1. ¿Toni monekiskia motajtanis se tokniuj siuat keman kinemilijtos monamiktis iuan se tokniuj takat?

TINOCHIN tiitekitikauan Dios techixyekana Jesucristo, akin semi kuali taixyekankej. Sayoj ke keman se tokniuj siuat monamiktia, se takat akin tajtakolej peua kiixyekana, uan kemansa uelis ouij kikisas mokauas maj kiixyekana. Yejua ika, keman kinemilijtos ox monamiktis oso amo, kuali yeskia maj motajtani: “¿Keniuj nikmati ke tokniuj akin nikneki iuan nimonamiktis yeski se kuali taixyekankej? ¿Kitayekanaltia kitekitilis Jiova? Komo amo, ¿mochikauas maj tiksentokakan kuali timouikakan iuan Jiova satepan ke timonamiktiskej?”. Tokniuj siuat no monekiskia motajtanis: “¿Toni kualneskayomej nikpia tein tapaleuis maj tiyolpakikan satepan ke timonamiktiskej? ¿Amo niyolijsiui uan nikualtakat? ¿Chikauak nokuali uikalis iuan Jiova?” (Ecl. 4:9, 12). Se siuat yolpakis satepan ke monamiktis komo achto kuali kiixejekoua tein kichiuas.

2. ¿Toni tikitaskej itech nejin tamachtilis?

² Millones tokniuan siuamej kikauaj se kuali neskayot porin kitakamatij ininnamik. Semi teyolpaktia se kitekitilis Jiova iniuan nejin tokniuan uan semi kuali tein kichiuaj porin tatakamatij. Itech nejin tamachtilis, tiknankiliskej nejin eyi netajtanilmej: ¿toni ouijkayomej xa kipiaskej siuamej akin kipiaj ininnamik?, ¿keyej tokniuan siuamej mokauaj maj kinixyekana ininnamik? Uan ¿toni uelis kinmachtis tokniuan takamej uan siuamej akin kipiaj ininnamik ineskayo Jesús, Abigaíl uan María, imomaj Jesús, kemej moneki kiitaskej tanauatil tein Jiova kinmakak sekin?

3. ¿Keyej nochin akin monamiktijkejya kipanouaj ouijkayomej?

³ Nenamiktilis se netetayokolil tein semi chipauak tein Dios kitemakak, sayoj ke taltikpakneminij tajtakolejkej (1 Juan 1:8). Yejua ika, iTajtol Dios kinnejmachtia akin monamiktijkejya ke “kipiaske ouijkayot tech ninnemilispan” (1 Cor. 7:28). Maj tikitakan seki ouijkayomej tein xa kipias siuat akin kipia inamik.

4. ¿Keyej siuat uelis kinemilis ke kipoujkaitas inamik kipinaujtia?

⁴ Kemansa, kemej kiiskaltijkej se siuat uelis kichiuas maj kinemili ke kitakamatis inamik kipinaujtia. Marisol, akin nemi Estados Unidos, kijtoua: “Kampa nimoskaltij, nochipa kiniluiayaj siuamej ke monekia yeskij kemej takamej itech nochi. Sayoj ke nikmati ke Jiova kiixtalij maj takat kiixyekana inamik uan ke siuat moneki kitakamatis, sayoj ke no kineki maj takamej kinpoujkaitakan siuamej. Maski ijkon, kemansa ouij nechkisa nikpoujkaitas nonamik porin miakej kijtouaj ke amo moneki nikchiuas”.

5. ¿Keniuj kinitaj siuamej seki takamej?

⁵ Uan no, inamik se siuat xa kinemilia ke takamej okachi ueyichiuanimej ke siuamej. Ivón, se tokniuj siuat akin nemi Sudamérica, kijtoua: “Kampa ninemi, takamej takuaj achto, uan satepan siuamej. Keman konemejok, siuapipil moneki takualchiuaskej uan tachipauaskej, sayoj ke okichpipil ininmomaj uan ininikniuan siuamej nochi kinchiuiliaj, uan kinmachtiaj ke yejuan tanauatiaj kalijtik”. Se tokniuj siuat akin monotsa Yingling, akin nemi Asia, kijtoua: “Itech tajtol chino, miakej kijtouaj seki tajtolmej tein kiteajsikamatiltiaj ke siuamej amo moneki kipiaskej tamatilis nion ueliskej teisa. Siuat moneki kichiuas nochi tekit tein onkak kalijtik, uan amo ueli kiluia inamik tein kinemilia”. Takat akin amo kinextia netasojtalis uan amo kichiua tein Biblia kijtoua, kichiua maj inamik amo yolpaki, amo kichiua kemej Jesús uan amo kiyolpaktia Jiova (Efes. 5:28, 29; 1 Ped. 3:7).

6. ¿Toni moneki kichiuaskej siuamej akin kipiaj ininnamik tein kinpaleuis maj kuali mouikakan iuan Jiova?

⁶ Kemej moijtoj itech tamachtilis tein achto tikitakej, Jiova kineki maj tokniuan takamej kinpaleuikan ininchankauan maj kuali mouikakan iuan, maj kuali momachilikan uan maj kinixpanoltikan (1 Tim. 5:8). Sayoj ke tokniuan siuamej akin kipiaj ininnamik no moneki mojmostaj kiixtajtoltiskej iTajtol Dios, itech tanemiliskej uan kitataujtiskej Jiova ika nochi ininyolo. Nejin uelis ouij kinkisas porin kipiaj miak tekit. Xa kinemiliskej ke kemej kipiaj miak tekit uan semi sioujtokej amo uelis kichiuaskej nochi nejon, sayoj ke moneki kixeloskej tiempo uan kichiuaskej. ¿Keyej? Porin Jiova kineki maj itekitikauan kuali mouikakan iuan uan maj kisentokakan kichikauakan nejon kuali uikalis (Hech. 17:27).

7. ¿Toni kipaleuis siuat maj kipoujkaita uan maj kitakamati inamik?

⁷ Melauj ke siuat xa monekis mochikauas kipoujkaitas uan kitakamatis inamik, akin tajtakolej. Sayoj ke okachi amo ouij kikisas kichiuas tekit tein Jiova kimakak komo kiajsikamati keyej Biblia kijtoua ke moneki kipoujkaitas uan kitakamatis inamik.

8. Kemej kijtoua Efesios 5:22-24, ¿keyej tokniuj siuat mokaua maj inamik kiixyekana?

⁸ Tokniuj siuat mokaua maj inamik kiixyekana porin yejua nejon kineki Jiova maj  kichiua (xikonixtajtolti Efesios 5:22-24). Takuaujtamati iuan iTajtsin akin moajsi iluikak porin kimati ke yejuatsin kitasojta uan ke nochi tein kitajtania maj kichiua, kitajtania porin kimati ke kipaleuis (Deut. 6:24; 1 Juan 5:3).

9. ¿Toni panoua keman tokniuj siuat kipoujkaita inamik?

⁹ Akin amo kitekitiliaj Jiova kiniluiaj siuamej maj amo kitakamatikan itanauatiluan Jiova uan ke komo mokauaj maj ininnamik kinixyekana kinpinaujtia. Sayoj ke akin kijtouaj nejon amo kiixmatij toDios tetasojtakej. Jiova amo keman kinnauatiskia siuamej, akin kinita kemej ikoneuan uan semi kintasojta, maj kichiuakan teisa tein kinpinaujtis. Tokniuj siuat akin mochikaua kitakamatis inamik kemej Jiova kineki kinpaleuia ichankauan maj kipiakan yolseuilis (Sal. 119:165). Uan nejon kipaleuia yejua, inamik uan ikoneuan.

10. ¿Toni techmachtia tein kijtoj Carol?

¹⁰ Siuat akin mokaua maj kiixyekana inamik akin tajtakolej, kinextia ke kitasojta uan ke kipoujkaita Jiova, akin kiixtalij maj sekin kipiakan tanauatil. Carol, akin nemi Sudamérica, kijtoua: “Nikmati ke nonamik mopolos. Uan no nikmati ke tein nikchiuas keman mopolos kinextis ox semi nikpatiuita kuali nimouikas iuan Jiova. Yejua ika nimochikaua niksentokas nikpoujkaitas nonamik porin nikneki nikchiuas tein Jiova kiyolpaktia”.

11. 1) ¿Toni kipaleuia Aneese maj yekmelauj tetapojpolui? 2) ¿Toni techmachtia ineskayo?

¹¹ Siuat ouij kikisas kipoujkaitas uan kitakamatis inamik komo kimachilia ke inamik amo kiita keniuj momachilia oso ke teisa kitekipachoua. Sayoj ke maj tikitakan toni kichiua se tokniuj siuat akin monotsa Aneese keman panoua nejon. Yejua kijtoua: “Nimochikaua amo nikualanis, uan nikelnamiki ke tinochin timopolouaj. Nimochikaua yekmelauj nitetapojpoluis, ijkon kemej Jiova kichiua. Keman nitetapojpoluia, oksepa niyolseui” (Sal. 86:5). Keman se siuat tetapojpoluia, xa okachi amo ouij kikisas kipoujkaitas inamik.

12. ¿Toni neskayomej tikajsij itech Biblia?

¹² Sekin xa kinemiliskej ke akin mokaua maj kiixyekanakan amo yolchikauak. Sayoj  ke nejon amo melauak. Itech Biblia moajsi ininneskayo miakej akin mokaujkej maj kinixyekanakan, uan maski ijkon, katkaj yolchikaujkej. Maj tikitakan toni uelis techmachtis ineskayo Jesús, Abigaíl uan María.

13. Xikonijto keyej Jesús mokaua maj Jiova kiixyekana.

¹³ Jesús mokaua maj Jiova kiixyekana. ¿Mokaua maj kiixyekanakan porin amo kipia tamatilis oso porin amo teyi ueli kichiua? Amo, moita ke Jesús semi tamatkej porin amo ouij kemej tamachtiaya uan niman se kiajsikamatia (Juan 7:45, 46). Jiova kimati ke Jesús semi tamatkej, yejua ika kikauak maj kipaleuiani keman kichijchiuak nochi tein onkak itech iluikak uan nikan taltikpak (Prov. 8:30; Heb. 1:2-4). Uan satepan ke Jiova oksepa kimakak inemilis, kimakak “nochi in tanauatil tech in eluiyaktsinko uan nikan taltikpak” (Mat. 28:18). Maski Jesús ueli kichiua miak taman, kitemoua maj Jiova kiixyekana, uan kichiua porin kitasojta iTajtsin (Juan 14:31).

14. 1) ¿Toni uelis kinmachtis takamej ineskayo Jiova? 2) ¿Toni uelis kinmachtis tein kijtoua Proverbios 31?

¹⁴ ¿Toni uelis kinmachtis takamej? Jiova amo kiixtalij maj takamej kiixyekanakan ininnamik porin kinemilia ke takamej okachi ueyichiuanimej ke siuamej. Jiova kinextij ke amo ijkon kinita siuamej keman no kinixpejpenak maj tekiuajtikan iuan Jesús (Gál. 3:26-29). Jiova kinextij ke itech takuaujtamati iKonetsin keman kimakak tanauatil. No ijkon, takat akin tamatkej kimakas inamik tepitsin tanauatil. ITajtol Dios kijtoua toni taman ueli kichiua siuat akin kimati kichiuas miak taman. Kemej neskayot, ueli kiixyekana tekit tein onkak kalijtik, ueli kikoua uan kinamaka talmej uan ueli kichiua okseki taman tekimej (xikonixtajtolti Proverbios 31:15, 16, 18). Amo se takeual akin amo ueli kijtoua toni kinemilia, ta inamik itech takuaujtamati uan kikaki tein kinemilia ke ueliskia kichiuaskej (xikonixtajtolti Proverbios 31:11, 26, 27). Takat akin kichiua nejin kinextia ke kipoujkaita inamik, uan inamik kitakamati ika yolpakilis.

15. ¿Toni uelis kinmachtis siuamej ineskayo Jesús?

¹⁵ ¿Toni uelis kinmachtis siuamej? Maski Jesús kichiuani miak taman, amo kinemilia ke komo mokaua maj Jiova kiixyekana kipinaujtia (1 Cor. 15:28; Luc. 22:42). No ijkon, siuat akin kichiua kemej Jesús amo kinemilia ke komo mokaua maj inamik kiixyekana kipinaujtia. Kipaleuia inamik porin kitasojta, sayoj ke tein okachi kiolinia maj kichiua nejon yejua porin kitasojta Jiova uan kipoujkaita.

16. Kemej kijtoua 1 Samuel 25:3, 23-28, ¿toni ouijkayomej kipiak Abigaíl? (Xikonita taixkopin ipeujyan amaix).

¹⁶ Abigaíl monamiktijka iuan Nabal, se takat akin amo inintech tanemiliaya oksekin, moueyimatia uan amo motasojkamatia. Maski ijkon, Abigaíl amo kitemoj amo kisentokas yetos iuan Nabal. Ueliskia amo teyi kijtos uan kikauas maj David uan takamej akin iuan yayaj kimiktianij. Sayoj ke kitemoj keniuj kipaleuis Nabal uan nochin akin nemiaj ichan. ¡Abigaíl monekik kinextis ueyi yolchikaualis keman yajki kampa moajsiaj 400 takamej akin kiuikayaj tein ika tateuiskej, uan keman ika poujkaitalis kinojnotsak David uan kitanemililtij! Uan maski inamik kichiujka tein amo kuali, yejua tajtanik maj kitapojpoluikan (xikonixtajtolti 1 Samuel 25:3, 23-28). David niman kiajsikamatik ke Jiova kinekia kiyolmajxitis uan kitsakuilis maj amo kichiua tein amo kuali itechkopa Abigaíl, akin semi yolchikauak katka.

17. ¿Toni uelis kinmachtis takamej tein panok iuan David uan Abigaíl?

¹⁷ ¿Toni uelis kinmachtis takamej? Abigaíl  semi tamatkej katka. Yejua ika semi kuali tein kichiuak David keman kikakik tein kiyolmajxitij. Uan nejon tapaleuij maj amo kinmiktiani akin amo teyi kichiujkaj. No ijkon, takat akin tamatkej itech tanemilis tein inamik kijtoua achto ke kiixtalis toni kichiuas keman monekis kiixpejpenas teisa. Nejon xa kipaleuis maj amo kiixtali teisa tein amo tapaleuis.

18. ¿Toni uelis kinmachtis siuamej ineskayo Abigaíl?

¹⁸ ¿Toni uelis kinmachtis siuamej? Siuat akin kitasojta uan kipoujkaita Jiova uelis semi kinpaleuis ichankauan, maski inamik xa amo kitekitilia Jiova oso amo mochikauaok kitakamatis itanauatiluan. Amo kitemos keniuj uelis kikauas inamik, ta kipoujkaitas uan kitakamatis, uan ijkon kitemos kipaleuis maj kineki kiixmatis Jiova (1 Ped. 3:1, 2). Sayoj ke maski inamik amo kiixtalis kitekitilis Jiova, yejuatsin yolpakis keman kiitas ke tokniuj siuat kitakamati inamik uan ke ijkon kitakamati yejuatsin.

19. ¿Kemanian tokniuj siuat amo kitakamatis inamik?

¹⁹ Sayoj ke tokniuj siuat amo kitakamatis inamik komo inamik kiluia maj kichiua se taman tein kitapanauilia itanauatiluan Dios. Kemej neskayot, maj tiknemilikan ke se takat akin amo itaixpantijkauj Jiova kiluia inamik maj takajkayaua, maj tachteki oso maj kichiua teisa tein Jiova amo kiyolpaktia. Nochin tokniuan, hasta tokniuan siuamej akin kipiaj ininnamik, moneki yekinika kitakamatiskej Jiova. Yejua ika, komo se tokniuj siuat kiluiaj maj kichiua teisa tein kitapanauilia tein Biblia kijtoua, moneki amo kichiuas uan maj ika netasojtalis kijto keyej amo ueli kichiua nejon (Hech. 5:29).

20. ¿Keniuj tikmatij ke María kuali mouikaya iuan Jiova?

²⁰ María kipiaya se kuali uikalis iuan Jiova. Moita ke kuali kiixmatia iTajtol porin keman kinojnotsak Elisabet, imomaj Juan akin taauiaya, panoua sempoalpa kijtoj tajtolmej tein moajsij itech Escrituras Hebreas (Luc. 1:46-55). Uan maj tiknemilikan nejin: maski María monamiktiskia iuan José, iángel Jiova amo achto kiitato yejua, ta achto kinojnotsak María uan kiluij ke kipiaskia se konetsin, akin yeskia iKonetsin Dios (Luc. 1:26-33). Jiova  kuali kiixmatia María uan kimatia ke kitasojtaskia uan kiyekpiaskia iKonetsin. Uan tikmatij ke María kisentokak kuali mouikak iuan Jiova hasta satepan ke Jesús momikilij uan yajki iluikak (Hech. 1:14).

21. ¿Toni uelis kinmachtis takamej tein Biblia kijtoua ke kichiuaya María?

²¹ ¿Toni uelis kinmachtis takamej? Tokniuj takat akin tamatkej kiyolpaktia maj inamik kuali kiixmati iTajtol Dios. Amo kualani nion kinemilia ke inamik kineki kitapanauilis. Kiajsikamati ke komo inamik kuali kiixmati tein Biblia tamachtia uan tein tayolmajxitia uelis semi kinpaleuis ichankauan. Uan maski siuat xa kiselij okachi tamachtilis itech kaltamachtiloyan, takat moneki kinixyekanas ichankauan maj kiueyichiuakan Jiova, kemej neskayot, moneki kiixyekanas taueyichiualis kemej kalyetouanij (Efes. 6:4).

22. ¿Toni uelis kinmachtis siuamej ineskayo María?

²² ¿Toni uelis kinmachtis siuamej? Maski siuat moneki kiajsikamatis ke inamik moneki kinixyekanas ichankauan maj kiueyichiuakan Jiova, yejua no moneki kichiuas tein kipaleuis maj kisentoka mochikaua itakuaujtamatilis (Gál. 6:5). Yejua ika moneki kixelos tiempo uan momachtis iselti uan tanemilis. Nejin kipaleuis maj kisentoka kitasojta Jiova uan maj kipoujkaita, uan maj kiyolpakti kitakamatis inamik.

23. ¿Keniuj keman siuamej mokauaj maj kinixyekanakan kinpaleuia yejuan, ininchankauan uan tokniuan itech nechikol?

²³ Siuamej akin mokauaj maj ininnamik kinixyekana porin kitasojtaj Jiova okachi yolpakij ke siuamej akin amo mokauaj maj kinixyekanakan. Uan no, kinkauiliaj se kuali neskayot telpochmej uan ichpochmej, uan tapaleuiaj maj ininchankauan uan tokniuan itech nechikol motasojtakan uan maj kipiakan yolseuilis (Tito 2:3-5). Axkan, miakej itekitikauan Jiova siuamej (Sal. 68:11). Sayoj ke tinochin, takamej uan siuamej, uelis titapaleuiskej maj itech nechikol tinochin tiyolpakikan. Itech okse tamachtilis tikitaskej keniuj tikchiuaskej.