1, 2. ¿Toni kijtoj Jiova ne uejkauj ke kipanoskia ixolal?

AXKAN moajsi se nechikol kampa pouij taltikpakneminij akin kitasojtaj Dios uan kinekij kitekitiliskej. Moixmatij kemej itaixpantijkauan Jiova. Melauak ke mopolouaj, sayoj ke Jiova kinixyekana uan kintatiochiuia ika iyektikatsin espíritu. Maj tikitakan keniuj kichiuani.

² Itech xiuit 1914, semi amo miakej taltikpakneminij kiueyichiuayaj Jiova. Sayoj ke kemej yejuatsin kintatiochiuiani itekitikauan itech tanojnotsalis, tel miak millones taltikpakneminij kiixmatinij tein Biblia yekmelauj tamachtia uan mochiuanij itaixpantijkauan Jiova. Ne uejkauj, Dios kijtoj ke akin pouij itech ixolal momiakiliskiaj: “Tein tsikitsin mochiuas se millar, uan tein amo ueyi mochiuas se altepet tel chikauak. Nejua, Jiova, nikijsiuiltis keman ajsis tonalmej” (Is. 60:22). Nejin tajtolmej yekmelauj mochiujtok itech totonaluan. Ixolal Jiova tamati kemej se ueyi altepet kampa moajsij panoua chikueyi millones taltikpakneminij. Nejin kijtosneki ke okachi timiakej ke nochin akin nemij itech miak altepemej.

3. ¿Keniuj itekitikauan Dios kinextianij netasojtalis?

 ³ Itech nejin itamian tonalmej, Jiova kinpaleuiani itekitikauan maj okachi kichikauakan netasojtalis tein mopialiaj. “Dios Yejuatsin tetasojtatinemi” uan kineki maj itekitikauan no ijkon kichiuakan (1 Juan 4:8). Jesús kinnauatij imomachtijkauan maj motasojtanij. Uan no kiniluij: “Komo namejuan nanmoyoltasojtatinemij, ijkuakon nochi in taltikpakuani kajsikamatiske ke melau nannomomachtijkauan” (Juan 13:34, 35). Itech totonaluan, itekitikauan Jiova kinextianij netasojtalis hasta keman mochiuanij neteuilismej. Kemej neskayot, itech Ojpatika Neteuilis tein Mochiuak itech Nochi Taltikpak momikilijkej kemej 55 millones taltikpakneminij. Sayoj ke itaixpantijkauan Jiova amo kimiktijkej nion se taltikpaknenkej itech nejon neteuilis (xikonixtajtolti Miqueas 4:1, 3). Nejon kinpaleuiani maj amo inintajtakol maj momikiliani nion semej nejon taltikpakneminij (Hech. 20:26).

4. ¿Keyej tikmoujkaitaj maj momiakilikan itekitikauan Dios?

⁴ Axkan, itekitikauan Dios kisentokaj momiakiliaj maski kinixnamiki se tetauelitakej akin tel chikauak. Nejin tetauelitakej yejua Satanás, “ten tayekantinemi nikan taltikpak” (2 Cor. 4:4). Ika taltikpaktekiuajyomej uan kampa kiteixmatiltiaj tanauatilmej, Satanás kitemoua kitsakuilis tanojnotsalis. Sayoj ke yejua amo ueli kitsakuilia. “Kuali kimati ke amo kipia ok miak tonalme”, yejua ika kisentoka kitemoua kichiuas maj amo tiktekitilikanok Jiova (Apoc. 12:12).

5. ¿Keyej sekin uelis techyolxokoliskej kemansa? (Xikonita taixkopin ipeujyan tamachtilis.)

⁵ Tiitekitikauan Dios tikmatij ke motelneki tiktasojtaskej yejuatsin uan no tikintasojtaskej oksekin. Jesús kijtoj: “‘Xiktasojta moueyitekotsin Totajtsin Dios ika nochi moyolo, uan ika nochi motanejnekilis, uan ika nochi motanemililisʼ. Yejua ya nijin in kachi ueyi tanauatil uan de kachi kuika ueyi chikaualis. Uan ika ome tanauatil moneuilia keme ne achtopa tanauatil uan no kijtoa ijkuin: ‘Xiktasojta moknitsin ijkon keme tejuatsin timotasojtaʼ” (Mat. 22:35-39). Sayoj ke Biblia kijtoua ke tinochin tiyolij titajtakouanij porin Adán techpanoltilij tajtakol (xikonixtajtolti Romanos 5:12). Yejua ika, xa se tokniuj itech nechikol kichiuas oso kijtos teisa tein techyolxokolis. ¿Toni tikchiuaskej? ¿Tiksentokaskej tiktasojtaskej Jiova? ¿Tikauaskej Jiova uan ixolal? (Xikonita kampa kijtoua “Tein okachi momelaua”.) Biblia ininka tajtoua seki itekitikauan Dios akin kijtojkej oso kichiujkej seki taman tein kinyolxokolij oksekin. Maj tikitakan toni uelis techmachtis tein kinpanok.

6. ¿Toni tein monekia kichiuas Elí amo kichiuak?

⁶ Maj itech titanemilikan Elí. Yejua katka tayekankatiopixkat itech xolal Israel, uan kipiaya ome ikoneuan akin amo kitakamatiaj itanauatiluan Jiova. Biblia kijtoua ke ikoneuan Elí amo yolkualmej katkaj uan amo kipoujkaitayaj Jiova (1 Sam. 2:12). Elí kimatia ke ikoneuan kichiujtoyaj miak taman tein tel amo kuali. Sayoj ke amo kinmelauak kemej monekia.  Satepan, Jiova kitatsakuiltij Elí uan ikoneuan. Uan no, amo kikauak maj satepan nion se ichankauj mochiuani tayekankatiopixkat (1 Sam. 3:10-14). Maj tiknemilikan ke tinemij itech itonaluan Elí uan tikitaj ke kikaujtok maj ikoneuan kichiuakan miak taman tein tel amo kuali. ¿Toni tikchiuaskiaj? ¿Amo titakuaujtamatiskiajok iuan Jiova uan senkis tikauaskiaj?

7. ¿Toni ueyi tajtakol kichiuak David, uan toni kichiuak Dios keman panok nejon?

⁷ Axkan maj ika titajtokan David. Yejua kipiaya tel kualtsitsin kualneskayomej, uan yejua ika Jiova kiteltasojtaya (1 Sam. 13:13, 14; Hech. 13:22). Sayoj ke hasta David kichiuak uejueyi tajtakolmej. Kemej neskayot, se tonal motekak iuan inamik Urías, se itateuijkauj akin yetoya itech se neteuilis. Siuat mokokoxkatalij, uan kemej David amo kinekia maj momatini tein kichiuak, kitatitauij Urías uan kitemoj kichiuas maj yani ichan. David kichiaya maj Urías motekani iuan inamik uan ijkon taltikpakneminij kinemiliskiaj ke konetsin katka iaxka Urías. Sayoj ke Urías amo kinekik yas ichan. Yejua ika David kinemilij keniuj kichiuas maj kimiktianij itech neteuilis. Kemej David kichiuak uejueyi tajtakolmej, yejua uan ichankauan tel tajyouijkej (2 Sam. 12:9-12). Sayoj ke Jiova kiiknelij David uan kitapojpoluij. Yejuatsin kimatia ke David kinekia kichiuas tein kuali (1 Rey. 9:4). Komo tinemiskiaj itech nejon tonalmej, ¿keniuj tikitaskiaj tein kichiuak David? ¿Amo tiktekitiliskiajok Jiova?

8. 1) ¿Toni tein Pedro motenkaujka amo kichiuak? 2) ¿Keyej Jiova kisentokak kimakak tekimej Pedro maski mopoloj?

 ⁸ Okse neskayot yejua tatitanil Pedro. Jesús kiixpejpenak Pedro kemej semej itatitaniluan. Maski ijkon, Pedro kemansa amo kiyeknemilij tein kijtoj oso tein kichiuak. Kemej neskayot, se tonal motenkauak ke amo keman kikauaskia Jesús, maski oksekin kikauaskiaj (Mar. 14:27-31, 50). Sayoj ke satepan ke kikitskijkej Jesús, nochin itatitaniluan kikaujkej, uan Pedro no kikauak. Uan expa kijtoj ke amo kiixmatia Jesús (Mar. 14:53, 54, 66-72). Sayoj ke Pedro moteltayokoltij ika tein kichiujka. Yejua ika Jiova kitapojpoluij uan kisentokak kimakak tekimej. Komo tiyeskiaj tiimomachtijkauan Jesús itech nejon tonalmej uan tikmatiskiaj tein kichiuak Pedro, ¿tiksentokaskiaj titakuaujtamatiskiaj iuan Jiova?

9. ¿Keyej tejuatsin tiontakuaujtamati ke Dios nochipa kichiuas tein melauak?

⁹ ¿Toni techmachtiaj nejin neskayomej? Ke seki itekitikauan Jiova kichiuanij tein amo kuali uan nejon kintajyouiltiani oksekin. ¿Toni tikchiuaskej komo techpanoua nejon? ¿Amo tiyaskejok nechikolmej uan tikauaskej Jiova uan ixolal? ¿Oso tikelnamikiskej ke Jiova teiknelia uan xa kichixtok maj nejon taltikpaknenkej moyolnonotsa? ¿Uan komo taltikpaknenkej amo moyolnonotsa? ¿Titakuaujtamatiskej ke Jiova kimati toni panotok uan ke kiyektalis nejon keman monekis? Komo moneki, yejuatsin uelis kikalankixtis taltikpaknenkej itech nechikol. Sayoj ke nochipa moneki titakuaujtamatiskej ke Jiova kichiuas tein melauak uan tein okachi kuali.

10. ¿Toni kiajsikamatik Jesús ika ininnepololuan Judas Iscariote uan Pedro?

¹⁰ Biblia ininka tajtoua miakej itekitikauan Dios akin amo keman kikaujkej yejuatsin nion ixolal maski oksekin kichiujkej uejueyi tajtakolmej. Kemej neskayot, keman Jesús yaya kinixpejpenati 12 itatitaniluan, nochi youal kitataujtijtoya iTajtsin maj kipaleui. Semej itatitaniluan akin kinixpejpenak yejua Judas Iscariote, akin satepan kitemaktij. Uan no, tatitanil Pedro kijtoj ke amo kiixmatia Jesús (Luc. 6:12-16; 22:2-6, 31, 32). Kemej Jesús kiajsikamatia ke Jiova uan okseki imomachtijkauan amo inintajtakol katka tein Judas Iscariote uan Pedro kichiujkej, amo kikauak iTajtsin, ta kisentokak kitekitilij ika nochi iyolo. Yejua ika Jiova oksepa kimakak nemilis uan satepan kiixtalij kemej Tekiuaj itech Tekiuajyot tein moajsi iluikak (Mat. 28:7, 18-20).

11. ¿Toni kijtoj Biblia ke panoskia iniuan itekitikauan Dios itech nejin tonalmej?

¹¹ Ineskayo Jesús techmachtia ke moneki amo tikauaskej Jiova nion ixolal. Uan onkak miak taman tein kinextia keyej moneki amo tikchiuaskej nejon. Ueli tikitaj ke Jiova techixyekantok itech nejin itamian tonalmej. Techpaleuia maj tikteixmatiltikan tamachtilis tein melauak  itech nochi taltikpak. Tein melauj, sayoj tejuan tikchiujtokej nejon. Uan no, nochi tein Dios techmachtia techpaleuia maj kuali timouikakan uan maj tiyolpakikan. Biblia kijtoj ke itekitikauan Dios yolpakiskiaj porin “kuali moajsi ininyolo” (Is. 65:14).

12. ¿Toni moneki tikchiuaskej keman oksekin mopolouaj?

¹² Semi tiyolpakij porin Jiova techixyekana uan techpaleuia maj tikchiuakan miak taman tein kuali. Taltikpakneminij akin Satanás kinixyekana amo yolpakij uan amo kichiaj kiseliskej tein kuali satepan. Yejua ika, keman oksekin itech nechikol mopoloskej, maj tiknemilikan keniuj moneki tikitaskej ininnepololuan uan toni moneki tikchiuaskej. Maj amo tikauakan Jiova nion inechikol sayoj porin yejuan mopolojkej. Amo tiknextiskiaj tamatilis nion taixejekol yeskia komo tikchiuaskiaj nejon, ta moneki tiksentokaskej tiktekitiliskej Jiova uan timokauaskej maj techixyekana. Maj tikitakan keniuj uelis tikchiuaskej.

13, 14. 1) ¿Keyej moneki amo tiyolijsiuiskej? 2) ¿Toni netenkaualis tiknekij tikelnamikiskej?

¹³ ¿Toni moneki tikchiuaskej komo se tokniuj kijtoua oso kichiua teisa tein techyolxokolia? Biblia kijtoua ke moneki amo ijsiujka tikualaniskej (Ecl. 7:9). Tinochin titajtakouanij uan timopolouaj. Yejua ika moneki amo tiyolijsiuiskej uan tikelnamikiskej ke tokniuan kemansa kijtoskej oso kichiuaskej teisa tein amo kuali. Uan no, amo kuali yetok maj tiksentokakan titanemilikan itech ininnepololuan oksekin, porin nejon uelis kichiuas maj amo techyolpaktiok tiktekitiliskej Jiova. Uan amo sayoj nejon, ta uelis tikpolojtiyaskej totakuaujtamatilis uan xa hasta tikauaskej inechikol Jiova. Ijkon amo uelisok tikchiuaskej itanejnekilis Jiova nion tikchiaskej tinemiskej itech yankuik taltikpak.

¹⁴ Komo ijkon, ¿toni uelis techpaleuis maj tiksentokakan tiktekitilikan Dios ika yolpakilis keman oksekin techyolxokoliaj? Maj nochipa tikelnamikikan nejin tein motenkaua Jiova tein semi teyolchikaua: “Nikchijchiuati yankuik iluikak uan se yankuik taltikpak; uan tein achto panok amo moelnamikisok, nion yetosok itech nanmoyolo” (Is. 65:17; 2 Ped. 3:13). Jiova techmakas nejin tatiochiualismej komo amo keman tikauaj.

15. ¿Toni kijtoj Jesús ke moneki tikchiuaskej keman oksekin mopolouaj?

¹⁵ Melauak ke ayamo tinemij itech yankuik taltikpak. Yejua ika, komo aksa techyolxokolia, maj tiknemilikan toni kineki Jiova maj tikchiuakan. Kemej neskayot, Jesús kijtoj: “Komo namejuan nankintapojpoluiaj naken namechmouispoloaj, ijkon no Toueyitajtsin Dios ten yetika eluiyaktsinko namechtapojpoluis. Uan komo amo nankintapojpoluiaj ne naken namechmouispoloaj, no  ijkon Namoueyitajtsin amo no namechtapojpoluis de namotajtakoluan”. Uan keman tatitanil Pedro kitajtanij Jesús ox moneki tikintapojpoluiskej oksekin sayoj “chikojpa”, Jesús kinankilij: “Amo sayo chikojpa xiktapojpolui. Ta, xiktapojpolui miakpa”. Jesús techmachtij ke nochipa moneki tikintapojpoluiskej oksekin keman mopolouaj (Mat. 6:14, 15; 18:21, 22).

16. ¿Toni kuali neskayot kikauak José?

¹⁶ Ineskayo José techmachtia toni moneki tikchiuaskej keman oksekin techyolxokoliaj. Jacob kipiak sayoj ome konemej iuan Raquel, se yejua José, akin Jacob okachi kitasojtaya. Kemej okachi kitasojtaya, majtakti itakpaikniuan kinexikoluijkej. Uan kemej kiteltauelitayaj, kinamakakej kemej takeual. Akin kikoujkej José kiuikakej Egipto. Miak xiujmej satepan, akin tekiuajtia Egipto kichiuak maj José no kipiani ueyi tanauatil itech nochi altepet. Tekiuaj semi kimoujkaitak nochi tein kuali tein kichiujka José. Xiujmej satepan, iikniuan José yajkej Egipto kikouatoj takual porin itech ininaltepeuj semi tatasojtia. Keman kiitakej José, amo kiixmatkej. Sayoj ke José kemaj kinixmatik. Maski yejuan kichiuilijkaj tein tel amo kuali, yejua amo kintatsakuiltij, ta kitemoj kiitas ox yekmelauj mopatakaj. Keman José kiitak ke kemaj mopatakaj, kiniluij ke yejua katka ininikniuj. Xiujmej satepan, kinyolseuij uan kiniluij: “Amo ximouikan. Nejua niksentokas namechmakas takual namejuan uan nanmokoneuan” (Gén. 50:21).

17. ¿Toni tikonchiuas tejuatsin keman oksekin mopoloskej?

¹⁷ Maj tikelnamikikan ke kemej tinochin timopolouaj, tejuan no tikinyolxokoliaj oksekin. Yejua ika, komo tikmatij ke tikyolxokolijkej aksa, maj tikchiuakan tein tayolmajxitia Biblia. Maj tiktajtanikan maj techtapojpolui uan maj tiktemokan tikyektaliskej kuejmol (xikonixtajtolti Mateo 5:23, 24). ¿Melauj ke tiktasojkamatij keman oksekin techtapojpoluiaj? Yejua ika tejuan no monekiskia titetapojpoluiskej. Colosenses 3:13 techyolmajxitia: “Ximoijyouilijtiyakan se uan okse in tataman de namotamachilisuan. Uan no ximotapojpoluijtiyakan se uan okse, ijkon keme kuak se aksa kiyolxokolia”. Uan no kijtoua ke ijkon kemej Jiova techtapojpoluij tejuan, tejuan no moneki ijkon tikchiuaskej. Komo yekmelauj tikintasojtaj tokniuan, amo tiksentokaskej tikelnamiktoskej teisa tein techchiuilijkej achto (1 Cor. 13:5). Uan komo tikintapojpoluiaj, Jiova no techtapojpoluis. Yejua ika, maj tikiniknelikan oksekin, ijkon kemej Jiova techiknelia tejuan (xikonixtajtolti Salmo 103:12-14).