Jiova kineki maj akin monamiktiaj yolpakikan, maj kuali mouikakan uan maj nochipa senyetokan (Mat. 19:4-6). Komo tejuatsin tikonneki tionmonamiktis, ¿keniuj uelis tikonajsis se kuali takat oso se kuali siuat? Kemej Jiova techchijchiuak, kimati toni moneki tikchiuaskej tein techpaleuis maj tiyolpakikan keman timonamiktiskej. Keman se kichiua tein Biblia tayolmajxitia nochipa tepaleuia. Maj tikitakan seki taman tein tayolmajxitia.

Yekinika, moneki tikajsikamatiskej se taman tein techpanoua tinochin: “Amo ueli se takuaujtamati itech se iyolo uan ijsiujka techiualtia teisa” (Jer. 17:9). Keman se takat uan se siuat peua moixmatij porin kinekij monamiktiskej, peua kimachiliaj se taman tein semi chikauak. Keman panoua nejon ouij kinkisa kuali tanemiliskej. Komo ijkuak kiixtaliaj monamiktiskej, satepan xa semi motayokoltiskej (Prov. 28:26). Yejua ika, amo kuali yetok maj se takat uan se siuat moiluikan nochi tein kimachiliaj keman yekin peua moixmatij oso maj kijtokan ke kichiuaskej seki taman komo ayamo kuali moixmatij.

Proverbios 22:3 kijtoua: “Tamatkej kiita ouijkayot uan motatia, sayoj ke akin amo kipiaj tamatilis kisentokaj taixpan uan kijyouiaj tein amo kuali”. ¿Toni uelis panos komo tikalakij itech páginas tein onkak itech Internet oso tikuij aplicaciones kampa takamej uan siuamej kitemouaj akin uelis iuan monamiktiskej? Tetayokoltij tikijtoskej ke sekin kiixmatkej se takat oso se siuat itech Internet, peuak okachi iuan moixmatij uan satepan kimatkej ke sayoj kinkajkayauak. Uan no, seki taltikpakneminij kinichtekilianij tomin porin kinemiliayaj ke iuan tajtojtoyaj se taltikpaknenkej akin kiixmatiaj. Kemansa, akin kichiujkej nejin kijtouayaj ke katkaj itaixpantijkauan Jiova.

Maj tikitakan okse taman tein uelis panos. Seki páginas itech Internet kitekitiltiaj computadoras uan kijtouaj ke ika ueli kimatij akoni uelis iuan monamiktis se takat oso se siuat. Sayoj ke amo teyi kinextia ke nejin yekmelauj kualtia. Amo tiknextiskiaj tamatilis komo tikauaj maj se computadora kiixpejpena se taman tein semi moneki, kemej akoni iuan timonamiktiskej. Tein kijtoua se computadora amo uelis okachi techpaleuis ke tein Biblia tayolmajxitia (Prov. 1:7; 3:5-7).

Proverbios 14:15 kijtoua okse taman tein panoua: “Akin amo tamatkej kineltoka nochi tein kiluiaj, sayoj ke akin tamatkej kuali kiita kani taksas”. Komo tiknekij tikmatiskej ox kuali tinemiskej iuan  se takat oso se siuat satepan ke timonamiktiskej, achto moneki kuali tikixmatiskej. Sayoj ke amo uelis kuali tikixmatiskej komo tikalakij itech páginas kampa takamej uan siuamej kitemouaj akin uelis iuan monamiktiskej. Hasta komo se takat uan se siuat kiitaj tein kijkuilojkej itech página kampa moixmatkej uan uejkauak tajtouaj, amo kijtosneki ke yekmelauj moixmatij. Sekin akin kinemiliayaj ke kiajsikajya se kuali takat oso se kuali siuat, keman kiixmatkej kiitakej ke amo yejua tein kinemiliayaj.

Se salmista kijtoj: “Amo nimouika iniuan akin kiuelitaj takajkayauaskej nion iniuan akin kitatiaj keniuj yekmelauj monejnemiltiaj” (Sal. 26:4). Miakej kiuelitaj takajkayauaskej keman kijkuilouaj itech Internet akonimej yejuan, porin kinekij maj oksekin okachi kinekikan kinixmatiskej. Xa kitatiaj tein amo kuali tein kinextiaj oso kichiuaj, uan itech tein kijkuilouaj amo ueli momati keniuj yekmelauj tanemiliaj. Sekin xa kijtoskej ke itaixpantijkauan Jiova, sayoj ke kuali yeskia maj tiknankilikan nejin netajtanilmej: ¿yekmelauj moauijkejya? ¿Kuali mouikaj iuan Jiova? ¿Tokniuan itech nechikol kinpoujkaitaj? ¿Oso kichiuaj tein amo kuali uan hasta amo tepaleuis komo iniuan se mouika? (1 Cor. 15:33; 2 Tim. 2:20, 21). ¿Amo kitapanauiliskej itanauatiluan Dios komo monamiktiaj? Moneki se kimatis nejin, sayoj ke ouij se kimatis komo amo se tajtoua iniuan okseki tokniuan akin kuali kinixmatij (Prov. 15:22). Uan tein melauj, se itekitikauj Dios akin kineki kiyolpaktis, amo kinemiliskia monamiktis iuan se takat oso se siuat akin amo itekitikauj Dios (2 Cor. 6:14; 1 Cor. 7:39).

Kemej uelis panos tein amo kuali komo se kalaki itech páginas tein onkak itech Internet oso komo se kikui aplicaciones kampa takamej oso siuamej kitemouaj akin uelis iuan monamiktiskej, ¿moajsi okseki taman kemej uelis se kiixmatis se kuali takat oso se kuali siuat? Ueli tikinixmatij okseki tokniuan keman ueli timosentiliaj itech nechikolmej, uejueyi nechikolmej uan keman mochiua okseki taman.

Keman amo ueli timosentiliaj, kemej tein panouani ika kokolis COVID-19, tiktekitiltiaj aplicaciones ika internet uan ijkon tikpiaj tonechikoluan. Ompa ueli tikinixmatij okseki tokniuan akin amo kipiaj ininnamik. Uelis tikakiskej keniuj tamachtiaj uan keniuj tanankiliaj (1 Tim. 6:11, 12). No uelis timonojnotsaskej satepan ke tamis nechikolmej itech salas kampa amo miakej tokniuan monojnotsaj, oso keman seki tokniuan mosentiliaj ika internet uan kisenchiuaj seki taman. Ijkuak uelis tikitaskej ikualneskayouan tokniuj akin tiknekij iuan timoixmatiskej uan keniuj kinnojnotsa oksekin (1 Ped. 3:4). Ijkon kemej tikixmattiaskej uelis tikitaskej ox tein tikixtalijtokej tikchiuaskej no yejua tein kiixtalijtok, uan ox kuali tinemiskej iuan komo timonamiktiaj.

Keman se takat oso se siuat kitakamati tein Biblia tayolmajxitia keman kitemoua akin uelis iuan monamiktis, xa okachi yolpakis keman monamiktis. Panoua tein moijtoua itech nejin tajkuilol: “Akin kiajsi se kuali siuat [oso se kuali takat] kiajsi se taman tein semi kipia ipatiuj uan Jiova kitatiochiuia” (Prov. 18:22).