej nochi tein onkak itech nejin taltikpak, amo tiktekitiliskej Jiova ika yolpakilis.
KEYEJ MONEKI TIKTEKITILISKEJ DIOS IKA YOLPAKILIS
Keman tiktasojtaj Jiova, amo tikitaj ke semi ouij tiktekitiliskej (1 Juan 5:3). Jesús kijtoj: “Xiualakan nouan, nochi namejuan naken nanmotekitiltijtokke uan nantamamatokke ika ne tajyouilis de namotajtakoluan. Xiualakan namejuan nouan, uan Nejuatsin namechmakas ne yolseuilis. Uan nikneki xikselikan notamachilis itech namonemilispan, keme se yugo ten uelis namechyekantinemis tech moojpan. Uan ika kuali ximomachtikan de nejua, porin Nejuatsin niyolyemankatagat; uan niyolkualtagat uan ijkon nankajsiske ne yolseuilis tech namoyolojuan. Porin in yugo de namechtalilis, yejua ne semi amo etik. Uan in tamamal ten Nejuatsin namechmakas, yejua ne semi amo no tesiouti” (Mat. 11:28-30). Nejin kinextia ke yekmelauj tikchiuaskej kemej Cristo techyolseuia uan techualkuilia yolpakilis. Senkis moita ke onkak keyej tiktekitiliskej Jiova ika yolpakilis. Maj tikitakan eyi (Hab. 3:18).
Tiktekitiliaj toTachijchiujkauj, Dios akin yolpaki (Hech. 17:28; 1 Tim. 1:11, TNM). Tinochin tikmatij ke Jiova techmakak tonemilis. Komo itech titanemiliaj nejin techpaleuis maj tiksentokakan tiktekitilikan ika yolpakilis, maski miak xiujmej achtoya timoauijkej.
Héctor mochikaua kisentokas tanojnotsas uan nochipa kielnamikis ke kichia nemis itech Xochital
Xikonnemili tein kipanotok se tokniuj akin monotsa Héctor. Yejua tekitik kemej takalpanojkej 40 xiujmej. Maski axkan xiuejya, kisentoka kitekitilia Jiova ika yolpakilis (Sal. 92:12-14). Inamik motelkokoua, yejua ika tokniuj amo semi ueli kitekitiliaok Dios kemej achto. Sayoj ke kisentoka yolpaki. Kijtoua ke kitayokoltia kiitas ke inamik okachi tanaui. Uan maski ouij kikisa kiyekpias, amo kikaua maj nejon kichiua maj amo kiyolpaktiok kitekitilis Dios. Keman kinemilia keyej Jiova techchijchiuak, kiolinia maj kitasojta uan maj kitekitili ika nochi iyolo. Yejua ika mochikaua kisentokas tanojnotsas uan nochipa kielnamikis ke kichia nemis itech Xochital. Nejin kipaleuia maj kisentoka kitekitili Jiova ika yolpakilis.
Jiova kiualtitanik iKonetsin maj toka momikiliki. Biblia kijtoua ke “Totajtsin Dios semi kintasojtak in taltikpakuani. Ika ya nojon Yejuatsin kualtitanik Iyojtsin Ikonetsin de Dios para ma nochi ne ten iuantsin takuautamatiske, yejuan nojonkes ma amo ixpoliuikan. Ta, ma kipiakan ne yek nemilis nachipa” (Juan 3:16). Komo titakuaujtamatij itech nejin netetayokolil tein Dios techmakak ika netasojtalis, yejuatsin uelis techtapojpoluis totajtakoluan uan techmakas nemilis nochipaya. ¿Melauj ke nejin se taman tein tel kuali tein techolinia maj timotasojkamatikan? Komo tiktasojkamatiliaj Dios nejin netetayokolil techolinis maj tiktekitilikan ika yolpakilis.
Jesús kiixtalij amo kipias miak taman itech inemilis uan kitekitilij Jiova ika yolpakilis miak xiujmej
Itech ueyi altepet México, se tokniuj akin monotsaya Jesús kijtoj ke semi kitayekanaltiaya itekiuj. Kemansa kiixpejpenaya tekitis tel miak horas mojmostaj porin kinekia kitanis okachi tomin. Sayoj ke satepan kiixmatik Jiova uan kimatik ke yejuatsin kitemakaka iKonetsin akin kiteltasojta maj toka momikili. Kemej kitelnekia kitekitilis Dios, motenkauak ijkon kichiuas nochi inemilis. Uan no, maski kiajxitijkaya 28 xiujmej kampa tekitia, kiixtalij kikauas nejon tekit. Ijkon Jesús peuak kitekitilia Dios ika yolpakilis.
Akin tikchiuaj kemej Cristo tichipaujkanemij. ¿Tikonelnamiki keniuj katka monemilis achto ke tikonixmatiskia Jiova? Tatitanil Pablo kinelnamiktij tokniuan akin nemiaj Roma ke achto ke mochiuaskiaj itatojtokakauan Cristo katkaj ‘itekitikauan tajtakol’, sayoj ke satepan mochiujkej ‘tekitinij de ne chipaujkanemilis uan ne yolchipaualis’. Kemej chipaujkanemiaj, ueliskiaj kiseliskej nemilis nochipaya (Rom. 6:17-22). Tejuan no tiktakamatij itanauatiluan Dios. Yejua ika amo moneki tikijyouiskej tein amo kuali tein teualkuilia auilnemilis oso tateuilis. ¿Melauj ke nejon kichiua maj tiyolpakikan?
Jaime kijtoua ke peuak yekmelauj yolpaki keman peuak kitekitilia Jiova
Maj tikitakan tein kipanok se tokniuj akin monotsa Jaime. Achto ke mochiuaskia itaixpantijkauj Jiova, katka boxeador. Uan no, amo kineltokaya Dios, ta kineltokaya ke nemilis iselti peuak. Keman peuak youi nechikolmej, semi kiyololinij kiitas netasojtalis tein tokniuan mopialiaj. Kiixtalij kipatas inemilis, sayoj ke monekik kitajtanis Jiova maj kipaleuiani maj kineltokani ke yejuatsin yekmelauj nemi. Jaime kijtoua: “Yolik nikajsikamattiyajki ke Jiova se tePopaj akin semi tetasojta uan teiknelia”. Kijtoua ke kitakamatis Dios kimatampauiani. No kijtoua ke komo amo kipataskia inemilis, axkan xa amo yoltoskiaok, ijkon kemej kinpanok seki itasojikniuan akin no katkaj boxeadores. Kiyekmati ke peuak yekmelauj yolpaki keman peuak kitekitilia Jiova.
MAJ AMO TISIOUIKAN
Keman tikchiaj maj tami tein amo kuali tein mochiujtok itech nejin taltikpak, ¿toni moneki tikchiujtoskej? Tikchiujtokejya tein Dios kijtoua uan tikchiaj tinemiskej nochipaya. Yejua ika maj tiksentokakan tiktakamatikan tein tayolmajxitia Gálatas 6:8, 9: “Ma amo keman tisiouitij de tikchiutinemiske ten kuali. Porin komo amo timoyojyolkuepatij de totakuautamatilis, ijkuakon tiselijtiyaske in taxtauil ne tonal kuak Dios kimonekiltis”. Maj timopaleuikan itech Jiova uan maj timochikauakan titaxikoskej, tikpiaskej kualneskayomej tein monekis tiknextiskej keman tikpanotoskej okachi ueyi tajyouilis uan tiksentokaskej tiktekitilijtoskej toDios ika yolpakilis (Sant. 1:2-4; Apoc. 7:9, 13, 14).
Komo titaxikouaj, uelis tikyekmatiskej ke Jiova techtiochiuas. ¿Keyej? Porin yejuatsin kimati nochi tein tikchiuaj itech itekiyo uan kimati ke tiktasojtaj yejuatsin uan itokay. Komo tiksentokaj tiktekitiliaj ika yolpakilis, timomachiliskej kemej David keman kijtoj: “Niktalijtok Jiova noixpan nochipa. Porin yejua moajsi noyekmakopa, amo keman teyi nechuetsiltis. Yejua ika noyolo paki” (Sal. 16:8, 9).