Kinixnextiaj ángeles akin tapaleuijkej keman kiixpolojkej Jerusalén uan akin no tapaleuiskej keman kiixpoloskej nochi tein kiixyekana Satanás itech Armagedón. Nejin yankuik kemej tikmelauaj. ¿Keyej tikpatakej kemej achto tikmelauayaj?

Achto ke ajsiskia xiuit 607 achto itech totonaluan, Jiova kiluij Ezequiel maj kiitani tein panoskia ompa Jerusalén achto ke kiixpoloskiaj. Ezequiel kiitak ke akin ompa nemiaj kichiuayaj miak taman tein tel amo kuali. Satepan kinitak chikuasen takamej akin kiuikayaj ininmako seki teposmej tein ika takokototsaskiaj. No kiitak se takat akin takentoya ika lino uan kiuikaya se tintero tein kikuiaj tajkuilouanij (Ezeq. 8:6-12; 9:2, 3). Jiova kiluij nejin takat: “Xipano tatajko itech xolal, tatajko ompa Jerusalén, uan xikinixkuaneskayoti takamej akin yoltejkotokej uan chokatokej ika nochi tein tel amo kuali tein mochiujtok itech xolal”. Uan chikuasen takamej akin kiuikayaj se tepos ininmako kiniluij maj kinmiktianij nochin akin amo taixkuaneskayotilmej (Ezeq. 9:4-7). ¿Toni techmachtia nejin tein kiitak Ezequiel? ¿Uan akoni nejon takat akin kiuika tintero?

Ezequiel kijtoj nejin itech xiuit 612 achto itech totonaluan. Uan yekinika mochiuak makuil xiuit satepan, keman Jiova kikauak maj tateuianij kayomej Babilonia kiixpolouanij Jerusalén. Ijkon, Dios kitatsakuiltij ixolal porin amo tatakamatik (Jer. 25:9, 15-18). Sayoj ke ¿toni kinpanok judíos tatakamatinij akin motayokoltiayaj ika nochi tein amo kuali tein mochiuaya Jerusalén? Jiova kinmakixtij.

Itech tein Ezequiel kiitaltijkej, yejua amo akin kiixkuatalilij se neskayot nion tapaleuij keman  kiixpolojkej Jerusalén, ta ángeles kiixyekankej nejon ixpoliuilis. Yejua ika nejon tajtolmej techpaleuia maj tikmatikan tein panoua ne iluikak. Jiova kiniluij ángeles maj kiixyekananij nochi tein mochiuaskia keman kinixpoloskiaj akin amo tatakamatiaj uan maj kiitanij maj makisanij akin tatakamatiaj. *

Nejin tajtolmej mochiuas oksepa. ¿Keniuj uan kemanian? Achto, itech toamaixuan momelauaya ke takat akin kiuika tintero kinixnextiaya tokniuan taixpejpenalmej akin nemijok nikan taltikpak uan ke taltikpakneminij kinixkuataliliaj tein kinextia ke makisaskej keman kikakij uan kiseliaj tamachtilis tein tikteixmatiltiaj. Sayoj ke yankuixtok tikitakej ke monekia tikpataskej nejon. ¿Keyej? Porin ayamo uejkaua timomachtijkej Mateo 25:31-33 uan tikitakej ke yejua Jesús akin kiixtalia tein panos iniuan taltikpakneminij uan ke kichiuas itech okachi ueyi tajyouilis. Ijkuak, kiixtalis akonimej tamatij kemej ichkamej uan akonimej kemej cabras. Ichkamej makisaskej, sayoj ke cabras kinixpoloskej.

Yejua ika, ¿toni techmachtia tein kiitaltijkej Ezequiel? Maj tikitakan makuil taman:

1. Achto ke kiixpoloskiaj Jerusalén, Jiova kinixtalij Ezequiel, Isaías uan Jeremías maj kinnejmachtianij taltikpakneminij tein panoskia itech xolal. Axkan, Jiova kinixtalij seki oloch tokniuan taixpejpenalmej maj kinmachtikan itekitikauan uan maj kinnejmachtikan taltikpakneminij achto ke peuas okachi ueyi tajyouilis. Tein melauj, itech nejin tekit no tapaleuiaj “oksekin takeualmej” tein kipia Cristo, tein kijtosneki, nochin itekitikauan Dios (Mat. 24:45-47).

2. Ezequiel amo kinixkuatalilij se neskayot taltikpakneminij akin yayaj makisatij. Itech nejin tonalmej, itekitikauan Dios amo no teyi kinixkuataliliaj taltikpakneminij. Yejuan sayoj kinixmatiltiaj uan kinnejmachtiaj tein panos satepan. Uan kichiuaj nejin noyampa taltikpak ika ininnepaleuil ángeles (Apoc. 14:6).

3. Itech itonaluan Ezequiel, akin makiskej amo teyi kipiayaj ininixkuako. Itech nejin tonalmej, akin makisaskej itech okachi ueyi tajyouilis amo no teyi kipiaskej ininixkuako. ¿Toni moneki kichiuaskej axkan komo kinekij makisaskej? Keman kikakij tanejmachtilis, moneki kitojtokaskej ineskayo Cristo, motemaktiskej iuan Dios uan kinpaleuiskej iikniuan Cristo itech tanojnotsalis (Mat. 25:35-40). Itech okachi ueyi tajyouilis, nejon taltikpakneminij kemej yeskia kiseliskej se neskayot ininixkuako, tein kijtosneki, moixtalis maj makisakan.

4. Takat akin kiuika tintero kiixnextia Jesús. Itech okachi ueyi tajyouilis, yejua kijtos tein kinpanos akin kichiaj nemiskej nikan taltikpak keman kiixtalis ke tamatij kemej ichkamej. Ijkuak, yejuan kiseliskej tatiochiualis nemiskej nochipaya nikan taltikpak (Mat. 25:34, 46, TNM). *

5. Itech nejin tonalmej, chikuasen takamej akin kipiaj teposmej ininmako kinixnextiaj ángeles ne iluikak akin Jesús kinixyekana. Yejuan amo uejkaua kinixpoloskej taltikpakneminij uan kitamiskej nochi tein amo kuali (Ezeq. 10:2, 6, 7; Apoc. 19:11-21).

Nejin makuil taman tein tikajsikamatij techpaleuia maj titakuaujtamatikan ke Jiova amo kinixpolos akin tatakamatij iniuan akin amo tatakamatij (2 Ped. 2:9, TNM; 3:9). Uan no, techelnamiktia ke semi moneki titanojnotsaskej itech nejin tonalmej. Nochin moneki kikakiskej tanejmachtilis achto ke ixpoliuis nochi tein amo kuali (Mat. 24:14).