1. ¿Toni tein kuali kichiua inemilis Jesús tein kitemakak?

INEMILIS Jesús tein kitemakak kichiua maj tikselikan miak tatiochiualismej. Kemej neskayot, kichiua maj se tonal nochin ikoneuan Adán akin kitasojtaj melaujkayot maj ueli pouikan itech ichankauan Dios (xikonita kampa kijtoua “Tein okachi momelaua”). No kichiua maj ueli tinemikan nochipaya. Sayoj ke amo sayoj ueli kichiua nejon. No mouika ika okseki taman tein motelneki iniuan nochin akin nemij ompa iluikak uan nikan taltikpak (Heb. 1:8, 9).

2. 1) ¿Toni taman tein motelneki ompa iluikak uan nikan taltikpak ika tajtoj Jesús itech netataujtil padrenuestro? (Xikonita taixkopin ipeujyan tamachtilis.) 2) ¿Toni tikitaskej itech nejin tamachtilis?

² Kemej ome xiuit achto ke momikiliskia, Jesús kinmachtij imomachtijkauan maj motataujtikan: “ToTajtsin akin tiyetok iluikak, maj moueyitali motokay. Maj uiki motekiuajyo. Maj mochiua motanejnekilis, kemej iluikak, no ijkon nikan taltikpak” (Mat. 6:9, 10, TNM). Itech nejin tamachtilis tikitaskej keniuj inemilis Jesús tein kitemakak tapaleuia 1) maj moueyitali itokay Jiova, 2) maj uiki iTekiuajyo uan 3) maj mochiua itanejnekilis.

3. 1) ¿Toni kiixnextia itokay Dios? 2) ¿Keniuj Satanás kichiuak maj amo kuali ika motajto Jiova?

³ Tein Jesús yekinika tajtanik yejua maj moueyitali itokay Dios, oso maj mopoujkaita porin yektik. Nejin tokayit kiixnextia Jiova uan kemej tamati. Yejuatsin kipia okachi uelilis uan okachi melauak itech nochi tein onkak. Jesús kitokaytij “Noueyimouiskatajtsin” (Juan 17:11). Kemej Jiova yektik, nochi tein kichiua no yektik, hasta itanauatiluan. Sayoj ke itech xochital tein moajsia Edén, Satanás kuali kinemilij keniuj taomeyolotis ke Dios amo kinamiki kinmakas tanauatilmej taltikpakneminij. Kitakajkayauilij uan kichiuak maj amo kuali ika motajto (Gén. 3:1-5).

4. ¿Keniuj Jesús kiueyitalij itokay Jiova?

⁴ Jesús amo kichiuak kemej Satanás, ta yejua yekmelauj kitasojtaya itokay Dios. Yejua ika mochikauak kiueyitalis (Juan 17:25, 26). ¿Keniuj kiueyitalij? Ika itachiualisuan uan itamachtilis. Ijkon kinpaleuij oksekin maj kiitakan ke itanauatiluan Jiova melaujkej uan ke nochi tein techtajtania techpaleuia (xikonixtajtolti Salmo 40:8-10). Jesús amo keman kikauak Jiova maski Satanás semi kitajyouiltij keman kimiktij. Kinextij ke se takat akin amo tajtakolej kemaj ueli senkis kitakamati Jiova.

5. ¿Keniuj uelis tikueyitaliskej itokay Jiova?

⁵ Uan tejuan, ¿keniuj tiknextiaj ke tiktasojtaj itokay Jiova? Ika tein tikchiuaj. Jiova kichia maj tichipaujkej (xikonixtajtolti 1 Pedro 1:15, 16). Yejua ika sayoj tikueyichiuaj yejuatsin uan tiktakamatij ika nochi toyolo. Hasta keman techtajyouiltiaj, timochikauaj tinemiskej kemej Jiova techmachtia. Keman tiktakamatij itanauatiluan, tikueyitaliaj itokay (Mat. 5:14-16). Uan no, tiknextiaj ke itanauatiluan melaujkej uan ke Satanás se takajkayaujkej. Melauak ke timopolouaj porin titajtakouanij. Sayoj ke timoyolnonotsaj uan timochikauaj amo tikchiuaskej tein yeski tein kichiuas maj amo kuali ika motajto Jiova (Sal. 79:9).

6. ¿Keyej Jiova ueli techita ke timelaujkej maski titajtakouanij?

⁶ Yeski tipouiskej iniuan taixpejpenalmej oso iniuan ‘okseki ichkamej’, Jiova techtapojpoluia komo titakuaujtamatij itech inemilis Jesús tein kitemakak. Yejuatsin kinselia maj kiueyichiuakan akin iuan motemaktiaj. Kinita ke melaujkej tokniuan taixpejpenalmej uan kinselia kemej ikoneuan. Uan no kinita ke melaujkej akin pouij iniuan ‘okseki ichkamej’ uan kinselia kemej itasojikniuan (Juan 10:16; Rom. 5:1, 2; Sant. 2:21-25). Hasta itech nejin tonalmej, inemilis Jesús tein kitemakak techpaleuia maj ueli kuali timouikakan iuan toTajtsin uan maj tikueyitalikan itokay.

7. ¿Toni tatiochiualismej kiualkui iTekiuajyo Dios porin Jesús kitemakak inemilis?

⁷ Itech padrenuestro, Jesús kijtoj: “Maj uiki motekiuajyo”. ¿Keniuj mouika inemilis Jesús tein kitemakak ika iTekiuajyo Dios? Tikmatij ke itech iTekiuajyo Dios pouij Jesús uan 144,000 taixpejpenalmej. Inemilis Jesús tein kitemakak kichiua maj yakan iluikak (Apoc. 5:9, 10; 14:1). Ompa yeskij tekiuanij uan tiopixkamej, uan taixyekanaskej itech taltikpak iuan Jesús 1,000 xiujmej. Itech nochi nejon xiujmej, ika iTekiuajyo, Dios kichiuas maj taltikpak mochiua se xochital uan kinpaleuis nochin taltikpakneminij maj amo kipiakanok tajtakol. Ijkuak, itekitikauan Jiova akin moajsiskej ompa iluikak uan nikan taltikpak pouiskej kemej sayoj se kalyetouanij (Apoc. 5:13; 20:6). Jesús kiixpolos Satanás uan nochi kuejmolmej tein kichiuani (Gén. 3:15).

8. 1) ¿Keniuj Jesús kinpaleuij imomachtijkauan maj kiajsikamatinij ke iTekiuajyo Dios motelneki? 2) ¿Keniuj tiknextiaj ke tikpaleuiaj Tekiuajyot?

 ⁸ Jesús kinpaleuij imomachtijkauan maj kiajsikamatinij ke iTekiuajyo Dios motelneki. ¿Keniuj kichiuak? Niman keman moauij, noyampa peuak kiteixmatiltia kuali tanauatilmej ika iTekiuajyo Dios (Luc. 4:43, TNM). Uan no, kiniluij imomachtijkauan ke monekia kiteixmatiltiskej “nonouiyampa de nochi senmanauak” (Hech. 1:6-8). Axkan, tanojnotsalis kichiua maj taltikpakneminij uelikan kimatikan keniuj kinpaleuia inemilis Jesús tein kitemakak uan maj ueli kinixyekana iTekiuajyo Dios. Tejuan tiknextiaj ke senkis tikpaleuiaj Tekiuajyot keman tikinpaleuiaj taixpejpenalmej maj kiteixmatiltikan kuali tanauatilmej itech nochi taltikpak (Mat. 24:14; 25:40).

9. ¿Keyej uelis titakuaujtamatiskej ke mochiuas kemej Dios kiixtalijtok maj nemikan taltikpakneminij?

⁹ Itech padrenuestro, Jesús no kijtoj: “Maj mochiua motanejnekilis”. ¿Toni kijtosnekik? Keman Jiova kijtoua ke teisa mochiuati, ijkon mochiua (Is. 55:11). Itaixnamikilis Satanás amo kichiuak maj mopata tein Jiova kiixtalijtoya. ¿Toni kiixtalijtoya Dios maj mochiua nikan taltikpak? Maj ininkoneuan Adán uan Eva akin amo tajtakolejkej yeskiaj maj momoyauanij itech nochi taltikpak (Gén. 1:28). Komo Adán uan Eva momikiliskiaj uan amo kinpiaskiaj konemej, itech taltikpak amo momiakiliskiaj taltikpakneminij ijkon kemej Dios kiixtalijtoya. Yejua ika Jiova kinkauak maj kinpianij konemej. Inemilis Jesús tein kitemakak kichiua maj akin takuaujtamatij ueli kinijkuanilikan tajtakol uan maj ueli nemikan nochipaya. Jiova techtasojta uan kineki maj tikselikan kualtsin nemilis tein yejuatsin yekinika kinekia maj tikpiakan.

10. ¿Keniuj inemilis Jesús tein kitemakak kinpaleuis akin momikilijkejya?

¹⁰ Tel miak millones taltikpakneminij momikilianij uan amo keman kiixmatkej Jiova. ¿Toni panos iniuan? Kemej Dios kineki maj taltikpakneminij nemikan, yejuatsin kinajokuis. Nejon sayoj uelis mochiuas ika inemilis Jesús tein kitemakak. Keman moajokuiskej, uelis kimatiskej keniuj tamati Jiova uan nemiskej nochipaya (Hech. 24:15). Kemej Jiova yejua akin kitemaka nemilis, mochiuas ininTajtsin nochin akin moajokuiskej (Sal. 36:9). Yejua ika Jesús kijtoj itech padrenuestro: “Toueyitajtsin ten tiyetika eluiyaktsinko” (tejuan tiktalilijkej cursivas; Mat. 6:9). Jiova kimakak Jesús tanauatil maj kinajokui mikemej, se tekit tein motelneki. Yejua ika Jesús kijtoj: “Nejuatsin nikinyolitia in animajme uan nikinmaka nemilis oksepa” (Juan 6:40, 44; 11:25).

11. ¿Toni kineki Dios maj kichiuakan “uel miak tagayot”?

¹¹ Jesús no kijtoj: “Nochi naken kitakamatiske ten Dios kimonekiltia, yejuan nijinkes nikinpouas keme noikniutagat uan noikniusiuat uan nonantsin” (tejuan tiktalilijkej cursivas; Mar. 3:35). Dios kineki maj nochin akin ualeuaj itech miak tataman altepemej, xolalmej uan tajtolmej kiueyichiuakan. Biblia kijtoua ke yejuan “uel miak tagayot ten amo aken uelis kinpouas”. Yejuan takuaujtamatij itech inemilis Jesús tein kitemakak uan kinekij kitakamatiskej Dios. No kiueyichiuaj uan kijtouaj: “Totajtsin Dios ten tiontokotsyetika tech ne tayekankatrono, Tejuatsin tiontechmakixtia, uan no tion to Temakixtijkatsin Tejuatsin ten tiontamati keme ichkatsin de Dios” (Apoc. 7:9, 10).

12. ¿Toni techmachtia netataujtil padrenuestro kemej kiixtalijtok Dios maj nemikan taltikpakneminij?

¹² Netataujtil padrenuestro techmachtia miak taman kemej tamati Jiova uan keniuj  kiixtalijtok maj nemikan taltikpakneminij. Yekinika, tikitaj ke moneki timochikauaskej tikueyitaliskej itokay Dios uan tikpoujkaitaskej (Is. 8:13). Inemilis Jesús tein kitemakak ueli kichiua maj timakisakan uan maj moueyichiua itokay Dios. Tein melauj, itokay Jesús kijtosneki “Jiova Temakixtia”. Ojpatika, tikitaj ke ika iTekiuajyo, Jiova kichiuas maj taltikpakneminij tatakamatinij ueli kiselikan nochi tein kuali tein kiualkui inemilis Jesús tein kitemakak. Uan expatika, tikitaj ke nion teyi uelis kitsakuilis maj mochiua itanejnekilis Dios (Sal. 135:6; Is. 46:9, 10).

13. ¿Keyej timoauiaj?

¹³ Se taman tein motelneki kemej uelis tiknextiskej ke tiktasojkamatij inemilis Jesús tein kitemakak, yejua keman timotemaktiaj iuan Jiova uan timoauiaj. Ijkon tiknextiaj ke titakuaujtamatij itech inemilis Jesús tein kitemakak uan ke tiiaxkauan Jiova (Rom. 14:8). Uan no, keman timoauiaj tiktajtaniaj yejuatsin maj techmaka se tanemilil chipauak (1 Ped. 3:21). Uan Dios technankilia keman techmaka tatiochiualismej ika inemilis Jesús tein kitemakak. Yejua ika senkis tikmatij ke Jiova techmakas nochi tein motenkaua (Rom. 8:32).

14. ¿Keyej Dios technauatia maj tikintasojtakan oksekin?

¹⁴ Jiova kichiua nochi ika netasojtalis. Kineki maj akin kiueyichiuaj kichiuakan kemej yejuatsin uan maj motasojtakan (1 Juan 4:8-11). Keman tikintasojtaj taltikpakneminij, senkis tiknextiaj ke tiknekij tiyeskij tiikoneuan ‘toueyiTajtsin tein yetikaj ne eluiyaktsinko’ (Mat. 5:43-48). Biblia kijtoua ke tanauatil tein okachi moneki yejua maj se kitasojta Jiova. Sayoj ke ojpatika tanauatil tein okachi moneki yejua maj se kintasojta oksekin (Mat. 22:37-40). Se taman kemej uelis tiknextiskej ke tikintasojtaj taltikpakneminij yejua keman tikinmatiltiaj tein kuali tein kiualkuis iTekiuajyo Dios. Komo tiktakamatij Dios keman techiluia maj tikintasojtakan oksekin, uan okachiok tokniuan, okachi tiktasojtaskej yejuatsin (1 Juan 4:12, 20).

15. 1) ¿Toni tatiochiualismej techmaka Jiova axkan? 2) ¿Toni tatiochiualismej tikseliskej satepan?

¹⁵ Jiova techyekmatiltia ke yejuatsin uelis kichiuas maj totajtakoluan senkis ixpoliuikan  komo titakuaujtamatij itech inemilis Jesús tein kitemakak. Nejin kijtosneki ke yejuatsin uelis senkis techtapojpoluis (xikonixtajtolti Hechos 3:19-21). Kemej tikitakej achto, inemilis Jesús tein kitemakak kichiua maj Jiova kinseli seki taltikpakneminij kemej ikoneuan uan maj nemikan ompa iluikak. Nejin yejuan tokniuan taixpejpenalmej (Rom. 8:15-17). Sayoj ke no, Jiova kinyoleua tokniuan akin pouij iniuan ‘okseki ichkamej’ maj pouikan iniuan ichankauan nikan taltikpak. Keman yejuan amo kipiaskejok tajtakol, monekis kipanoskej se tayejyekolis tein mochiuas satepan ke panos mil xiujmej. Komo amo kikauaj Jiova, yejuatsin no kinselis kemej ikoneuan (Rom. 8:20, 21; Apoc. 20:7-9). Jiova nochipa kintasojtas nochin ikoneuan. Uan ika inemilis Jesús tein kitemakak, tiksentokaskej tikselijtoskej tatiochiualismej nochipaya (Heb. 9:12). Jiova techmakak nejin ueyi netetayokolil, uan amo akin uelis techkuilis.

16. ¿Keniuj techmakixtia inemilis Jesús tein kitemakak?

¹⁶ Komo timoyolnonotsaj, Amokuali amo uelis kichiuas nion teyi tein ika kitsakuilis maj se tonal ueli tipouikan iniuan ichankauan Jiova. Jesús kitemakak inemilis “sepa san”. Nejin kijtosneki ke amo monekisok maj oksepa momikili (Heb. 9:24-26). Adán techpanoltilij mikilis, sayoj ke inemilis Jesús tein kitemakak techmakas nemilis nochipaya. Uan no ueli techmakixtia itech nejin taltikpak kampa taixyekantok Satanás uan amo tikmouiliajok timomikiliskej (Heb. 2:14, 15).

17. ¿Toni tikmachiliaj keman tiknemiliaj ke Jiova semi techtasojta?

¹⁷ Uelis tikyekmatiskej ke inetenkaualisuan Jiova nochipa mochiuaskej. Uan ijkon kemej tanauatilmej tein kiixyekana tein onkak amo keman mopataj, Jiova amo keman mopatas. Yejuatsin amo techkajkayauas (Mal. 3:6). Uan no, amo sayoj techtayokolia nemilis, ta no techmaka inetasojtalis. “Tejuan tikajsikamatke ya uan titakuautamatke ya de ke Dios techtasojta. Uan Totajtsin Dios tetasojta.” (1 Juan 4:16.) Kemej Jiova nochipa kichiua tein motenkaua, amo uejkaua taltikpak mochiuas se kualtsin xochital. Nochin taltikpakneminij kichiuaskej kemej Jiova uan motasojtaskej. Ijkuak, nochin itekitikauan Dios akin moajsiskej iluikak uan taltikpak kiueyichiuaskej uan kijtoskej: “Ma timitsonueyipanchiuakan uan ma timitsonmouistilikan tion to Dios, porin sayo Tejuatsin tikonpia nochi tamachilisme. Uan ma timitsontasojkamachilikan uan ma timitsonmouiskapouakan porin sayo Tejuatsin tikonpia nochi chikaualis uan uelilis. Uan ijkon ma timitsonmouistilijtiyakan Tejuatsin tion to Dios sen nachipa uan sen nachipa. Ma ijkon mochiutiu” (Apoc. 7:12).