1. Kemej kijtoua 3 Juan 3, 4, ¿toni kichiua maj tiyolpakikan?

¿UELI tiknemiliaj keniuj semi yolpakik tatitanil Juan keman kimatik ke tokniuan akin kinpaleuij maj kiixmatikan tein melauak kisentokayaj kitekitiliayaj Jiova? Juan kinitaya nejon tokniuan kemej ikoneuan. Kemej kipiayaj miak kuejmolmej, kichiuak miak taman tein ika kinpaleuij maj mochikaua inintakuaujtamatilis. Tejuan no tiyolpakij keman tokoneuan oso akin tikinpaleuijkej maj kiixmatikan tein melauak motemaktiaj iuan Jiova uan kisentokaj kitekitiliaj (xikonixtajtolti 3 Juan 3, 4).

2. ¿Keyej kijkuiloj Juan eyi amamej?

² Itech xiuit 98, Juan xa nemia itech xolal Éfeso oso ompakauin. Xa mokaltalito ompa satepan ke kikixtijkej kampa tsaktoya ompa Patmos. Ijkuak, iyektikatsin espíritu Jiova kiolinij maj kijkuilo eyi amamej. Ika nejin amamej kitemouaya kinyolchikauas tokniuan maj kisentokanij takuaujtamatinij iuan Jesús uan maj nentineminij itech tein melauak.

3. ¿Toni netajtanilmej tiknankiliskej itech nejin tamachtilis?

³ Itech nejon tonalmej, tatitanilmej momikilijkajya uan sayoj tatitanil Juan yoltoyaok. Yejua semi kitekipachouaya tein kichiujtoyaj itech nechikolmej tamachtianij akin takajkayauayaj (1 Juan 2:18, 19, 26). * Nejin tamachtianij kijtouayaj ke kiixmatiaj Dios, sayoj ke amo kitakamatiaj itanauatiluan. Itech nejin tamachtilis, tikitaskej tein Juan tayolmajxitij uan tiknankiliskej eyi netajtanilmej: ¿toni kijtosneki tinentinemiskej itech tein melauak? ¿Toni uelis kichiuas maj amo tinentinemikanok itech tein melauak? Uan ¿keniuj uelis timosenpaleuiskej maj tiksentokakan itech tein melauak?

4. Kemej kijtoua 1 Juan 2:3-6 uan 2 Juan 4, 6, ¿toni moneki tikchiuaskej uan ijkon tinentinemiskej itech tein melauak?

⁴ Yekinika moneki tikixmatiskej tein melauak tein moajsi itech Biblia, iTajtol Dios, uan ijkon uelis tinentinemiskej itech tein melauak. Uan no, moneki tiktakamatiskej itanauatiluan Jiova (xikonixtajtolti 1 Juan 2:3-6; 2 Juan 4, 6). Jesús techkauilij se kuali neskayot porin nochipa kitakamatik. Yejua ika, se taman kemej tiktakamatij Jiova yejua komo timochikauaj tikchiuaskej kemej Jesús (Juan 8:29; 1 Ped. 2:21).

5. ¿Toni moneki tikneltokaskej?

⁵ Tiksentokaskej tinentinemiskej itech tein melauak komo tikneltokaj ke Jiova amo keman takajkayaua, uan yejua ika, nochi tein techiluia itech iTajtol melauak. No moneki tikneltokaskej ke Jesús yejua Mesías akin moijtojka ke ualaskia. Axkan, miakej amo kineltokaj ke Dios kiixpejpenak Jesús kemej Tekiuaj itech iTekiuajyo. Juan tanejmachtij ke moajsiaj “miakke takajkayauani”, akin ueliskiaj kinkajkayauaskej akin amo senkis kineltokayaj nejin tamachtilismej (2 Juan 7- 11). Juan kijkuiloj: “¿Akoni yejua ne tekajkayaukatagat? Yejua [...] ten kijtoa ke Jesús amo Yejuatsin in Cristo” (1 Juan 2:22). Komo timomachtiaj iTajtol Dios amo uelis techkajkayauaskej. Sayoj ijkon uelis tikixmatiskej Jiova uan Jesús (Juan 17:3). Uan keman tikchiuaskej nejin, titakuaujtamatiskej ke tein tikneltokaj yejua tein melauak.

6. ¿Toni uelis kichiuas maj telpochmej uan ichpochmej amo nentinemikanok itech tein melauak?

⁶ Tinochin tiitekitikauan Dios moneki timoyekpiaskej uan ijkon amo techkajkayauaskej inintanemililuan akin amo kitekitiliaj Dios (1 Juan 2:26). Okachi moneki moyekpiaskej telpochmej uan ichpochmej. Alexia, * se tokniuj siuat akin kipia 25 xiujmej uan kayot Francia, kijtoua: “Keman niyaya kaltamachtiloyan, nechmachtijkej ke amo akin kichijchiuak tein onkak uan okseki taman tein tamachtiaj taltikpakneminij. Nejin kichiuak maj nimotajtaniani ox melauak tein nikneltokaya. Kemansa nikuelitaya tein nechmachtiayaj kaltamachtiloyan. Sayoj ke niknemilij ke amo kuali yetoya maj nikneltokani nochi tein ompa nechmachtiayaj uan maj amo nikakini Jiova”. Alexia momachtij amatajkuilol La vida... ¿cómo se presentó aquí? ¿Por evolución, o por creación? Itech sayoj seki semanas amo motajtanijok ox melauak tein  kineltokaya. Alexia kijtoua: “Nikneltokak ke Biblia tamachtia tein melauak. Uan nikajsikamatik ke komo niktakamatia niyolpakiskia uan kuali nimomachiliskia”.

7. ¿Toni amo moneki tikchiuaskej, uan keyej?

⁷ Tinochin tiitekitikauan Dios, telpochmej uan akin xiuejkejya, moneki timoyekpiaskej uan amo tiktemoskej tiktekitiliskej Jiova uan no tikchiuaskej tein amo kuali. Juan kijtoj ke amo uelis tinentinemiskej itech tein melauak uan no tiauilnemiskej (1 Juan 1:6). Komo tiknekij tikyolpaktiskej Jiova, moneki nochipa tikelnamikiskej ke yejuatsin amo teyi ueli tiktatiliaj. Maski taltikpakneminij amo kiitaj tein tikichtakachiuaj, Jiova ueli kiita nochi (Heb. 4:13).

8. ¿Toni amo moneki tikchiuaskej?

⁸ No moneki maj amo tikitakan tajtakol kemej kiitaj akin amo kitekitiliaj Jiova. Tatitanil Juan kijkuiloj: “Komo tejuan tikijtoaj ke amo tikpiaj tajtakol, ijkuakon timokajkayauaj tejuan san” (1 Juan 1:8). Itech itonaluan Juan, akin kikaujkaj uan kiixnamikkaj tamachtilis tein melauak kijtouayaj ke ueliskia se mouikas iuan Dios maski se kichiuaskia tein amo kuali. Axkan miakej no ijkon tanemiliaj. Kijtouaj ke kineltokaj Dios, sayoj ke amo kiitaj tajtakol kemej yejuatsin kiita, okachiok kemej kiita auilnemilis. Tein Jiova kijtoua ke tajtakol, yejuan kijtouaj ke uelis kichiuaskej komo kinekij oso komo yejua okachi kinyolpaktia.

9. ¿Keniuj kinpaleuia telpochmej uan ichpochmej kitakamatiskej tein Biblia kijtoua?

⁹ Telpochmej uan ichpochmej xa okachi ouij kinkisas amo kiitaskej auilnemilis kemej kiitaj akin iniuan tekitij oso akin iniuan momachtiaj. Yejua nejin kipanok se tokniuj takat akin monotsa Aleksandar. Yejua kielnamiki: “Itech kaltamachtiloyan, seki ichpochmej semi nechiluiayaj maj iniuan nimotekani. Kijtouayaj ke kemej amo nikpiaya nonovia, xa nikinuelitaya takamej”. Xa no ijkon nankipanotokej namejuan, telpochmej uan ichpochmej.  Komo ijkon, xikelnamikikan ke keman nankitakamatij tein Biblia kijtoua kuali nanmomachiliaj, amo namechkui seki kokolismej, amo nanmoyolkokouaj uan nankisentokaj kuali nanmouikaj iuan Jiova. Uan komo nochipa nankiixtopeuaj tein amo kuali, okachi amo ouij namechkisas nankichiuaskej tein kuali. Amo xikelkauakan ke Satanás kichiujtok maj taltikpakneminij amo kiitakan auilnemilis kemej Jiova kiita. Yejua ika, komo amo nantanemiliaj kemej yejuan, “nankitanilijke ya in amokuali Satanás” (1 Juan 2:14).

10. ¿Keniuj techpaleuia 1 Juan 1:9 maj tiktekitilikan Jiova ika se kuali tanemilil?

¹⁰ Tikmatij ke Jiova kinamiki kijtos toni tajtakol. Uan timochikauaj amo tikchiuaskej. Sayoj ke komo titajtakouaj tikiluiaj itech se netataujtil (xikonixtajtolti 1 Juan 1:9). Uan komo se ueyi tajtakol, tiktemouaj ininnepaleuil tayekananij, porin Jiova kinixtalijtok maj techyekpiakan (Sant. 5:14-16). Sayoj ke, maj amo tiksentokakan itech titanemilijtokan tajtakolmej tein achto tikchiujkej. ¿Keyej? Porin toTajtsin akin semi techtasojta kitemakak inemilis iKonetsin uan ijkon uelis techtapojpoluis totajtakoluan. Keman Jiova kijtoua ke kintapojpoluis akin moyolnonotsaj oso moyolnemiliaj, yekmelauj kintapojpoluia. Yejua ika uelis tiktekitiliskej ika se kuali tanemilil (1 Juan 2:1, 2, 12; 3:19, 20).

11. ¿Toni techpaleuis maj amo tikneltokakan tein miakej kiteixmatiltiaj?

¹¹ Moajsi okse taman tein no moneki tikixtopeuaskej: tein kijtouaj akin kikaujkej uan kiixnamikij tamachtilis tein melauak. Keman peuak moajsi nechikol kampa kichiuaj kemej Cristo, Satanás peuak kitemoua ika inintamachtilisuan miakej takajkayauanij maj itekitikauan Dios amo takuaujtamatikanok. Yejua ika, moneki kuali tikitaskej toni melauak uan toni amo. * Akin techtauelitaj uelis kitaliskej teisa itech Internet uan ika kitemoskej maj  amo titakuaujtamatikanok iuan Jiova nion maj tikintasojtakanok tokniuan. Maj amo tikneltokakan nejon takajkayaualis, porin Satanás kichiua maj kiteixmatiltikan (1 Juan 4:1, 6; Apoc. 12:9).

12. ¿Keyej moneki okachi titakuaujtamatiskej itech tamachtilis tein melauak?

¹² Komo amo tiknekij maj Satanás techkajkayaua, moneki okachi titakuaujtamatiskej iuan Jesús uan ke Dios kichiujtok itanejnekilis itechkopa. No moneki titakuaujtamatiskej iuan takeual takuaujtamach uan tamatkej, akin Jiova kiixtalijtok maj kiixyekana inechikol (Mat. 24:45-47). Komo nochipa timomachtiaj iTajtol Dios, totakuaujtamatilis mochikauas uan mochiuas kemej se kouit tein uejkatan monaluayotia. Pablo kijtoj nejin keman kintajkuilouilij tokniuan akin nemiaj Colosas: “Namejuan nantakuautamatke iuan Totekotsin Cristo [...]. Uan axkan nikneki ximotachikauilijtiyakan sayo iuan [...]. Uan nochi namonemilispan ma ualeuto itech Cristo, ijkon keme se kuoutaktson monaluayokui uejkatan. Uan no namonemilispan ma tsineutok itech Cristo, ijkon keme in tepamit tsinijkatok tech se kuali tatsineualoni. Uan namotakuautamatilis ma moueyiltijtiu” (Col. 2:6, 7). Komo totakuaujtamatilis chikauak, Satanás oso akin kitojtokaj amo uelis kichiuaskej maj amo tinentinemikanok itech tein melauak (2 Juan 8, 9).

13. ¿Toni tikmatij tiitekitikauan Jiova ke techpanos, uan keyej?

¹³ Tikmatij ke akin amo kitekitiliaj Jiova techtauelitaskej (1 Juan 3:13). Juan techelnamiktia ke “nochi in taltikpakuani kinyekana ok yejua in amokuali Satanás” (1 Juan 5:19). Amo uejkaua ixpoliuis tein amo kuali, yejua ika Satanás okachi kualantok (Apoc. 12:12). Amo sayoj kitekitiltia seki taman kemej auilnemilis uan inintakajkayaualis akin kikaujkej uan kiixnamikij tamachtilis tein melauak, ta no kichiua maj techtajyouiltikan. Kemej kimati ke amo kipiaok miak tonalmej, okachi kitemoua maj amo motanojnotsaok oso maj amo titakuaujtamatikanok iuan Dios. Yejua ika, itech seki altepemej tokniuan amo kinkauaj maj kichiuakan seki taman tein ika kiueyichiuaj Jiova oso senkis maj nion teyi kichiuakan. Maski ijkon, amo mosenkauaj. Kinextiaj ke maski Satanás techchiuilis miak taman, amo keman tikauaskej Dios.

14. ¿Katiyejua se taman kemej uelis tikinpaleuiskej tokniuan maj kisentokakan itech tamachtilis tein melauak?

¹⁴ Uelis tikinpaleuiskej tokniuan maj kisentokakan itech tamachtilis tein melauak komo tikinikneliaj (1 Juan 3:10, 11, 16-18). Moneki timonextiliskej netasojtalis keman kuali tiyetoskej uan keman tikpiaskej ouijkayomej. Kemej neskayot, ¿tikixmatij se tokniuj akin momikilij se ichankauj oso se akin kuali iuan mouikaya uan moneki maj se kiyolseui oso maj se kipaleui ika okseki taman? ¿Tikmatkej ke seki tokniuan moneki maj se kinpaleui maj kiyekchijchiuakan Kali kampa Mosentiliaj oso ininchan porin chikauak kiouik oso semi taejekak? Tiknextiskej ke yekmelauj tikintasojtaj uan tikinikneliaj tokniuan ika tein tikchiuaskej, amo sayoj ika tein tikijtoskej.

15. Kemej kijtoua 1 Juan 4:7, 8, ¿toni moneki tikchiuaskej?

¹⁵ Keman tikinnextiliaj oksekin ke tikintasojtaj, tikchiuaj kemej toTajtsin tetasojtakej (xikonixtajtolti 1 Juan 4:7, 8). Se taman kemej tiknextiaj nejin yejua keman tikintapojpoluiaj. Kemej neskayot, komo se tokniuj techyolkokoua, netasojtalis kichiuas maj tiktapojpoluikan uan maj tikelkauakan tein techchiuilij (Col. 3:13). Maj tikitakan tein kipanok  se tokniuj takat akin monotsa Aldo. Semi moyolkokoj keman kikakik ke se tokniuj takat akin semi kipoujkaitaya kinijtouilij se taman akin kayomej kampa yejua kayot. Aldo kijtoua: “Miakpa niktajtanij Jiova maj nechpaleuiani maj amo niktauelitani nejon tokniuj”. Sayoj ke no kichiuak okse taman. Kiyoleuak maj sentanojnotsatij uan ijkuak kiluij keniuj momachiliaya. Aldo kijtoua: “Keman kiajsikamatik keniuj nimomachilij ika tein kijtoj, nechiluij maj niktapojpolui. Ijkon kemej tajtoj nikitak ke yekmelauj kinemiliaya maj amo kijtouani nejon. Satepan oksepa kuali timouikakej”.

16, 17. ¿Toni moneki tikixtaliskej tikchiuaskej?

¹⁶ Tatitanil Juan semi kintasojtaya tokniuan uan kinekia maj kuali mouikanij iuan Jiova. Senkis kinextij nejon ika tein kinyolmajxitij itech eyi amamej tein kinijkuilouilij. Semi techyolchikaua tikmatiskej ke ijkon kemej Juan, takamej uan siuamej akin tekiuajtiskej iuan Cristo no techtasojtaj uan toka motekipachouaj (1 Juan 2:27).

¹⁷ Maj tikchiuakan tein motayolmajxitij itech nejin tamachtilis. Maj tikixtalikan tinentinemiskej itech tamachtilis tein melauak uan maj nochipa tiktakamatikan Jiova. Maj timomachtikan iTajtol uan maj itech titakuaujtamatikan. Maj okachi titakuaujtamatikan iuan Jesús. Maj tikixtopeuakan inintanemililuan akin amo kitekitiliaj Jiova uan tein kijtouaj akin kikaujkej uan kiixnamikij tamachtilis tein melauak. Maj amo tiktemokan tiktekitiliskej Jiova uan no tikchiuaskej tein amo kuali nion maj tikinkakikan akin kitemouaj maj titajtakokan. Maj tiktakamatikan itanauatiluan Jiova. Uan maj tikinpaleuikan tokniuan maj kisentokakan itech tamachtilis tein melauak keman tikintapojpoluiskej akin techyolkokouaj uan keman tikinpaleuiskej akin kipanouaj tein amo kuali. Ijkon, maski tikpanoskej tein yeski taman, tiksentokaskej tinentinemiskej itech tamachtilis tein melauak.