MAJ tiknemilikan ke tinejnentokej itech se ojti keman tel youakya. Ompa, tikitaj ke aksa techtojtoka. Komo timotsakuiliaj, no motsakuilia. Komo okachi ijsiujka tinejnemij, no ijsiujka nejnemi. Ompa tikelnamikij ke ompakauin nemi se totasojikniuj. Yejua ika titsikuinij hasta ichan. Keman techtatapouilia uan techiluia maj tipanokan, tiyolseuij porin tikmatij ke amo teyi techpanosok.

Nejin xa amo keman techpanouani. Sayoj ke xa itech tonemilis tikpanouaj okseki taman tein techtekipachoua. Kemej neskayot, ¿timochikaujtokej amo tiuetsiskejok itech se tajtakol? ¿Uejkaujya tikpolojkej totekiuj uan amo ueli tikajsij okse? ¿Timotekipachouaj porin tiueuentsintiaj uan techtekipachoua maj peua tikokolispeuakan? ¿Onkak okse taman tein techtekipachoua?

Tein yeski netekipacholis tikpiaskej, semi kuali yeskia maj tikpiakan se totasojikniuj akin techkaki uan kineki techpaleuis. ¿Tikpiaj se totasojikniuj ijkon? Kemaj. Jiova yejua nejon tetasojikniuj. Yejuatsin katka se kuali itasojikniuj Abrahán, kemej tikitaj itech Isaías 41:8-13. Itech versículo 10, Jiova techiluia tisejsemej: “Amo ximoui, porin nejua niyetok mouan. Amo ximotekipacho porin nejua nimoDios. Nejua nimitschikauas, kemaj, nejua nimitspaleuis, nejua yekmelauj nimitsmakitskis ika noyekmay tein kipia melaujkayot”. Uan itech versículo 13 kisentoka kijtoua: “Nejua, Jiova moDios, nikitskijtok moyekmay, Akin mitsiluia: ‘Amo ximoui. Nejua nimitspaleuis’”.

Itajtoluan Jiova semi techyolseuiaj. ¿Tiknemilianij tein Jiova motenkaujtok touan? Nejin tajkuilol amo kijtoua ke tinejnentokej inakastan Jiova uan techmajchana. Komo ijkon yeskia, yejuatsin ika ‘iyekmayʼ kikitskiskia toopochmay. Sayoj ke tajkuilol kijtoua ke Jiova kimelaua ‘iyekmayʼ uan kikitskia toyekmay, kemej yeskia kinekiskia techtilanas uan techkixtis itech se ouijkayot. Keman yejuatsin kikitskia toyekmay, techyolchikaua keman techiluia: “Amo ximoui. Nejua nimitspaleuis”.

¿Tikitaj Jiova kemej totasojikniuj uan topopaj akin techtasojta? ¿Titakuaujtamatij ke yejuatsin techpaleuis keman tikpiaskej kuejmolmej? Yejuatsin kiita tein techpanoua uan kineki techpaleuis. Keman tikpiaj kuejmolmej, kineki maj tiyolseujtokan. ¿Keyej? Porin techteltasojta. Yejuatsin “se nepaleuil tein niman se kiajsi keman onkak ouijkayomej” (Sal. 46:1).

Seki tokniuan amo ueli kielkauaj tein ika mopolojkej achtoya uan motajtaniaj ox Dios kintapojpoluijya. Komo ijkon timomachiliaj, maj titanemilikan  itech Job. Yejua kijtoj ke tajtakojka keman katka telpoch (Job 13:26). David no kijtoj ke tajtakoj keman katka telpoch. Yejua ika kitajtanij Jiova maj kielkauani itajtakoluan (Sal. 25:7). Kemej tinochin titajtakouanij, Biblia kijtoua ke “tinochin timotajtakolmakakke iixpantsinko Yejuatsin uan uejka [tinentinemij] de ne chipaukanemilis ten Dios kimonekiltia ma tikpiakan” (Rom. 3:23).

Tein kijtoua Isaías capítulo 41 kinijkuilouilijkej israelitas. Kemej yejuan ueyi tajtakojkaj, Jiova kijtoj ke kintatsakuiltiskia keman kikauaskia maj kinuikakan Babilonia kampa kintajyouiltiskiaj (Is. 39:6, 7). Sayoj ke no motenkauak ke kinmakixtiskia akin moyolnonotsaskiaj uan oksepa kitakamatiskiaj (Is. 41:8, 9; 49:8). Itech nejin tonalmej, Jiova no kintasojta uan kintapojpoluia akin yekmelauj moyolnonotsaj uan mochikauaj kiyolpaktiskej (Sal. 51:1).

Maj tikitakan tein kipanok se tokniuj akin monotsa Takuya. * Yejua mochikauaya amo kiitasok auilnemilis uan amo momajmatokas. Sayoj ke miakpa uetsia itech nejon tajtakolmej. Kijtoua ke kimachiliaya ke amo teyi chiujkej katka. Sayoj ke keman kitataujtiaya Jiova maj kitapojpolui, kimachiliaya ke Dios kemej yeskia kiajokuia satepan ke uetsia. ¿Keniuj kichiuaya Jiova? Inintechkopa tayekananij. Yejuan kiluijkej Takuya maj kinnotsani ika teléfono keman uetsiskia itech nejon tajtakol. Yejua kijtoua ke semi kiouijmakaya kinnotsas, sayoj ke keman kinnotsaya, okachi kuali momachiliaya. Se tonal, tayekananij kiluijkej tokniuj takalpanojkej maj kikalpanouani Takuya uan maj kiyolchikaua. Keman tokniuj takalpanojkej yajki kiitato, kiluij ke amo ompa yetoya sayoj porin iselti kinemilij, ta porin tayekananij kiixpejpenkaj Takuya maj kikalpanotij. Takuya kijtoua ke maski tajtakojtoya, Jiova inintechkopa tayekananij kipaleuij. Satepan, uelik kikauak nejon tajtakolmej uan mochiuak precursor regular. Axkan tekiti itech se sucursal. Jiova kipaleuij nejin tokniuj, uan no techpaleuis tejuan keman timopoloskej.

Sekin semi motekipachouaj porin kipolojkej tekit uan amo ueli kiajsij okse. Maj tiknemilikan keniuj se momachilia keman miakej amo kinekij tetakeuaskej. Nejin kichiua maj miakej momachilikan ke amo teyi chiuanimej. Komo techpanoua nejin, ¿keniuj uelis techpaleuis Jiova? Xa amo ijsiujka techmakas se tel kuali tekit, sayoj ke uelis techpaleuis maj tikelnamikikan nejin itajtoluan David: “Nejua katka nitelpoch uan no niueuentsintiakya, sayoj ke amo akin nikitani akin yolmelauak maj kisenkauakan, nion ikoneuan maj kitemojtokan tein kikuaskej” (Sal. 37:25). Jiova semi techpatiuita. Yejuatsin techmaka ‘iyekmayʼ tein techpaleuia maj tikpiakan tein monekis tein techpaleuis maj tiksentokakan tiktekitilikan.

Itech ueyi altepet Colombia, se tokniuj itokay Sara kiitak keniuj Jiova kipaleuij. Yejua tekitia nochi tonalmej itech se ueyi tekitiloyan uan kuali tatania. Sayoj ke kinekia okachi kitekitilis Jiova.  Yejua ika kikauak itekiuj uan mochiuak precursora. Kemej ouij kikisak kiajsis se tekit kampa tekitiskia sayoj tajko tonal, peuak kinamaka helados. Sayoj ke tamik itomin uan monekik tatsakuas. Yejua kijtoua ke kimachilij ke semi yolik panok eyi xiuit tein kisentokak, sayoj ke Jiova kipaleuij maj taxiko. Kiitak toni yekmelauj kipolouaya uan kimatik toni kichiuas tein kipaleuij maj amo kiteltekipacho tein panoskia satepan (Mat. 6:33, 34). Satepan, akin achto katka iteko kinotsak porin kimakaya tekit tein achto kipiaya. Yejua kiluij ke tekitiskia komo sayoj tekitia tajko tonal uan komo kikauaya maj youi nechikolmej uan uejueyi nechikolmej. Iteko kijtoj ke kemaj. Axkan Sara amo tatani kemej achto, sayoj ke kisentoka tekiti kemej precursora. Yejua kijtoua ke itech ouijkayomej tein kipanok kimachilij keniuj Jiova kipaleuiaya ika netasojtalis.

Miakej motekipachouaj porin okachi ueuentsintiaj uan amo uejkaua amo uelisok tekitiskej. Motajtaniaj ox kipiaskej tomin tein kinajsis maj kuali nemikan satepan. No motekipachouaj porin satepan uelis kokolispeuaskej. Xa yejua tekiuaj David akin kitataujtij Jiova: “Amo xinechixtopeua keman nixiuejya; amo xinechkaua keman kaxantok nochikaualis” (Sal. 71:9, 18).

¿Toni kinpaleuis akin xiuejkejya maj amo kinteltekipacho tein panos satepan? Komo kichikauaj inintakuaujtamatilis iuan Dios uan takuaujtamatij ke yejuatsin kinmakas nochi tein kinpoloua. Sekin kipiakej miak taman keman kipiayaj okachi tomin. Yejua ika xa monekis momatiskej kipiaskej amo miak taman uan yolpakiskej. Xa hasta kiitaskej ke semi kinpaleuia maj kuali yetokan komo kikuaj “kilmej” uan amo nakat (Prov. 15:17). Komo tiktayekanaltiaj tiktekitiliskej Jiova, yejuatsin kiitas maj tikpiakan nochi tein techpolos keman tiueuentsintiaskej.

Maj titanemilikan itech tein kipanokej José uan Rose, seki namikuanij akin panouaya 65 xiujmej kitekitilijtokej Jiova itech tekit kemej precursor. Itech nochi nejin xiujmej kipianij miak ouijkayomej. Kemej neskayot, monekik kiyekpiaskej ipopaj Rose, akin monekia kiitaskej youal uan tonal. Uan no, José monekik kitekiskej tapajtianij porin kipiaya cáncer uan kichiuiliskej quimioterapia. ¿Keniuj Jiova kinmakitskij nejin namikuanij? Inintechkopa ome tokniuan akin monotsaj Tony uan Wendy. Yejuan kipiayaj se kali tein amo kikuiaj uan kinekiaj kintaneujtiskej akin kichiujtoyaj tekit kemej precursor. Tony kielnamikik ke keman yetoya itech tamachtiloyan, kinitaya José uan Rose tanojnotstoyaj. Kiyolpaktiaya kinitas keniuj tanojnotsayaj ika yolpakilis, uan nejin semi kipaleuij. Kemej José uan Rose nochi ininnemilis kitekitilijtoyaj Jiova, Tony uan Wendy kiniluijkej ke ueliskia ompa mokauaskej. Yejuan kinpaleuianij 15 xiujmejya José uan Rose, akin axkan kipiaj kemej 85 xiujmej. José uan Rose kinitaj Tony uan Wendy kemej se inetetayokolil Jiova.

Jiova motenkaua touan: “Amo ximoui. Nejua nimitspaleuis”. Yejuatsin no techmaka ‘iyekmayʼ. ¿Timomamelauaskej uan tikmakitskiskej?