Komo tanankilil yeskia kemaj, ¿keniuj techijtakoskia? Maj tikitakan se neskayot. Ikonetsin se tokniuj takat momiktij. Peuak motajtania ox Jiova kimattoyaya tein panoskia uan ox kiixtalijkaya ke yejua uan inamik kixikoskiaj nejon ouijkayot. Tetayokoltij tikijtoskej ke itech nejin tonalmej timiakej tikpanoskej uejueyi ouijkayomej. Sayoj ke ¿moneki tiknemiliskej ke Jiova kichiua maj techpano oso maj amo techpano seki taman?

Komo tikitaj tein kijtoua 1 Corintios 10:13, tikajsikamatiskej ke Biblia amo tamachtia ke Jiova achto kiita hasta kani uelis titaxikoskej uan satepan kiixpejpena toni ouijkayomej tikpanoskej. Maj tikitakan naui taman keyej ijkon tikijtouaj.

Yekinika, Jiova techkaua maj toselti taixpejpenakan. Yejuatsin kineki maj tikixpejpenakan toni tikchiuaskej (Deut. 30:19, 20; Jos. 24:15). Komo tikixpejpenaj tein kiyolpaktia, uelis titakuaujtamatiskej ke yejuatsin techixyekanas (Prov. 16:9). Sayoj ke komo amo kuali titaixpejpenaj, titajyouiskej (Gál. 6:7). Komo Jiova kiixpejpenaskia ouijkayomej tein monekis tikxikoskej, ¿tikijtoskiaj ke yekmelauj toselti titaixpejpenaj?

Ojpatika, Jiova amo techmatampauia keman panoua “tachiualis tein amo momattok” (Ecl. 9:11). Aksa uelis kipanos se taman tein amo kuali porin moajsia kampa mochiuak teisa tein amo momattoya. Jesús ika tajtoj keman momikilijkej 18 taltikpakneminij porin kinpechij se ueyi tepamit. Yejua senkis kinextij ke Dios amo kichiujka maj momikilianij (Luc. 13:1-5). Amo taixejekol se kinemilis ke achto ke panos se taman tein amo kuali Dios kiixpejpena akoni nemis oso akoni momikilis.

Expatika, tisejsemej moneki tiknextiskej ke amo tikauaskej Jiova. Satanás kijtoj ke sayoj tiktekitiliaj Jiova porin techmaka miak taman uan ke tikauaskej komo tikpanouaj ouijkayomej (Job 1:9-11; 2:4; Apoc. 12:10). Komo Jiova techmatampauiskia keman tikpanoskej seki taman ouijkayomej, ueliskia moitas ke melauak tein Satanás kijtoj.

Naujpatika, Jiova kiixpejpena amo kimatis nochi tein techpanos satepan. Melauak ke komo yejuatsin kineki, uelis kimatis toni panos satepan (Is. 46:10). Sayoj ke Biblia kijtoua ke onkak seki taman tein Jiova kiixpejpena amo kimatis (Gén. 18:20, 21; 22:12). ¿Keyej? Porin yejuatsin tetasojtakej uan melauak, uan kipoujkaita maj toselti tiuelikan titaixpejpenakan (Deut. 32:4; 2 Cor. 3:17).

Komo ijkon, ¿toni kijtosnekia Pablo keman kijtoj ke Jiova amo kikauas maj tikpiakan tayejyekolismej okachiok ke tein uelis tikxikoskej? Pablo kijtosnekia keniuj techpaleuia Jiova keman tikpanotokej ouijkayomej, amo tein kichiua achto ke tikpanoskej. Komo titakuaujtamatij iuan Jiova, yejuatsin techpaleuis maj tikxikokan tein yeski ouijkayot (Sal. 55:22). Maj tikitakan axkan ome taman keyej Pablo uelik kijtoj ke Dios amo kikauas maj tikpiakan tayejyekolismej okachiok ke tein uelis tikxikoskej.

Yekinika, porin tein yeski ouijkayot tein tikpiaskej, “ipa kipanouaj taltikpakneminij”. Nejin kijtosneki ke ouijkayomej ipa se kipanoua itech nejin taltikpak kampa taixyekantok Satanás. Sayoj ke komo titakuaujtamatij iuan Jiova, uelis tikxikoskej tayejyekolismej uan amo tikauaskej (1 Ped. 5: 8, 9). Itech seki tajkuilolmej achto ke tiajsiskej itech 1 Corintios 10:13, Pablo kijtoua seki tayejyekolismej tein kipanokej israelitas keman yetoyaj taluakyan (1 Cor. 10:6-11). Israelitas akin takuaujtamatkej iuan Jiova uelik taxikojkej. Sayoj ke akin amo iuan takuaujtamatkej amo kitakamatkej uan kikaujkej.

Ojpatika, porin “Dios amo tekaua”. ¿Toni kijtosneki nejin? Komo itech titanemiliaj keniuj Jiova nochipa kinyekpiani itekitikauan, tikitaskej ke yejuatsin amo tekaua uan ke kinpaleuia “akin kitasojtaj” uan “kitakamatij itanauatiluan” (Deut. 7:9). Uan no, Jiova nochipa kichiua tein motenkaua (Jos. 23:14). Yejua ika uelis tikyekmatiskej ome taman. Yekinika, ke Jiova amo kikauas maj se tayejyekolis mochiua tel ouij kemej amo uelis tikxikoskej. Uan ojpatika, ke yejuatsin ‘kitalis keniuj tikisaskej’.

¿Keniuj Dios ‘kitalia keniuj tikisaskej’ akin iuan titakuaujtamatij? Melauak ke yejuatsin uelis techijkuanilis ouijkayomej. Sayoj ke Pablo kijtoj ke Jiova ‘kitalia keniuj tikisaskej’ tein techpaleuis maj uelis titaxikokan. Nejin techmachtia ke miakpa Jiova techtalilia keniuj tikisaskej keman techmaka chikaualis tein techpaleuia ika miak taman maj tiksentokakan tiktakamatikan. Maj tikitakan seki.

• Jiova “techyolseuia itech nochi totayejyekolis” (2 Cor. 1:3, 4, TNM). Yejuatsin techyolseuia ika Biblia, iyektikatsin espíritu uan takeual takuaujtamach uan tamatkej (Mat. 24:45; Juan 14:16; Rom. 15:4).

• Jiova uelis techixyekanas ika iyektikatsin espíritu (Juan 14:26). Yektikatsin espíritu uelis techpaleuis maj tikelnamikikan tein panok ne uejkauj uan tayolmajxitilis tein kitemaka Biblia tein techpaleuis maj kuali titaixpejpenakan.

• Jiova uelis techpaleuis ika ángeles (Heb. 1:14).

• Jiova uelis kichiuas maj tokniuan techpaleuikan. Yejuan uelis techyolchikauaskej keman toka kichiuaskej teisa oso ika inintajtoluan (Col. 4:11).

¿Toni techmachtia tein kijtoj Pablo itech 1 Corintios 10:13? Ke Jiova amo kiixpejpena ouijkayomej tein tikpanoskej. Uan ke komo iuan titakuaujtamatij, tikxikoskej tein yeski ouijkayot. Jiova nochipa kitalis keniuj tikisaskej uan ijkon amo keman tikauaskej.