1, 2. ¿Toni semi tikuelitaj ika titajtoskej tiitaixpantijkauan Jiova?

NOCHIN taltikpakneminij moneki kimatiskej ke sayoj Jiova kinamiki taixyekanas uan tejuan tiknekij maj ejko tonal keman mochipauas itokay. Tiitaixpantijkauan Jiova semi tikuelitaj ika titajtoskej nejin ome taman tein semi mouikaj.

² Tinochin timomachtianij ke moneki maj mochipaua itokay Dios uan maj monexti ke yejuatsin okachi kuali taixyekana. Nejin ome taman semi monekij.

3. ¿Toni techmatiltia itokay Jiova?

³ Jiova yejua Ueyi Taixyekankej itech iluikak uan taltikpak. Tein melauj, itokay techmatiltia nochi tein yejuatsin kichiua uan kemej tanemilia, hasta kemej taixyekana. Nejin kijtosneki ke itokay senkis techmatiltia keniuj taixyekana yejuatsin. Yejua ika, tein okachi moneki yejua maj mochipaua itokay Dios uan maj monexti ke yejuatsin okachi kuali taixyekana (xikonita recuadro “ Tein no moneki monextis keman mochipauas itokay Dios”).

4. 1) ¿Toni kijtoua Salmo 135:13 ika itokay Dios? 2) ¿Toni netajtanilmej tiknankiliskej itech nejin tamachtilis?

⁴ Amo moajsi okse tokayit kemej itokay Jiova (xikonixtajtolti Salmo 135:13). ¿Keyej itokay semi kipia ipatiuj? ¿Keniuj yekinika kitakajkayauilijkej? ¿Keniuj Dios kichipaua itokay? ¿Keniuj uelis titapaleuiskej maj mochipaua? Itech nejin tamachtilis tiknankiliskej nejin netajtanilmej.

5. Keman ika titajtouaj maj mochipaua itokay Dios, ¿toni xa timotajtaniskej?

⁵ Jesús kijtoj ke se taman tein okachi moneki tiktajtaniskej Dios itech tonetataujtiluan yejua nejin: “Maj mochipaua motokay” (Mat. 6:9, TNM). ¿Toni kijtosneki nejin? Se kichipauas teisa kijtosneki se kichiuas maj yektik. Sayoj ke xa timotajtaniskej: “¿Kijtosneki ke itokay Jiova amo yektik oso chipauak? ¿Keyej moneki maj mochipaua?”. Uelis tiknankiliskej nejin netajtanilmej komo itech titanemiliaj nochi tein techmatiltia se tokayit.

6. ¿Keyej semi kipia ipatiuj se tokayit?

⁶ Se tokayit amo sayoj se tajtol tein se kijtoua oso se kijkuiloua. Biblia kijtoua: “Okachi kuali maj kuali toka tajtokan ke tikpiaskej miak tomin” (Prov. 22:1; Ecl. 7:1). ¿Keyej semi kipia ipatiuj se tokayit? Porin no kinextia keniuj oksekin kiitaj taltikpaknenkej akin kipia nejon tokayit. Yejua ika, amo okachi tayekantok keniuj moijkuiloua oso moijtoua se tokayit, ta tein kinemiliaj oksekin keman kiitaj oso kikakij.

7. ¿Keniuj kipitsotilianij itokay Dios?

⁷ Keman taltikpakneminij kitakajkayauiliaj Jiova, kichiuaj maj oksekin kinemilikan ke yejuatsin kichiua tein amo kuali uan ijkon kipitsotiliaj itokay. Yekinika kitakajkayauilijkej uan kipitsotilijkej itokay itech xochital Edén. Maj tikitakan toni uelis techmachtis tein panok.

8. 1) ¿Toni kimatiaj Adán uan Eva? 2) ¿Toni xa uelis timotajtaniskej?

⁸ Adán uan Eva kimatiaj ke Dios monotsa Jiova, uan no kimatiaj okseki taman tein semi moneki. Kemej neskayot, kimatiaj ke yejuatsin kichijchiuak nochi tein onkak, ke kinmakaka ininnemilis, se kualtsin xochital kampa nemiaj uan ininnamik akin amo tajtakolej katka (Gén. 1:26-28; 2:18). Sayoj ke, ¿kisentokaskiaj tanemiliskiaj itech nochi tein Jiova kinmakaka? ¿Kitemoskiaj okachi kitasojtaskej uan iuan motasojkamatiskej? Nejin netajtanilmej monankilijkej keman akin kitauelita Dios kitemoj maj kichiuakan tein amo kuali.

9. Kemej kijtoua Génesis 2:16, 17 uan 3:1-5, ¿toni kiniluij Jiova Adán uan Eva, uan keniuj Satanás kitakajkayauilij Dios?

⁹ (Xikonixtajtolti Génesis 2:16, 17; 3:1-5.) Satanás kichiuak maj se kouat kitajtaniani  Eva: “¿Yekmelauj namechiluij Dios amo xikuakan itakilo nochi koujmej tein onkak itech xochital?”. Ika nejin netajtanil Satanás kitakajkayauilij Dios, porin yejuatsin kiniluijka ke ueliskia kikuaskej itakilo nochi koujmej, sayoj se amo. Itech xochital onkaya tataman koujtakilomej tein Adán uan Eva ueliskia kikuaskej (Gén. 2:9). Senkis moita ke Jiova kinmakaka miak taman. Sayoj ke kiniluij ke onkaya se koujtakilot tein amo monekia kikuaskej. Yejua ika, ika inetajtanil, Satanás kiteajsikamatiltij ke Jiova amo kiuelita kitemakas tein kipia. Eva xa motajtaniaya ox Dios amo kinekia kimakas se taman tein kuali.

10. ¿Keniuj Satanás kitakajkayauilij Dios, uan toni panok?

¹⁰ Ijkuak, Eva kisentokaya kiitaya Jiova kemej iTaixyekankauj. Yejua ika kiluij Satanás tajtolmej tein Dios ika kinnauatijka maj amo kikuanij koujtakilot. Uan hasta no kiluij ke nion monekia kimatokaskej kouit. Kimatia ke Dios kiniluijka ke komo amo kitakamatiaj, momikiliskiaj. Ompa, Satanás senkis kiluij: “Amo nanmikiskej” (Gén. 3:2-4). Ika nejon tajtolmej senkis kitakajkayauilij itokay Dios, porin tein melauj kiluijtoya Eva ke Jiova kinkajkayaujka. Ijkon Satanás mochiuak diablo oso tetakajkayauilijkej. Satanás senkis kikajkayauak Eva uan yejua kineltokilij (1 Tim. 2:14). Eva okachi kineltokak tein kiluij Satanás uan amo tein kijtojka Jiova, uan nejon kichiuak maj kiixpejpenani tein amo kuali: amo kitakamatik Dios uan kikuaj koujtakilot tein kinnauatijka maj amo kikuanij. Ompa, no kimakak Adán (Gén. 3:6).

11. ¿Toni monekia maj kichiuanij Adán uan Eva?

¹¹ Maj tiknemilikan tein Eva monekia kinankilis Satanás. Yejua ueliskia kiluis: “Tejua amo nimitsixmati, sayoj ke noTajtsin, Jiova, kemaj nikixmati. Niktasojta uan iuan nitakuaujtamati. Yejuatsin techmakani nochi tein tikpiaj. ¿Keyej tikijtouilia tein amo melauak? ¡Xiyouj!”. Jiova semi yolpakiskia komo Eva, akin katka ikonetsin, kinextiliskia ke kitasojtaya uan ke kitakamatia ika seki tajtolmej kemej nejon (Prov. 27:11). Sayoj ke Adán uan Eva amo senkis kitasojtayaj Jiova. Yejua ika amo kitajtouijkej itokay ininTajtsin.

12. ¿Toni kitemoj Satanás maj Eva motajtaniani, uan toni amo kichiujkej Adán uan Eva?

¹² Kemej tikitakejya, Satanás peuak kitakajkayauilia Jiova keman kitemoj maj Eva motajtaniani ox Jiova katka se kuali tePopaj. Satepan, Adán uan Eva amo kitajtouijkej itokay Jiova. Nejon kichiuak maj kineltokanij tein Satanás kijtoj uan maj kiixnamikinij ininTajtsin. Itech nejin tonalmej, Satanás kisentoka ijkon kichiua. Kitakajkayauilia Dios uan kichiua maj taltikpakneminij akin kineltokaj itakajkayaualis amo mokauakan maj Jiova kinixyekana.

13. ¿Keniuj kinextia Ezequiel 36:23 tein ika tajtoua nochi Biblia?

¹³ ¿Kikauak Jiova maj kitakajkayauilianij uan amo teyi kichiuak? Amo. Biblia kijtoua tein Jiova kichiuani uan ijkon kinextis ke tein Satanás kijtoj itech xochital Edén se takajkayaualis (Gén. 3:15). Tein melauj, nochi Biblia ika tajtoua nejin: Jiova kichipaua itokay ika Tekiuajyot tein moajsi imako iKonetsin uan kichiua maj oksepa onka yolseuilis uan melaujkayot itech taltikpak. Biblia kipia tamachtilis tein techpaleuia maj tikajsikamatikan keniuj Jiova kichipaua itokay (xikonixtajtolti Ezequiel 36:23).

14. ¿Keniuj tein Jiova kichiuak keman kiixnamikkej tapaleuiani maj mochipaua itokay?

¹⁴ Satanás kitemouani ika miak taman maj Jiova amo kichiua tein kiixtalijtok, sayoj ke amo uelini. Biblia kijtoua tein Jiova kichiuani uan kinextia ke se tePopaj akin yekmelauj tetasojta uan ke okachi kuali Taixyekankej. Jiova semi kiyolkokouani maj Satanás uan nochin akin kitojtokaj kiixnamikikan (Sal. 78:40). Sayoj ke yejuatsin kitemouani maj moyektali nejin ika tamatilis, melaujkayot uan amo yolijsiui. No kinextiani iueyi chikaualis ika miak taman. Uan tein okachi moneki, kinextia inetasojtalis itech nochi tein kichiua (1 Juan 4:8). Jiova kisentokani kitemouani maj mochipaua itokay.

15. ¿Keniuj Satanás kisentoka kitakajkayauilia Dios itech nejin tonalmej, uan toni panouani?

¹⁵ Itech nejin tonalmej, Satanás kisentoka kitakajkayauilia itokay Jiova. Kitemoua maj taltikpakneminij kinemilikan ke Dios amo kipia chikaualis, amo kichiua tein melauak, amo kipia tamatilis uan ke amo tetasojta. Kemej neskayot, kitemoua maj kinemilikan ke Jiova amo toTachijchiujkauj. Uan komo kineltokaj ke Dios nemi, kichiua maj kinemilikan ke itanauatiluan amo melaujkej uan ke amo tekauaj maj se kichiua tein se kineki. Hasta kinmachtia ke Jiova se Dios tetajyouiltijkej akin nochipaya kinchichinojtok akin momikilijkejya. Akin kineltokaj nejon  takajkayaualis xa okachi kiixnamikij itaixyekanalis Jiova. Kemej Jiova ayamo kiixpoloua Satanás, yejua kisentokas kitakajkayauilijtos uan no kitemos xikonkaua Jiova. ¿Uelis kichiuas nejon?

16. ¿Toni uelis tikchiuaskej tejuan tein amo kichiujkej Adán uan Eva?

¹⁶ Jiova techkaua maj titapaleuikan maj mochipaua itokay maski titajtakolejkej. Yejua ika, tinochin uelis tikchiuaskej tein Adán uan Eva amo kichiujkej. Maski axkan miakej kiuijuikaltiaj uan kitakajkayauiliaj itokay Jiova, tejuan ueli tiktajtouiaj uan tikiniluiaj taltikpakneminij ke Jiova yektik, ke kichiua tein melauak uan tein kuali uan ke tetasojta (Is. 29:23). Uelis tiknextiskej ke tiknekij maj yejuatsin techixyekana uan tikinmatiltiskej taltikpakneminij ke sayoj iTekiuajyo kichiuas tein melauak uan kichiuas maj onka yolseuilis uan yolpakilis itech nochi taltikpak (Sal. 37:9, 37; 146:5, 6, 10).

17. ¿Keniuj kiteixmatiltij Jesús itokay iTajtsin?

¹⁷ Keman tiktajtouiaj itokay Jiova, tikchiuaj kemej Jesucristo (Juan 17:26). Jesús kiteixmatiltij itokay iTajtsin amo sayoj keman kikuik, ta no keman tamachtij keniuj yekmelauj tanemilia uan toni kichiua. Kemej neskayot, keman fariseos kichiujkej maj taltikpakneminij kiitanij Jiova kemej se Dios akin kintajtaniaya miak taman, akin amo kipataya tein kiixtaliaya uan akin tetajyouiltiaya, Jesús kinpaleuij maj kiitanij ke iTajtsin teajsikamati, amo yolijsiui, tetasojta uan teiknelia. Jesús nochipa kinextij ikualneskayouan iTajtsin uan ijkon no kinpaleuij taltikpakneminij maj kiixmatinij Jiova (Juan 14:9).

18. ¿Keniuj uelis tiknextiskej ke amo melauak tein kijtouiliaj Jiova akin kitauelitaj?

¹⁸ Ijkon kemej Jesús, uelis tikinpaleuiskej oksekin maj kiixmatikan Jiova uan tikintapouiskej ke yejuatsin semi tetasojta uan kualtakat. Ijkon tiknextiaj ke amo melauak tein kijtouiliaj akin kitauelitaj. Titapaleuiaj maj mochipaua itokay uan maj taltikpakneminij kiitakan ke itokay yektik. Uan maski titajtakolejkej, uelis tikchiuaskej kemej Jiova (Efes. 5:1, 2). Keman tein tikijtouaj uan tein tikchiuaj kinnextilia taltikpakneminij keniuj  yekmelauj tanemilia Jiova uan toni kichiua, titapaleuijtokej maj mochipaua itokay. Titapaleuiaj maj kuali ika motajto keman tikinpaleuiaj taltikpakneminij maj kiixmatikan tein melauak. No titapaleuiaj maj mochipaua itokay keman nochipa tiktakamatij maski titajtakolejkej (Job 27:5).

19. Ijkon kemej kijtoua Isaías 63:7, ¿toni moneki okachi tiktemoskej keman titamachtiskej ika Biblia?

¹⁹ Moajsi okse taman tein uelis ika titapaleuiskej maj mochipaua itokay Jiova. Keman titamachtiaj ika Biblia, miakpa ika titajtouaj ke sayoj Jiova kinamiki taixyekanas. Uan melauak ke kinamiki taixyekanas itech iluikak uan taltikpak. Sayoj ke, maski moneki tikinmachtiskej taltikpakneminij katiyejua itanauatiluan Dios, okachi moneki tiktemoskej tikinpaleuiskej maj kitasojtakan uan maj amo keman kikauakan toTajtsin. Yejua ika, moneki okachi ika titajtoskej ikualneskayouan, keniuj tanemilia uan toni kichiua, ijkon kemej techmatiltia itokay (xikonixtajtolti Isaías 63:7). Komo tikchiuaj nejin, taltikpakneminij kitasojtaskej Jiova uan kitakamatiskej porin kinekiskej kitekitiliskej nochipaya.

20. ¿Toni netajtanil tiknankiliskej itech okse tamachtilis?

²⁰ ¿Keniuj ika tein tikchiuaj uan kemej titamachtiaj uelis titapaleuiskej maj taltikpakneminij kuali ika tajtokan itokay Jiova uan maj motokikan iuan? Itech okse tamachtilis tiknankiliskej nejin netajtanil.