1. ¿Toni kinnankilij Jesús imomachtijkauan keman kitajtanijkej kemanian ‘tamis tein mochiujtok itech taltikpak’, uan toni kinyolmajxitij?

 TEPITSIN achto ke Jesús momikiliskia, naui imomachtijkauan kitajtanijkej toni kinextiskia ke “tamitiya tein mochiujtok itech taltikpak” (Mat. 24:3). Yejuan xa motajtaniayaj keniuj kimatiskiaj kemanian kiixpoloskiaj Jerusalén uan templo. Keman kinnankilij, Jesús amo sayoj ika tajtoj ke Jerusalén uan templo kiixpoloskiaj, ta no keman ‘tamiskia tein mochiujtok itech taltikpak’ kampa tinemij. Keman ika tajtoj nejon, kijtoj: “Nejon tonal oso hora amo akin kimati, nion ángeles akin nemij ne iluikak nion iKoneuj Dios; sayoj noTajtsin”. Satepan kinyolmajxitij: “Xiijsatokan” uan “Nochipa xitachixtokan” (Mar. 13:32-37).

2. ¿Keyej tokniuan itech yekinika siglo monekia nochipa tachixtoskej?

² Tokniuan itech yekinika siglo monekia nochipa tachixtoskej porin sayoj ijkon ueliskia momakixtiskej. Jesús kiniluij imomachtijkauan keniuj kimatiskiaj ke yaya kiixpolotijya Jerusalén uan templo. Kiniluij: “Keman nankiitaskej ke miakej soldados kiyoualojtokej Jerusalén, xikmatikan ke kiixpolotijya”. Keman kiitaskiaj nejon, monekia choloskej itech tepemej kemej Jesús kiniluijka (Luc. 21:20, 21). Akin kichiujkej tein Jesús kijtoj, cholojkej achto ke romanos kiixpoloskiaj Jerusalén uan momakixtijkej.

3. ¿Toni tikitaskej itech nejin tamachtilis?

³ Tejuan tinemij itech tonalmej keman tamitiya tein amo  kuali. Yejua ika, ijkon kemej tokniuan itech yekinika siglo, no moneki maj tiksentokakan kuali titalnamiktokan uan maj nochipa titachixtokan. Itech nejin tamachtilis timomachtiskej toni uelis tikchiuaskej uan toni amo, keman tikitaskej tein mochiujtok itech taltikpak. No tikitaskej keniuj uelis timoyekpiaskej tisejsemej uan keniuj kuali tikuiskej totiempo achto ke ixpoliuis tein amo kuali.

4. ¿Keyej tiknekij tikmatiskej toni mochiujtok itech taltikpak?

⁴ Keman tikitaj tein mochiujtok itech taltikpak, tiknekij tikmatiskej keniuj mochiujtokya tein Biblia kijtojka. ¿Keyej? Yekinika porin Jesús kijtoj toni techpaleuiskia maj tikmatikan ke amo uejkaua ixpoliuisya nochi tein Satanás kiixyekana (Mat. 24:3-14). Ojpatika porin tatitanil Pedro no techyolmajxitij maj tikitakan keniuj mochiujtokya tein Biblia kijtojka para maj nochipa titakuaujtamatikan (2 Ped. 1:19-21). Uan ipeujyan amatajkuilol Apocalipsis kijtoua: “Nejin yejua tein Dios kinextilij Jesucristo, para maj kinnextili itakeualuan tein amo uejkaua moneki mochiuas” (Apoc. 1:1). Yejua ika tiknekij tikmatiskej toni mochiujtok itech taltikpak uan keniuj nejin kinextia ke mochiujtokya tein Biblia kijtojka. Uan xa hasta tikuelitaj ika titajtoskej nejon iniuan tokniuan.

5. ¿Toni amo moneki tikchiuaskej keman ika titajtouaj tein mochiujtokya tein Biblia kijtojka, uan toni moneki tikchiuaskej? (No xikonita taixkopimej).

⁵ Keman ika titajtoskej keniuj mochiujtokya tein Biblia kijtojka, amo moneki tikijtoskej tein tejuan tiknemiliaj. ¿Keyej? Porin tokniuan ueliskia moxexeloskej. Xa tikakiskej ke seki taixyekananij itech nochi taltikpak peua kijtouaj keniuj kiyektaliskej se kuejmol uan kichiuaskej maj tiyolseujkanemikan uan maj kuali tiyetokan. Amo kuali yeskia maj tiknemilikan ke nejon kinextia ke mochiujtokya tein kijtoua 1 Tesalonicenses 5:3, ta okachi kuali maj tiktemokan tikmatiskej toni yankuixtok kitematiltiani inechikol Jehová. Komo nochi tein tikijtouaj yejua tein kimelauani inechikol, titapaleuiaj maj amo tixexeliujtokan uan maj tikpiakan “sayoj se tanemilil” (1 Cor. 1:10; 4:6).

6. ¿Toni techmachtia tein kijtoua 2 Pedro 3:11-13?

⁶ (Xikonixtajtolti 2 Pedro 3:11-13). Tatitanil Pedro techpaleuia maj tikitakan keyej moneki timomachtiskej tein Biblia kijtojka ke panoskia. Techyolmajxitia maj ‘semi tikchixtokan maj ejko itonal Jehová’. ¿Keyej? Amo porin tiknekij tikmatiskej “tonal uan hora” keman Jehová kiualkuis Armagedón, ta porin tiknekij tikuiskej tiempo tein mokauaok para ‘tichipaujkanemiskej uan tikchiuaskej tein kinextis ke tikueyichiuaj Dios ika nochi toyolo’ (Mat. 24:36; Luc. 12:40). Tiknekij kuali timonejnemiltiskej uan tikitaskej ox tiktekitiliaj Jehová porin semi tiktasojtaj, ijkon tikchiuaskej komo timoyekpiaj tisejsemej.

7. ¿Toni kijtosneki maj timotachilikan? (Lucas 21:34).

⁷ Jesús amo sayoj kiniluij imomachtijkauan maj kiitanij tein mochiuaya itech taltikpak, ta no maj moyekpianij. Nejin ixnesi itech Lucas 21:34 (xikonixtajtolti). Ompa Jesús kijtoj: “Ximotachilikan”.  ¿Toni kijtosneki maj timotachilikan? Kijtosneki tikitstoskej toni uelis kichiuas maj amo timouikakanok iuan Jehová uan timoyekpiaskej. Komo tikchiuaj nejin, Dios kisentokas techtasojtas (Prov. 22:3; Jud. 20, 21).

8. ¿Toni kinyolmajxitij Pablo akin kichiuaj kemej Cristo?

⁸ Tatitanil Pablo kiniluij akin kichiuaj kemej Cristo ke monekia motachiliskej. Tokniuan akin nemiaj Éfeso kinijkuilouilij: “Ximoyekpiakan para amo nanentinemiskej kemej akin amo kuatamatij, ta kemej akin tamattokej” (Efes. 5:15, 16). Satanás semi kitemoua maj amo tiktekitilikanok Jehová. Yejua ika, Biblia techyolmajxitia maj tikajsikamatikan “toni kineki Jehová” para timoyekpiaskej keman Satanás techixnamikis (Efes. 5:17).

9. ¿Keniuj uelis tikmatiskej toni kineki Jehová maj tikchiuakan?

⁹ Biblia amo kijtoua sejse taman tein ueliskia kichiuas maj amo timouikakanok iuan Jehová. Miakpa, toselti moneki tikixejekoskej toni tikchiuaskej keman Biblia amo senkis kijtoua toni tikixpejpenaskej. Para kuali titaixpejpenaskej, moneki tikajsikamatiskej “toni kineki Jehová”. ¿Keniuj tikchiuaj? Keman timomachtiaj iTajtol Dios uan nochipa itech titanemiliaj tein timomachtiaj. Keman okachi tikajsikamatiskej toni kineki Jehová uan okachi timochikauaskej ‘titanemiliskej kemej Cristo’, tinentinemiskej “kemej akin tamattokej”, uan kuali titaixpejpenaskej hasta keman Biblia amo senkis kijtos toni uelis tikchiuaskej (1 Cor. 2:14-16). Tein melauj, seki taman uelis ijsiujka tikmatiskej ke amo kuali yetok, sayoj ke itech okseki taman xa techouijmakas tikitaskej ox kuali oso amo.

10. ¿Toni seki taman moneki amo tikchiuaskej?

¹⁰ Seki taman tein amo moneki tikchiuaskej yejua nejin: amo tiknextiskej ke tikueuelitaj aksa komo sayoj timauiltijtokej, amo titeltatayiskej oso titeltakuaskej, amo tikijtoskej tein teyolkokos uan amo timoixpetaniskej ika nion se taman kampa monextia tateuilis oso auilnemilis (Sal. 101:3). Satanás akin semi techtauelita nochipa kitemojtok maj amo timouikakanok iuan Jehová (1 Ped. 5:8). Komo amo timoyekpiaj, uelis peuas titenexikoluiskej, titakajkayauaskej, tikixnejnekiskej tein teaxka, titetauelitaskej, timoueyimatiskej uan tiyolkualantinemiskej (Gál. 5:19-21). Maski yekinika xa sayoj tepitsin tikyolmachiliskej, komo amo niman timokixtiliaj, uelis kichiuas maj titajtakokan uan techijtakos (Sant. 1:14, 15).

11. ¿De toni moneki timoyekpiaskej uan keyej?

¹¹ Maj tikitakan okse taman tein uelis techijtakos: komo timouikaj iniuan akin amo kitekitiliaj Jehová. Maj tiknemilikan ke titekitij iuan aksa akin amo itaixpantijkauj Jehová. Kemej tiknekij maj kuali kinita itaixpantijkauan Jehová, timochikauaj tiyeskij tikualtakamej iuan uan tikpaleuiaj. Maski yekinika xa sayoj kemansa iuan titakuaj, satepan peua nochipa iuan titakuaj. Kemansa ika tajtoua auilnemilis. Yekinika amo kuali timomachiliaj uan amo teyi tikijtouaj, sayoj ke satepan timomatij uan amo techkuejmolouaok. Se tonal, techyoleua maj titayitij teisa satepan den tekit uan tikiluiaj ke tiaskej. Ijkon yolik peua titanemiliaj kemej yejua. ¿Kanachi tiempo monekis panos para no ijkon peuas timonejnemiltiskej? Maski tikmatij ke akin  tikchiuaj kemej Cristo moneki tiyeskij tikualtakamej uan tikinpoujkaitaskej oksekin, maj amo tikelkauakan ke uelis peuas timonejnemiltiskej kemej yejuan (1 Cor. 15:33). Komo tikchiuaj tein Jesús kijtoj uan tiksentokaj timoyekpiaj, amo semi iniuan tiyetoskej akin amo kitakamatij itanauatiluan Jehová (2 Cor. 6:15). Tikitaskej tein uelis panos uan amo timouikaskej iniuan.

12. ¿Toni monekia kichiujtoskej itatojtokakauan Jesús keman kichixtoyaj maj ixpoliuini Jerusalén uan templo?

¹² ¿Toni monekia kichiujtoskej itatojtokakauan Jesús keman kichixtoyaj maj ixpoliuini Jerusalén uan templo? Jesús kinnauatij imomachtijkauan maj kichiujtonij se tekit. Maj kiteixmatiltianij kuali tanauatilmej “ompa Jerusalén, itech nochi Judea uan Samaria, uan itech nochi taltikpak” (Hech. 1:6-8). Maski nejin katka se ueyi tekit, kuali kikuitoskiaj inintiempo komo nochipa tanojnotsaskiaj.

13. ¿Keyej moneki maj kuali tikuikan totiempo? (Colosenses 4:5).

¹³ (Xikonixtajtolti Colosenses 4:5). Para timotachilijtoskej, moneki tikitaskej keniuj tikuitokej totiempo. Kemej  kijtoua Eclesiastés 9:11, tinochin uelis techpanos ‘tein amo tikchiayaj’. Hasta uelis ijsiujka timomikiliskej.

14, 15. ¿Keniuj okachi kuali tikuiskej totiempo? (Hebreos 6:11, 12; no xikonita taixkopin).

¹⁴ Kuali tikuitokej totiempo komo tikchiujtokej tein Jehová kineki uan timochikaujtokej okachi kuali timouikaskej iuan, (Juan 14:21). Moneki tikchiuaskej nejin tein Biblia tayolmajxitia: “Xiksentokakan xiyekijkatokan, amo ximotsinkixtikan uan nochipa xikchiujtokan itekiuj toTekotsin” (1 Cor. 15:58). Komo tikchiuaj nejin, maski timomikiliskej oso ejkosya tonal keman ixpoliuis tein amo kuali, amo timoyolkokoskej porin kuali tikuikej totiempo para tiktekitiliskej Jehová (Mat. 24:13; Rom. 14:8).

¹⁵ Axkan Jesús kisentoka kinixyekana imomachtijkauan para maj tanojnotsakan itech nochi taltikpak ijkon kemej kijtojka ke kichiuaskia. Jesús kikui inechikol Jehová para techmachtis keniuj tikteixmatiltiskej kuali tanauatilmej uan techmaka tein techpaleuia maj kuali titanojnotsakan (Mat. 28:18-20). Yejua ika, axkan ke tikchixtokej tonal keman Jehová kiixpolos nochi tein amo kuali, moneki timochikauaskej titanojnotsaskej uan kuali titamachtiskej uan tiksentokaskej titachixtoskej. Titaxikoskej “hasta keman tatamis” komo tikchiuaj tein kijtoua Hebreos 6:11, 12 (xikonixtajtolti).

16. ¿Toni tikixtalijtokej tikchiuaskej?

¹⁶ Jehová kiixtalijya kemanian kiixpolos nochi tein Satanás kiixyekana. Keman ejkos nejon tonal, kichiuas nochi tein Biblia kijtojka ke panoskia. Uan maski xa tiknemiliskej ke amo niman kiixpoloua nochi tein amo kuali, itonal Jehová “amo motajkajtilis” (Hab. 2:3). Yejua ika, maj tikixtalikan tikchiuaskej tein kijtoua Miqueas 7:7: “Niksentokas nitachixtos itech Jehová. Nikchias Dios akin nechmakixtia”.