1. ¿Toni kijtoj tekiuaj Salomón itech Eclesiastés 7:20?

 TEKIUAJ Salomón kijtoj: “Amo onkak nion se takat yolmelauak nikan taltikpak akin nochipa kichiua tein kuali uan amo keman tajtakoua” (Ecl. 7:20). Nejon semi melauak porin tinochin titajtakolejkej (1 Juan 1:8). Yejua ika, moneki maj Dios uan oksekin techtapojpoluikan.

2. ¿Keniuj timomachiliaj keman techtapojpoluia aksa akin kuali iuan timouikaj?

² ¿Kemansa tikonyolxokoliani aksa akin kuali iuan tionmouika? Tinochin techpanouani nejon. Uan kemej tikonnekia tikonsentokas kuali iuan tionmouikas, tikoniluij maj mitsontapojpolui. Xa semi tionyolpakik uan tionyolseuik keman mitsontapojpoluij.

3. ¿Toni tikitaskej itech nejin tamachtilis?

³ Tinochin tiknekij kuali timouikaskej iuan Jiova. Sayoj ke miakpa tikchiuaj oso tikijtouaj teisa tein amo kiuelita. Yejua ika, ¿keniuj tikmatij ke Jiova kineki techtapojpoluis? ¿Keyej semi taman kemej Jiova tetapojpoluia uan kemej tetapojpoluiaj taltikpakneminij? Uan ¿akonimej kintapojpoluia Dios?

4. ¿Keniuj tikmatij ke Jiova kineki techtapojpoluis?

⁴ ITajtol Dios kiyeknextia ke Jiova kineki techtapojpoluis. Kemej neskayot, itech tepet Sinaí Jiova kiluij Moisés keniuj tamati. Itechkopa se ángel kiluij: “Jiova, Jiova, se Dios teiknelijkej, amo niman kualani uan inetasojtalis tein amo tami semi ueyi uan nochipa kijtoua tein melauj, kinnextilia miakej ueyi netasojtalis tein amo tami, kitapojpoluia akin mopoloua, akin kitapanauilia tanauatil uan akin tajtakolchiua” (Éx. 34:6, 7). Jiova se Dios akin tetasojta uan teiknelia, uan nochipa kineki kintapojpoluis akin moyolnonotsaj (Neh. 9:17; Sal. 86:15).

5. Kemej kijtoua Salmo 103:13, 14, ¿toni kichiua Jiova porin kuali techixmati?

⁵ Jiova kuali techixmati porin yejuatsin techchijchiuak. Se kimoujkaita maj semi kuali kinixmati sejsemej (Sal. 139:15-17). Yejua ika, ueli kiita nochi tein amo kuali tein techpanoltilijkej totatuan. Uan no, kemej kimati tein tikpanouanij kimati keyej tikchiuaj teisa. Jiova kuali techixmati yejua ika semi techiknelia (Sal. 78:39; xikonixtajtolti Salmo 103:13, 14).

6. ¿Keniuj kinextiani Jiova ke kineki techtapojpoluis?

⁶ Jiova kinextiani ke kineki techtapojpoluis. Yejuatsin kimati ke kemej yekinika takat, Adán, tajtakoj tinochin titajtakolejkej uan timomikiliaj (Rom. 5:12). Uan amo ueliskia tikchiuaskej maj amo titajtakolejkejok nion maj timomikilikan uan amo no ueliskia tikinpaleuiskej oksekin (Sal. 49:7-9). Sayoj ke Dios techiknelij uan kichiuak teisa tein ika ueliskia techmakixtis. Juan 3:16 kijtoua ke Jiova semi techtasojta, yejua ika kiualtitanik iKonetsin maj toka momikiliki (Mat. 20:28; Rom. 5:19). Jesús toka momikilij para kinmakixtis nochin akin iuan takuaujtamatiskej (Heb. 2:9). Jiova semi tajyouij keman kiitak ke semi kitajyouiltijkej uan kipinaujtijkej iKonetsin keman kimiktijkej. Nejin kinextia ke komo Jiova amo kinekiskia techtapojpoluis, amo kikauaskia maj kimiktianij iKonetsin.

7. Xikonijto sekin akin Jiova kintapojpoluij.

 ⁷ Biblia ininka tajtoua miakej akin Jiova kintapojpoluij (Efes. 4:32). Xa tikonelnamiki tekiuaj Manasés. Yejua semi amo yolkuali katka uan semi tajtakolchiuak. Kinueyichiuak tiotsitsin uan kichiuak maj oksekin no kinueyichiuanij. No kinchichinoj ikoneuan kemej netemaktilmej para nejon tiotsitsin, uan moixeuij kikalakis se tiotsin itech itemplo Jiova tein yektik katka. Biblia kijtoua: “Kichiuak miak taman tein amo kuali iixpan Jiova porin kinekia kikualantis” (2 Crón. 33:2-7). Sayoj ke keman Manasés kinextij ke yekmelauj moyolnonotsak, Jiova kitapojpoluij uan hasta kikauak maj oksepa tekiuajti (2 Crón. 33:12, 13). Xa no tikelnamikij tein kichiuak tekiuaj David, akin kichiuak uejueyi tajtakolmej porin auilnemik uan temiktij. Sayoj ke keman kijtoj tein kichiuak uan yekmelauj moyolnonotsak, Jiova kitapojpoluij (2 Sam. 12:9, 10, 13, 14). Yejua ika, uelis tikneltokaskej ke Jiova yekmelauj kineki tetapojpoluis. Uan kemej tikitaskej, Jiova amo tetapojpoluia kemej taltikpakneminij.

8. ¿Keyej Jiova okachi kuali Tamelaujkej uan keniuj nejon tapaleuia keman tetapojpoluia?

⁸ Jiova “Tamelaujkej itech nochi taltikpak” (Gén. 18:25). Se tamelaujkej moneki kiixmatis nochi tanauatilmej. Yejuatsin toTamelaujkauj uan kuali kiixmati tanauatilmej porin yejuatsin kinixtalia (Is. 33:22). Sayoj Jiova kuali kimati toni kuali uan toni amo kuali. ¿Toni no moneki kichiuas se tamelaujkej? Achto ke kiixtalis keniuj kitatsakuiltiskej aksa, moneki kimatis nochi tein panok. Yejua ika, amo akin okachi kuali tamelaua ke Jiova.

9. ¿Toni kiita Jiova achto ke kitapojpoluis aksa?

⁹ Jiova amo tamelaua kemej kichiuaj tamelauanij nikan taltikpak. Yejuatsin kuali kimati keyej panoua teisa (Gén. 18:20, 21; Sal. 90:8). Amo tamelaua sayoj ika tein kiitaj uan kikakij taltikpakneminij. Jiova kimati ke onkak miak taman tein kiolinia aksa maj kichiua teisa, uelis yeski tein kimachtijkej, kemej moskaltij, kampa nemia oso xa kipia se kokolis tein kichiua maj amo yektanemili uan maj amo kuali momachili. Amo uelis tiktatiliskej Jiova nion teyi, yejuatsin nochi kiita (Heb. 4:13). Yejua ika, Jiova kitapojpoluia aksa porin kimati nochi tein kipanoua.

10. ¿Keyej tikijtouaj ke Jiova nochipa kiixtalia tein kuali? (Deuteronomio 32:4).

¹⁰ Jiova nochipa kiixtalia tein kuali. Yejuatsin amo techichikotasojta. Para kitapojpoluis aksa, Jiova amo kiita keniuj ixtamati, ox kipia tomin, ox miakej kiixmatij uan ox ueli kichiua miak taman (1 Sam. 16:7; Sant. 2:1-4). Amo akin uelis kichiualtis teisa Jiova nion kikajkayauas ika tomin (2 Crón. 19:7). Amo kiixtalia teisa ika tein kimachilia (Éx. 34:7). Jiova yejua akin kuali tamelaua porin kuali techajsikamati uan kimati nochi tein tikpanouaj (xikonixtajtolti Deuteronomio 32:4).

11. ¿Keyej semi taman kemej tetapojpoluia Jiova?

¹¹ Akin kijkuilojkej Escrituras Hebreas kimattoyaj ke amo akin tetapojpoluia kemej Jiova. Se amatajkuilol kijtoua ke tajtol hebreo tein kemansa  kikuikej sayoj mokui keman ika motajtoua ke Dios tetapojpoluia. Nejon amatajkuilol no kijtoua: “Amo keman mokui keman ika motajtoua keniuj motapojpoluiaj taltikpakneminij”. Sayoj Jiova ueli senkis kitapojpoluia aksa akin moyolnonotsa. ¿Keniuj timomachiliaj keman Jiova techtapojpoluia?

12, 13. 1) ¿Keniuj kipaleuia aksa keman Jiova kitapojpoluia? 2) ¿Toni kichiua Jiova keman tetapojpoluia?

¹² Keman tikneltokaj ke Jiova techtapojpoluijya tiyolseuij, nejin kijtosneki ke amo techkuejmolouaok totanemilil. Amo ijkon timomachiliaj keman aksa techtapojpoluia, ta sayoj keman Jiova kichiua (Hech. 3:19). Keman yejuatsin techtapojpoluia oksepa kuali timouikaj iuan, kemej yeskia amo keman titajtakolchiuaskiaj.

¹³ Keman Jiova kitapojpoluia aksa amo kitatsakuiltiaok nion kielnamikiliaok tein kichiuak (Is. 43:25; Jer. 31:34). Jiova kemej yeskia uejka kitalia itajtakoluan “ijkon kemej ueuejka moajsij tonalkisayampa uan tonalkalakyampa” (Sal. 103:12). * Jiova senkis tetapojpoluia uan keman itech titanemiliaj nejon, kichiua maj timotasojkamatikan uan maj tikueyichiuakan (Sal. 130:4). Sayoj ke, ¿akonimej kintapojpoluia Jiova?

14. ¿Toni timomachtijkejya kemej Jiova tetapojpoluia?

¹⁴ Keman Jiova techtapojpoluia amo kiita ox ueyi tajtakol tein tikchiujkej oso amo. Uan no, timomachtijkejya ke keman Jiova kiita ox kitapojpoluis aksa moyekana ika nochi tein kimati porin yejuatsin toTachijchiujkauj, toTamelaujkauj uan techmaka tanauatilmej. Komo ijkon, ¿toni kiita Jiova achto ke techtapojpoluis?

15. Kemej kijtoua Lucas 12:47, 48, ¿toni kiita Jiova achto ke kitapojpoluis aksa?

¹⁵ Se taman tein Jiova kiita, yejua ox akin tajtakolchiuak kimattoya ke amo kuali tein kichiujtoya. Yejua nejon  tein kijtoj Jesús itech Lucas 12:47, 48 (xikonixtajtolti). Keman aksa kiixtalia kichiuas teisa tein kimattok ke amo kuali yetok, ueyi tajtakoua. Uan nejon uelis kichiuas maj Jiova amo kitapojpolui (Mar. 3:29; Juan 9:41). Sayoj ke kemansa tikchiuaj teisa tein tikmattoyaj ke amo kuali yetoya. Komo ijkon techpanoua, ¿uelis techtapojpoluis Jiova? Kemaj, porin Jiova kiita okse taman.

16. ¿Toni kijtosneki se moyolnonotsas, uan keyej semi moneki?

¹⁶ Jiova no kiita ox akin tajtakolchiua yekmelauj moyolnonotsa. ¿Toni kijtosneki nejin? Se moyolnonotsas kijtosneki se kipatas kemej se tanemilia uan tein se kichiua. Uan no, akin moyolnonotsa semi motayokoltia porin kichiuak tein amo kuali oso porin amo kichiuak tein monekia. Amo sayoj amo kuali momachilia ika tein kichiuak, ta no porin amo kuali mouikayaok iuan Jiova uan yejua ika tajtakolchiuak. Maj tikelnamikikan ke maski Manasés uan David semi tajtakolchiujkej, Jiova kintapojpoluij porin yekmelauj moyolnonotskej (1 Rey. 14:8). Nejin techmachtia ke Jiova sayoj kintapojpoluia akin kinextiaj ke moyolnonotskejya. Amo sayoj moneki timotayokoltiskej, ta moneki tikchiuaskej teisa * porin nejon okse taman tein kiita Jiova.

17. ¿Toni kijtosneki se mopatas, uan keniuj techpaleuia nejon maj amo oksepa titajtakolchiuakan? (Isaías 55:7).

¹⁷ Jiova no kiita okse taman tein semi moneki, kiita ox akin tajtakolchiuak mopata. Nejin kijtosneki ke amo kichiuaok tein amo kuali uan peua kichiua tein yejuatsin kiyolpaktia (xikonixtajtolti Isaías 55:7). Moneki kipatas kemej tanemilia uan mochikauas tanemilis kemej Jiova (Rom. 12:2; Efes. 4:23). Moneki kiixtalis amo kinemilisok nion kichiuasok tein amo kuali (Col. 3:7-10). Sayoj ke maj tikelnamikikan ke Jiova ueli techtapojpoluia porin Jesús toka momikilij, yejua ika semi moneki maj titakuaujtamatikan  itech nejon. Keman Jiova kiita ke timochikaujtokej timopataskej, techtapojpoluia porin Jesús toka momikilij (1 Juan 1:7).

18. ¿Toni timomachtijkej kemej tetapojpoluia Jiova?

¹⁸ Maj ika titajtokan seki taman tein tikitakej itech nejin tamachtilis. Amo akin tetapojpoluia kemej Jiova. ¿Keyej? Yekinika, porin yejuatsin nochipa kineki tetapojpoluis. Ojpatika, porin kuali techixmati, yejua ika kimati ox yekmelauj timoyolnonotsaj. Uan expatika, porin keman Jiova tetapojpoluia senkis kielkaua tein tikchiujkej. Nejon techpaleuia maj amo techkuejmolook totanemilil uan maj ueli tikyolpaktikan.

19. ¿Keyej uelis tiyolpakiskej maski timopoloskej porin titajtakouanij?

¹⁹ Kemej titajtakolejkej tiksentokaskej timopoloskej. Sayoj ke semi techyolchikaua tein kijtoua amatajkuilol Perspicacia para comprender las Escrituras, volumen 1, página 209: “Jiova teiknelia uan kiajsikamati ke itekitikauan uelis niman mopoloskej, yejua ika amo moneki nochipa motayokoltijtoskej ika tein kichiuaj porin tajtakouanij (Sl 103:8-14; 130:3). Uelis yolpakiskej komo mochikauaj kitakamatiskej Jiova (Flp 4:4-6; 1Jn 3:19-22)”. ¡Nejin semi techyolchikaua!

20. ¿Toni tikitaskej itech okse tamachtilis?

²⁰ Semi tiktasojkamatij maj Jiova techtapojpolui komo yekmelauj timoyolnonotsaj. Sayoj ke, ¿keniuj uelis tikchiuaskej kemej yejuatsin? ¿Keniuj tetapojpoluia Jiova uan keniuj titetapojpoluiaj tejuan? ¿Keyej semi moneki maj tikmatikan nejin? Itech okse tamachtilis tiknankiliskej nejin netajtanilmej.