1. ¿Keniuj momachilia Jiova keman se itekitikauj akin mouejkatilijka mokepa?

KEMEJ timomachtijkej achto, Jiova kijtoua ke yejuatsin kemej yeskia se kuali ichkatajpixkej akin kinyekpia iichkauan ika netasojtalis uan kitemoua tein poliuik. Se tonal, kiniluij israelitas akin mouejkatilijkaj: “Ximokepakan nouan, uan nejua nimokepas namouan”. Uan tikmatij ke itech nejin tonalmej kisentoka ijkon tanemilia, porin yejuatsin kijtoua: “Amo nimopata” (Mal. 3:6, 7). Uan no, Jesús kijtoj ke Jiova uan ángeles semi yolpakij keman se itekitikauj akin mouejkatilijka mokepa (Luc. 15:10, 32).

2. ¿Toni ika titajtoskej itech nejin tamachtilis?

² Itech nejin tamachtilis, tikitaskej eyi neskayomej tein Jesús ika tajtoj tein kinextiaj keniuj uelis tikinpaleuiskej akin mouejkatilijkej iuan Jiova. Tikitaskej toni kualneskayomej moneki tiknextiskej uan ijkon uelis tikinpaleuiskej maj mokepakan iuan uan keyej amo nenkaj komo timochikauaj tikinpaleuiskej.

3, 4. ¿Keyej siuat akin ika motajtoua itech Lucas 15:8-10 semi kitemoj platajtomin tein kipolojka?

³ Moneki semi tikintemoskej akin kinekij mokepaskej iuan Jiova. Itech amatajkuilol Lucas, Jesús kijtoj se neskayot kampa ika tajtoj se siuat akin kitemoua se platajtomin tein semi kipia ipatiuj. Tein okachi kinextij itech nejin neskayot yejua ke siuat semi kitemoj platajtomin (xikonixtajtolti Lucas 15:8-10).

⁴ Nesi ke itech itonaluan Jesús, tonal keman monamiktiayaj seki siuamej judías, ininmomaj kintayokoliaya majtakti platajtomin. Siuat akin ika tajtoj Jesús xa kipolojka semej nejon  platajtomin. Kemej kinemilia ke uetsik talpan, kixotaltia se tauil ika aceite uan kitemoua. Sayoj ke amo kiajsi, xa porin tauil amo semi tatanextia. Yejua ika, yolik peua tachpana. Uan satepan kiita se teisa tein milini: ¡yejua platajtomin! Jesús kijtoj ke nejon siuat semi yolseui uan yolpaki uan yejua ika kinnotsa siuamej akin kuali iniuan mouika uan akin ompakauin nemij uan kiniluia ke kiajsik iplatajtomin.

5. ¿Keyej moneki semi tikintemoskej akin amo tanojnotsajok nion monechikouajok?

⁵ Neskayot tein ika tajtoj Jesús techmachtia ke keman tikpolouaj teisa, moneki semi tiktemoskej komo tiknekij tikajsiskej. No ijkon moneki tikintemoskej akin amo tanojnotsajok nion monechikouajok. Xa miak xiujmejya amo monechikouajok. Xa oksekoya nemij, kampa tokniuan amo kinixmatij. Sayoj ke axkan, sekin xa kinekij mokepaskej iuan Jiova. Kinekij oksepa kitekitiliskej iniuan tokniuan, sayoj ke moneki maj tikinpaleuikan.

6. ¿Keniuj nochin tokniuan uelis kintemoskej akin amo tanojnotsajok nion monechikouajok?

⁶ ¿Akonimej uelis kintemoskej akin amo tanojnotsajok nion monechikouajok? Nochin tokniuan, kemej ininchankauan, tayekananij, precursores uan tanojnotsanij. ¿Tikpiaj se tochankauj oso se akin kuali iuan timouikaj akin amo tanojnotsaok nion monechikouaok? ¿Tikajsikej se itech tanojnotsalis kampa miakej panouaj oso kajkalpan? Xikonilui tokniuj ke komo kiuelitaskia maj kikalpanokan, tejuatsin uelis tikoniluis tayekananij kani nemi uan katiyejua itapoual.

7. ¿Toni mitsonmachtia tein kichiua se tokniuj tayekankej akin monotsa Thomas?

⁷ ¿Toni moneki kichiuaskej tayekananij uan ijkon uelis kinajsiskej akin kinekij mokepaskej iuan Jiova? Maj tikitakan tein kijtoj Thomas, * se tokniuj tayekankej akin kayot España. Yejua kinpaleuiani maj mokepakan itech nechikol panoua cuarenta tokniuan. Kijtoua: “Yekinika, nikintajtania miakej tokniuan ox kimatij kani nemij axkan akin amo tanojnotsajok nion monechikouajok. Oso nikintajtania tokniuan tanojnotsanij xa kielnamikij se tokniuj akin amo monechikouaok. Miakej yolpakij tapaleuiskej keman tikintemouaj. Satepan, keman nikalpanoua se tokniuj takat oso siuat akin amo tanojnotsaok nion monechikouaok ininka nitajtani ikoneuan oso ichankauan. Sekin kinuikayaj ininkoneuan nechikolmej, uan xa no katkaj tanojnotsanij. Yejuan no uelis se kinpaleuis maj mokepakan iuan Jiova”.

8. Kemej kijtoua Lucas 15:17-24, ¿keniuj kiselij tepopaj ikonetsin akin moyolnonotsak?

⁸ ¿Katiyejua kualneskayomej moneki tiknextiskej komo tiknekij tikinpaleuiskej akin kinekij mokepaskej iuan Jiova? Maj tikitakan toni techmachtia neskayot kampa Jesús ika tajtoj telpoch akin kisak ichan (xikonixtajtolti Lucas 15:17-24). Jesús kijtoua ke satepan telpoch yektanemilia uan mokepa ikalijtik. Ipopaj motaloua kiajsiti uan kinaua uan ijkon kinextilia ke kisentoka kitasojta. Telpoch amo kuali momachilia uan kinemilia ke amo kinamikiok maj kiita kemej ikoneuj. Tepopaj kiiknelia ikoneuj keman kitapouia keniuj momachilia uan keman kiita ke moyolnonotsakya oso moyolnemilijya. Yejua ika kichiua se ueyi takualis uan tanauatia maj kimakakan tilmaj tein okachi kuali. Ijkon kinextilia ke amo kiselia kemej semej itakeualuan, ta kemej ikonetsin akin semi kitasojta.

9. ¿Katiyejua kualneskayomej moneki tikpiaskej uan ijkon uelis tikinpaleuiskej akin mouejkatilijkej iuan Jiova? (Xikonita recuadro “ Keniuj uelis tikinpaleuiskej akin kinekij mokepaskej”.)

 ⁹ Jiova kemej yeskia tepopaj akin ika motajtoua itech nejin neskayot. Kintasojta tokniuan akin amo tanojnotsajok nion monechikouajok uan kineki maj mokepakan iuan. Komo tikchiuaj kemej yejuatsin, uelis tikinpaleuiskej maj mokepakan. Yejua ika, moneki amo tiyolijsiuiskej, tikinajsikamatiskej uan tiknextiskej ke tikintasojtaj. ¿Keyej moneki tikpiaskej nejin kualneskayomej, uan keniuj uelis tiknextiskej?

10. ¿Keyej amo moneki tiyolijsiuiskej keman tikinpaleuiskej akin amo tanojnotsajok nion monechikouajok?

¹⁰ Moneki amo tiyolijsiuiskej porin tokniuj xa amo niman mokepas iuan Jiova. Miakej tokniuan akin amo tanojnotsayajok nion monechikouayajok kijtouaj ke tayekananij uan okseki tokniuan monekik miakpa kinkalpanoskej achto ke mokepaskiaj iuan Jiova. Se tokniuj akin monotsa Nancy, akin kayot Asia, kijkuiloj: “Se akin kuali iuan nimouikaya itech nechikol semi nechpaleuij. Semi nechtasojtaya kemej yeskia niikniuj akin tayekanaya. Nechelnamiktiaya miak taman tein kualtsin tein tikpanokaj. Keman nikiluiaya keniuj nimomachiliaya, kuali nechkakia uan nechyolmajxitiaya. Kinextij ke yekmelauj katka notasojikniuj uan nochipa nechpaleuij keman monekik”.

11. ¿Keyej moneki tikinajsikamatiskej akin moyolkokojtokej uan ijkon uelis tikinpaleuiskej?

¹¹ Keman tikinajsikamatij akin moyolkokojtokej kemej yeskia tikintaliliaj se pomada tein kinpaleuia maj kuali momachilikan. Seki tokniuan mouejkatilijkej porin se tokniuj kinyolkokoj, uan uejkaujya kualantokej. Yejua ika  amo kinekij mokepaskej iuan Jiova. Oksekin xa kinemiliaj ke amo kuali tein kinchiuilijkej. Xa moneki maj se kinkaki uan maj se kinajsikamati (Sant. 1:19). María, se tokniuj akin amo tanojnotsayaok nion monechikouayaok, kijtoua: “Monekia nikpias akoni iuan nitajtos, akoni nechyolseuis, nechyolmajxitis uan nechpaleuis”.

12. ¿Keniuj inetasojtalis Jiova kemej yeskia se mekat oso lazo?

¹² Biblia kijtoua ke netasojtalis tein Jiova kinpialia itekitikauan kemej yeskia se mekat oso lazo. ¿Keniuj? Maj tikitakan se neskayot. Xikonnemili ke tionatojtolojtok uan se taltikpaknenkej akin moajsi atentenoj mitsontamotilia se mekat. Xa semi tikontasojkamatilia porin nejon mitsonpaleuis maj at amo mitsonuika. Sayoj ke no moneki kichiuas okse taman. Kemej at ijsiujka motalojtok, monekis maj kitilana mekat uan maj mitsonpaleui xionajsi atentenoj. Jiova kijtoj toni kichiujka ininka israelitas akin mouejkatilijkaj: “Nikuik netasojtalis kemej yeskia se mekat tein ika niktemoj maj nouan motokikan” (Os. 11:4). Yejua nejon kineki kichiuas Dios iniuan akin amo tanojnotsajok nion monechikouajok uan kipiaj miak kuejmolmej uan miak taman kintekipachoua. Kineki maj kimatikan ke kintasojta uan kineki kinpaleuis maj mokepakan. Uan yejuatsin uelis kichiuas maj tikinpaleuikan maj kimachilikan nejon netasojtalis.

13. Xikonijto se neskayot tein kinextia keniuj tapaleuia netasojtalis.

¹³ Semi moneki maj tikinmatiltikan akin amo tanojnotsajok nion monechikouajok ke Jiova uan tejuan tikintasojtaj. Pablo, akin ika titajtojkej itech tamachtilis tein achto tikitakej, panoua treinta xiujmej amo tanojnotsak  nion monechikoj. Yejua kijtoua: “Se tonal, keman nikistiyaya nochan kualkampa, se tokniuj siuat akin xiuejya nechtajpaloj uan nechnojnotsak ika miak netasojtalis. Peuak nichoka kemej se konetsin. Nikiluij ke kemej yeskia Jiova kititanka maj nouan tajtoti. Ijkuak nikixtalij nimokepas iuan Jiova”.

14. Kemej kijtoua Lucas 15:4, 5, ¿toni kichiua ichkatajpixkej keman kiajsi ichkatsin tein poliujka?

¹⁴ Keman mokepaj akin amo tanojnotsayajok nion monechikouayajok, moneki tiksentokaskej tikinpaleuiskej uan tikinyolchikauaskej. Xa semi tajyouijtokej, kemej telpoch akin ika tajtoj Jesús. Uan kemej moajsiaj kampa Satanás taixyekana, xa amo chikauak ininkuali uikalis iuan Jiova. Yejua ika, moneki tikinpaleuiskej maj mochikaua inintakuaujtamatilis. Itech neskayot kampa Jesús ika tajtoj ichkatsin tein poliuik, ichkatajpixkej kitalij ikechko uan kiuikak iniuan okseki ichkamej. Ichkatajpixkej miak tonalmej kitemojtinemik uan mosioujtij. Sayoj ke kimatia ke monekia kipaleuis porin ichkatsin amo ueliskia mokepas iselti porin amo kipiaya chikaualis (xikonixtajtolti Lucas 15:4, 5).

15. ¿Keniuj uelis tikinpaleuiskej akin mouejkatilijkej iuan Jiova uan kinekij mokepaskej? (Xikonita recuadro “ Se nepaleuil tein semi kipia ipatiuj”.)

¹⁵ Xa monekis tikuiskej miak tonalmej uan chikaualis keman tikinpaleuiskej akin amo tanojnotsajok nion monechikouajok maj oksepa kuali mouikakan iuan Jiova (Rom. 15:1). Yejua ika Jiova techpaleuia ika iespíritu, iTajtol uan amaixmej tein tikseliaj itech inechikol. ¿Keniuj uelis tikinpaleuiskej? Se tokniuj akin uejkaujya tayekankej kijtoua: “Keman miakej akin amo tanojnotsajok nion monechikouajok  kiixtaliaj mokepaskej, moneki maj se tokniuj kinpaleui maj momachtikan Biblia”. * Yejua ika, komo tayekananij techiluiaj maj tikpaleuikan semej nejon tokniuan, maj tikchiuakan ika pakilis. Nejon tokniuj tayekankej no kijtoua: “Tokniuj akin kinmachtia akin amo tanojnotsayajok nion monechikouayajok moneki kichiuas maj kimachilikan ke se kuali inintasojikniuj, se akin uelis iuan takuaujtamatiskej”.

16. ¿Keniuj tikmatij ke ángeles techpaleuiaj?

¹⁶ Tein kinpanouani miakej kinextia ke ángeles techpaleuiaj maj tikinajsikan akin amo tanojnotsajok nion monechikouajok uan kinekij mokepaskej iuan Jiova (Apoc. 14:6). Kemej neskayot, Silvio, akin kayot Ecuador, kitataujtij Jiova maj kipaleuiani maj mokepa itech nechikol. Keman kitataujtijtoyaok, tanotskej ichan. Katkaj ome tokniuan tayekananij. Uan ijkuak peuak kimakaj nepaleuil tein monekia kiselis.

17. ¿Toni tatiochiualis tikseliaj keman tikinpaleuiaj akin mouejkatilijkej iuan Jiova?

¹⁷ Tikinpaleuiskej maj mokepakan iuan Jiova akin mouejkatilijkej semi techyolpaktis. Maj tikitakan tein kijtoua Salvador, se precursor akin semi mochikaua kinpaleuis akin amo tanojnotsajok nion monechikouajok: “Kemansa ouij nechkisa amo nichokas porin semi niyolpaki. Nechyolpaktia niknemilis ke Jiova kimakixtij itech taltikpak kampa Satanás taixyekana semej iichkauan akin semi kitasojta uan ke nikpiak tatiochiualis nikpaleuis” (Hech. 20:35).

18. Komo tejuatsin tionmouejkatilij iuan Jiova, ¿toni uelis tikonneltokas?

¹⁸ Komo tejuatsin amo tiontanojnotsaok nion tionmonechikouaok, uelis tikonneltokas ke Dios kisentoka mitsontasojta uan kineki xionmokepa. Melauak ke monekis tikonchiuas seki taman. Sayoj ke xikonelnamiki tepopaj akin Jesús ika tajtoj. Jiova kichixtok xionmokepa iniuan ichankauan, uan kuali mitsonselis.