NE UEJKAUJ, keman se takat uan se siuat monamiktiskiaj, takat monekia kintaxtauis ichankauan siuat, xa ika tapialmej, tomin oso okseki taman tein kipiaya ipatiuj. Kemansa no uelia kintaxtauiaya ika tekit, kemej kichiuak Jacob keman yaya monamiktiti iuan Raquel. Kiluij imontat ke kitekitiliskia chikome xiujmej (Gén. 29:17, 18, 20). ¿Keyej se takat monekia taxtauas?

Carol Meyers, akin momachtiani tein Biblia ika tajtoua, kijtoj: “Tein takat kinmakaya ichankauan siuat kemej yeskia ika kintaxtauiaya porin siuat amo kinpaleuiskiaok ika tekit. Nejin semi kinpaleuiaya kalyetouanij akin tatokayaj uan ijkon moixpanoltiayaj”. No tapaleuiaya maj ichankauan siuat uan takat okachi kuali mouikanij uan keman kipiaskiaj ouijkayomej ueliskia mopaleuiskej. Uan no, kinextiaya ke se siuat yaya monamiktitia uan ke axkan amo ipopaj kiyekpiaskiaok ta inamik.

Keman se takat kintaxtauiaya ichankauan siuat, amo kijtosnekia ke siuat katka kemej se teisa tein uelia se kikouaya oso se kinamakaya. Amatajkuilol Instituciones del Antiguo Testamento kijtoua: “Keman itech xolal Israel se takat kinmakaya tomin oso okseki taman ichankauan siuat, ueliskia moitas ke kemej yeskia kikouaya siuat. Sayoj ke […] amo ijkon kiitayaj, ta kemej se netetayokolil tein kinmakayaj ichankauan siuat”. *

Itech seki altepemej, takamej kisentokajok kintaxtauiaj ichankauan siuat keman kinekij monamiktiskej. Komo tetatmej akin itaixpantijkauan Jiova amo tajtanij miak tomin, taltikpakneminij kiitaskej ke yektanemiliaj (Filip. 4:5; 1 Cor. 10:32, 33). Ijkon kinextiskej ke amo ‘xijxikuintinemij ika tomin’ (2 Tim. 3:2). Uan no, komo amo tajtanij miak tomin, takat uelis kiixtalis maj niman monamiktikan porin amo monekis kisentilijtos miak tomin. Uan komo precursor, uelis kisentokas kichiuas nejon tekit porin amo monekis tekitis okachi tonalmej para kisentilis tomin tein kitajtaniaj.

Itech seki altepemej, tekiuanij kiixtaliaj kanachi moneki taxtauaskej. Uan tetatmej akin itaixpantijkauan Jiova kitakamatij tein kiixtaliaj. Ijkon kichiuaj porin Dios kinnauatia itekitikauan: “Moneki xikintakamatiyakan nochi nojon tekiuani ten kintalia in gobierno”. Yejuatsin kineki maj kitakamatikan tanauatilmej tein tekiuanij kiixtaliaj komo amo kitapanauiliaj itanauatiluan (Rom. 13:1; Hech. 5:29).