Salomón, ipopaj Rehoboam, tekiuajtik Israel cuarenta xiujmej (1 Rey. 11:42). Satepan ke momikilij, Rehoboam yajki Siquem, kampa ika norte ompa Jerusalén, kampa kiixtaliskiaj kemej tekiuaj (2 Crón. 10:1). ¿Mouiskia porin kipiaskia tekit tein kipiaya ipopaj, akin kitelixmatkaj porin semi tamatkej katka? Amo uejkaua, Rehoboam kinextiskia ox kipiaya tamatilis tein kipaleuiskia maj kiyektali se ueyi kuejmol.

Israelitas kimachiliayaj ke kinteltajyouiltijtoyaj, yejua ika kintitankej seki takamej maj kiluitij Rehoboam tein kinekiaj maj kichiua. Yejuan kiluijkej: “Mopopaj kichiuak maj etik toyugo. Sayoj ke komo tikchiua maj amo ouij tekit tein techmakak mopopaj uan tikaxania yugo tein etik tein techtalilij, timitstekitiliskej” (2 Crón. 10:3, 4).

Rehoboam xa amo kimatia toni kichiuas. Komo kichiuaya tein kiluijkaj, yejua, ichankauan uan nochin akin nemiaj ichan xa amo kipiaskiajok miak kuajkuali taman. Sayoj ke, komo amo kichiuaya, taltikpakneminij ueliskiaj kiixnamikiskej. ¿Toni kichiuak? Yekinika kintajtanij takamej akin xiuejkejya katkaj akin achto kiyolmajxitiayaj Salomón maj kiyolmajxitianij. Satepan no kintajtanij iuampoyuan. Yejuan kiluijkej maj okachi kintajyouiltiani, uan kinkakik. Yejua ika, tanankilij: “Nikchiuas okachi etik namoyugo, uan niktamajxitilis. Nopopaj namechtatsakuiltiaya ika kuetax, sayoj ke nejua nikchiuas ika kuetax tein tenpijpitstik”, tein xa katka kuetax takojkoton tein itempan kipiaya omit oso tepos (2 Crón. 10:6-14).

¿Toni techmachtia nejon? Axkan, moajsij miakej tokniuan xiuejkejya akin uejkaujya kitekitilianij Jiova uan uelis techpaleuiskej maj kuali titaixpejpenakan. Maj tiknextikan tamatilis uan maj tikinkakikan (Job 12:12).

Rehoboam kinsentilij itateuijkauan uan yaya kinteuiti akin kiixnamikkaj. Sayoj ke Jiova kititanik tanauatijkej Semaya maj kiluiti: “Moneki amo nanpankisaskej uan nanmoteuiskej iniuan nanmokniuan israelitas. Sejsemej namejuan moneki nanmokepaskej nanmochan, porin nejua nikchiuak maj pano nejin” (1 Rey. 12:21-24). *

¿Kiouijmakak Rehoboam kikakis Jiova? ¿Keniuj kiitaskiaj taltikpakneminij inintekiuaj akin yankuixtok kiixtalijkaj? Yejua kiniluijka ke kintatsakuiltiskia “ika kuetax tein tenpijpitstik”, sayoj ke axkan amo teyi kinchiuiliskiaok taixnamikinij (no xikonita 2 Crónicas 13:7). Maski ijkon, nejin tekiuaj uan itateuijkauan “kitakamatkej itajtol Jiova uan mokepkej ininchan, kemej Jiova kiniluijka”.

¿Toni techmachtia nejin? Ke okachi kuali maj tiktakamatikan Jiova maski oksekin techkejkeloskej. Ijkon, tikpiaskej itatiochiualis (Deut. 28:2).

Yejua nejon tein kipanok Rehoboam. Yejua tatakamatik uan amo tateuito. Okachi kuali, kichiuak maj okachi kuali moajsinij seki xolalmej uan kinchijchiuak okseki itech talmej kampa taixyekanayaok: Judá uan Benjamín (2 Crón. 11:5-12). Uan tein okachi moneki, seki tonalmej kitakamatik itanauatiluan Jiova. Kemej itech majtakti uejueyi kalyetouanij kampa taixyekanaya Jeroboán peuak kinueyichiuaj tiotsitsin, miakej yayaj Jerusalén kampa kipaleuiayaj Rehoboam uan kiueyichiuayaj Jiova kemej kiyolpaktia (2 Crón. 11:16, 17). Yejua ika, kemej Rehoboam kitakamatik Jiova mochikauak itekiuajyo.

Keman Rehoboam kuali moajsia itekiuajyo kichiuak se taman tein amo mochiaya. Amo kitakamatikok iTanauatil Jiova uan peuak kinueyichiua tiotsitsin. Sayoj ke ¿keyej kichiuak? ¿Mokauak maj imomaj, akin katka ammonita, kitanemililpatani? (1 Rey. 14:21.) Amo tikmatij, sayoj ke nochin itech xolal kichiujkej kemej yejua. Yejua ika, Jiova kikauak maj Sisaq, akin tekiuajtia Egipto, moaxkatiliani miak xolalmej tein pouiaj Judá, maski Rehoboam kinchijchiujka kemej taixnamikinij amo kalakiskiaj (1 Rey. 14:22-24; 2 Crón. 12:1-4).

Okachi mochiuak tein amo kuali keman Sisaq ajsik Jerusalén, kampa taixyekanaya Rehoboam. Ijkuak, tanauatijkej Semaya kimatiltij Rehoboam uan uejueyi chiuanimej tein Jiova kijtouaya: “Namejuan nanechkaujkej, yejua ika nejua no namechkauak imako Sisaq”. ¿Toni kichiuak Rehoboam keman Jiova kimelauak? Kichiuak tein kuali. Biblia kijtoua: “Uejueyi chiuanimej itech Israel uan tekiuaj moyolyemanijkej uan kijtojkej: ‘Jiova yolmelauak’”. Yejua ika, Jiova kimakixtij Rehoboam uan amo kikauak maj kiixpolouanij Jerusalén (2 Crón. 12:5-7, 12).

Satepan, Rehoboam kisentokakok taixyekanak itech ome uejueyi kalyetouanij. Achto ke momikiliskia, kinmakak miak netetayokolilmej ikoneuan, xa porin amo kinekia maj kiixnamikinij ininikniuj, Abías, akin mochiuaskia tekiuaj (2 Crón. 11:21-23). Ijkon, kinextij okachi tamatilis ke achto.

Maski Rehoboam kichiuak seki taman tein kuali, amo kipiak itatiochiualis Dios. Biblia kijtoua: “Kichiuak tein amo kuali”. ¿Keyej ijkon kijtoua? Porin amo kitemoj Jiova ika nochi iyolo (2 Crón. 12:14).

¿Toni techmachtia tein kichiuak Rehoboam? Maski kemansa kitakamatik Dios uan kichiuak seki taman tein ika kipaleuij ixolal Jiova, amo keman kuali mouikak iuan nion yekmelauj kinekik kiyolpaktis. Yejua ika, kichiuak tein amo kuali uan kinueyichiuak tiotsitsin. ¿Kiselij Rehoboam  itamelaualis Jiova porin yekmelauj moyolnonotska uan kinekia kiyolpaktis, oso porin oksekin kiluijkej maj ijkon kichiua? (2 Crón. 11:3, 4; 12:6.) Satepan, Rehoboam oksepa kichiuak tein amo kuali. ¡Amo katka kemej iueyitat, tekiuaj David! Melauak ke David ueyi tajtakoj, sayoj ke nochipa kitasojtak Jiova, kipaleuij taueyichiualis tein melauak uan yekmelauj moyolnonotsak (1 Rey. 14:8; Sal. 51:1, 17; 63:1).

Ineskayo Rehoboam techmachtia se taman tein motelneki. Komo tiknekij tikpiaskej itatiochiualis Dios, amo sayoj moneki tikintekipanoskej tochankauan oso tikinpaleuiskej oksekin, ta okachi moneki maj tikueyichiuakan kemej kiyolpaktia uan maj kuali timouikakan iuan.

Uelis tikchiuaskej nejon komo timochikauaj nochipa tiktasojtaskej Jiova. Ijkon kemej tit moneki tiktaliliskej okachi kouit uan ijkon amo seuis, tiksentokaskej tiktasojtaskej Jiova komo mojmostaj timomachtiaj iTajtol, itech titanemiliaj uan nochipa tikchiuaj netataujtil (Sal. 1:2; Rom. 12:12). Nejon netasojtalis techolinis maj sayoj tikchiuakan tein kiyolpaktia. Uan komo titajtakouaj, kichiuas maj yekmelauj timoyolnonotsakan. Ijkon amo tiyeskij kemej Rehoboam, ta nochipa tiktakamatiskej Jiova (Jud. 20, 21).