1. ¿Toni kineki Jiova maj mochiua?

 JIOVA kineki maj itech nochi taltikpak moteixmatilti tein kuali tein kichiuas iTekiuajyo (Mar. 13:10; 1 Tim. 2:3, 4). Nejin tekit iaxka Jiova uan kemej kiita ke semi moneki kiixtalij iKonetsin maj kiixyekana. Uan kemej Jesús kuali taixyekana tikyekmatij ke Jiova semi yolpakis ika nochi tein mochiuas hasta keman tamis nochi tein amo kuali (Mat. 24:14).

2. ¿Toni tikitaskej itech nejin tamachtilis?

² Itech nejin tamachtilis tikitaskej ke Jesús itechkopa “takeual takuaujtamach uan tamatkej” techmachtia uan kiixyekana tanojnotsalis, se ueyi tekit tein axkan mochiujtok (Mat. 24:45, TNM). No tikitaskej keniuj tisejsemej uelis tikpaleuiskej Jesús uan “takeual takuaujtamach uan tamatkej”.

3. ¿Katiyejua tanauatil kimakakej Jesús?

³ Jesús kiixyekana tanojnotsalis. Tikmatij nejin porin tepitsin achto ke yaskia iluikak mosentilij iniuan seki imomachtijkauan itech se tepet ompa Galilea, uan kiniluij: “Notajtsin Dios nechmaktilij ya nochi in tanauatil tech in eluiyaktsinko uan nikan taltikpak”. Uan satepan no kiniluij: “Xiyakan nochi tech in senmanauak uan xikinnextilikan nochi in taltikpakuani ma yejuan no ma mochiuakan nomomachtijkauan” (Mat. 28:18, 19). Nejin kinextia ke Jesús no kimakakej tanauatil para kiixyekanas tanojnotsalis.

4. ¿Keniuj tikmatij ke Jesús kiixyekantok tanojnotsalis hasta axkan?

 ⁴ Jesús kijtoj ke itech nochi taltikpak motanojnotsaskia uan kinpaleuiskiaj oksekin maj mochiuakan imomachtijkauan. No kijtoj ke yetoskia iniuan itatojtokakauan “hasta keman tantiasya tein mochiujtok itech taltikpak” (Mat. 28:20, TNM). Nejin kinextia ke Jesús kiixyekanaskia tanojnotsalis hasta axkan.

5. ¿Keniuj titapaleuiaj maj mochiua tein moijtoua itech Salmo 110:3?

⁵ Jesús kimatia ke itech itamian tonalmej miakej tapaleuiskiaj. Kimatia ke mochiuaskia nejin tein achtook moijtojka: “Moxolal kiixtalis motemakas itech tonal keman tikinixyekanas motateuijkauan” (Sal. 110:3). Komo tejuatsin tikonteixmatiltia kuali tanauatilmej tikonpaleuijtok Jesús, “takeual takuaujtamach uan tamatkej”, uan no tiontapaleuijtok maj mochiua nejin tein achtook moijtojka. Axkan motanojnotsa, sayoj ke no tikpanouaj seki ouijkayomej.

6. ¿Katiyejua ouijkayot tikpanouaj axkan?

⁶ Miakej techixnamikij uan nejon se ouijkayot tein tikpanouaj. Kemej neskayot, akin kikaujkej uan kiixnamikij tamachtilis tein melauak, tekiuanij uan akin taixyekanaj itech taneltokalismej techtakajkayauiliaj. Komo tochankauan, akin tikinixmatij uan akin iniuan titekitij kineltokaj nochi tein techijtouiliaj xa kitemoskej maj tikauakan Jiova uan maj amo titanojnotsakanok. Itech miak altepemej tokniuan kinixnamikij, kintajyouiltiaj uan hasta kintsakuaj. Sayoj ke amo tikmoujkaitaj nejon porin Jesús kijtoj: “Namechtauelitaskej porin nantakuaujtamatij itech notokay” (Mat. 24:9, TNM). Keman techtauelitaj kinextia ke tikchiuaj kemej Jesús uan ke Jiova yolpaki ika tein tikchiuaj (Mat. 5:11, 12). Satanás kichiua maj techtauelitakan, sayoj ke amo keman uelis kitanis Jesús. Moteixmatiltijtok kuali tanauatilmej itech nochi taltikpak porin Jesús tapaleuijtok.

7. ¿Keniuj tikonitani ke mochiujtok tein moijtojka itech Apocalipsis 14:6, 7?

⁷ Onkak miak tataman tajtolmej uan nejon no se ouijkayot. Sayoj ke tein Jesús kichiuak maj kiitani tatitanil Juan kinextia ke nejon amo kitsakuiliskia maj moteixmatilti kuali tanauatilmej (xikonixtajtolti Apocalipsis 14:6, 7). ¿Toni kichiuani inechikol Jiova ika nejon? Itech jw.org mokixtianij miak amaixmej itech panoua mil tataman tajtolmej. Uan no, Tokniuan Oloch Taojtokaltianij kijtojkej ke ueliskia motajtolkepas itech panoua 700 tataman tajtolmej amatajkuilol Tiyolpakiskej nochipaya, tein okachi ika titamachtiaj. No mochijchiuanij videos tein kinpaleuia akin amo ueli takakij, uan amaixmej itech braille tein kinpaleuia akin amo ueli tachiaj. Ika nochi nejin okachi miakej ueli kimatij tein Biblia tamachtia. Axkan tikitaj ke mochiujtok tein achtook moijtojka porin miakej akin tajtouaj tataman tajtolmej momachtijtokej “tajtol tein chipauak” (Zac. 8:23; Sof. 3:9). Nochi nejin mochiua porin Jesús kuali taixyekantok.

8. ¿Toni panouani porin motanojnotsa?

⁸ Axkan, itech inechikol Jiova moajsij panoua 8 millones tokniuan itech 240 altepemej uan xolalmej. ¡Uan xijxiujtika moauiaj miles! Sayoj ke nejin amo yejua tein okachi moneki, ta kualneskayomej tein kinextiaj porin kipataj tein achto kichiuayaj uan kichiuaj tein Dios kineki (Col. 3:8-10). Miakej amo auilnemijok,  amo tateuiajok, amo techikotasojtajok uan amo ika moueyichiuajok ininaltepeuj. Moyekita ke mochiujtok tein kijtoua Isaías 2:4 porin amo tateuiajok. Kemej amo tikchiuajok tein achto tikchiuayaj, taltikpakneminij techitaj uan yejua ika kinekij momachtiskej Biblia uan no tiknextiaj ke tiktojtokaj Jesucristo, akin techixyekana (Juan 13:35; 1 Ped. 2:12). Uan nochi nejin ueli mochiua porin Jesús techpaleuijtok.

9. Kemej kijtoua Mateo 24:45-47, ¿toni kijtojka Jesús ke panoskia itech itamian tonalmej?

⁹ (Xikonixtajtolti Mateo 24:45-47). Jesús kijtojka ke itech itamian tonalmej kiixtaliskia se “takeual takuaujtamach uan tamatkej” akin techmakaskia tamachtilis tein techpaleuiskia maj kuali timouikakan iuan Jiova. Yejua ika axkan monekiskia semi tekititos uan ijkon kichiujtok. Jesús kinixtalij seki tokniuan taixpejpenalmej akin amo miakej maj kinmakakan tamachtilis itekitikauan Dios uan no akin kinekij kiixmatiskej. Nejin takamej amo kinemiliaj ke tokniuan moneki takuaujtamatiskej kemej yejuan kinekij (2 Cor. 1:24). Kimatij ke Jesucristo yejua akin kinixyekana itekitikauan Dios (Is. 55:4).

10. ¿Katiyejua amatajkuilol tein nesi itech taixkopin mitsonpaleuij xikonixmati uan peua xikontekitili Jiova?

¹⁰ Itech xiuit 1919 hasta axkan “takeual takuaujtamach uan tamatkej” kikixtiani miak amaixmej tein ika kinpaleuianij miakej maj kiixmatikan Dios. Itech xiuit 1921, “takeual takuaujtamach uan tamatkej” kikixtij itech tajtol inglés amatajkuilol El Arpa de Dios tein kinpaleuij miakej maj kiixmatikan tamachtilismej tein tayekantokej itech Biblia. Ijkon kemej panouanij  xiujmej mokixtiani okseki amatajkuilolmej. ¿Katiyejua amatajkuilol mitsonpaleuij xikonixmati uan xikontasojta Jiova? Xa semej nejin: “Sea Dios veraz”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Toni yekmelauj tamachtia Biblia? oso ¿Toni techmachtia Biblia? Oso xa tionmomachtijtok ika yankuik amatajkuilol Tiyolpakiskej nochipaya. Nochi nejin mokixtiani para tikinpaleuiskej oksekin maj mochiuakan itatojtokakauan Cristo uan kisanij keman okachi moneki.

11. ¿Keyej semi moneki maj tiksentokakan kuali tikixmatikan Jiova uan tein Biblia tamachtia?

¹¹ Tinochin moneki tiksentokaskej kuali tikixmatiskej Jiova uan tein tamachtia Biblia, amo sayoj akin yankuixtok peuak momachtiaj. Tatitanil Pablo kijkuiloj: “Tapalol kikuaj akin semi takuaujtamatij”. Uan no kijtoj ke komo tikchiuaj tein timomachtiaj techpaleuis maj tikmatikan “toni kuali uan toni amo” (Heb. 5:14, TNM). Kemej axkan miakej amo chipaujkanemij xa ouij techkisas tiktakamatiskej tein Jiova tanauatia. Sayoj ke Jesús, itechkopa “takeual takuaujtamach uan tamatkej” techmaka tamachtilis tein kisa itech Biblia tein techpaleuia maj semi titakuaujtamatikan.

12. ¿Keniuj tikueyitalianij itokay Dios kemej kichiuak Jesús?

¹² Ijkon kemej kichiuak Jesús, tejuan tikueyitalianij itokay Dios kemej kinamiki (Juan 17:6, 26). Kemej neskayot, itech xiuit 1931 peuak tikuij tokayit itaixpantijkauan Jiova tein mokixtia itech Biblia. Ika nejon tiknextijkej ke tiknekiaj maj techixmatikan ika itokay Dios porin tikitaj ke semi moneki (Is. 43:10-12). Uan itech metsti octubre itech nejon xiuit, peuak  kitaliaj itokay Dios ipeujyan nejin amaix itech tajtol inglés. Uan no, itech Biblia Traducción del Nuevo Mundo oksepa kitalilianij itokay Dios kampa moneki yas. Nejin semi taman ika tein kichiuaj okseki taneltokalismej kampa kijtouaj ke kichiuaj kemej Cristo, porin itech ininBiblias kikixtilianij itokay Dios.

13. ¿Keyej tikonneltoka ke Jesús techixyekantok itechkopa “takeual takuaujtamach uan tamatkej”? (Juan 6:68).

¹³ Itechkopa “takeual takuaujtamach uan tamatkej”, Jesús kichiuani se nechikol tein semi kualtsin para kiueyichiuaskej Jiova kemej yejuatsin kinamiki. ¿Keniuj tikonita nejin nechikol? Xa tionmomachilia kemej Pedro keman kiluij Jesús: “¿Akoni tiktojtokaskej? Tein titamachtia kichiua maj se nemi nochipaya” (Juan 6:68, TNM). ¿Keniuj tietoskiaj komo amo tipouiskiaj itech inechikol Jiova? Jesús techmaka tamachtilis tein techpaleuia maj tiksentokakan titakuaujtamatikan iuan Dios uan technextilia keniuj okachi kuali titamachtiskej. Uan no, techpaleuia maj tikchiuakan tein kuali para tikyolpaktiskej Jiova (Efes. 4:24).

14. ¿Keniuj mitsonpaleuiani tionpouis itech inechikol Jiova keman onkak ouijkayomej kemej kokolis COVID-19?

¹⁴ Keman tikpanouaj ouijkayomej Jesús techixyekana ika tamatilis. Nejin senkis monextij keman peuak kokolis COVID-19. Miakej itech taltikpak amo kimatiaj toni kichiuaskej, sayoj ke Jesús kiitak keniuj techpaleuiskia. Tokniuan techiluijkej ke monekia tikuiskej cubrebocas kampa miakej yetoyaj  uan amo monekia timosentiliskej iniuan oksekin. Tokniuan tayekananij kinelnamiktijkej ke monekia kiitaskej maj kuali yetokan tokniuan uan maj kinpaleuikan maj kisentokakan kuali mouikakan iuan Jiova (Is. 32:1, 2). Uan itech videos kampa nesi tein kitematiltiaj Tokniuan Oloch Taojtokaltianij, techiluianij okseki taman tein uelis tikchiuaskej uan techyolchikauaj.

15. ¿Toni okseki taman techiluianij maj tikchiuakan itech kokolis COVID-19, uan keniuj tapaleuiani nejon?

¹⁵ Itech kokolis COVID-19 techiluijkej keniuj timonechikoskiaj uan keniuj titanojnotsaskiaj. Niman peuak tikchiuaj nechikolmej uan uejueyi nechikolmej ika internet uan peuak okachi titanojnotsaj ika carta uan ika teléfono. Jiova semi techtatiochiuiani porin timochikauaj tiksentokaskej tikueyichiuaskej. Itech miak kalmej Betel motematiltiani ke okachi momiakilianij tanojnotsanij. Uan miakej kipanouanij miak taman tein kuali (xikonita recuadro “ Jiova kintatiochiuia tokniuan itech tanojnotsalis”).

16. ¿Toni senkis tikneltokaj?

¹⁶ Seki tokniuan xa kinemilianij ke itech inechikol Jiova techiluianij miak taman kemej timoyekpiaskej ika kokolis COVID-19. Sayoj ke miakpa tikitanij ke tein techiluiaj semi techpaleuia (Mat. 11:19). Kemej Jesús techixyekana kinextia ke techtasojta, keman tiknemiliaj nejon senkis tikneltokaj ke ika tein yeski tein panos satepan, Jiova uan Jesús techpaleuiskej (xikonixtajtolti Hebreos 13:5, 6).

17. ¿Keniuj tionmomachilia tikontekitilis Jiova uan maj Jesús mitsonixyekana?

¹⁷ ¡Semi tiyolpakij tiktekitiliskej Jiova uan maj Jesús techixyekana! Tipouij itech se nechikol kampa tinochin kuali timouikaj maski seseko tikayomej, tataman tein timomattokej tikchiuaskej uan tataman tajtolmej titajtouaj. Tinochin tikpiaj tamachtilis tein techpaleuia maj kuali timouikakan iuan Jiova uan tikpiaj tein moneki para titanojnotsaskej. No timochikauaj tikchiuaskej tein Dios kiyolpaktia uan tikintasojtaskej oksekin. ¡Semi tiyolpakij porin Jesús yejua akin techixyekana!