1. ¿Keyej seki takamej amo kuali kiitaj ininnamik uan ininkoneuan?

¿TONI tikonnemilia ke kijtosneki se kipias tanauatil, kemej neskayot, tanauatil tein kipiaj takamej iniuan ininchankauan? Seki takamej kiitaj ininnamik uan ininkoneuan kemej kinmachtijkej ininkalyetouanij oso kemej momattokej kichiuaskej kampa kayomej. Yanita, se tokniuj siuat akin nemi Europa, kijtoua: “Kampa ninemi, taltikpakneminij kinemiliaj ke takamej okachi ueyichiuanimej ke siuamej, uan ke moneki kinitaskej siuamej kemej takeualmej”. Uan Luke, se tokniuj takat akin nemi Estados Unidos, kijtoua: “Seki tetatmej kinmachtiaj ininkoneuan ke nion teyi tein kijtouaj siuamej kipia ipatiuj, uan ke yejua ika takamej amo moneki kikakiskej nion teyi tein kijtouaj”. Sayoj ke amo ijkon kemej Jiova kineki maj takamej kinitakan ininnamik (no xikonita Marcos 7:13). ¿Toni uelis kipaleuis se takat maj kuali kinixyekana ikalyetouanij?

2. ¿Toni moneki kimatis takat, uan keyej?

² Takat yekinika moneki kiajsikamatis toni kineki Jiova maj kichiua, porin nejon kipaleuis maj kuali kinixyekana ichankauan. Uan no, moneki kimatis keyej Jiova kinmakak tanauatil seki taltikpakneminij, uan keniuj uelis kichiuas kemej Jiova uan Jesús. ¿Keyej takat moneki kimatis nochi nejin? Porin Jiova kinmakani takamej tanauatil, uan kineki maj kuali kikuikan keman kinixyekanaskej ininchankauan (Luc. 12:48b).

3. Kemej kijtoua 1 Corintios 11:3, ¿keniuj kiixtalij Jiova maj moajsikan ichankauan ompa iluikak uan nikan taltikpak?

³ Xikonixtajtolti 1 Corintios 11:3. Nejin tajkuilol kinextia keniuj kiixtalij Jiova maj moajsikan ichankauan ompa iluikak uan nikan taltikpak. Kemej Jiova ‘tayekantinemi’, yejuatsin kipia okachi ueyi tanauatil. Uan kemej kiixtalij maj moajsikan  taixyekananij, sekin kinmakak tanauatil. Sayoj ke kichia maj kuali kikuikan tanauatil tein kinmakak (Rom. 14:10; Efes. 3:14, 15). Jiova kimakak Jesús tanauatil itech nechikol, sayoj ke Jesús tanankilis iixpan Jiova komo amo kuali techixyekana (1 Cor. 15:27). Jiova no kiixtalij maj takat kiixyekana inamik uan ikoneuan, sayoj ke takat tanankilis iixpan Jiova uan Jesús komo amo kuali kikui nejon tanauatil iniuan ichankauan (1 Ped. 3:7).

4. ¿Toni tanauatil kipiaj Jiova uan Jesús?

⁴ Kemej Jiova kinixyekana ichankauan ompa iluikak uan nikan taltikpak, kipia tanauatil kiixtalis keniuj kineki maj nemikan ikoneuan uan kinamiki kintakakiltis komo amo kitakamatij (Is. 33:22). Kemej Jesús taixyekana itech nechikol, no kinamiki kiixtalis tanauatilmej uan tetakakiltis komo amo se kitakamati (Gál. 6:2; Col. 1:18-20).

5. ¿Toni tanauatil kipia takat akin kitekitilia Jiova, uan itech toni amo kipia tanauatil?

⁵ Ijkon kemej Jiova uan Jesús, takat akin kitekitilia Jiova kipia tanauatil kiixtalis toni kichiuaskej ichankauan (Rom. 7:2, TNM; Efes. 6:4). Sayoj ke amo kipia tanauatil itech nochi. Kemej neskayot, moneki moyekanas ika tein Biblia tamachtia keman kiixtalis toni kichiuaskej ichankauan (Prov. 3:5, 6). Uan no, amo kipia tanauatil kiixtalis toni kichiuaskej akin amo ichankauan (Rom. 14:4). Uan keman ikoneuan moskaltiaj uan okseko nemitij, kisentokaj kipoujkaitaj oso kimouiskaitaj, sayoj ke amo yejuaok kinixyekana (Mat. 19:5).

6. ¿Keyej kiixtalij Jiova maj sekin kipiakan tanauatil?

⁶ Jiova kiixtalij maj sekin kipiakan tanauatil porin kintasojta ichankauan. Nejin tapaleuia maj ichankauan Jiova kipiakan yolseuilis uan maj amo xexeliujtokan (1 Cor. 14:33, 40). Komo amo ixyetoskia se taixyekankej, amo kipiaskiaj yolseuilis uan amo akin yolpakiskia. Kemej neskayot, keman moixejekoskia teisa tein moneki mochiuas amo akin kimatiskia akoni kiixpejpenas se taman tein moijtoj uan kiixtalis maj mochiua, nion kimatiskiaj akoni kinixyekanas keman kichiuaskej.

7. Kemej kijtoua Efesios 5:25, 28, ¿keniuj kineki Jiova maj takat kiixyekana inamik?

⁷ Komo semi tapaleuia maj Dios kiixtaliani maj sekin kipiakan tanauatil, ¿keyej miakej siuamej kimachiliaj ke ininnamik kintajyouiltia uan kinchikaujkauia? Porin miakej takamej amo kitakamatij tanauatilmej tein Jiova kinmaka kalyetouanij uan kichiuaj tein kinmachtijkej kampa nemij. Xa no kitajyouiltiaj ininnamik porin ijkon kuali momachiliaj. Kemej neskayot, xa se takat kichikaujkauia inamik porin kineki kimachilis ke okachi ueyichiujkej oso porin kineki kinnextilis oksekin ke “yekmelauj takat”. Xa kinemilia ke maski amo ueli kichiua maj inamik kitasojta, kemaj uelis kichiuas maj kimouili. Uan uelis kitemos maj kichiua tein kineki porin kimati ke kimouilia. * Kemej tanemiliaj uan tein kichiuaj nejon takamej amo kuali yetok. Yejuan amo kinpoujkaitaj siuamej kemej monekiskia. Uan no, nejon tanemilil uan tachiualis senkis kiixnamiki tein Jiova kineki maj kichiuakan (xikonixtajtolti Efesios 5:25, 28).

8. ¿Toni uelis kipaleuis se takat maj kuali kinixyekana ichankauan?

⁸ Se takat kuali kinixyekanas ichankauan komo kikui tanauatil tein kipia kemej Jiova  uan Jesús kikuij. Maj ika titajtokan ome kualneskayomej tein Jiova uan Jesús kinextiaj, uan maj tikitakan keniuj takamej uelis kinextiskej iniuan ininnamik uan ininkoneuan.

9. ¿Keniuj kinextia Jiova yolyemanilis?

⁹ Yolyemanilis. Jiova yejua akin okachi kipia tamatilis, uan maski ijkon, kikaki tein kinemiliaj itekitikauan (Gén. 18:23, 24, 32). Hasta kikauani maj akin kinixyekana kiluikan toni ueliskia mochiuas (1 Rey. 22:19-22). Maski Jiova nochi ueli kichiua, amo kichia maj tejuan tikchiuakan tein amo tiuelij. Okachi kuali, maski itekitikauan tajtakolejkej, kinpaleuia maj kuali kinyoui uan maj yolpakikan (Sal. 113:6, 7). Tein melauj, David kiluij nejin tajtolmej tein moajsij itech Biblia: “Tejua tinechpaleuia” (Sal. 27:9; Heb. 13:6). David kimatia ke nochi tein kichiuak uelik kichiuak porin Jiova yolyemanik uan kipaleuij (2 Sam. 22:36).

10. ¿Keniuj kinextij Jesús yolyemanilis?

¹⁰ Maj tikitakan ineskayo Jesús. Yejua kinmetspajpakak imomachtijkauan maski katka ‘inintamachtijkauj uan inintekotsin’. ¿Keyej Jiova kinekik maj moijkuilouani itech Biblia nejin tein Jesús kichiuak? Porin kinekia techmachtis maj tiyolyemankej, hasta tokniuan takamej akin kinixyekanaj ininchankauan. Jesús kijtoj: “Nejuatsin axkan namechnextilij ya para kenin nankichiuaske namejuan. Uan ijkon xikchiuakan namejuan” (Juan 13:12-17). Maski kipiaya ueyi tanauatil, amo kichiaya maj kitekitilikan, ta yejua kintekitiliaya oksekin (Mat. 20:28).

11. ¿Keniuj tokniuan takamej uelis kinextiskej yolyemanilis kemej Jiova uan Jesús?

¹¹ Tein techmachtia. Komo se takat yolyemanik kinextia itech miak taman. Kemej neskayot, amo kichia maj inamik uan ikoneuan kichiuakan tein amo uelij. Kikaki tein kinemiliaj ke ueliskia kichiuaskej, maski yejua amo kinemilia nejon. Marley, akin nemi Estados Unidos, kijtoua: “Nonamik uan nejua kemansa tataman kemej tikitaj teisa, sayoj ke nikmachilia ke nechpatiuita porin nochipa nechtajtania toni ueliskia tikchiuaskej uan itech tanemilia tein nikiluij achto ke kiixtalis tein mochiuas”. Uan no, se takat akin yolyemanik kichiua tekimej tein onkak kalijtik, maski kampa nemi kinemiliaj ke nejon tekimej sayoj siuamej moneki kichiuaskej. Nejin uelis ouij kinkisas.  ¿Keyej? Se tokniuj siuat akin monotsa Rachel kijtoua: “Kampa nikayot, komo se takat kipaleuia inamik maj tapajpaka oso maj tachipaua kalijtik, akin ompakauin nemij uan ichankauan kijtoskej ke amo ‘yekmelauj takat’. Kinemiliskej ke isiuauj tanauatia”. Komo kampa tionnemi miakej ijkon tanemiliaj, xikonelnamiki ke Jesús kinmetspajpakak imomachtijkauan, maski taltikpakneminij kiitayaj ke nejon tekit monekia kichiuaskej takeualmej. Se takat akin kuali kinixyekana ichankauan amo kitemos maj oksekin kuali kiitakan, ta kitemos maj ichankauan kuali momachilikan. Tikitakejya ke takamej moneki kinextiskej yolyemanilis, axkan maj ika titajtokan okse kualneskayot tein no moneki kinextiskej.

12. ¿Toni kichiuaj Jiova uan Jesús porin techtasojtaj?

¹² Netasojtalis. Nochi tein Jiova kichiua, kichiua porin tetasojta (1 Juan 4:7, 8). Kinextia ke techtasojta uan ke kineki maj kuali timouikakan iuan porin techmakak iTajtol uan inechikol. No techpaleuia maj kuali timomachilikan keman techelnamiktia ke semi techtasojta. Uan techmaka tein ika timoixpanoltiskej, techmaka “miak tataman para ma ijkon timoyolpaktijtiyakan” (1 Tim. 6:17). Keman tikchiuaj tein amo kuali, techtakakiltia, sayoj ke kisentoka techtasojta. No techmakak iKonetsin maj techmakixti porin semi techtasojta. Uan kemej Jesús no semi techtasojta, motemakak toka momikilis (Juan 3:16; 15:13). Nion teyi ueli kichiua maj Jiova uan Jesús amo kintasojtakan akin kintakamatij (Juan 13:1; Rom. 8:35, 38, 39).

13. ¿Keyej se takat moneki kinextis ke kintasojta ichankauan? (No xikonita recuadro “ ¿Toni uelis kichiuas se takat akin yankuixtok monamiktij tein tapaleuis maj inamik kipoujkaita?”).

¹³ Tein techmachtia. Nochi tein kichiuas se takat, moneki kichiuas porin kintasojta ichankauan. ¿Keyej? Tatitanil Juan kijtoj: “Komo tejuan amo tikinyektasojtaj in tokniuan taneltokani [oso tochankauan] ten tikinyekitstokke ya, pues ijkon tejuan amo no uelis tiktasojtaske Totajtsin Dios porin Yejuatsin amo uelis tikitstinemij” (1 Juan 4:11, 20). Yejua ika, se takat akin kintasojta ichankauan  uan kineki kichiuas kemej Jiova uan Jesús kinpaleuis ichankauan maj kuali mouikakan iuan Jiova, kichiuas maj kuali momachilikan uan kinixpanoltis (1 Tim. 5:8). Kinmachtis uan kintakakiltis ikoneuan. No kisentokas kiixtalis tein kinpaleuis ichankauan uan tein tapaleuis maj kiueyitalikan Jiova. Axkan maj ika titajtokan nochi nejin tein moneki kichiuas takat uan keniuj uelis kichiuas kemej Jiova uan Jesús.

14. ¿Keniuj takat uelis kinpaleuis ichankauan maj kuali mouikakan iuan Jiova?

¹⁴ Kinpaleuis ichankauan maj kuali mouikakan iuan Jiova. Ijkon kemej kichiua iTajtsin, Jesús kitemoj kinpaleuis itatojtokakauan maj kisentokanij takuaujtamatinij (Mat. 5:3, 6; Mar. 6:34). No ijkon, takat kiita ke okachi moneki kinpaleuis ichankauan maj kisentokakan kuali mouikakan iuan Jiova (Deut. 6:6-9). Yejua ika, moneki kinpaleuis maj kiixtajtoltikan uan maj momachtikan Biblia, maj yakan nechikolmej, maj tanojnotsakan uan maj kisentokakan kuali mouikakan iuan Jiova, uan yejua no moneki kichiuas nejin.

15. ¿Keniuj se takat uelis kichiuas maj ichankauan kuali momachilikan?

¹⁵ Kichiuas maj ichankauan kuali momachilikan. Jiova kiluij Jesús ke kitasojtaya keman oksekin kikaktoyaj (Mat. 3:17). Jesús kinextij ke kintasojtaya itatojtokakauan ika tein kichiuak uan ika tein kijtoj. Uan itatojtokakauan no kiluijkej ke kitasojtayaj (Juan 15:9, 12, 13; 21:16). Se takat uelis kinextilis inamik uan ikoneuan ke kintasojta ika tein kichiua, kemej neskayot, keman iniuan momachtia Biblia. No moneki kiniluis ke kintasojta uan ke kinpatiuita, uan keman kinamikis, maj kinilui ke kuali tein kichiuaj keman oksekin kikaktoskej (Prov. 31:28, 29).

16. 1) ¿Toni no moneki kichiuas se takat? 2) ¿Toni moneki amo kichiuas?

¹⁶ Kinixpanoltis. Jiova nochipa kinmakak israelitas tein ika moixpanoltiskiaj. Uan kichiuak nejin maski kintatsakuiltijka porin amo kitakamatkaj (Deut. 2:7; 29:5). Axkan no kiita maj tiitekitikauan tikpiakan tein ika timoixpanoltiskej (Mat. 6:31-33; 7:11). Uan no, Jesús kintamakak itatojtokakauan (Mat. 14:17-20). No kinpajtij miakej akin mokokouayaj (Mat. 4:24). Komo se takat kineki kiyolpaktis Jiova, moneki kinixpanoltis ichankauan. Sayoj ke moneki amo nochipa tekititos, porin nejon kichiuas maj amo kinpaleuiok maj kuali mouikakan iuan Jiova uan maj yolpakikan.

17. ¿Keniuj techmachtiaj uan techtakakiltiaj Jiova uan Jesús?

¹⁷ Kinixyekanas ichankauan ika netasojtalis uan kinyolmajxitis. Jiova techmachtia uan techtakakiltia porin kineki techpaleuis (Heb. 12:7-9). Ijkon kemej iTajtsin, Jesús kinmachtij ika netasojtalis akin kinixyekanaya (Juan 15:14, 15). Chikauak tayolmajxitia, sayoj ke no kinextia netasojtalis (Mat. 20:24-28). Kiajsikamati  ke kemej titajtakolejkej, timopolouaj (Mat. 26:41).

18. ¿Toni nochipa kielnamiki takat akin kuali kinixyekana ichankauan?

¹⁸ Takat akin kichiua kemej Jiova uan Jesús nochipa kielnamiki ke inamik uan ikoneuan tajtakolejkej, uan yejua ika amo eliuis kualani iniuan (Efes. 4:31; Col. 3:19). Okachi kuali, kichiua tein kijtoua Gálatas 6:1 uan kinyolmajxitia ika yolnejmachkayot, porin kielnamiki ke yejua no tajtakolej. Ijkon kemej Jesús, kimati ke okachi kuali kinmachtis komo kinkauilia se kuali neskayot (1 Ped. 2:21, TNM).

19, 20. ¿Keniuj takat uelis kichiuas kemej Jiova uan Jesús keman kiixtalis teisa?

¹⁹ Kiixtalis maj mochiua tein kinpaleuis ichankauan. Keman Jiova kiixtalia teisa, kiixtalia tein kimati ke kinpaleuis oksekin. Kemej neskayot, yejuatsin kiixtalij maj tinemikan amo porin yejua kipaleuiskia, ta porin kinekia maj no tikmachilikan yolpakilis tein teualkuilia se nemis. Amo akin kichikaujkauij maj kiualtitanini iKonetsin maj toka momikiliki, ta kichiuak porin kinekia techpaleuis. Keman Jesús kiixtalij kichiuas seki taman no kitemoj kinpaleuis oksekin (Rom. 15:3). Kemej neskayot, kinmachtij miakej taltikpakneminij maski semi sioujtoya (Mar. 6:31-34).

²⁰ Se takat akin kuali kinixyekana ichankauan kimati ke moneki kiixtalis maj mochiua tein okachi kinpaleuis, uan kichiua maski kimati ke ouij. Mochikaua amo kiixtalis maj mochiua teisa tein ijsiujka kinemilij oso porin sayoj ijkon kineki maj mochiua. Okachi kuali, mokaua maj Jiova kimachti maj kuali taixpejpena, uan nejon kipaleuia maj kinemili toni okachi kinpaleuis oksekin uan amo tein yejua okachi kipaleuis (Prov. 2:6, 7; Filip. 2:4). *

21. ¿Toni tikitaskej itech okse tamachtilis?

²¹ Jiova kinmakak takamej se tekit tein semi ouij, uan kichia maj kuali kichiuakan. Sayoj ke komo takat mochikaua kichiuas kemej Jiova uan Jesús, kuali kinixyekanas ichankauan. Uan komo inamik kichiua tekit tein Jiova kinmakatok siuamej, nochin yolpakiskej. ¿Keniuj moneki kiitas siuat tanauatil tein kipia inamik, uan toni ouijkayomej kipia? Tikitaskej itech okse tamachtilis.