1. ¿Toni totech yetok tinochin?

MAJ tiknemilikan ke timonamikij iuan aksa akin tikixmatij uan tikpoujkaitaj, sayoj ke yejua amo kielnamiki keniuj timonotsaj, oso tein okachi amo kuali, nion techelnamikiok. ¿Keniuj timomachiliskej? Xa semi titayokoyaskej, porin tinochin totech yetok tiknekiskej maj oksekin techixmatikan. Sayoj ke amo sayoj tiknekij maj kimatikan tiakonimej, ta no maj kimatikan keniuj titamatij uan tein tikchiuanij (Núm. 11:16; Job 31:6).

2, 3. ¿Toni uelis techpanos porin titajtakouanij? (Xikonita taixkopin ipeujyan tamachtilis.)

² Sayoj ke, ijkon kemej panoua ika okseki taman tein totech yetok, kemej titajtakouanij xa tiknekiskej maj okachi kiitakan tein tikchiuaj. Uan no, nochi tein kiixyekana Satanás uelis kichiuas maj tiknekikan tiyeskij tiueyichiuanimej uan maj noyampa techixmatikan. Keman panoua nejon, amo tikueyitaliaj nion tikueyichiuaj toTajtsin Jiova kemej kinamiki (Apoc. 4:11).

 ³ Itech itonaluan Jesús, seki taixyekananij itech taneltokalis kitelnekiaj maj oksekin kiitanij tein kichiuayaj. Yejua kinnejmachtij imomachtijkauan: “Ximotachialikan ka kuali de ne tanextiliani den tanauatil de Moisés porin yejuan semi kuelitaj nentinemiske uan mokualnextijtinemij ika ne itilma ten sen tanikistok. Uan yejuan no kuelitaj ke ma kinmouiskatajpalokan tech in plazajteno. Uan yejuan no kuelitaj motalitiue ne taixpampa den tiopan de judíos kampa yetokke ne mouiskasillajme. Uan no semi kinekij motalitiue tech ne sillajme kampa kachi kuali tatakuaske”. Uan no kijtoj: “Nochi nijinkes kiseliske imako Dios kachi ueyi tatsakuiltilis” (Luc. 20:46, 47). Sayoj ke, Jesús kijtoj ke semi kuali tein kichiuak se siuatsin akin amo nemiaok inamik uan kipanouaya tatasojtilis keman kitemakak tepitsin tomin uan amo kitemoj maj oksekin kiitanij (Luc. 21:1-4). Ijkon, Jesús kinextij keniuj kiita Jiova maj se kitelneki maj oksekin kiitakan tein se kichiua. Nejin tamachtilis techpaleuis maj tikitakan nejin taman kemej kiita Dios.

4. ¿Akoni okachi moneki tiktemoskej maj techixmati, uan keyej?

⁴ ¿Kani moneki tiktemoskej maj techixmatikan? Amo itech tein onkak nikan taltikpak kemej itech nemachtil, tanamakalis oso neixpetanilis. Pablo kimelauak akoni moneki tiktemoskej maj techixmati. Yejua kijtoj: “Axkan namejuan nankixmatij ya Totajtsin Dios. Oso kachi kuali ma nikijto ke Totajtsin Dios namechixmatiko ya. Uan [...] ¿keye nankitoktiliske oksepa ne tayekanani ejekame de pouij nikan taltikpak ten amo kualkui chikaualis para namechmakixtiske? Uan keme [...] nenkajti san ninuelilis, ¿keye nanmotekauiliske inuan ke ma yejuan oksepa namechmapachojto keme yeskia nannintakeualuan innauak?” (tejuan tiktalilijkej cursivas; Gál. 4:9). ¡Se ueyi tatiochiualis maj techixmati Dios, ueyi Taixyekankej itech nochi tein onkak! Yejuatsin kimati tiakonimej, techtasojta uan kineki maj timochiuakan tiitasojikniuan. Jiova techchijchiuak kemej uelis kuali timouikaskej iuan (Ecl. 12:13, 14).

5. ¿Toni uelis techpaleuis maj Jiova techita kemej tiitasojikniuan?

⁵ Yejua nejon tein panok iuan Moisés. Keman kitataujtij Jiova maj kikauani maj okachi kuali kiixmati iojuan, yejuatsin kinankilij: “No nikchiuas nejin tein titajtanik, porin tinechyolpaktia uan nimitstokayixmati” (Éx. 33:12-17). Tejuan no tikseliaj uejueyi tatiochiualismej keman Jiova techixmati. Sayoj ke ¿toni moneki tikchiuaskej tein techpaleuis maj Dios techita kemej tiitasojikniuan? Moneki tiktasojtaskej uan timotemaktiskej iuan (xikonixtajtolti 1 Corintios 8:3).

6, 7. ¿Toni uelis kichiuas maj amo kuali timouikakanok iuan Jiova?

⁶ Sayoj ke, moneki tikyekpiaskej tokuali uikalis iuan toTajtsin. Ijkon kemej tokniuan akin nemiaj Galacia, moneki amo tiktemoskej timoajsiskej imako tein onkak itech nejin taltikpak “ten amo kualkui chikaualis” uan “nenkajti san”, kampa no poui tiknekiskej maj techixmatikan (Gál. 4:9). Dios kinixmatiaya nejon tokniuan. Sayoj ke Pablo kijtoj ke oksepa kitemojtoyaj tein sayoj nenkajti. Ika okseki tajtolmej, kemej yeskia kiniluijtoya: “¿Keyej oksepa nankitemojtokej tein amo teyi ika tapaleuia uan tein amo kipia ipatiuj tein nankikaujkajya?”.

⁷ ¿Uelis no techpanos nejon? Kemaj. Keman tikixmatkej Jiova, xa tikixtalijkej  maj amo techixmatikanok itech nejin taltikpak, ijkon kemej kichiuak Pablo (xikonixtajtolti Filipenses 3:7, 8). Xa amo tikselijkejok se ueyi tamachtilis, se okachi kuali tekit oso amo tiknekkej tiktaniskej miak tomin. Komo tel kuali titatsotsonaj oso timauiltiaj, ueliskia timoteltomintiskej uan noyampa techixmatiskiaj. Sayoj ke amo tiktemojkej nejon (Heb. 11:24-27). Amo tiknextiskiaj tamatilis komo tiknemiliskiaj maj amo tikixtalianij nejon uan ke okachi kuali tinemiskiaj. Nejon tanemilil uelis techuikas maj oksepa tiktemokan tein tikitayaj ke “nenkajti san” uan “amo kualkui chikaualis”.

8. ¿Keniuj uelis okachi tiknekiskej maj techixmati Jiova?

⁸ ¿Keniuj uelis okachi tiknekiskej maj techixmati Jiova uan amo maj kuali techitakan itech nejin taltikpak? Moneki maj tikelnamikikan ome taman tein motelneki. Yekinika, ke Jiova amo keman kinelkaua itekitikauan akin amo kikauaj (xikonixtajtolti Hebreos 6:10; 11:6). Yejuatsin kinpatiuita sejsemej uan kiita ke amo yeskia “Yolmelauaktsin” komo kinelkaua. Nochipa “kinixmati naken pouij iuantsin” (2 Tim. 2:19). Jiova kiita “ininojuan akin yolmelaujkej” uan kimati keniuj kinmakixtis (Sal. 1:6; 2 Ped. 2:9).

9. Xikonijto keniuj Jiova kimakixtij ixolal.

⁹ Kemansa, Jiova kinnextiliani akin pouij itech ixolal ke kiyolpaktiaj ika seki taman tein se kimoujkaita (2 Crón. 20:20, 29). Kemej neskayot, maj tiknemilikan keniuj Jiova kinmakixtij israelitas itech ueyiat Chichiltik keman itateuijkauan faraón kintojtokayaj (Éx. 14:21-30; Sal. 106:9-11). Kemej nejon amo keman mochiujtoya, taltikpakneminij kisentokayaj ika tajtouayaj maski panokajya cuarenta xiujmej (Jos. 2:9-11). Semi techyolchikaua tikelnamikiskej keniuj Jiova kinextij inetasojtalis uan ichikaualis ne uejkauj, okachiok axkan ke okachi motokia tonal keman techixnamikis Gog tein poui Magog (Ezeq. 38:8-12). Keman ejkos nejon tonal, semi timotasojkamatiskej porin tiktemojkej maj techixmati Jiova uan amo maj techixmatikan nikan taltikpak.

10. ¿Katiyejua ojpatika taman tein moneki tikelnamikiskej?

¹⁰ Ojpatika taman tein moneki tikelnamikiskej yejua ke Jiova uelis techtatiochiuis kemej amo keman tiknemilianij. Yejuatsin amo kintatiochiuis akin kichiuaj tein kuali sayoj porin kinekij maj oksekin kinitakan. ¿Keyej? Porin Jesús kijtoj ke keman taltikpakneminij kinueyitaliskej yejuaya nejon yeski inintaxtauil (xikonixtajtolti Mateo 6:1-5). Sayoj ke no kijtoj ke iTajtsin kinita akin amo kinueyitaliaj maski kinpaleuiaj oksekin. Yejuatsin kiita tein kichiuaj uan yejua ika kintatiochiuia, kemansa kemej amo kichiaj. Maj tikitakan seki neskayomej.

11. ¿Keniuj Jiova kitatiochiuij María?

¹¹ Keman ajsik tonal keman iKonetsin yoliskia nikan taltikpak, Jiova kiixpejpenak María, se ichpoch akin amo ueyichiujkej, maj kiyolitiani. Yejua nemia Nazaret, se xolalkonet tein semi uejka moajsia iuan xolal Jerusalén uan itemplo tein semi kualtsin katka (xikonixtajtolti Lucas 1:26-33). ¿Keyej kiixpejpenak nejin ichpoch? Ángel Gabriel kiluij: “Totajtsin Dios semi mitsyoliknelijtiuits”. María kinextij ke tel kuali mouikaya iuan  Jiova keman tepitsin satepan iuan tajtoj ichankauj, Elisabet (Luc. 1:46-55). Jiova kiitstoya keniuj monejnemiltiaya María, uan kemej nochipa kitakamatia, kimakak nejin tatiochiualis tein amo kichiaya.

12, 13. ¿Keniuj kiueyitalijkej Jesús keman yolik uan keman kiuikakej templo?

¹² Keman Jesús yolik, Jiova amo kinmatiltij uejueyi chiuanimej oso tekiuanij ompa Jerusalén uan Belén ke yolka, ta kintitanik seki ángeles maj kinmatiltitij seki ichkatajpianij akin kinyekpiayaj ininichkauan ompakauin itech xolal Belén (Luc. 2:8-14). Ichkatajpianij kikalpanotoj konetsin (Luc. 2:15-17). María uan José xa semi kinyolpaktij kiitaskej ke ijkon kiueyitaliayaj Jesús. Maj tiknemilikan keniuj semi taman tein kichiua Jiova uan tein kichiua Amokuali. Keman Satanás kintitanik seki sitalixmatinij maj kikalpanotij Jesús uan itatuan, nochin akin nemiaj Jerusalén kimatkej ke yolka, uan nejin kiualkuik miak kuejmolmej (Mat. 2:3). Nejon kichiuak maj kinmiktianij tel miakej konemej (Mat. 2:16).

¹³ Ome poual tonalmej satepan ke Jesús yolik, María monekia kimakas Jiova se nemaktil itech templo ompa Jerusalén. Kisaskiaj Belén uan monekia ojtokaskej kemej ome hora (Luc. 2:22-24). Keman ojtokatoyaj, María xa motajtaniaya ox tiopixkat kichiuaskia teisa tein ika kiueyitaliskia Jesús porin satepan kichiuaskia miak uejueyi taman. Jesús kemaj kiueyitalijkej, sayoj ke amo kemej María xa kichiaya. Jiova kiteixmatiltij ke Jesús yeskia Cristo, Mesías akin moijtojka ualaskia, itechkopa Simeón, akin “katka semi yolchipaukatagat uan ipa kimouistilijtinemia Dios”, uan itechkopa Ana, se tanauatijkej akin kipiaya 84 xiujmej uan amo nemiaok inamik (Luc. 2:25-38).

14. ¿Toni tatiochiualismej Jiova kimakak María?

¹⁴ ¿Jiova kitatiochiuij María porin kiyekpiak uan kiiskaltij iKonetsin ika nochi iyolo? Kemaj. Yekinika, kichiuak maj itachiualisuan uan itajtoluan moijkuilouanij itech Biblia. Nesi ke María amo uelik iuan yajtinemik Jesús keman tanojnotstinemik eyi xiuit uan tajko. Xa monekik mokauas ompa Nazaret porin momikilijkaya José. Yejua ika amo uelik kiselij miak tatiochiualismej tein kiselijkej oksekin. Sayoj ke kemaj iuan yetoya Jesús keman momikilij (Juan 19:26). Uan no, yetoya iniuan imomachtijkauan Jesús ompa Jerusalén seki tonalmej achto ke mochiuaskia Pentecostés itech xiuit 33, keman kiselijkej yektikatsin espíritu (Hech. 1:13, 14). Yejua xa no kiixpejpenkej iniuan oksekin. Komo ijkon, nejin kijtosneki ke kiselij tatiochiualis yetos iluikak iuan Jesús nochipaya. ¡Tel ueyi tatiochiualis kiselij porin nochipa kitakamatik Jiova!

15. Keman Jesús yetoya nikan taltikpak, ¿keniuj kinextilij Jiova ke kitasojtaya?

¹⁵ Jesús amo kitemouaya maj kiueyitalianij taixyekananij itech taneltokalis oso tekiuanij. Sayoj ke expa, Jiova kiualpannojnotsak uan kimatiltij ke kitasojtaya. Nejon xa semi kiyolchikauak Jesús. Itech ueyiat Jordán, niman keman moauij, Jiova kijtoj: “Yejuatsin nijin Notasojkonetsin tenika semi nimoyolpakiltia” (Mat. 3:17). Nesi ke sayoj Jesús uan Juan Taauijkej kikakkej nejin tajtolmej. Kemej se xiuit achto ke kimiktiskiaj Jesús, eyi itatitaniluan kikakkej keman Dios kijtoj: “Yejuatsin nijin Notasojtsin Konetsin.  Ika por Yejuatsin semi niyolpaktok; xikakilikan” (Mat. 17:5). Satepan, Jiova oksepa kiualpannojnotsak iKonetsin seki tonalmej achto ke kimiktiskiaj (Juan 12:28).

16, 17. ¿Keniuj Jiova kitatiochiuij Jesús kemej amo kichiaya?

¹⁶ Jesús kimatia ke semi tepinaujtij yeskia kemej kimiktiskiaj, uan no kipantiskiaj ke kiuijuikaltij Dios. Maski ijkon, itech netataujtil tajtanik maj mochiua itanejnekilis Dios, amo tein yejua kinekia (Mat. 26:39, 42). “Kipouak ke amo teyi pinaualis kuak kikuoupampilojke”, uan amo kitemoj maj taltikpakneminij kiueyitalianij, ta sayoj iTajtsin (Heb. 12:2). ¿Keniuj Jiova kiueyitalij Jesús?

¹⁷ Keman moajsia nikan taltikpak, Jesús kijtoj ke kinekia oksepa kiselis ueyichiualis tein kipiaya ompa iluikak iuan iTajtsin (Juan 17:5). Biblia amo kijtoua ke kichiaya kiselis okachi ke nejon. Yejua amo kichiaya se ueyi taxtauil porin kichiuako itanejnekilis Jiova. Maski ijkon, ¿toni kichiuak Jiova? Kitatiochiuij kemej amo kichiaya. Oksepa kimakak nemilis uan “kiueyipantalij”. Uan no, kimakak se taman tein hasta ijkuak amo akin kiselijtoya: nemilis ompa iluikak kemej amo teyi uelis kiixpolos (Filip. 2:9; 1 Tim. 6:16). * ¡Semi ueyi tatiochiualis kiselij porin nochipa kitakamatik Jiova!

18. ¿Toni techpaleuis maj amo tiktemokan maj kuali techitakan nikan taltikpak?

¹⁸ ¿Toni techpaleuis maj amo tiktemokan maj kuali techitakan nikan taltikpak? Nochipa tikelnamikiskej ke Jiova amo keman kinelkaua itekitikauan akin kitakamatij uan ke miakpa kintatiochiuia kemej amo kichiaj. ¡Uan amo tikmatij keniuj techtatiochiuis satepan! Sayoj ke axkan, keman tikxikojtokej tataman ouijkayomej, maj tikelnamikikan ke nejin taltikpak uan ueyichiualis tein uelis techmakas amo uejkaua tamis (1 Juan 2:17). ToTajtsin Jiova semi techtasojta uan amo kielkaua tein tikchiuaj nion netasojtalis tein tiknextiliaj itokay, porin “Yejuatsin Yolmelauaktsin” (Heb. 6:10). Kemaj, yejuatsin kinextis ke techixmati, xa kemej axkan nion ueli tiknemiliaj.