1. ¿Toni kichiuak Jiova tepitsin satepan ke Adán uan Eva tajtakojkej? (Génesis 3:15).

 TEPITSIN satepan ke Adán uan Eva tajtakojkej, Jiova kijtoj ke ininkoneuan ueliskia kichiaskej tein kuali. Tein kijtoj ke mochiuaskia moajsi itech Génesis 3:15 (xikonixtajtolti).

2. ¿Keyej semi moneki tein moijtojka itech Génesis 3:15?

² Nejin tein achtook moijtojka moajsi itech yekinika amatajkuilol tein kipia Biblia, uan nochi okseki amatajkuilolmej mouikaj ika tein ompa kijtoua. Ijkon kemej se mekat kisenilpia miak kouit, tein kijtoua Génesis 3:15 kemej yeskia kinsentilia nochi amatajkuilolmej tein kipia Biblia porin kitematiltiaj sayoj se taman. Ika tajtouaj ke Dios kititaniskia se temakixtijkej para kiixpolos Satanás uan nochin akin kipaleuiaj. * ¡Nejin semi techyolchikaua nochin akin tiktasojtaj Jiova!

3. ¿Toni tikitaskej itech nejin tamachtilis?

³ Itech nejin tamachtilis tiknankiliskej seki netajtanilmej tein mouikaj ika tein kijtoua Génesis 3:15: ¿akonimej ininka motajtoua ompa?, ¿keniuj mochiuani tein ompa kijtoua? uan ¿keniuj techpaleuia axkan?

4. ¿Akoni “kouat”, uan keniuj tikmatij?

⁴ Itech Génesis 3:14, 15 ika motajtoua se “kouat” uan ‘ikoneuan’, se “siuat” uan “ikonetsin”. Biblia techpaleuia maj tikmatikan akonimej. * Yekinika maj ika titajtokan “kouat”. Nejin amo yekmelauj se kouat porin amo kiajsikamatiskia tein Jiova kijtoj ke kipanoskia. Monekiskia yeski aksa akin kemaj kiajsikamatiskia uan Biblia techiluia akoni. Apocalipsis 12:9 itech Traducción del Nuevo Mundo kijtoua ke “yekinika kouat” yejua Amokuali Satanás. ¿Uan akonimej ikoneuan?

5. ¿Akonimej ikoneuan kouat?

⁵ Keman itech Biblia mokui tajtol “ikoneuan”, kemansa kinixnextia akin tanemiliaj uan kichiuaj kemej aksa akin kemej yeskia ininpopaj. Yejua ika, iuan ikoneuan kouat pouij seki ángeles uan taltikpakneminij akin kiixnamikij Jiova uan itekitikauan, ijkon kemej kichiua Satanás. Sekin yejuan ángeles akin itech itonaluan Noé kikaujkej iluikak uan ualajkej nikan taltikpak. Uan no, taltikpakneminij akin amo yolkualmej akin kichiuaj kemej ininpopaj, Satanás (Gén. 6:1, 2; Juan 8:44; 1 Juan 5:19; Jud. 6).

6. ¿Keyej Eva amo ueliskia yeski “siuat” akin ika motajtoua itech Génesis 3:15?

⁶ Axkan maj tikitakan akoni “siuat”. Ueliskia tiknemiliskej ke Eva, sayoj ke amo yejua. ¿Keyej tikijtouaj nejin? Génesis 3:15 kijtoua ke “ikonetsin” siuat kikuaxamaniskia kouat. Tikitakejya ke kouat amo se taltikpaknenkej, ta Satanás. Yejua ika se ikoneuj Eva akin no  yeskia tajtakolej amo ueliskia kiixpolos. Komo ijkon, ¿keniuj ueliskia kiixpoloskej Satanás?

7. ¿Keniuj techpaleuia Apocalipsis 12:1, 2, 5, 10 maj tikmatikan akoni siuat akin ika motajtoua itech Génesis 3:15?

⁷ Amatajkuilol tein ika tami Biblia kijtoua akoni siuat akin ika motajtoua itech Génesis 3:15 (xikonixtajtolti Apocalipsis 12:1, 2, 5, 10). Amo se taltikpaknenkej porin imetstampa kipia metsti uan kuaaktok se corona tein kipia 12 sitalimej. Uan no, kipia se konetsin, yejua iTekiuajyo Dios. Nejon tekiuajyot yetok ompa iluikak, yejua ika siuat no moneki ompa pouis. Siuat kiixnextia inechikol Jiova ompa iluikak kampa pouij ángeles akin amo kikauaj (Gál. 4:26).

8. ¿Akoni okachi tayekantok keman ika motajtoua “ikonetsin” siuat, uan kemanian moitak nejon? (Génesis 22:15-18).

⁸ Biblia no techpaleuia maj tikmatikan akoni okachi tayekantok keman ika motajtoua “ikonetsin” siuat. Nejon konetsin ualeuaskia itech ichankauan Abrahán (xikonixtajtolti Génesis 22:15-18). Nejon tein moijtojka mochiuak, porin Jesús ualeuak itech ichankauan Abrahán (Luc. 3:23, 34). Sayoj ke se taltikpaknenkej amo ueliskia kikuaxamanis Satanás uan senkis kiixpolos. Yejua ika, keman kipiaya 30 xiujmej, Jiova kiixpejpenak iKonetsin ika iyektikatsin espíritu. Ijkuak, Jesús mochiuak akin okachi tayekantok keman ika motajtoua “ikonetsin” siuat (Gál. 3:16). Satepan ke Jesús momikilij uan oksepa nemik, Dios kiueyitalij uan kimakak “nochi in tanauatil tech in eluiyaktsinko uan nikan taltikpak”, uan no kimakak tanauatil “para kinuejuelos in chikaualisme den amokuali Satanás” (Heb. 2:7; Mat. 28:18; 1 Juan 3:8).

9, 10. 1) ¿Akonimej no pouij iuan “ikonetsin” siuat, uan kemanian mochiua nejon? 2) ¿Toni tikitaskej axkan?

⁹ Sayoj ke, amo sayoj Jesús poui iuan “ikonetsin” siuat. Tatitanil Pablo kinextij nejin keman kiniluij taixpejpenalmej judíos uan akin amo judíos: “Komo naniaxkauan Cristo yekmelauj nanikoneuan Abrahán, uan nankiseliskej tein Dios motenkauak” (Gál. 3:28, 29, TNM). Keman Jiova kiixpejpena se tokniuj ika iyektikatsin espíritu peua poui iuan “ikonetsin” siuat. Yejua ika, “ikonetsin” siuat yejua Jesús uan 144,000 akin iuan tekiuajtiskej (Apoc. 14:1). Nochin mochikauaj tanemiliskej uan kichiuaskej kemej ininpopaj, Jiova.

¹⁰ Tikitakejya akonimej ininka motajtoua itech Génesis 3:15. Axkan maj tikitakan tein Jiova kichiuani para maj mochiua tein achtook kijtojka uan no tikitaskej keniuj techpaleuia axkan.

11. ¿Keniuj kikotskejtsonkej “ikonetsin” siuat?

¹¹ Génesis 3:15 kijtoua ke kouat kikotskejtsomaskia “ikonetsin” siuat. Nejin panok keman Satanás kichiuak maj judíos uan romanos kimiktianij Jesús (Luc. 23:13, 20-24). Keman aksa mokotskokoua amo ueli nejnemi seki tonalmej. No ijkon, keman Jesús momikilij amo uelik kichiuak nion teyi keman yetoya itech miketekoch (Mat. 16:21).

12. ¿Kemanian kikuaxamaniskej kouat uan keniuj kichiuaskej?

¹² Para mochiuas tein kijtoua Génesis 3:15 Jesús monekia oksepa nemis, porin ompa kijtoua ke “ikonetsin” siuat kikuaxamaniskia kouat. Yejua ika, Jesús monekia pajtis kampa kikotskejtsonkaj. ¡Uan  senkis pajtik! Eyi tonal satepan ke momikilij oksepa nemik kemej se espíritu uan amo keman momikilisok. Keman ejkos tonal tein Dios kiixtalijtok, Jesús kikuaxamanis Satanás oso senkis kiixpolos (Heb. 2:14). Akin iuan tekiuajtiskej Jesús, kipaleuiskej keman kinixpolos nochin akin kiixnamikij Dios oso ikoneuan kouat (Apoc. 17:14; 20:4, 10). *

13. ¿Keniuj techpaleuia tein achtook moijtojka uan mochiuaniya?

¹³ Komo tejuatsin tikontekitilijtokya Dios, mitsonpaleuijtokya tein achtook moijtojka uan mochiuaniya. Jesús ualaj nikan taltikpak kemej se takat uan ika tein kichiuak kinextij keniuj tamati iPopaj (Juan 14:9). Ika ineskayo techpaleuia maj tikixmatikan uan maj tiktasojtakan Jiova. No techpaleuiani ika tein tamachtij uan kemej kiixyekana inechikol Dios axkan. No techmachtiani maj tikchiuakan tein kiyolpaktis Jiova. Uan hasta keman kikotskejtsonkej oso kimiktijkej no techpaleuia. Keman oksepa nemik kitemakak iesyo kemej se nemaktil tein “techchipautinemi de nochi totajtakol” (1 Juan 1:7).

14. ¿Keniuj tikmatij ke tein Jiova kijtoj itech xochital Edén amo niman mochiuaskia?

¹⁴ Tein Jiova kijtoj itech xochital Edén kinextiaya ke amo niman mochiuaskia. ¿Keyej? Porin siuat monekia kipias “ikonetsin” uan Satanás kinsentiliskia ikoneuan, ijkon “ikonetsin” siuat uan ikoneuan kouat motauelitaskiaj. Nejin technejmachtia porin itech nejin taltikpak kampa taixyekana Satanás miakej kinixnamikij itekitikauan Dios. Miak xiujmej satepan, Jesús kiniluij itatojtokakauan ke ijkon panoskia (Mar. 13:13; Juan 17:14). Axkan tikitaj ke mochiujtokya seki taman tein moijtojka itech Génesis 3:15, okachiok itech 100 xiujmej tein panouanij. ¿Keyej ijkon tikijtouaj?

15. 1) ¿Keyej taltikpakneminij okachi techtauelitaj axkan? 2) ¿Keyej amo moneki tikmouiliskej Satanás?

¹⁵ Jesús peuak tekiuajti itech xiuit 1914 uan tepitsin satepan kiualpantamotak Satanás nikan taltikpak. Axkan Satanás sayoj ueli kichiua tein kineki nikan taltikpak uan kimati ke amo uejkaua ixpoliuis (Apoc. 12:9, 12). Semi kualantok uan kemej amo kimati toni kichiuas semi kinixnamiki itekitikauan Dios (Apoc. 12:13, 17). Yejua ika taltikpakneminij okachi techtauelitaj axkan. Sayoj ke amo moneki tikmouiliskej Satanás uan akin kipaleuiaj, ta ijkon kemej Pablo no uelis tikneltokaskej nejin tein kijtoj: “Komo Dios touan yetok, ¿akoni uelis techixnamikis?” (Rom. 8:31, TNM). Uelis senkis titakuaujtamatiskej iuan Jiova porin ijkon kemej tikitakejya, seki taman tein moijtojka itech Génesis 3:15 mochiuakya.

16-18. ¿Keniuj kinpaleuiani Curtis, Ursula uan Jessica kiajsikamatiskej tein kijtoua Génesis 3:15?

¹⁶ Tein Jiova motenkauak itech Génesis 3:15 techpaleuia maj tikixnamikikan tein yeski ouijkayot. Curtis, se misionero akin tapaleuia ompa Guam, kijtoua: “Kemansa nikpiani kuejmolmej uan amo mochiuani tein nikchiaya. Nejon kichiuani maj ouij nechkisa niksentokas niktekitilis Jiova. Sayoj ke itech nitanemilis tein kijtoua Génesis 3:15 nechpaleuiani maj niksentoka nitakuaujtamati iuan noTajtsin”. Curtis kichia maj ejko tonal keman Jiova kichiuas maj amo tikpiakanok kuejmolmej.

 ¹⁷ Ursula, se tokniuj siuat kayot Baviera (Alemania) kijtoua ke kiajsikamatis tein kijtoua Génesis 3:15 kipaleuij maj kineltoka ke Biblia iTajtol Dios. Okachi kimoujkaitak ke nochi tein moijtojka ke mochiuaskia mouika ika tein kijtoua Génesis 3:15. Ursula no kijtoua: “Nechyolpaktij nikmatis ke Jiova niman kichiuak tein monekia para maj taltikpakneminij kichiakan tein kuali”.

¹⁸ Jessica, se tokniuj siuat kayot Micronesia, kijtoua: “Nikelnamikiok keniuj nimomachilij keman nikitak ke tein nimomachtijtoya yejua tein melauak. ¡Mochiujtoya tein moijtojka itech Génesis 3:15! Nikajsikamatis tein ompa moijtoua nechelnamiktia ke kemej axkan tinemij amo ijkon kemej Jiova kinekia maj tinemikan. Uan nejin tein achtook moijtojka nechpaleuia maj okachi nikneltoka ke se kitekitilis Jiova techpaleuia maj kuali tinemikan axkan uan okachiok satepan”.

19. ¿Keyej senkis tikmatij ke no mochiuas okseki taman tein moijtojka itech Génesis 3:15?

¹⁹ Kemej tikitakejya, tein kijtoua Génesis 3:15 mochiujtokya. Axkan kuali tikmatij akoni “ikonetsin” siuat uan akonimej ikoneuan kouat. Jesús, akin okachi tayekantok keman ika motajtoua “ikonetsin” siuat, pajtikya kampa kikotskejtsonkaj. Axkan tekiuajtitokya ompa iluikak, kipia miak chikaualis uan amo keman momikilisok. Uan no, axkan Jiova kintamiixpejpentokya akin no pouij iuan “ikonetsin” siuat. Kemej mochiuakya seki taman tein moijtojka itech Génesis 3:15 senkis tikmatij ke okseki taman no mochiuas. ¡Jesús kikuaxamanis kouat! Itekitikauan Dios semi yolpakiskej keman kiixpoloskej Satanás. Uelis senkis titakuaujtamatiskej iuan Jiova, yejua ika axkan maj tiksentokakan tiktekitilikan. Itechkopa “ikonetsin” siuat, kiseliskej miak tatiochiualismej “nochi altepemej tein moajsij itech taltikpak” (Gén. 22:18).