1. ¿Keniuj moneki tikitaskej netataujtil?

 AKIN kichijchiuak iluikak uan taltikpak techmaka se ueyi tatiochiualis, ueli tiknojnotsaj ika netataujtil. Nejin kijtosneki ke ueli tikiluiaj Jiova nochi tein tiknemiliaj uan tikmachiliaj itech tein yeski tajtol uan keman yeski, uan amo moneki tiktajtaniskej kemanian uelis tiknojnotsaskej. Uelis titakuaujtamatiskej ke yejuatsin techkakis maski tiyetoskej kaltapajtiloyan oso titsaktoskej. Semi tiktasojkamatij nejin netetayokolil.

2. ¿Keniuj kinextij tekiuaj David ke kiitaya ke se tatiochiualis kitataujtis Jiova?

² Tekiuaj David kiitaya ke se tatiochiualis kitataujtis Jiova. Itech se nekuikatil kiluij: “Maj nonetataujtil tamati kemej kopal tayekchijchiuj tein kichichinouaj moixpan” (Sal. 141:1, 2). Keman David nemia, tiopixkamej semi kuali kichijchiuayaj kopal tein mokuia itech templo para kiueyichiuaskej Jiova (Éx. 30:34, 35). David kinekia kuali kinemilis tein kiluiskia Jiova itech inetataujtil, ijkon kemej kuali kichijchiuayaj kopal tein kichichinouayaj. Uan tejuan no ijkon tiknekij tikchiuaskej porin tiknekij maj tonetataujtiluan kiyolpakti Jiova.

3. ¿Keniuj moneki tiktataujtiskej Jiova, uan keyej?

³ Keman tiktataujtiskej Jiova maj tiknextikan ke semi tikpoujkaitaj. Maj itech titanemilikan tein Jiova kichiuak maj kiitakan Isaías, Ezequiel, Daniel uan Juan. Maski tataman tein kiitakej, nochi nauin kiitakej Jiova kemej se Tekiuaj akin semi ueyichiujkej. Isaías kiitak ke Jiova “tokotsyetok itech itrono tein uejkapan yetok” (Is. 6:1-3). Ezequiel kiitak ke tokotsyetok itech icarro tein “kiyoualouaya  se tanex tein moitaya kemej se arcoíris” (Ezeq. 1:26-28). Daniel kiitak “Akin xiuejya itech Tonalmej” ika itaken istak uan tokotsyetok itech itrono kampa kisaya tit (Dan. 7:9, 10). Uan Juan kiitak ke Jiova tokotsyetok itech itrono uan kiyoualouaya se arcoíris tein milinia kemej “ne tetsitsin ten kiliaj esmeralda” (Apoc. 4:2-4). Keman itech titanemiliaj ke Jiova semi ueyichiujkej, techelnamiktia ke se ueyi tatiochiualis maj ueli tiktataujtikan uan ke semi moneki maj tikchiuakan ika miak poujkaitalis. Sayoj ke, ¿toni uelis tikiluiskej Jiova keman tiktataujtiskej?

4. ¿Toni techmachtia tein Jesús yekinika kijtoj itech netataujtil tein ika tamachtij? (Mateo 6:9, 10).

⁴ (Xikonixtajtolti Mateo 6:9, 10). Keman Jesús tamachtij itech se tepet, kiniluij imomachtijkauan keniuj motataujtiskej ijkon kemej kiyolpaktis Jiova. Satepan ke kijtoj “ximotatatautilikan ijkuin”, yekinika kijtoj tein okachi monekia, maj moueyitali itokay Jiova, maj uiki iTekiuajyo tein kinixpolos nochin akin kiixnamikij, uan maj nochin tikselikan tatiochiualismej nikan taltikpak. Keman no titajtanij nejin itech tonetataujtiluan, tiknextiaj ke no tikitaj ke semi moneki maj mochiua tein Dios kineki.

5. ¿Keyej amo tajtakol se kitajtanis Jiova teisa para tejuan?

⁵ Tein Jesús no kijtoj itech netataujtil kinextia ke amo tajtakol maj se kitajtani Jiova teisa para tejuan. Uelis tiktajtaniskej tein tikuaskej, maj techtapojpolui totajtakoluan, maj techpaleui maj amo titajtakolchiuakan uan maj techmakixti den Amokuali (Mat. 6:11-13). Keman tiktajtaniaj Jiova nochi nejin tiknextiaj ke tikajsikamatij ke moneki maj techpaleui uan ke tiknekij tikyolpaktiskej.

6. ¿Sayoj moneki titajtaniskej tein Jesús tamachtij itech netataujtil? Xikonmelaua.

⁶ Jesús amo kinekia maj imomachtijkauan sayoj kijtouanij tein yejua kijtoj itech netataujtil tein tamachtij. Itech okseki netataujtilmej tein kichiuak kijtoj okseki taman tein kitekipachouaya  (Mat. 26:39, 42; Juan 17:1-26). Tejuan no uelis ijkon tikchiuaskej keman teisa techtekipachoua. Kemej neskayot, keman moneki tikixpejpenaskej se taman uelis titajtaniskej tamatilis uan taajsikamatilis (Sal. 119:33, 34). Keman tikseliaj se tekit itech nechikol uan tikitaj ke ouij, uelis tikiluiskej Jiova maj techpaleui maj tikmatikan keniuj tikchiuaskej (Prov. 2:6). Tetatmej uelis ininka motataujtiskej ininkoneuan uan konemej uelis ininka motataujtiskej inintatuan. Uan no, maj ininka timotataujtikan akin tikinmachtiaj uan akin tikinnojnotsaj ika Biblia. Sayoj ke, keman tikchiuaskej netataujtil amo sayoj moneki titajtaniskej tein techpoloua.

7. ¿Keyej moneki tikueyichiuaskej Jiova keman tiktataujtiaj?

⁷ Keman timotataujtiskej no moneki tikueyichiuaskej Jiova. Yejuatsin kinamiki maj tikueyichiuakan. Se salmista kiluij Jiova: “Tiyolkuali uan tikneki titetapojpoluis”. Uan no kijtoj: “Tejua se Dios teiknelijkej, amo niman tikualani uan monetasojtalis tein amo tami semi ueyi uan nochipa tikijtoua tein melauj” (Sal. 86:5, 15). Jiova senkis kinamiki maj tikueyichiuakan porin kinextia uan kichiua miak taman tein kuali.

8. ¿Kemej toni uelis tiktasojkamatiliskej Jiova? (Salmo 104:12-15, 24).

⁸ Ika tonetataujtiluan tiknekij tikueyichiuaskej Jiova, sayoj ke no tiknekij tiktasojkamatiliskej nochi tein techmaka. Kemej neskayot, tataman xochimej, miak taman tein tikuaj tein semi uelik uan porin tikinpiaj akin kuali iniuan timouikaj. Yejuatsin techmaka miak taman porin kineki maj tiyolpakikan (xikonixtajtolti Salmo 104:12-15, 24). No tiktasojkamatiliaj nochi tamachtilis tein techmaka uan porin kichiua maj tikchiakan tein kuali.

9. ¿Toni techpaleuis maj amo tikelkauakan ke moneki tiktasojkamatiliskej Jiova tein toka kichiua? (1 Tesalonicenses 5:17, 18).

⁹ Kemansa uelis tikelkauaskej tiktasojkamatiliskej Jiova tein toka kichiua. ¿Toni uelis techpaleuis maj amo tikelkauakan? Uelis tikijkuiloskej tein tiktajtaniaj  uan maj tikitstiakan keniuj technankilia, satepan maj tikchiuakan netataujtil uan maj tiktasojkamatilikan (xikonixtajtolti 1 Tesalonicenses 5:17, 18). Keman oksekin techtasojkamatiliaj teisa tein tikchiuaj tiyolpakij uan tikmachiliaj ke techpatiuitaj. No ijkon, Jiova yolpaki keman tikelnamikij tiktasojkamatiliskej keman technankilia tonetataujtiluan (Col. 3:15). Sayoj ke onkak okse taman tein moneki tiktasojkamatiliskej uan tein semi moneki. Maj tikitakan toni.

10. ¿Keyej moneki tiktasojkamatiliskej Jiova porin kiualtitanik iKonetsin? (1 Pedro 2:21).

¹⁰ (Xikonixtajtolti 1 Pedro 2:21). Moneki tiktasojkamatiliskej Jiova porin kiualtitanik iKonetsin akin kitasojta maj techmachtiki. Keman timomachtiaj tein Jesús kichiuak nikan taltikpak, ueli tikmatij keniuj tamati Jiova uan keniuj uelis tikyolpaktiskej. Komo tiknextiaj ke tiktasojkamatij maj Jesús toka momikiliani uelis timouikaskej iuan Jiova (Rom. 5:1).

11. ¿Keyej tiktataujtiaj Jiova itokaykopa Jesús?

¹¹ Tiktasojkamatiliaj Jiova porin ueli tiktataujtiaj itokaykopa iKonetsin. Itechkopa Jesús yejuatsin techmaka tein tiktajtaniaj. Yejua ika keman tiktataujtiaj Jiova itokaykopa Jesús, yejuatsin techkaki uan technankilia. Jesús kijtoj: “Tein yeski taman tein nantajtaniskej notokaykopa, nejua nikchiuas, para maj noTajtsin moueyitali itechkopa iKoneuj” (Juan 14:13, 14, TNM).

12. ¿Keyej no tiktasojkamatiliaj Jiova porin kitemakak iKonetsin?

¹² Jiova techtapojpoluia totajtakoluan porin Jesús toka momikilij. Biblia kijtoua ke Jesús toTayekankatiopixkauj uan ke yejua “motalij iyekmakopa toUeyi Dios akin motalia itech iueyi silla ne iluikak” (Heb. 8:1, TNM). Biblia no kijtoua ke “tikpiaj se akin techpaleuia akin yetok iuan toTajtsin: Jesucristo” (1 Juan 2:1, TNM). Semi tiktasojkamatiliaj Jiova porin techmakak se Tayekankatiopixkat akin techiknelia, techajsikamati uan techtajtouia (Rom. 8:34; Heb. 4:15). Komo Jesús amo toka momikiliskia amo ueliskia tiktataujtiskej Jiova porin titajtakouanij. Semi tiktasojkamatiliaj porin yejuatsin kitemakak iKonetsin akin semi kitasojta.

13. ¿Keniuj kinextij Jesús youak achto ke momikiliskia ke kintasojtaya itatojtokakauan?

¹³ Youak achto ke momikiliskia, Jesús uejkauak ininka motataujtij itatojtokakauan uan kiluij Jiova maj kinyekpiani den Amokuali (Juan 17:15). Ika nejin, Jesús senkis kinextij ke kintasojtaya porin maski yaya kipanoti se ueyi ouijkayot, kinekia maj itatitaniluan kuali yetonij.

14. ¿Keniuj tiknextiaj ke tikintasojtaj tokniuan?

¹⁴ Ijkon kemej Jesús, tejuan amo sayoj itech titanemiliaj tein techpoloua, ta no ininka timotataujtiaj tokniuan. Ijkon tikchiuaj tein kijtoj Jesús, ke moneki timotasojtaskej uan ika nejon no tiknextiliaj Jiova ke tikintasojtaj tokniuan (Juan 13:34). Uelis kinpaleuis tokniuan keman ininka timotataujtiaj, porin Biblia kijtoua ke “semi tapaleuia keman chikauak motataujtia akin yolmelauak” (Sant. 5:16, TNM).

15. ¿Keyej moneki maj ininka timotataujtikan tokniuan?

¹⁵ Moneki maj ininka timotataujtikan tokniuan porin kiixnamikij miak  ouijkayomej. Uelis tiktajtaniskej Jiova maj kinpaleui maj taxikokan akin mokokouaj, akin kinpanok se tetsauit kampa ika nemij, akin kintajyouiltiaj uan akin nemij kampa onkak neteuilis. No uelis ininka timotataujtiskej tokniuan akin motemakaj tapaleuiskej keman mochiua se tetsauit. Komo tejuatsin tikonixmati se tokniuj akin kipanotok se taman kemej nejin uelis tikontokaytis keman tionmotataujtis. Tiknextiaj ke tikintasojtaj tokniuan keman tiktajtaniaj Jiova maj kinpaleui maj taxikokan.

16. ¿Keyej moneki ininka timotataujtiskej tokniuan akin techixyekanaj?

¹⁶ Tokniuan akin techixyekanaj itech nechikol semi kitasojkamatij maj ininka timotataujtikan, uan semi kinpaleuia keman tikchiuaj. Tatitanil Pablo kimatia ke semi monekia maj oksekin ika motataujtianij. Yejua kijkuiloj: “No ximotataujtikan noka para uelis nikmatis toni nikijtos keman peuas nitajtos uan ijkon amo nimouis nikteixmatiltis kuali tanauatilmej tein kimelauaj tein Dios amo kitematiltijtoya” (Efes. 6:19, TNM). Tokniuan akin axkan techixyekanaj semi tekitij, keman tiktajtaniaj Jiova maj kitiochiua nochi tein kichiuaj, tiknextiaj ke tikintasojtaj.

17, 18. ¿Kemanian xa techiluiskej maj tikchiuakan netataujtil ininixpan oksekin, uan toni moneki tikelnamikiskej?

¹⁷ Kemansa xa techiluiskej maj tikchiuakan netataujtil ininixpan oksekin. Kemej neskayot, se tokniuj siuat akin kimachtia aksa ika Biblia xa kiluis maj kichiua netataujtil tokniuj siuat akin iuan tamachtia. Sayoj ke, kemej nejon tokniuj amo semi kiixmati akin kimachtiaj, xa kiitas ke okachi kuali kichiuas netataujtil keman motamimachtiskej, porin ijkon uelis kimatis toni okachi kipaleuis akin kimachtijtokej.

¹⁸ Kemansa tokniuan takamej kiniluiaj maj kichiuakan netataujtil itech nechikolmej oso achto ke peuas titanojnotsaskej. Nejon tokniuan moneki kielnamikiskej keyej mochiua nejon nechikol, no moneki kielnamikiskej ke itech netataujtilmej amo moneki tayolmajxitiskej  nion kitematiltiskej teisa. Itech seki nechikolmej tein mochiuaj ixyetok 5 minutos tein ika timokuikatiskej uan tein ika mochiuas netataujtil. Yejua ika, tokniuj akin kichiua netataujtil amo moneki uejkauak tajtos, okachiok keman kichiuas netataujtil achto ke peuas nechikol (Mat. 6:7).

19. ¿Toni techpaleuis maj tikchiakan itonal Jiova?

¹⁹ Moneki okachi tikpatiuitaskej netataujtil porin amo uejkaua ejkos tonal keman Dios kiixtalis tein kinnamiki kiseliskej akin nemij itech taltikpak. Keman Jesús ika tajtoj nejin, kijtoj: “Xiijsatokan uan nochipa ximotataujtijtokan para uelis namakisaskej keman mochiuas nochi nejin” (Luc. 21:36, TNM). Komo nochipa tikchiuaj netataujtil okachi titakuaujtamatiskej uan tikchixtoskej maj ejko itonal Jiova.

20. ¿Toni moneki tikchiuaskej para maj Jiova kiita tonetataujtiluan kemej kopal tein kichichinouaj tein kualtsin ajuiyak?

²⁰ ¿Toni tikitakej itech nejin tamachtilis? Netataujtil se ueyi tatiochiualis tein semi tikpatiuitaj. Keman timotataujtiskej moneki maj ika titajtokan seki taman tein mouika ika tein Dios kiixtalijtok kichiuas. No tiktasojkamatiliaj iTekiuajyo uan porin kitemakak iKonetsin, uan ininka timotataujtiaj tokniuan. No uelis tiktajtaniskej Jiova maj techmaka tein techpoloua uan tein techpaleuis maj tiksentokakan kuali timouikakan iuan. Keman kuali tiknemiliaj tein tiktajtaniskej tiknextiaj ke tikpatiuitaj netataujtil. Jiova kiitas ke tonetataujtiluan kemej yeskia kopal tein kichichinouaj tein kualtsin ajuiyak, uan kiyolpaktis (Prov. 15:8).