1, 2. 1) ¿Keyej tikijtoskia ke neauilis se taman tein moneki amo tikauilmatis? 2) ¿Toni moneki tikyekitas achto ke timoauis?

¿TITELPOCH uan tikneki timoauis? Se moauis yejua okachi ueyi tatiochiualis tein uelis se kipias. Kemej tikitakej itech okse tamachtilis, neauilis se taman tein moneki amo tikauilmatiskej. Keman se moauia, se kinextia ininixpan oksekin ke se kimaktilijya Jiova se inemilis. Ika okseki tajtolmej, se kinextia ke se motenkauakya iuan ke se kitekilis nochipaya uan ke yejua tein okachi se kitayekanaltis. Kemej nejin se netenkaualis tein motelneki, achto ke timoauis moneki tikyekitas ke ueli moselti titaixpejpena, ke tikneki timoauis porin yekmelauj tikneki tiktekitilis Dios uan ke kuali tikajsikamati tein kijtosneki se motemaktis iuan Dios.

² ¿Tiknemilia ke uelisya timoauis? Xa tiknemilis ke ayamo. Oso xa tiknemilis ke kemaj, sayoj ke motatuan mitsiluiaj ximochia okachi ximoskalti uan okachi kuali xitaixejeko. Sayoj ke amo ximotekipacho. Ximochikaua tikchiuas tein moneki uan ijkon amo uejkaua uelisya timoauis. Nejin tamachtilis mitspaleuis xikixtali okachi kuali tiknextis eyi taman.  Yekinika, tein tikneltoka. Ojpatika, tein tikchiua. Uan expatika, tein ika tiktasojkamatilia Jiova.

3, 4. ¿Toni telpochmej uelis kinmachtis tein kichiuak Timoteo?

³ Ximotajtani nejin: “¿Keyej nikneltoka ke Dios yekmelauj nemi? ¿Keyej nikneltoka ke Biblia kipia itanemililuan Dios? ¿Keyej nikchiua tein Dios kiyolpaktia uan amo tein nikan taltikpak kichiuaj?”. Komo timotajtania nejin, mochiuas tein tatitanil Pablo kijtoj: “Nankiyekajsikamatitiue ya ne tekit ten Dios kimonekiltia xikchiutiyakan. Uan nankajsikamatiske ten kuali; uan no nankajsikamatiske de keniu nankiyolpaktijtiyaske Dios” (Rom. 12:2). Nejin tajtolmej kinextiaj ke tejua moneki tikitas ke tikchiuas tein Dios kijtoua yejua tein okachi kuali. ¿Keyej tejua moneki tikitas?

⁴ Xitanemili itech tein kipanok telpoch Timoteo. Yejua kuali kiixmatia tein tamachtia iTajtol Dios porin imomaj uan iueyinan kimachtijkej. Sayoj ke Pablo kiluij: “Xiktakamatiu nochi tanextililisme ten timomachtij ya uan ten tikyekneltokak ya” (2 Tim. 3:14, 15). Kemaj, Timoteo kineltokak ke tamachtilis tein melauak moajsia itech iTajtol Dios. Sayoj ke ¿keyej kineltokaya? ¿Sayoj porin imomaj uan iueyinan kiluijkej ke yejua tein melauak? Amo. Tein melauj kineltokaya porin ‘moyekixejekoltij’, oso tanemilij itech tein momachtijka, uan nejon kipaleuij maj kineltoka ke yejua tein melauak (xikixtajtolti 1 Tesalonicenses 5:21). Tein melauj, telpochmej uelis kinmachtis miak taman tein kichiuak Timoteo.

5, 6. ¿Keyej axkanya moneki tikmatis moselti titanemilis uan titaixejekos?

⁵ Tejua xa no uejkaujya mitsmachtijkej tein kijtoua Biblia. Komo ijkon, xikchiua kemej Timoteo uan xiknemili keyej tikneltoka tein mitsmachtijkej. Keman okachi tikmatis ke melauak tein tikneltoka, okachi chikauak yeski motakuaujtamatilis. Uan no, amo tiknekis tikchiuas tein mitsiluiskej akin iniuan timomachtia, tein oksekin kichiuaj nion tein tejua kemansa tiknejneki tikchiuas.

⁶ Motelneki niman tikmatis moselti titaixejekos. ¿Keyej? Porin ijkon uelis tiknankilis tein mitstajtaniskej akin iniuan timomachtia, kemej: “¿Keyej tikneltoka ke Dios nemi? Komo Dios tetasojta, ¿keyej kikaua maj mochiua tein amo kuali? Komo Dios kichijchiuak nochi, ¿akoni kichijchiuak Dios?”. Keman tikmatis moselti titaixejekos, nejin netajtanilmej amo kichiuas xiomeyoloua ox melauak tein tikneltoka, ta kichiuas xikneki okachi ximomachti Biblia.

7-9. Xikmelaua keniuj uelis mitspaleuis okachi xitakuaujtamati taxelol ¿Qué enseña realmente la Biblia?

⁷ Komo timomachtia Biblia ika nejmachkayot, uelis tiknankilis netajtanilmej, tikmelauas tein ayamo tikyekajsikamati uan tikyekitas ox melauak tein tikneltoka (Hech. 17:11). Tiitaixpantijkauan Jiova tikpiaj miak tataman amaixmej tein uelis mitspaleuiskej xikchiua nochi nejon. Kemej neskayot, miakej telpochmej kinpaleuiani folleto El origen de la vida uan amatajkuilol ¿Existe un Creador que se interese por nosotros? Miakej no kinpaleuiani taxelol ¿Qué enseña realmente la Biblia? tein moajsi itech jw.org. Nejin taxelol moajsi kampa  kijtoua ENSEÑANZAS BÍBLICAS › JÓVENES. Kipia tataman netajtanilmej tein chijchiujtok kemej mitspaleuis okachi kuali xikajsikamati miak taman tein tamachtia Biblia.

⁸ Kemej timomachtijtokya Biblia, xa tikixmatisya itanankililuan seki netajtanilmej tein ompa moajsij. Sayoj ke ¿tikneltoka ke melauak nejon tanankililmej? Nejon netajtanilmej mitspaleuiaj xitanemili ika nejmachkayot itech miak tajkuilolmej tein moajsij itech Biblia uan mitsyoleuaj xikijkuilo tein tejua tikneltoka. Uan no, mitspaleuiaj xiknemili keniuj tikinmelauilis oksekin. Komo ueli tikita nejin netajtanilmej, xiktekitilti keman timomachtis uan ika xikchikaua motakuaujtamatilis itech tein timomachtiani itech Biblia.

⁹ Motelneki xiktemo tein mitspaleuis xikneltoka ke melauak nochi tein timomachtiani itech Biblia. Nejin mitspaleuis maj ueli ximoaui. Se tokniuj ichpoch kijtoj: “Achto ke nikixtaliskia nimoauis, nimomachtij Biblia hasta senkis nikneltokak ke nejin katka taneltokalis tein melauak”. Yejua no kijtoua ke ijkon kemej panouaj tonalmej okachi kineltoka nejon.

10. ¿Keyej taixejekol maj se kichia maj se itaixpantijkauj Jiova akin moauijya kinexti ika tein kichiua ke kipia takuaujtamatilis?

¹⁰ Biblia kijtoua ke “komo amo monextia in totakuautamatilis ika ne tapaleuilis ten tikchiuaj, ijkuakon totakuautamatilis mokaua majya se tensa ten amo teyi ipatiu” (Sant. 2:17). Yejua ika, komo tikpia takuaujtamatilis uan tikyekmati ke melauak tein tikneltoka, taixejekol maj se kichia xiknexti ika tein tikchiua. Ijkon tikchiujtos nejin tein Biblia kijtoua: “Xichipaukanemikan uan xikmouistilijtiyakan Dios” (xikixtajtolti 2 Pedro 3:11).

11. ¿Keniuj tiknextiaj ke ‘tichipaujkanemij’?

¹¹ ¿Keniuj tiknextiaj ke ‘tichipaujkanemij’?  Kemej neskayot, xiknemili tein tikchiuani itech chikuasen metsti tein tipanokej. Keman monekik tikixejekos ox tikchiuas se taman tein amo kuali, ¿uelik tikmatik toni tein kuali uan toni tein amo kuali? (Heb. 5:14.) ¿Tikelnamiki keman amo tiknekik tikchiuas tein amo kuali oso tein mitsiluiayaj okseki telpochmej? ¿Tikaua se kuali neskayot kampa timomachtia? ¿Tikchiua tein mitsiluia Jiova, oso tein mitsiluiaj akin iniuan timomachtia porin amo tikneki maj mitspinaujtikan? (1 Ped. 4:3, 4.) Melauak ke tinochin titajtakouanij. Hasta akin miak xiujmejya kitekitilijtokej Dios kemansa xa pinauaj kijtoskej ke itaixpantijkauan Jiova. Sayoj ke akin motemaktijya iuan Dios moneki yolpakis porin itaixpantijkauj Jiova uan kinextis ika ichipaujkanemilis.

12. 1) ¿Toni ika tiknextia ke ‘tikmouistilia Dios’? 2) ¿Keniuj moneki tikitas nejon?

¹² ¿Keniuj tiknextia ke ‘tikmouistilia Dios’? Ika tein tikchiua itech nechikol, kemej titanojnotsas uan tiyas nechikolmej. Sayoj ke no ika tein tikchiua moselti, kemej tiktataujtis Jiova uan timomachtis Biblia. Akin motemaktia iuan Jiova kiyolpaktia kichiuas nejin uan amo kiita kemej seki taman tein moneki kichiuas maski amo kineki. Momachilia kemej tekiuaj David, akin kijtoj: “Nikchiuas motanejnekilis, noDios, nechtelyolpaktia, uan motanauatil moajsi noyolijtik” (Sal. 40:8).

13, 14. ¿Toni mitspaleuis ‘xikmouistili Dios’ ika tein tikchiua, uan keniuj kinpaleuiani seki telpochmej?

¹³ ¿Toni uelis mitspaleuis ‘xikmouistili Dios’ ika tein tikchiua? Uelis tikuis tein moajsi itech amatajkuilol Los jóvenes preguntan, volumen 2, página 308 uan 309. Ompa uelis tiknankilis netajtanilmej kemej: “¿Senkis tikiluia Jiova tein tiknemilia keman tikchiua netataujtil? ¿Nesi ke tiktasojta Jiova ika tein tikijtoua?”, “¿Toni tamachtilis tikita keman timomachtia?” uan “¿Titanojnotsati maski motatuan amo kisaj nejon tonal?”. Itech nejon páginas no uelis tikijkuilos tein tikuelitaskia tikchiuas uan ijkon okachi kuali tikchiuas monetataujtiluan, timomachtis Biblia uan titanojnotsas.

¹⁴ Miakej telpochmej akin kinekij moauiskej kijtouaj ke nejin semi kinpaleuiani. Se tokniuj ichpoch itokay Tilda kijtoua ke nejon netajtanilmej kipaleuijkej maj kiixtaliani kichiuas seki taman. Kijtoua: “Yolik nikchiujtiyajki tein nikixtalij uan keman ajsik se xiuit uelik nimoauij”. Se tokniuj telpoch itokay Patrick kijtoua se taman kemej nejon: “Nejua nikixtalijtoyaya nikchiuas seki taman, sayoj ke keman nikijkuiloj nechpaleuij maj okachi nimochikauani nikchiuas”.

15. ¿Keyej tikijtouaj ke netemaktilis se taman tein moselti tikixpejpena?

¹⁵ Okse netajtanil tein tikitas itech amatajkuilol Los jóvenes preguntan yejua  nejin: “Komo motatuan oso motasojikniuan kikauaskiaj Jiova, ¿tiksentokaskia tiktekitilis?”. Xikelnamiki ke netemaktilis se taman tein moselti tikixpejpena. Keman timotemaktis iuan Jiova uan timoauis, tiyeski tiitasojikniuj uan monekis titanankilis iixpan ika tein tikchiuas. Yejua ika tein tikixpejpenas tikchiuas itech itekiyo Jiova amo tikixtalis ika tein kichiuaskej motatuan oso oksekin. Komo axkan tichipaujkanemi uan tiktemoua tikueyitalis Jiova, tiknextis ke senkis tikneltoka ke nejin yejua tein melauak uan ke tikneki tikchiuas tein Dios tanauatia. Ijkon, amo uejkaua uelisya timoauis.

16, 17. 1) ¿Toni moneki kiolinis akin kineki moauis uan mochiuas itatojtokakauj Cristo? 2) ¿Toni mitspaleuis okachi xikpatiuita nemilis tein Jesús kitemakak? Xikijto se neskayot.

¹⁶ Se tonal, se takat akin kuali kiixmatia Tanauatil tein kiselij Moisés kitajtanij Jesús katiyejua tanauatil tein okachi moneki. Jesús kiluij ke yejua nejin: “Xiktasojta moueyitekotsin Totajtsin Dios ika nochi moyolo, uan ika nochi motanejnekilis, uan ika nochi motanemililis” (Mat. 22:35-37). Kemej tikitaj, komo aksa kineki moauis uan mochiuas itatojtokakauj Cristo, moneki kichiuas porin kitasojta  Jiova. ¿Keniuj uelis okachi tiktasojtas Jiova? Se taman tein okachi mitspaleuis yejua komo titanemilia itech inemilis Jesús tein kitemakak (xikixtajtolti 2 Corintios 5:14, 15 uan 1 Juan 4:9, 19). Komo titanemilia itech nejin ueyi netetayokolil tein Dios mitsmakak, okachi tikpatiuitas uan tiknekis tiktasojkamatilis ika nochi moyolo.

¹⁷ Xitanemili itech nejin neskayot. Xiknemili ke timoaeltsimijtok uan aksa mitskixtia itech at. ¿Toni tikchiuaskia? ¿Tiyaskia mochan timotapatilitiuj uan amo tiktasojkamatiliskia akin mitspaleuij? Amo. Tikyekmatij ke nochipa timotasojkamatiskia iuan. No ijkon, ika tajtakol uan mikilis kemej yeskia tinochin timoaeltsimijtoskiaj. Sayoj ke Jiova uan Jesús techmakixtijkej porin techteltasojtaj. Nejon tein kichiujkej techpaleuia maj ueli tinemikan nochipaya itech se xochital. ¿Melauj ke moneki tikinteltasojkamatiliskej?

18, 19. 1) ¿Keyej moneki amo timouis timotemaktis iuan Jiova? 2) ¿Keyej keman timoauis tikpias okachi tatiochiualismej?

¹⁸ ¿Tiktasojkamati tein Jiova moka kichiuak? Komo ijkon, tein okachi kuali tein uelis tikchiuas yejua timotemaktis iuan Dios uan timoauis. Kemej tikmati, timotemaktis iuan Dios kijtosneki ke timotenkauas iuan ke nochipa tikchiuas tein yejuatsin kineki. Sayoj ke moneki amo timouis tikchiuas nejin netenkaualis. ¿Keyej? Porin Jiova kineki xikpia se kuali nemilis, uan yejuatsin motenkaujtok kintatiochiuis akin kitakamatij (Heb. 11:6). Keman timotemaktis iuan Jiova uan timoauis, amo tikpias okachi ouijkayomej. ¡Tikpias okachi tatiochiualismej! Se tokniuj akin kipia 24 xiujmej uan moauij keman okichpilok katka, kijtoua: “Komo nimochiani seki xiujmej, okachi kuali nikajsikamatiskia tein nikchiujtoya. Sayoj ke kemej nimoauij nechpaleuij maj amo nechtapololti tein onkak nikan taltikpak”.

¹⁹ Kemej tikitakejya, Jiova kineki xikpia se kuali nemilis. Sayoj ke Satanás amo kitemoua mitspaleuis, porin yejua amo inintech tanemilia oksekin. Komo tikchiua tein yejua kineki, amo mitsmakas nion se taman tein kuali. Amo ueli kichiua porin amo kipia nion teyi tein kuali tein uelis temakas. Amo ueli kiniluia taltikpakneminij ke kinpanoti tein kuali nion ke uelis kichiaskej kiseliskej tein kuali. Amo ueli mitsiluia ke kuali tinemis satepan, porin yejua amo nemisok satepan (Apoc. 20:10).

20. ¿Toni uelis tikchiuas tein mitspaleuis ximotemakti iuan Jiova uan ximoaui? (No xikita kampa kijtoua “Tein mitspaleuis okachi kuali ximouika iuan Dios”.)

²⁰ Timotemaktis iuan Jiova yejua tein okachi kuali tein uelis tikixpejpenas. ¿Uelisya ijkon tikchiuas? Komo ijkon, amo ximoui. Sayoj ke komo tiknemilia ke ayamo uelis timoauis, xikchiua tein moijtoj itech nejin tamachtilis. Pablo kinyolmajxitij tokniuan akin nemiaj Filipos maj kisentokanij kichikauanij inintakuaujtamatilis (Filip. 3:16). Komo tejua no ijkon tikchiua, amo uejkaua uelisya timotemaktis iuan Jiova uan timoauis.