“ONGAK miak tekit de tapixkalis pero in tekitini amo semi miak ongakke. Ika ya nojon namechilia ximotatautilikan inauak Namoteko ten niaxka nijin tapixkalis para ma Yejuatsin kachi ok ma kinualtitani itekitikauan.” (Luc. 10:2.) Nejin tein Jesús kijtoj kemej ome mil xiuit achto kuali kinextia tein panoua Myanmar. ¿Keyej? Porin ompa moajsij sayoj 4,200 tanojnotsanij akin kinmatiltiaj 55 millones taltikpakneminij tein kichiuas iTekiuajyo Dios.

Sayoj ke, Jiova, akin “niaxka nijin tapixkalis”, kinoliniani tel miakej tokniuan akin okseko kayomej maj mokaltalitij itech nejon ueyi altepet tein poui Asia uan maj tapaleuikan itech tanojnotsalis. ¿Toni kinoliniani maj kikauakan ininaltepeuj? ¿Keniuj uelik kichiujkej nejon? ¿Toni tatiochiualismej kiselijtokej? Maj tikitakan.

Seki xiujmej achto, Kazuhiro, se precursor kayot Japón, kipiak se ataque epiléptico, ixtayouak uan kiuikakej tapajtiloyan. Tapajtijkej kiluij maj amo kinejnemilti carro ome xiuit. Kazuhiro amo uelia kineltokaya nejon uan kinemilij: “¿Toni nikchiuati? Nikteluelita niyeski niprecursor uan amo nikneki nikauas”. Kiteltataujtij Jiova maj kipaleuiani maj kisentokani kemej precursor.

Kazuhiro kijtoua: “Se metsti satepan, se notasojikniuj akin tapaleuijtoya Myanmar kimatik tein nikpanotoya. Nechnotsak uan nechiluij: ‘Nikan Myanmar okachi se yajtinemi itech autobús. Komo titapaleuiki, uelis tiksentokas tiyeski tiprecursor uan amo monekis tikpias se carro’. Niktajtanij tapajtijkej ox ueliskia nimokaltalitiuj Myanmar maski nikpia nejon kokolis. Nikmoujkakakik keman nechiluij: ‘Se tapajtijkej kayot Myanmar takalpanojtok Japón axkan. Nimitsuikas xikixmati. Komo oksepa tikpia se ataque, yejua uelis mitspaleuis’. Nikitak kemej yeskia Jiova nechnankilij”.

Kazuhiro niman kintajkuilouilij tokniuan akin tapaleuiaj itech sucursal ompa Myanmar uan kiniluij ke yejua uan inamik kinekiaj ompa tapaleuiskej kemej precursores. Sayoj makuil tonal satepan, tokniuan kinnankilijkej: “Xiualakan, monekij okachi precursores”. Kazuhiro uan inamik, Mari, kinamakakej ininome carro, kikixtijkej amamej tein ika ueliskiaj kalakiskej  itech nejon altepet uan kikoujkej tein ika yaskiaj itech avión. Axkan, semi yolpakij tapaleuijtoskej itech se tein ayamo nechikol itech tajtol ika señas ompa Mandalay. Kazuhiro kijtoua: “Nochi tein techpanouani techpaleuiani maj okachi titakuaujtamatikan itech netenkaualis tein moajsi itech Salmo 37:5: ‘Xikauili Jiova moojuan; xitakuaujtamati iuan, uan yejuatsin mitspaleuis’”.

Itech xiuit 2014, itaixpantijkauan Jiova akin nemij Myanmar kipiakej tatiochiualis maj ompa mochiuani se ueyi nechikol tein no uejkaua eyi tonal. Miakej tokniuan akin okseko kayomej yajkej ueyi nechikol. Semej katka Monique, se tokniuj siuat kayot Estados Unidos akin kipia 34 xiujmej. Yejua kijtoua: “Keman nimokepak satepan ke tamik ueyi nechikol, niktataujtij Jiova ika tein monekia nikchiuas itech nonemilis. No nikintapouij notatuan tein nikixtalijtoya nikchiuas. Tieyin tikitayaj ke kuali katka maj niknemiliani nitapaleuitiuj Myanmar. Sayoj ke, achto ke senkis nikixpejpenaskia tein nikchiuaskia, monekik miakpa niktataujtis Jiova uan nikauas maj panokan seki tonalmej”. Monique techiluia keyej ijkon kichiuak.

Yejua kijtoua: “Jesús kiniluij imomachtijkauan maj kiixejekokan ox kinajsis tomin. Yejua ika nimotajtanij: ‘¿Nikpia tomin tein nechajsis maj okseko nimokaltaliti? ¿Uelis nimoixpanoltis ompa uan amo semi nitekitis?’”. Monique kijtoua: “Niman nikitak ke amo nikpiaya tomin tein ika ueliskia nimokaltalitiuj oksekopa itech taltikpak”. Komo ijkon, ¿keniuj uelik okseko mokaltalito? (Luc. 14:28.)

Monique kisentoka kijtoua: “Se tonal, siuat akin niktekitiliaya nechtatitauij. Semi nimouik, niknemiliaya ke yaya nechtokati. Sayoj ke, amo panok nejon, ta nechtasojkamatilij kuali tekit tein nikchiuaya uan nechiluij ke nechmakaskiaj se netetayokolil ika tomin. Nejon tomin nechajsia maj nitaxtaua tein nitauikaya”.

Monique mokaltalij Myanmar itech metsti diciembre xiuit 2014. ¿Keniuj momachilia tapaleuis kampa motelnekij okachi tanojnotsanij? Yejua tanankilia: “Semi niyolpaki niyetos nikan. Nikinmachtia eyin ika Biblia. Semej se siuat akin kipia 67 xiujmej. Yejua nochipa nechixuetskilia uan nechnaua keman nikitati. Keman kimatik ke itokay Dios yejua Jiova, peuak ixayojtemoua. Nechiluij: ‘Axkan yekinika nikaki itokay Dios. Okachi tiichpoch ke nejua uan tinechmachtiani tein okachi moneki tein niuelini itech nonemilis’. Amo moneki nikijtos ke nejua no nichokak. Nejin tein nikpanouani kichiua maj semi niyolpaki nitapaleuis kampa monekij okachi tanojnotsanij”. Yankuixtok, Monique kiselij Tamachtilis tein kiseliaj akin kiteixmatiltiaj iTekiuajyo Dios.

Tein moijtoj ika Myanmar itech Anuario de los testigos de Jehová 2013 no kinolinij sekin maj ompa tapaleuitij. Li, se tokniuj siuat akin kipia kemej 30 xiujmej uan nemia Asia, tekitia miak tonalmej. Sayoj ke tein kiixtajtoltij itech Anuario kiolinij maj kinemiliani tapaleuitiuj Myanmar. Yejua kijtoua: “Itech xiuit 2014, keman niyajki ueyi nechikol tein mochiuak Yangón, nikinixmatik seki namikuanij akin tapaleuijtoyaj itech tajtol chino ompa Myanmar. Kemej nitajtoua nejon tajtol, nikixtalij nimokaltalitiuj ompa uan nitapaleuis itech tein ayamo nechikol itech tajtol chino. Monique uan nejua tikixtalijkej tisentapaleuiskej Mandalay. Jiova techtatiochiuij uan tikajsikej tekit sayoj seki tonalmej kemej tamachtianij itech se kaltamachtiloyan uan tikajsikej kani tinemiskej ompakauin. Maski tel tona uan tikpanouaj okseki ouijkayomej, semi niyolpaki nikan nitapaleuijtos. Akin kayomej nikan Myanmar amo kipiaj miak taman, kualtakamej uan tekakij keman se kinnojnotsa ika Biblia. Semi nikmoujkaita keniuj Jiova tapaleuijtok itech tanojnotsalis. Nikyekmati ke yejuatsin kineki maj nitapaleuijto nikan Mandalay”.

Miakej tokniuan akin tapaleuiaj kampa monekij okachi tanojnotsanij kiitanij ke netataujtil semi tapaleuia. Kemej neskayot, Jumpei, akin kipia 37 xiujmej, uan inamik, Nao, akin kipia 35, tapaleuiayaj itech se nechikol itech tajtol ika señas ompa Japón. ¿Keyej mokaltalitoj Myanmar? Jumpei kijtoua: “Nonamik uan nejua tikixtalijtoyaj titapaleuitiuij itech okse ueyi altepet. Se tokniuj takat itech tonechikol itech tajtol ika señas mokaltalijka Myanmar. Uan tejuan no tikchiujkej nejon itech xiuit 2010, maski amo miak tomin tiksentilijtoyaj. Tokniuan akin nemij Myanmar kuali techselijkej”. ¿Keniuj Jumpei kiita tanojnotsalis ompa Myanmar? Yejua kijtoua: “Taltikpakneminij kitelnekij kimatiskej okachi. Keman kiitaj videos itech tajtol ika señas, akin amo ueli takakij kimoujkaitaj. Semi techyolpaktia maj tikixtalianij tiualaskej nikan”.

¿Keniuj moixpanoltiaj Jumpei uan Nao? Jumpei kijtoua: “Eyi xiuit satepan, tiktamijtoyajya totomin tein tiksentilijkaj uan amo techajsiaok tein ika titaxtauaskiaj okse xiuit kampa tinemiaj. Semi tiktataujtijkej Jiova. Uan tikmoujkaitakej keman tokniuan akin tapaleuiaj sucursal techyoleujkej maj titapaleuikan kemej precursores especiales seki tonalmej. Titakuaujtamatkej iuan Jiova uan yejuatsin amo techkauak. Nochipa techyekpiani”. Yankuixtok, Jumpei uan Nao kiselijkej Tamachtilis tein kiseliaj akin kiteixmatiltiaj iTekiuajyo Dios.

Simone, se tokniuj takat kayot Italia akin kipia 43 xiujmej, uan inamik, Anna, kayot Nueva Zelanda akin kipia 37, mokaltalitoj Myanmar. ¿Toni kinolinij? Anna tanankilia: “Anuario tein kisak 2013 kampa ika motajtoj Myanmar”. Simone kisentoka kijtoua: “Se ueyi tatiochiualis tiyetoskej Myanmar. Amo moneki tikpiaskej miak taman, uan ueli okachi niktekitilia Jiova. Semi nikmoujkaita keniuj techyekpia keman titapaleuiaj kampa monekij okachi tanojnotsanij” (Sal. 121:5). Anna no kijtoua: “Amo keman semi niyolpakini. Amo nikpia miak taman uan okachi niyetok iuan nonamik; okachi kuali timouikaj. Uan no, tikinajsinij kuali totasojikniuan. Taltikpakneminij amo kinchikoitaj itaixpantijkauan Jiova, uan semi se kimoujkaita keniuj kinekij kimatiskej okachi”. ¿Toni kijtosneki?

Anna kijtoua: “Se tonal, niknojnotsak se ichpoch akin momachtia universidad itech tanamakaloyan uan nikiluij ke oksepa timoitaskiaj. Keman oksepa timoitakej, kiualkuik se ichpoch akin katka itasojikniuj. Satepan, kinualkuik oksekin. Uan ompa, oksekinok. Axkan nikinmachtijtok makuil nejon ichpochmej”. Simone kijtoua: “Akin tikinnojnotsaj semi kualtakamej uan kipiaj miak netajtanilmej. Kitelnekij kimatiskej okachi. Tein melauj, amo ueli tikinkalpanouaj nochin”.

¿Toni kichiujkej sekin achto ke kiixtaliskiaj mokaltalitiuij Myanmar? Mizuho, kayot Japón, kijtoua: “Notakauj, Sachio, uan nejua uejkaujya tiknektoyaj tiyaskej  se ueyi altepet kampa monekiaj okachi tanojnotsanij, sayoj ke ¿kani? Kualtsitsin neskayomej tein ika motajtoj itech Anuario tein kisak 2013 semi techyololinijkej. Yejua ika peuak tiknemiliaj titapaleuitiuij Myanmar”. Sachio no kijtoua: “Tikixtalijkej timokauaskej se semana itech xolal Yangón, tein okachi ueyi ompa Myanmar. Uelis tikijtoskej ke tiknekiaj tikpijpiaskej tal. Maski amo tiuejkaujkej tikitakej ke monekia ompa timokaltalitiuij”.

Rodney uan inamik, Jane, kayomej Australia uan kipiaj panoua cincuenta xiujmej. Iniuan ininkoneuan, Jordan uan Danica, peuak tapaleuiaj Myanmar itech xiuit 2010. Rodney kijtoua: “Semi tikmoujkaitakej maj taltikpakneminij kitelnekikan kiixmatiskej Dios. Nikinyolmajxitia okseki kalyetouanij maj kitemokan tapaleuiskej itech se altepet kemej Myanmar”. ¿Keyej ijkon kijtoua? Yejua kimelaua: “Semi kualtsin tikitaskej keniuj tein tikpanouanij nikan okachi techtokia iuan Jiova. Miakej telpochmej okachi kinyolnotsa teléfonos, carros, tekit uan okseki taman kemej nejon. Tokoneuan kitayekanaltiaj momachtiskej yankuik tajtolmej tein ika tanojnotsaskej. Kinekij kimatiskej keniuj kintanemililtiskej akin amo kiixmatij Biblia uan tanankiliskej itech nechikolmej. Kitayekanaltiaj nejon uan okseki tekimej itech itekiyo Dios”.

Oliver, akin kipia 37 xiujmej uan kayot Estados Unidos, kimelaua keyej kinyolmajxitia oksekin maj tapaleuitij okse ueyi altepet: “Niktekitilis Jiova kampa amo niixmatia uan kuali nimomachiliaya semi nechpaleuiani. Ninemis okseko kichikauani notakuaujtamatilis uan nechpaleuiani maj nochipa nitakuaujtamati iuan Jiova. Nitapaleuijtok iniuan tokniuan akin amo nikinixmatia sayoj ke kuali timouikaj porin tikneltokaj sayoj se taman. Nejin sayoj ueli panoua itech inechikol Dios”. Axkan, Oliver uan inamik, Anna, kisentokaj kinnojnotsaj ika yolpakilis akin tajtouaj chino.

Trazel, se tokniuj siuat akin kipia 52 xiujmej kayot Australia, uan peuak tapaleuia Myanmar itech xiuit 2004, kijtoua: “Nochin akin ueliskej, nikinyolmajxitia maj tapaleuikan kampa monekij okachi tanojnotsanij. Nikitani ke Jiova kintatiochiuia akin mochikauaj kitekitiliskej. Amo keman niknemilijka ijkon ninemis. Yejua nejin okachi kuali nemilis tein ueliskia niknemilis nikpias”.

Tikchiaj maj tein kijtojkej nejin tokniuan mitsonyolchikaua xikonita ox tejuatsin no uelis tikonpaleuis akin yolmelaujkej akin nemij kampa ayamo motanojnotsa. Tokniuan akin ompa tapaleuiaj kemej yeskia mitsoniluijtoskiaj: “¡Xionuiki Myanmar uan xitechonpaleui!”.