Itech nejin tajkuilolmej ika motajtoua nejin chiknaui kualneskayomej: “Itakilo espíritu yejua netasojtalis, yolpakilis, yolseuilis, amo se yolijsiuis, kualtakayot, yolkualtakayot, takuaujtamatilis, yolnejmachkayot, se motsakuilis” (Gál. 5:22, 23, TNM). Sayoj ke iespíritu Dios amo sayoj nejin kualneskayomej uelis techpaleuis maj tiknextikan.

Maj tikitakan tein tatitanil Pablo kijkuiloj itech seki tajkuilolmej tein achto moajsij: “Totanejnekilis ten kuika tajtakol, yejua nojon kichiualtia ma onka nijin tajtakolme: nekes [...] ten tasiuapapata oso tagapapata, uan se kichiutinemi ten amo chipauak, uan se eliuistitinemi tech in pitsotik nemilis. Uan [...] kuak se kimouistilijtinemis ne tatadiosme, uan kuak se monaualuijtinemi, uan kuak se tetauelitstinemi, uan kuak se tetajtolteuijtinemi, uan kuak se tanejxikolijtinemi, uan kuak se tekualanuijtinemi [...], uan kuak se tekualankaxejxelojtinemi, uan no kuak se tetauelxejxelojtinemi. Uan no se motajtakolmaka kuak se tensa moaxkatilisneki, [...] uan kuak se mouintitinemis, uan kuak se eliuis tatakuajtinemis, uan kuak se kichiutinemis miak tataman tajtakol de nochi ten kinejneuilia nochi nijin” (Gál. 5:19-21). Tajtolmej “nochi ten kinejneuilia nochi nijin” kinextia ke Pablo ueliskia ika tajtos okseki taman tein moajsi itech “totanejnekilis ten kuika tajtakol”, kemej tein ika tajtoj itech Colosenses 3:5. No ijkon panoua ika kualneskayomej tein ika tajtoj itech Gálatas 5:22, 23. Itech nejin tajkuilolmej, Pablo amo ika tajtoj nochi kualneskayomej tein yektikatsin espíritu uelis techpaleuis maj tikpiakan.

Tikajsikamatij nejin keman tikitaj kualneskayomej tein Pablo ika tajtoj itech Gálatas uan tein kinijkuilouilij tokniuan akin nemiaj Éfeso: “Itakilo tanex kipia nochi taman yolkualtakayot, melaujkayot uan chipaujkanemilis” (Efes. 5:8, 9, TNM). Kemej tikitaj, yolkualtakayot, melaujkayot uan chipaujkanemilis moajsij itech “itakilo tanex”, sayoj ke yolkualtakayot no moajsi itech kualneskayomej tein kipia “itakilo espíritu”. Nejin kinextia ke maski Pablo amo ika tajtoj melaujkayot uan chipaujkanemilis itech Gálatas 5:22, 23, ueliskia no ika tajtos.

No ijkon, Pablo kiyolchikauak Timoteo maj kinextiani chikuasen kualneskayomej: “Xiktemo tein kuali, xiktekitili Dios ika nochi moyolo, xiktemo takuaujtamatilis, netasojtalis, taxikolis uan yolnejmachkayot” (1 Tim. 6:11, TNM). Sayoj takuaujtamatilis, netasojtalis uan yolnejmachkayot ixnesij itech kualneskayomej tein kipia “itakilo espíritu”. Sayoj ke yektikatsin espíritu no monekiskia kipaleuis Timoteo maj kinexti okseki kualneskayomej tein kiluij Pablo. Yejua kiluij maj kitemo tein kuali, maj taxiko uan maj kitekitili Dios ika nochi iyolo (no xikonita Colosenses 3:12; 2 Pedro 1:5-7).

Nejin kinextia ke Gálatas 5:22, 23 amo ika tajtoua nochi kualneskayomej tein akin tikchiuaj kemej Cristo moneki tikpiaskej ika inepaleuil yektikatsin espíritu. Iespíritu Dios uelis techpaleuis maj tiknextikan chiknaui kualneskayomej tein kipia “itakilo espíritu”. Sayoj ke onkak okseki kualneskayomej tein moneki tikpiaskej uan ijkon uelis nochipa tikchiuaskej tein Jiova kiyolpaktia uan tikpiaskej “yankuikatalnamikilis ten Dios kitalij [...]. Porin ne yankuik talnamikilis kinejneuilia Dios iyolchipaualis” (Efes. 4:24).