1. ¿Toni techyolmajxitia Filipenses 2:3, uan keniuj techpaleuis komo ijkon tikchiuaj?

TIITEKITIKAUAN Jiova amo timoueyimatij uan tiktakamatij itanauatiluan, porin tikajsikamatij ke yejuatsin kimati tein okachi uelis techpaleuis (Efes. 4:22-24). Amo timoueyimatiskej kichiua maj tiktayekanaltikan itanejnekilis Dios uan maj tiknemilikan ke oksekin okachi ueyichiuanimej ke tejuan. Nejon kichiua maj kuali timouikakan iuan Jiova uan iniuan tokniuan (xikonixtajtolti Filipenses 2:3).

2. 1) ¿Toni kijtoj tatitanil Pablo? 2) ¿Toni tikitaskej itech nejin tamachtilis?

² Sayoj ke komo amo timoyekpiaj, uelis peuas timoueyimatiskej uan sayoj totech titanemiliskej kemej kichiuaj akin kinixyekana Satanás. * Nesi ke seki tokniuan itech yekinika siglo ijkon tanemiliayaj, porin tatitanil Pablo kinyolmajxitij tokniuan akin nemiaj Roma: “Ma amo aken kinemili ke yejua kachi uelilis kipixtinemi uan ke ne uelilis ten Dios kimaktilij ya. Ta [...] ma kajsikamati toni uelilis Dios kitayokolij [...], uan ijkon kuali kuatamatkanemis” (Rom. 12:3). Kemej tikitaj, Pablo kiajsikamatia ke moneki timopatiuitaskej. Sayoj ke yolyemanilis techpaleuis maj tiknextikan taixejekolis uan maj amo tiknemilikan ke tiueyichiuanimej. Itech nejin tamachtilis, tikitaskej eyi taman kampa yolyemanilis techpaleuis maj amo tiknemilikan ke tiueyichiuanimej: iuan tonamik, itech tekimej tein tikpiaj itech inechikol Dios uan itech redes sociales.

3. 1) ¿Keyej uelis kipiaskej kuejmolmej akin kipiaj ininnamik? 2) ¿Toni kichiuaj sekin akin kipiaj nejon kuejmolmej?

³ Jiova kineki maj akin kipiaj ininnamik yolpakikan. Sayoj ke, kemej tinochin titajtakolejkej, uelis tikpiaskej kuejmolmej. Tein melauj, Pablo kijtoj ke akin monamiktiskej kipiaskej seki ouijkayomej (1 Cor. 7:28). Seki tokniuan kinemiliaj ke kemej nochipa mokualantiaj iuan ininnamik xa okachi kuali maj amo monamiktianij. Komo peua tanemiliaj kemej akin amo kitekitiliaj Jiova, kitayekanaltiskej inintanejnekilis uan kinemiliskej ke okachi kuali maj tekiuanij kiixpolokan amat tein kinextia ke monamiktijkaj.

4. ¿Toni amo moneki tiknemiliskej?

⁴ Maj amo tiknemilikan ke amo uelisok tiyolpakiskej iuan tonamik. Tikmatij ke Biblia kijtoua ke akin kipiaj ininnamik sayoj uelis kiixpoloskej amat tein kinextia ke monamiktijkaj komo semej auilnemi (Mat. 5:32). Yejua ika, keman tikpanoskej ouijkayomej tein Pablo ika tajtoj, maj amo timoueyimatikan uan maj tiknemilikan ke tonamik amo toka motekipachoua, ke amo techtasojta kemej technamiki uan ke xa okachi tiyolpakiskiaj iuan okse. Ijkon sayoj totech titanemilijtoskiaj uan amo itech tonamik. Akin amo kitekitiliaj Jiova kijtouaj ke okachi kuali maj tikakikan toyolo uan maj tiktemokan tiyolpakiskej, maski monekis tikauaskej tonamik. Sayoj ke akin mokauaj maj kinixyekana Dios ‘amo kitemojtinemij de keniuj mopaleuijtinemiskej yejuan san. Ta, kachi ok kitemojtinemij de keniuj kinpaleuijtiyaskej oksekin’ (Filip. 2:4). Jiova kineki maj nochipa tiyetokan iuan tonamik, amo maj tikauakan (Mat. 19:6). Kichia maj tiktayekanaltikan tein yejuatsin kineki, uan amo tein tejuan tiknekij.

5. Kemej kijtoua Efesios 5:33, ¿toni moneki kichiuaskej takat iuan inamik?

⁵ Takat uan inamik moneki motasojtaskej uan mopoujkaitaskej oso momouiskaitaskej  (xikonixtajtolti Efesios 5:33). Biblia techmachtia ke moneki okachi tiktemoskej titemakaskej tein tikpiaj uan amo tikchiaskej maj tejuan techmakakan (Hech. 20:35). Takat uan inamik motasojtaskej uan mopoujkaitaskej komo yolyemankej. Yolyemanilis kinpaleuis maj amo sayoj kitemokan inintanejnekilis, ta no tein kinejneki ininnamik (1 Cor. 10:24).

6. ¿Toni techmachtia tein kijtouaj Steven uan Stephanie?

⁶ Yolyemanilis kinpaleuiani miakej tokniuan akin kipiaj ininnamik maj okachi yolpakikan. Kemej neskayot, se tokniuj akin monotsa Steven kijtoua: “Komo nansentekitij, nanmopaleuiskej, okachiok keman nankipiaskej kuejmolmej. Amo nankinemiliskej ‘¿toni okachi nechpaleuis?’, ta nankinemiliskej ‘¿toni okachi techpaleuis?’”. Inamik, Stephanie, no ijkon tanemilia. Kijtoua: “Amo akin kiuelita nemis iuan se akin nochipa iuan mokualantia. Keman tikpiaj se kuejmol, tiktemouaj tikmatiskej keyej ijkon panok. Ompa, tikchiuaj se netataujtil, tiktemouaj tamachtilis uan titajtouaj. Tiktemouaj tikyektaliskej kuejmol uan amo timoteuiskej iuan tonamik”. Takat uan siuat okachi yolpakiskej komo amo kinemiliaj ke okachi ueyichiuanimej ke ininnamik.

7. ¿Toni moneki kichiuas se tokniuj takat komo kiselia se tekit itech nechikol?

⁷ Tikitaj ke se ueyi tatiochiualis tiktekitiliskej Jiova uan tikmakaskej tein okachi kuali (Sal. 27:4; 84:10). Semi kuali komo se tokniuj takat kitemoua okachi tapaleuis itech inechikol Jiova. Tein melauj, Biblia kijtoua: “Takan aksa tokniu kineki mochiuas keme tayekanke [...], nojon semi kuali” (1 Tim. 3:1). Sayoj ke, komo kiselia se tekit itech nechikol, amo moneki moueyimatis (Luc. 17:7-10). Moneki kitemos kinpaleuis oksekin ika yolyemanilis (2 Cor. 12:15).

8. ¿Toni techmachtia tein kichiujkej Diótrefes, Uzías uan Absalón?

⁸ Biblia ininka tajtoua taltikpakneminij akin kinemilijkej ke katkaj okachi ueyichiuanimej. Kemej neskayot, Diótrefes kinemiliaya ke nochi uelia kichiuaya uan kiuelitaya “mopouas tayekanke” itech nechikol (3 Juan 9). Uzías kinextij ke moueyimatia keman kinekik kichiuas se tekit tein Jiova amo kinauatijka maj kichiua (2 Crón. 26:16-21). Absalón kinekia mochiuas tekiuaj, yejua ika kitemoj maj taltikpakneminij kinemilianij ke kintasojtaya porin kinekia maj kipaleuikan (2 Sam. 15:2-6). Kemej kinextiaj nejin neskayomej, Jiova amo kiyolpaktiaj taltikpakneminij akin kitemouaj moueyichiuaskej (Prov. 25:27). Akin moueyimatij uan kitemouaj maj kinueyitalikan amo kuali kinyoui (Prov. 16:18).

9. ¿Toni neskayot techkauilij Jesús?

⁹ Semi taman tein kichiuak Jesús. Biblia kijtoua ke “maski katka kemej Dios, amo kinemilij kikuilis Dios tein iaxka uan mochiuas kemej yejuatsin” (Filip. 2:6, TNM). Satepan ke Jiova, Jesús no kipia miak chikaualis. Maski ijkon, amo kinemilia ke semi ueyichiujkej. Kiniluij imomachtijkauan: “Tagat ten amo moueyinektinemi inixpan in tagayot, yejua ne Dios kipouas se ueyi chiuke” (Luc. 9:48). Semi techyolpaktia titekitiskej iniuan precursores, tapaleuianij, tayekananij uan takalpanouanij akin kinextiaj yolyemanilis kemej Jesús. Keman tiitekitikauan Jiova tiyolyemankej, tiknextiaj netasojtalis tein techixnextia kemej ixolal Dios (Juan 13:35).

10. ¿Toni monekiskia tikchiuaskej komo tiknemiliaj ke tayekananij amo kiyektaliaj kuejmolmej tein onkak itech nechikol?

¹⁰ ¿Toni monekiskia tikchiuaskej komo tiknemiliaj ke itech nechikol onkak kuejmolmej uan ke tayekananij amo kiyektaliaj? Maj amo tikijtojtinemikan ke amo kuali tein mochiujtok,  ta maj tiyolyemankej uan maj tikinpaleuikan akin techixyekanaj (Heb. 13:17). ¿Toni techpaleuis maj ijkon tikchiuakan? Maj timotajtanikan: “¿Yekmelauj uejueyi kuejmolmej tein nikita? Komo moneki moyektalis teisa, ¿axkanya moneki moyektalis? ¿Nejua moneki nikyektalis? ¿Yekmelauj niktemoua maj kuali timouikakan itech nechikol oso maj nechueyitalikan?”.

11. Kemej kijtoua Efesios 4:2, 3, ¿toni panos komo tiyolyemankej keman tiktekitiliaj Jiova?

¹¹ Jiova okachi kipatiuita maj tiyolyemankej ke tein tiuelij tikchiuaj, uan maj kuali timouikakan iniuan tokniuan ke kuali tikchiuaskej teisa. Yejua ika, maj timochikauakan tiyeskij tiyolyemankej keman tiktekitiliaj Jiova. Ijkon titapaleuiskej maj tinochin itech nechikol kuali timouikakan (xikonixtajtolti Efesios 4:2, 3). Maj tiktemokan nochipa titanojnotsaskej. Maj tikchiuakan seki taman tein ika tikinpaleuiskej oksekin. Maj nochin kuali tikinselikan, amo sayoj akin kipiaj se tekit itech nechikol (Mat. 6:1-4; Luc. 14:12-14). Komo tikchiuaj nochi nejin, oksekin amo sayoj kiitaskej tein ueli tikchiuaj, ta no ke tiyolyemankej.

12. ¿Toni kijtoua Biblia keman ika tajtoua tasojiknimej?

¹² Jiova kineki maj tiyolpakikan iniuan totasojikniuan oso akin kuali iniuan timouikaj uan tochankauan (Sal. 133:1). Tein melauj, Jesús kipiaya kuali tasojiknimej (Juan 15:15). Uan no, Biblia kijtoua ke semi techpaleuia tikpiaskej kuali tasojiknimej (Prov. 17:17; 18:24). Uan no techiluia ke amo techpaleuia komo amo tiknekij tiyetoskej iniuan oksekin (Prov. 18:1). Miakej kinemiliaj ke itech redes sociales uelis tikinpiaskej miakej totasojikniuan  uan ijkon amo timomachiliskej toselti. Sayoj ke komo tikuij redes sociales, moneki timoyekpiaskej.

13. ¿Keyej sekin akin kikuij redes sociales uelis momachiliskej ininselti uan motayokoltiskej?

¹³ Seki momachtianij kiitanij ke akin uejkaua kiitstokej tein oksekin kijkuilouaj uan taixkopimej tein kitaliaj itech redes sociales uelis kichiuas maj momachilikan ininselti uan maj motayokoltikan. ¿Keyej? Se taman xa porin miakej kitaliaj taixkopimej kampa moita seki taman tein okachi kinyolpaktiani: taixkopimej kampa okachi kualtsin moitaj, taixkopimej iniuan inintasojikniuan uan kampa yanij moixpetanitij. Akin kiitaj nejon uelis kinemiliskej ke yejuan nochipa kichiuaj sayoj se taman uan amo moyolpaktiaj kemej oksekin. Se tokniuj siuat akin kipia 19 xiujmej kijtoua: “Nikmachilij ke amo niyolpakiaok keman nikitaya ke sekin semi moyolpaktiayaj itamian semana uan nejua sayoj niyetoya nochan”.

14. ¿Keniuj techpaleuia 1 Pedro 3:8 maj kuali tikuikan redes sociales?

¹⁴ Redes sociales uelis semi tapaleuiskej, kemej neskayot, uelis tikuiskej keman titajtoskej iniuan tochankauan uan totasojikniuan. Sayoj ke, ¿tikitanij ke miak taman tein miakej kitaliaj itech redes sociales sayoj ika kitemouaj maj oksekin kinitakan? Nesi ke kinekij maj oksekin nochipa kimatikan toni kichiuaj. Sekin hasta kijkuilouaj seki taman tein pitsotik ika taixkopimej tein yejuan kitaliaj oso taixkopimej tein kitaliaj oksekin. Nejin amo mouika ika kualneskayomej tein moneki tiknextiskej tiitekitikauan Dios, kemej yolyemanilis uan netasojtalis (xikonixtajtolti 1 Pedro 3:8).

15. ¿Keniuj techpaleuia Biblia maj amo timoueyimatikan?

¹⁵ Komo tikuij redes sociales, maj timotajtanikan: “Ika taixkopimej, videos tein niktalia uan tein nikijkuiloua, ¿uelis niknextis ke nimoueyimati? ¿Ueliskia kichiuas maj oksekin nechnexikoluikan?”. Biblia kijtoua: “Amo teyi ongak tajtakolnemilis ten ualeua de Totajtsin Dios. Ta, sayo ualeua itech ne amokuali Satanás [...]: yejua ne tanejnekilis den pitsotik ten eua itech in tonakayo; uan yejua ne taixnejnekilis kuak kiyokolitaj in toixtololouan; uan yejua ne moueyinekilis ten eua itech miak tataman de se kipixtok”  (1 Juan 2:16). Akin tikchiuaj kemej Cristo amo tiktemouaj maj oksekin techitakan, ta tikchiuaj nejin tein tayolmajxitia Biblia: “Ma amo timoueyimatinemikan; uan ma amo timopeualtijtinemikan ika kualanyot; uan ma amo timonejxikolijtinemikan” (Gál. 5:26). Komo tiyolyemankej, amo timoueyimatiskej kemej kichiuaj akin amo kitekitiliaj Jiova.

16. ¿Keyej amo tiknekij timoueyimatiskej?

¹⁶ Moneki tiyeskij tiyolyemankej, porin akin moueyimatij amo kinextiaj ke ‘kuali kuatamatkanemij’ (Rom. 12:3). Nochipa mokualantiaj iniuan oksekin uan sayoj kitemouaj maj kinueyitalikan. Uan no, kemej tanemiliaj uan tein kichiuaj miakpa kichiua maj yejuan uan oksekin kipanokan tein amo kuali. Komo amo kipataj kemej tanemiliaj, Satanás ‘kinixpojpoyokuiltis den nintamachilis’ uan ‘kinkajkayauas’ (2 Cor. 4:4; 11:3). Sayoj ke, akin yolyemankej kinextiaj ke ‘kuali kuatamatkanemij’. Amo kinemiliaj ke ueyichiuanimej, uan kiajsikamatij ke oksekin “kachi ueyi chiuanime” itech miak taman (Filip. 2:3). Uan no, kimatij ke “Dios kinixnamiki nekes ten moueyimatinemij. Uan Dios kinpaleuijtinemis ika ne iteiknelilis nekes ten moyolyemankamatinemij” (1 Ped. 5:5). Akin kinextiaj ke ‘kuali kuatamatkanemij’ amo kinekij maj Dios kinixnamiki.

17. ¿Toni moneki tikchiuaskej komo tiknekij tiksentokaskej tiyeskij tiyolyemankej?

¹⁷ Komo tiknekij tiksentokaskej tiyeskij tiyolyemankej, moneki timokixtiliskej ‘soltik talnamikilis’ uan timotaliliskej “chipauak talnamikilis” kemej Biblia tayolmajxitia. Moneki timochikauaskej uan ijkon uelis tikchiuaskej nejin, porin moneki timomachtiskej tein Jesús kichiuak uan timochikauaskej tikchiuaskej kemej yejua (Col. 3:9, 10; 1 Ped. 2:21). Sayoj ke amo nenkaj yeski. Komo timochikauaj tiyeskij tiyolyemankej, okachi tiyolpakiskej kemej kalyetouanij, okachi kuali timouikaskej iniuan tokniuan itech nechikol uan kuali tikuiskej redes sociales. Uan tein okachi moneki, tikpiaskej itatiochiualis Jiova uan kiyolpaktis tein tikchiuaj.