1, 2. 1) ¿Toni techmatiltia Jiova? 2) ¿Toni netenkaualis tikajsij itech Isaías 46:10, 11 uan 55:11?

BIBLIA peujteua ika nejin tajtolmej tein amo ouijkej sayoj ke kitelpiaj ipatiuj: “Keman peuak nochi, Dios kichijchiuak iluikak uan taltikpak” (Gén. 1:1). Tejuan amo nochi tikixmatij tein Dios kichijchiuak itech iluikak uan taltikpak. Amo semi tikmatij toni onkak iluikak, keniuj chijchiujtok tanex uan keniuj nochi yetok talpan uan amo ejekaixko (Ecl. 3:11). Sayoj ke Jiova techmatiltia toni kiixtalijtok maj mochiua nikan taltikpak uan keniuj kiixtalijtok maj nemikan taltikpakneminij. Yejuatsin kinchijchiuak taltikpakneminij kemej yejuatsin tamati uan kinekia maj neminij ika yolpakilis (Gén. 1:26). Taltikpakneminij yeskiaj ikoneuan, uan yejuatsin yeskia ininTajtsin.

² Itech Génesis capítulo 3 tikixtajtoltiaj ke mochiuak se kuejmol tein kitsakuilij maj mochiuani itanejnekilis Dios (Gén. 3:1-7). Sayoj ke Jiova ueli kiyektalia tein yeski kuejmol. Amo akin ueli kitsakuilia maj kichiua tein kinejneki (Is. 46:10, 11; 55:11). Uelis tikyekmatiskej ke mochiuas keman monekis tein yekinika kiixtalijka.

3. 1) ¿Toni tamachtilismej tein motelnekij techpaleuiaj maj tikajsikamatikan tein Biblia tamachtia? 2) ¿Keyej tikitaskej nejin tamachtilismej axkan? 3) ¿Toni netajtanilmej tikitaskej?

 ³ Tikmatij toni kiixtalijtok Dios maj mochiua nikan taltikpak uan keniuj kiixtalijtok maj nemikan taltikpakneminij. No tikmatij keniuj tapaleuia Jesús maj mochiua nejon. Nejin pouij itech tamachtilismej tein moajsij itech Biblia tein okachi monekij. Xa yejua tein yekinika tikmatkej keman peuak timomachtiaj iTajtol Dios. ¿Melauj ke tiknekij tikinpaleuiskej oksekin maj kiixmatikan? Itech nejin tonalmej uelis tikchiuaskej nejin porin tikinyoleujtokej taltikpakneminij maj touan monechikokan keman tikelnamikiskej imikilis Cristo (Luc. 22:19, 20). Komo yejuan touan monechikouaj itech nejin tonal tein motelneki, okachi kiixmatiskej ikualtsin tanejnekilis Dios. Yejua ika axkan moneki maj titanemilikan itech seki netajtanilmej tein kichiuas maj kinekikan touan monechikoskej. Itech nejin tamachtilis ika titajtoskej nejin eyi netajtanilmej: ¿Toni kiixtalijtoya Dios maj mochiua nikan taltikpak uan keniuj kiixtalijtoya maj nemikan taltikpakneminij? ¿Keyej amo mochiuak? ¿Uan keyej inemilis Jesús tein kitemakak tel tapaleuia maj mochiua?

4. ¿Keyej Biblia kijtoua ke itachijchiualis Dios “kiteixmatiltijtok iueyiyo”?

⁴ Jiova se tel kuali tachijchiujkej. Se kimoujkaita nochi tein kichijchiuak (Gén. 1:31; Jer. 10:12). Kemej nochi itachijchiualis tel kualtsin uan nochi kuali ixyetok keniuj tekitis, ¿toni techmachtia nejon? Ke nochi tein Jiova kichijchiuak techpaleuia. ¿Melauj ke semi tikmoujkaitaj tikinitaskej miak sitalimej, keniuj moajkotamota ueyiat oso tikitaskej keman pankalaki Tonaltsin? Tejuan ueli tikmoujkaitaj tein kualtsin porin Jiova ijkon techchijchiuak (xikonixtajtolti Salmo 19:1 uan 104:24).

5. ¿Toni kichiuak Jiova tein tapaleuia maj nochi itachijchiualis sentekiti?

⁵ Tein Jiova kichijchiuak kinextia ke yejuatsin kiixtalij nochi. Kemej tetasojtakej, kiixtalij tanauatilmej tein kiixyekana tein onkak uan tein kinextiaj keniuj moneki monejnemiltiskej taltikpakneminij. Nejin tapaleuia maj nochi tein onkak itech iluikak uan taltikpak sentekiti (Sal. 19:7-9). Jiova kiixtalij kani moajsis uan keniuj tekitis nochi tein onkak. Kemej neskayot, chikaualis tein tapaleuia maj nochi yeto talpan uan amo ejekaixko kichiua maj amo semi moskalti at itech ueyiamej nion maj tel kaxani uan maj ejekat tein kipiki taltikpak amo youi okseko. Komo amo moajsiskia nejin chikaualis, amo onkaskia nemilis itech taltikpak. Nochi tein onkak itech iluikak uan taltikpak tel kuali tekiti porin Jiova ijkon kiixtalij. Nejin kinextia ke moajsi keyej kichijchiuak taltikpak uan taltikpakneminij. Keman tikinnojnotsaj taltikpakneminij, ueli tikinpaleuiaj maj kiixmatikan Akin kichijchiuak nochi tein onkak tein semi tikmoujkaitaj (Apoc. 4:11).

6, 7. ¿Katiyejua seki netetayokolilmej Jiova kinmakak Adán uan Eva?

⁶ Jiova kinekia maj taltikpakneminij nemikan nochipaya (Gén. 1:28; Sal. 37:29). Kemej semi kualtakat, kinmakak Adán uan Eva miak netetayokolilmej tein kitelpiaj ipatiuj (xikonixtajtolti Santiago 1:17).  Kemej neskayot, kinchijchiuak kemej ueliskiaj tanemiliskej uan ininselti taixpejpenaskej, tetasojtaskej uan kinpiaskej inintasojikniuan. Jiova iuan tajtouaya Adán uan kimelauilij keniuj ueliskia kichiuas tein kuali. Uan no, kinextilij keniuj moyekpias uan keniuj tatokas uan kinyekpias tapialmej (Gén. 2:15-17, 19, 20). Jiova kinchijchiuak Adán uan Eva kemej ueliskiaj kimatokaskej, kiitaskej, kiyekoskej, kikakiskej uan kijnekuiskej tein kuali tein yejuatsin kinchijchiuilijka. Ijkon ueliskiaj yolpakiskej kampa kintalijka maj nemikan kampa tel takualtsinkan katka. No kinmakak miak tekit tein kinyolpaktiskia kichiuaskej. Yejuan nochipa kiixmattoskiaj yankuik taman.

⁷ ¿Toni no kiixtalijtoya Jiova? Yejuatsin kinchijchiuak Adán uan Eva kemej ueliskiaj kipiaskej konemej akin amo yeskiaj tajtakolejkej. Uan ininkoneuan no kipiaskiaj konemej. Ijkon, itech nochi taltikpak momoyauaskiaj taltikpakneminij. Dios kinekia maj tetatmej kintasojtanij ininkoneuan ijkon kemej yejuatsin kintasojtaka yekinika ikoneuan nikan taltikpak, Adán uan Eva. Kintayokolij taltikpak uan nochi tein kualtsin uan tein motelneki tein nikan onkak. Nemiskiaj itech taltikpak nochipaya (Sal. 115:16).

8. ¿Keyej Jiova kinmakak Adán uan Eva tanauatil tein moajsi itech Génesis 2:16, 17?

⁸ Ijkuak, amo mochiuak kemej Jiova kinekia. ¿Toni panok? Maj tikitakan. Jiova kinmakak Adán uan Eva se tanauatil tein amo ouij tein kinpaleuiskia maj kimatinij ke moajsia seki taman tein amo ueliskia kichiuaskej. Yejuatsin kijtoj: “Nochi itakilo koujmej tein moajsij itech xochital uelis tikuas hasta tiixuis. Sayoj ke itakilo kouit tein kiixnextia taixmatilis ika tein kuali uan tein amo kuali, moneki amo tikuas, porin itech tonal keman tikuas, yekmelauj timomikilis” (Gén. 2:16, 17). Nejin tanauatil amo kinouijmakaya kiajsikamatiskej nion ouij kinkisaya kitakamatiskej, porin itech xochital onkaya okseki miak taman takilomej tein uelik tein ueliskia kikuaskej.

9, 10. 1) ¿Toni Satanás kijtouilij Jiova? 2) ¿Toni kiixpejpenkej kichiuaskej Adán uan Eva? (Xikonita taixkopin ipeujyan tamachtilis.)

⁹ Ika se kouat, Satanás kikajkayauak Eva uan kichiuak maj amo kitakamatini iTajtsin, Jiova (xikonixtajtolti Génesis 3:1-5; Apoc. 12:9). Kichiuak maj moitani ke amo kuali yetoya maj Dios amo kinkauani ikoneuan nikan taltikpak maj kikuanij “itakilo nochi koujmej tein moajsij itech xochital”. Kemej yeskia kijtoj: “¿Yekmelauj amo ueli nankichiuaj tein nankinekiskej?”. Satepan kikajkayauak Eva ika nejin tajtolmej: “Yekmelauj amo nanmikiskej”. Ompa kitemoj kichiuas maj kineltoka ke amo monekia kitakamatis Dios. Yejua kiluij: “Dios kimati ke itech tonal keman nankikuaskej koujtakilot, nanixtajtapouiskej”. Ika nejin tajtolmej, Satanás kiteajsikamatiltij ke Jiova amo kinekia maj kikuanij koujtakilot porin komo kikuayaj kinmakaskia se taman taixmatilis tein amo keman kipiaskiaj. Uan ika tamik, Satanás motenkauak nejin tein amo melauak: “Nanmochiuaskej kemej Dios, uan nankiixmatiskej tein kuali uan tein amo kuali”.

 ¹⁰ Adán uan Eva monekia kiixpejpenaskej ox kitakamatiskiaj Dios oso kitajtolkakiskiaj kouat. Sayoj ke kiixpejpenkej amo kitakamatiskej Jiova. Ijkon peuak kitojtokaj Satanás. Kiixtopeujkej Jiova uan amo kinekkejok maj yeskia ininTajtsin. Ijkuak, mokaujkej ininselti uan amo kipiayajok itatiochiualis (Gén. 3:6-13).

11. ¿Keyej Jiova amo uelia kiixpanauiaya inintajtakol Adán uan Eva?

¹¹ Keman Adán uan Eva amo kitakamatkej itanauatil Dios, mochiujkej tajtakouanij. Uan tein kichiujkej no kinuejkatilij iuan Dios, porin yejuatsin kitauelita tein amo kuali. Biblia kijtoua ke iixtololouan ‘semi yektikej, yejua ika amo ueli kiitaj tein amo kuali’ (Hab. 1:13). Komo Jiova kiixpanauiskia tein kichiujkej Adán uan Eva, ueliskia moijtakos ininkuali yetolis nochin akin nemij iluikak uan taltikpak. Ángeles uan taltikpakneminij motajtaniskiaj ox ueliskia takuaujtamatiskej itech tein yejuatsin kijtouaya. Sayoj ke Jiova amo kitapanauilia itanauatiluan, nochipa kichiua ijkon kemej kijtoua (Sal. 119:142). Maski Adán uan Eva uelia ininselti taixpejpenayaj, monekia kijyouiskej tein amo kuali tein kinualkuiliaya inintaixnamikilis. Satepan, momikilijkej uan mokepkej itech talnex tein Jiova ika kinchijchiujka (Gén. 3:19).

12. ¿Toni kinpanok ikoneuan Adán?

¹² Keman Adán uan Eva kikuajkej takilot, Jiova amo uelikok kikauak maj kisentokanij pouinij iuan ichankauan. Yejua ika kinkixtij itech xochital tein moajsia Edén uan amo kinkauak maj oksepa kalakinij (Gén. 3:23, 24). Jiova kichiuak maj kijyouianij tein kinualkuilij tein kiixpejpenkej (xikonixtajtolti Deuteronomio 32:4, 5). Kemej katkaj tajtakolejkejya, amo uelikok senkis kinextijkej ikualneskayouan Jiova. Adán kipoloj kualtsin nemilis tein kipiaskia satepan uan no ijkon panok iniuan ikoneuan. Sayoj uelik kinpanoltilij tajtakol uan mikilis (Rom. 5:12). Ikoneuan amo ueliskiajok nemiskej nochipaya. Adán uan Eva amo ueliajok kinpiayaj konemej akin yektikej, uan no ijkon ininkoneuan. Satepan ke Satanás kichiuak maj Adán uan Eva kiixnamikinij Dios, kisentokani kitemouani maj tinochin tikchiuakan nejon (Juan 8:44).

13. ¿Toni kisentoka kineki Jiova maj kipiakan taltikpakneminij?

¹³ Maski Adán uan Eva kikaujkej Jiova, yejuatsin kisentokaya kintasojtaya taltikpakneminij. Kinekiaok maj yeskiaj itasojikniuan uan amo kinekia maj nion akin momikili (2 Ped. 3:9). Yejua ika niman kichiuak tein kinpaleuiskia taltikpakneminij maj oksepa yeskiaj itasojikniuan. ¿Keniuj  uelik kichiuak kemej amo kitapanauilis itanauatiluan? Maj tikitakan.

14. 1) Kemej kijtoua Juan 3:16, ¿keniuj Dios techmakixtia? 2) ¿Toni netajtanil uelis tikitaskej iniuan taltikpakneminij?

¹⁴ (Xikonixtajtolti Juan 3:16.) Xa sekin akin tikinyoleuaskej maj touan monechikokan keman tikelnamikiskej imikilis Cristo kiixmatij nejin tajkuilol. Sayoj ke ¿kimatij taltikpakneminij keyej inemilis Cristo tein kitemakak uelis kichiuas maj tikpiakan nemilis nochipaya? Uelis tikinpaleuiskej maj kimatikan itanankilil nejin netajtanil. ¿Kemanian? Keman tikinyoleuaskej maj touan monechikokan keman tikelnamikiskej imikilis Cristo, keman yetoskej itech nejon nechikol uan keman oksepa tikinkalpanoskej. Komo yejuan kuali kiajsikamatij tein kijtosneki inemilis Cristo tein kitemakak, okachi kuali kiajsikamatiskej ke Jiova techteltasojta uan ke semi tamatkej. ¿Toni tein mouika ika inemilis Cristo tein kitemakak uelis ika titajtoskej iniuan?

15. ¿Keyej Jesús amo monejnemiltij kemej Adán?

¹⁵ Jiova kitemakak inemilis se takat akin amo tajtakolej maj techmakixti. Nejon takat akin amo tajtakolej monekia nochipa kitakamatis Jiova uan motemakas ininka momikilis taltikpakneminij (Rom. 5:17-19). Yejua ika Jiova kiixpejpenak Jesús, akin yekinika kichijchiuak, uan kipanoltij inemilis nikan taltikpak (Juan 1:14). Ijkon, Jesús mochiuak se takat akin amo tajtakolej, kemej katka Adán. Sayoj ke yejua amo monejnemiltij kemej Adán. ¿Keyej? Porin yejua kemaj kitakamatik tanauatilmej tein Dios kichiaya maj kitakamatini se takat akin amo tajtakolej. Maski Jesús kipanok okachi  uejueyi ouijkayomej, nochipa kitakamatik itanauatiluan Dios.

16. ¿Keyej inemilis Jesús tein kitemakak kitelpia ipatiuj?

¹⁶ Keman Jesús toka kitemakak inemilis tein amo kipiaya tajtakol, uelik techmakixtij itech tajtakol uan mikilis. Yejua monejnemiltij ijkon kemej Adán monekia monejnemiltis. Katka se takat yektik akin amo keman kikauak Dios uan nochipa kitakamatik (1 Tim. 2:6). Inemilis tein kitemakak kichiua maj nochin takamej, siuamej uan konemej uelikan kichiakan nemiskej nochipaya (Mat. 20:28). Kemej tikitaj, inemilis Jesús tein kitemakak tel tapaleuia maj mochiua tein Dios kiixtalijtok (2 Cor. 1:19, 20).

17. ¿Toni ueli kichiua inemilis Jesús tein kitemakak?

¹⁷ Jiova kitemakak se ueyi taxtauil tein ika techmakixtij (1 Ped. 1:19). Kemej yejuatsin semi techpatiuita motemakak kikauas maj iKonetsin akin kiteltasojta toka momikiliani (1 Juan 4:9, 10). Uelis tikijtoskej ke Jesús kiixpatak Adán uan mochiuak topopaj (1 Cor. 15:45). Ika inemilis tein kitemakak, Jesús amo sayoj kichiua maj ueli tikchiakan tinemiskej nochipaya, ta no kichiua maj satepan ueli tipouikan iniuan ichankauan Dios. No techpaleuia maj satepan amo tikpiakanok tajtakol, uan maj Jiova ueli oksepa techseli itech ichankauan kemej amo kitapanauilis itanauatiluan. Maj tiknemilikan keniuj tel kualtsin yeski keman nochin akin amo kikauaj Dios amo kipiaskejok tajtakol. Ijkuak, nochin akin nemij ompa iluikak uan nikan taltikpak mochiuaskej sayoj se kalyetouanij. Tinochin tiyeskij tiikoneuan Dios (Rom. 8:21).

18. ¿Kemanian Jiova “tayekantinemis ipan nochi ten ongak”?

¹⁸ Maski Adán uan Eva kiixtopeujkej Jiova, yejuatsin kisentokaya kintasojtaya taltikpakneminij. Yejua ika kitemakak inemilis iKonetsin maj techmakixti. Maski titajtakouanij, Satanás amo ueli techchikaujkauia maj tikauakan Jiova. Ika inemilis Jesús tein kitemakak, Jiova techpaleuis maj timochiuakan senkis tiyolmelaujkej. Tel kualtsin yeski keman nochin akin kineltokaskej Jesús uan iuan takuaujtamatiskej kipiaskej nemilis nochipaya (Juan 6:40). ToTajtsin tetasojtakej uan tamatkej, Jiova, kichiuas tein kiixtalijtok uan kinpaleuis taltikpakneminij maj amo kipiakanok tajtakol. Ompa, “Yejuatsin tayekantinemis ipan nochi ten ongak” (1 Cor. 15:28).

19. 1) ¿Toni tikchiuaskej komo tiktasojkamatij inemilis Jesús tein kitemakak? (Xikonita kampa kijtoua “ Maj tiksentokakan tikintemokan akin kinekij kikakiskej”.) 2) ¿Toni tikitaskej itech okse tamachtilis?

¹⁹ Komo tiktasojkamatij inemilis Jesús tein kitemakak, ika titajtoskej nejin netetayokolil tein kitelpia ipatiuj iniuan oksekin. Taltikpakneminij moneki kimatiskej ke ika inemilis Jesús tein kitemakak, Jiova kinnextilia netasojtalis uan ke uelis kinmakas nemilis nochipaya. Sayoj ke amo sayoj kichiua maj ueli tinemikan nochipaya. No kinankilia netajtanilmej tein Satanás ika taomeyolotij itech xochital tein moajsia Edén. Itech okse tamachtilis tikitaskej keniuj inemilis Jesús tein kitemakak kinankilia tein Satanás ika taomeyolotij.