ITECH xolal Baguio (Filipinas) ome siuamej panokej kampa ika moajsia se carrito tein kipia toamaixuan, sayoj ke amo motokijkej. Helen, tokniuj siuat akin yetoya inakastan carrito kinitak uan kinixuetskilij. Siuamej kisentokakej ojtokakej, sayoj ke semi kinyolnotsak maj Helen kinixuetskiliani.

Satepan, keman mokepayajya ininchan itech autobús, kiitakej tajtolmej jw.org itech se Kali kampa tiMosentiliaj. Kielnamikkej ke nejon tajtolmej kiitakajya tepitsin achto itech carrito tein kipiaya toamaixuan. Temokej uan kiitatoj toni hora mochiuayaj nechikolmej.

Nejon ome siuamej yajkej se nechikol, uan keman ajsikej yekinika kiitakej Helen. Niman kielnamikkej ke yejua akin kinixuetskilijka. Helen kijtoua: “Keman yaya nechajsitij, tepitsin nimotekipachoj porin niknemilij ke xa nikchiujka teisa tein amo kuali”. Sayoj ke siuamej kiluijkej Helen ke kiitakajya achto itech carrito.

Yejuan semi kiuelitakej nechikol uan yetoskej iniuan tokniuan, kimachilijkej kemej yeskia yetoyaj ininchan. Keman kiitakej ke tokniuan peuak tachipauaj satepan ke tamik nechikol, tajtankej ox ueliskia tapaleuiskej. Semej nejon siuamej amo nemiok Filipinas, sayoj ke okse peuak youi nechikolmej uan peuak momachtia Biblia. ¡Nochi nejon panok porin Helen kinixuetskilij!