1, 2. 1) ¿Toni tajkuilolmej kinpaleuiani miakej maj amo mikikan? (Xikonita taixkopin ipeujyan tamachtilis.) 2) ¿Keniuj Jiova kinixyekantok itekitikauan?

PANOUAYA 100 xiujmej, itech seki uejueyi altepemej peuak kitaliaj seki tajkuilolmej kampa carretera iuan monamiki ojti kampa panoua tren. Nejon tajkuilolmej kijtouaj seki taman kemej nejin: “XIONMOKETSA, XIONTACHIA, XIONTAKAKI”. Kitaliaj porin kinpaleuia akin ompakauin panouaj itech inintepos maj amo kinkuitikisa se tren tein ijsiujka ompakauin panos. Nejon tajkuilolmej kinpaleuiani miakej maj amo mikikan.

² Jiova kichiua se taman tein okachi kuali ke techtalilis tajkuilolmej tein techpaleuis maj amo teyi techpano. Techmaka tanauatilmej uan techixyekana kemej uelis tikseliskej nemilis nochipaya. Yejuatsin tamati kemej se ichkatajpixkej akin ika netasojtalis kinixyekana iichkauan itech se ojti kampa amo teyi kinpanos (xikonixtajtolti Isaías 30:20, 21).

3. ¿Keyej momikiliaj taltikpakneminij?

³ Jiova nochipa kinmakani tanauatilmej itekitikauan, uan peuak keman moajsikej yekinika taltikpakneminij. Kemej neskayot,  itech xochital tein moajsia Edén kitemakak tanauatilmej tein amo ouij se kiajsikamati tein kinpaleuiskia taltikpakneminij maj nemikan ika yolpakilis uan maj amo momikilianij (Gén. 2:15-17). Sayoj ke Adán uan Eva kiixtopeujkej itaixyekanalis. Eva kitajtolkakik kouat, uan Adán kitajtolkakik Eva. Yejua ika, nochin omen tajyouijkej uan momikilijkej uan kimatiaj ke amo oksepa nemiskej. Kemej amo tatakamatkej, nochin timomikiliaj.

4. 1) ¿Keyej monekia yankuik tanauatilmej satepan ke panok Tetsaujkakiouit? 2) ¿Toni techpaleuiaj nejin yankuik tanauatilmej maj tikajsikamatikan?

⁴ Miak xiujmej satepan, Jiova kimakak tanauatilmej Noé tein ika kinmakixtij seki taltikpakneminij. Satepan ke panok Tetsaujkakiouit, Dios kiniluij taltikpakneminij maj amo kikuanij oso tayinij esti. ¿Keyej? Porin axkan kinkauaskiaya maj kikuakan nakat. Kemej seki taman mopataka, monekia yankuik tanauatilmej. Yejua ika kiniluij: “Sayoj nakat ika inemilis, iesyo, moneki amo xikuakan” (Gén. 9:1-4). Nejin tanauatilmej techpaleuiaj maj tikajsikamatikan keniuj Jiova kiita nemilis. Kemej yejuatsin techchijchiuak, tonemilis iaxka. Yejua ika kinamiki maj techilui keniuj moneki tikitaskej nemilis. Kemej neskayot, yejua kijtoj maj amo se temikti. Dios kiita ke nemilis uan esti kitelpiaj miak ipatiuj, uan kitatsakuiltis akin amo kipoujkaitas (Gén. 9:5, 6).

5. 1) ¿Toni tikitaskej itech nejin tamachtilis? 2) ¿Keniuj techpaleuis nejin tamachtilis?

⁵ Satepan ke Noé momikilij, Dios kisentokak kiixyekana ixolal. Itech nejin tamachtilis tikitaskej keniuj kichiuak. Uan no, nejin tamachtilis techpaleuis maj tiktakamatikan tanauatilmej tein Jiova techmaka uan maj tiyakan itech ojti tein teuika itech nemilis nochipaya.

6. 1) ¿Keyej israelitas monekia kitakamatiskej tanauatil tein Jiova kimakak Moisés? 2) ¿Toni monekia kichiuaskej komo kinekiaj maj Dios kintatiochiuiani?

⁶ Itech itonaluan Moisés, Jiova kinmakak tanauatilmej itekitikauan tein senkis kinextiaya keniuj monekia monejnemiltiskej uan kiueyichiuaskej. ¿Keyej? Porin oksepa mopataka tein mochiujtoya. Israelitas kinteltekitiltijkej panoua doscientos xiujmej ompa Egipto. Akin ompa kayomej katkaj kinueyichiuayaj mikemej uan tiotsitsin uan kichiuayaj okseki taman tein amo kiyolpaktiaya Dios. Keman israelitas kiskej Egipto, monekia kipiaskej yankuik tanauatilmej. Axkan pouiskiaj itech se xolal kampa sayoj kitakamatiskiaj itanauatil Jiova. Seki taixmatinij kijtouaj ke tajtol hebreo tein kijtosneki “tanauatil” ualeua itech okse tajtol tein kijtosneki “teixyekana”, “teojtokaltia” oso “temaka tanauatilmej”. Tanauatil tein kiselij Moisés kinmatampauiskia israelitas maj amo auilneminij nion maj kichiuanij kemej okseki taneltokalismej tein kipiayaj okseki xolalmej. Komo israelitas kinekiaj maj Dios kintatiochiuiani, monekia mokauaskej maj kinixyekana. Komo amo kitakamatiaj, kipiaskiaj uejueyi ouijkayomej (xikonixtajtolti Deuteronomio 28:1, 2, 15).

7. 1) ¿Keyej Jiova no kinmakak tanauatilmej israelitas? 2) ¿Keyej tikijtouaj ke tanauatil katka kemej se “tapixke”?

⁷ Sayoj ke no onkaya okse taman tein kichiuaya maj israelitas kiselianij yankuik tanauatilmej. Tanauatil tein kiselij Moisés kinpaleuij maj kichiuanij tein monekia, porin ompa ualeuaskia Mesías, Jesucristo. Nejin motelnekia porin ijkon mochiuaskia itanejnekilis Jiova. Tanauatil kinelnamiktij ke katkaj tajtakouanij. Uan kinpaleuij maj kiajsikamatinij ke monekia maj aksa akin amo kipiaya tajtakol  motemakani uan maj kinpaleuiani maj ixpoliuini inintajtakoluan nochipaya (Gál. 3:19; Heb. 10:1-10). Uan no, nejin tanauatil kinmatampauij kalyetouanij kampa ualeuaskia Mesías. Uan keman ejkok Mesías, nejin tanauatil kinpaleuij israelitas maj kimatinij akoni katka. Yejua ika Biblia kijtoua ke nejin tanauatil katka kemej se “tapixke” oso se taman tein itech amo miak xiujmej kinixyekanak hasta keman ejkoskia Cristo (Gál. 3:23, 24).

8. ¿Keyej moneki timokauaskej maj techixyekana tamachtilismej tein moajsij itech tanauatil tein kiselij Moisés?

⁸ Akin tikchiuaj kemej Cristo uelis techpaleuis tanauatilmej tein Jiova kimakak Moisés. ¿Keniuj? Ijkon kemej neskayot tein tikitakej itech yekinika párrafo, moneki kemej yeskia timoketsaskej uan tikitaskej ika nejmachkayot tamachtilis tein tayekantok itech tanauatil tein kiselij Moisés. Maski tejuan amo moneki tiktakamatiskejok nejon tanauatilmej, uelis timoixyekanaskej ika miak tamachtilismej tein ompa moajsij. ¿Keyej? Porin nejon techpaleuis itech tonemilis uan itech taueyichiualis tein tikmakaj Jiova. Dios kichiuak maj tanauatil tein kiselij Moisés moijkuilouani itech Biblia uan ijkon tikajsikamatiskiaj miak taman uan timoixyekanaskiaj ika tamachtilis tein kipia. Uelis timotasojkamatiskej maj Jesús techmachtiani se taman tein okachi kuali ke tanauatil tein kiselij Moisés. Kemej neskayot, moneki tikakiskej nejin tayolmajxitilis: “Namejuan nankikakke ya ke ne namouejkautatuan namechnajnauatijke ijkuin: ‘Amo xitasiuapapata’. Pero Nejuatsin namechnajnauatiaj ijkuin: Takan se tagat kinixuelitstinemi siuame san, ijkuakon ne tagat moteltajtakolmakak ya itech italnamikilis iuan ne siuame”. Tanauatil tein kiselij Moisés kijtouaya maj amo se auilnemi. Sayoj ke Jesús tamachtij ke no moneki timoijkuaniliskej amo kuali tanejnekilis uan amo kuali tanemililmej (Mat. 5:27, 28).

9. ¿Keyej monekia maj Jiova kitemakani yankuik tanauatilmej?

⁹ Satepan ke Jesús mochiuak Mesías, Jiova temakak yankuik tanauatilmej uan kiteixmatiltij okseki taman tein mouikaya ika itanejnekilis. ¿Keyej monekia? Porin miak taman oksepa mopatak itech ixolal Dios. Itech xiuit 33, Dios kiixtopeuak Israel kemej ixolal uan kiixpejpenak nechikol kampa kichiuaj kemej Cristo.

10. 1) ¿Keyej itech nechikol monekia yankuik tanauatilmej? 2) ¿Keyej “tanauatil de Cristo” amo kemej tanauatil tein kiselij Moisés?

¹⁰ Kemej tikitakejya, Jiova kinmakak israelitas tanauatil tein kiselij Moisés maj kinpaleuiani maj kimatinij keniuj nemiskiaj uan keniuj kiueyichiuaskiaj. Satepan ke Jesús ualaj nikan taltikpak, Jiova kitemakak yankuik tanauatilmej oso kitamajxitilij tein ipa yetoyajya. ¿Keyej? Porin ijkuak uan satepan itekitikauan amo ualeuaskiajok itech sayoj se xolal, ta itech miak xolalmej uan kipiaskiaj tataman tanemililmej. Itech ixolal pouiskiaj akin taixpejpenalmej. Yejuan kipeualtiskiaj nechikol kampa kichiuaj kemej Cristo uan pouiskiaj itech se yankuik netenkaualis. Ijkon Dios kinextij ke amo techichikotasojta, ta kinselia nochin akin kitakamatij uan kichiuaj tein kuali, maski kampa yeski kayomej (Hech. 10:34, 35). Itech yankuik nechikol kitakamatiaj “tanauatil de Cristo”. Nejin tanauatil amo kemej tanauatil tein kiselij Moisés. ¿Keyej? Porin moyekana ika tamachtilismej tein amo ijkuiliujtokej itech tet, ta itech iyolo sejse akin kichiua kemej Cristo. Nejin tanauatil kinixyekanaskia uan kinpaleuiskia nochin itekitikauan Dios maski kayomej itech tataman altepemej (Gál. 6:2).

11. ¿Katiyejua ome tanauatilmej pouij itech “tanauatil de Cristo”?

¹¹ Taixpejpenalmej semi kinpaleuij “tanauatil  de Cristo”. Tepitsin achto ke mopeualtiskia yankuik netenkaualis, Jesús kitemakak ome tanauatilmej tein motelnekij. ¿Katiyejua nejin tanauatilmej? Se, mouika ika tanojnotsalis. Uan okse kinextia keniuj moneki mouikaskej tokniuan. Kemej nejin tanauatilmej monekia kitakamatiskej nochin akin kichiuaj kemej Cristo, tinochin moneki tiktakamatiskej, yeski tikchiaskej tinemiskej iluikak oso nikan taltikpak.

12. ¿Keyej uelis tikijtoskej ke tanojnotsalis katka se taman tein yankuik?

¹² Achto, komo aksa akin amo katka israelita kinekia kitekitilis Jiova, monekia yas uan kitemos xolal Israel (1 Rey. 8:41-43). Sayoj ke Jesús kiniluij imomachtijkauan ke axkan yejuan monekiskia yaskej uan kintemoskej taltikpakneminij (xikonixtajtolti Mateo 28:19, 20). Itech iluit Pentecostés itech xiuit 33, Jiova senkis kinextij ke kinekia maj itekitikauan tanojnotsanij noyampa taltikpak. Itech nejon tonal, kemej 120 akin pouiaj itech yankuik nechikol kiselijkej yektikatsin espíritu. Ompa, itech miak tataman tajtolmej peuak kinnojnotsaj judíos uan akin amo katkaj judíos sayoj ke taueyichiuayaj kemej judíos (Hech. 2:4-11). Satepan peuak kinnojnotsaj samaritanos. Uan itech xiuit 36 peuak kinnojnotsaj akin amo katkaj judíos. Senkis moitaya ke imomachtijkauan Jesús monekia kinixmatiltiskej iTajtol Dios nochin taltikpakneminij.

13, 14. 1) ¿Keniuj uelis tiktakamatiskej “yankuik tanauatil” tein kitemakak Jesús? 2) ¿Toni techmachtij Jesús ika tein kichiuak?

¹³ Jesús no kitemakak “se yankuik tanauatil” tein kinextia keniuj moneki timouikaskej (xikonixtajtolti Juan 13:34, 35). Melauak ke mojmostaj moneki tikinnextiliskej netasojtalis tokniuan. Sayoj ke no moneki timotemakaskej ininka tiktemakaskej tonemilis. Nejin tanauatil amo moajsia itech tanauatil tein kiselij Moisés (Mat. 22:39; 1 Juan 3:16).

¹⁴ Jesús amo kinextij ke okachi motasojtaya yejua, ta oksekin, uan ijkon kikauak okachi kuali neskayot. Yejua semi kintasojtaya imomachtijkauan uan amo omeyolouak ininka kitemakas inemilis. Uan yejua kichia maj tejuan no timotemakakan titajyouiskej oso hasta tiktemakaskej tonemilis ininka tokniuan (1 Tes. 2:8).

15, 16. 1) ¿Keniuj axkan Jiova kiixyekantok ixolal? 2) ¿Toni yankuik taman mochiujtok axkan?

¹⁵ Axkan, Jesús kiixtalij takeual takuaujtamach uan tamatkej maj kinmaka tamachtilis itatojtokakauan keman moneki (Mat. 24:45-47). Itech tamachtilis tein kitemaka moajsij tanauatilmej tein motelnekij tein Dios kimaka ixolal keman mopata tein mochiujtok. ¿Toni yankuik taman mochiujtok?

¹⁶ Axkan tinemij itech itamian tonalmej. Uan amo uejkaua tikpanoskej se “ueyi tajyouilis ten amo keman mochiuaya” achto (Mar. 13:19; 2 Tim. 3:1). Okse taman, Satanás uan iamokuali ejekauan kinkixtijkej ompa iluikak uan taijtakojtokej itech taltikpak (Apoc. 12:9, 12). Uan no, tejuan tiktakamattokej tanauatil tein Jesús kitemakak keman titanojnotsaj noyampa taltikpak. Tikinixmatiltiaj kuali tanauatilmej okachi miak taltikpakneminij uan itech okachi miak tajtolmej kemej amo keman ijkon mochiujtoya.

17, 18. ¿Toni moneki tikchiuaskej keman techmakaj tanauatilmej?

¹⁷ Itech inechikol Dios tikseliaj miak taman tein techpaleuia maj titanojnotsakan. ¿Tiktekitiltijtokej? Itech nechikolmej techmakaj tayolmajxitilismej tein techpaleuiaj maj okachi kuali tiktekitiltikan. ¿Tikitaj ke yejua Jiova akin techmaka nejon tayolmajxitilismej?

¹⁸ Komo tiknekij maj Dios techtatiochiui,  moneki tikakiskej ika nejmachkayot tanauatilmej tein techmaka itech inechikol. Komo axkan titatakamatij, no titatakamatiskej itech okachi ueyi tajyouilis, keman ixpoliuis nochi tein kiixyekana Satanás (Mat. 24:21). Satepan, oksepa monekis maj techmakakan yankuik tanauatilmej keman tinemiskej itech Xochital, kampa amo taijtakosok Satanás.

19, 20. 1) ¿Toni amatajkuilolmej motaposkej? 2) ¿Toni panos keman motaposkej nejon amatajkuilolmej?

¹⁹ Ne uejkauj, Jiova kinmakak israelitas tanauatil itechkopa Moisés. Satepan, yejuatsin kinmakak imomachtijkauan Jesús “tanauatil de Cristo”. Uan itech Xochital, Jiova techmakas “amatajkuilolmej” ika yankuik tanauatilmej (xikonixtajtolti Apocalipsis 20:12, TNM). Itech nejon amatajkuilolmej xa moajsiskej tanauatilmej tein Jiova kineki maj tiktakamatikan itech nejon tonalmej. ¿Toni panos keman motaposkej nejon amatajkuilolmej? Keman tejuan uan akin moajokuiskej timomachtiskej nejon amatajkuilolmej, tikmatiskej toni kichia Dios maj tikchiuakan. Tinochin okachi kuali tikajsikamatiskej keniuj tanemilia Jiova. Uan kemej okachi kuali tikajsikamatiskej iTajtol Dios, okachi timotasojtaskej uan timopoujkaitaskej (Is. 26:9). ¿Ueli tiknemiliaj nochi tein tikajsikamatiskej uan titamachtiskej itech Xochital kampa taixyekantos toTekiuaj, Jesucristo?

²⁰ Komo tiktakamatij tanauatilmej tein “ijkuiliujtok itech amatajkuilolmej” uan amo tikauaj Jiova itech tayejyekolis tein mochiuas satepan ke panos mil xiujmej, yejuatsin kijkuilos totokay itech “amatajkuilol kampa ixnesij akin kipiaskej nemilis”. Nejin kinextia ke uelis tikseliskej nemilis nochipaya. Sayoj ke moneki TIMOKETSASKEJ uan tikixtajtoltiskej tein kijtoua Biblia, TIKITASKEJ ika nejmachkayot uan ijkon tikajsikamatiskej tein kijtosneki uan TIKAKISKEJ keman tiktakamatiskej tanauatilmej tein Jiova techmaka. Komo tikchiuaj nochi nejin, uelis timakisaskej itech okachi ueyi tajyouilis uan tikixmatiskej nochipaya keniuj tamati toDios tetasojtakej (Ecl. 3:11; Rom. 11:33).