1, 2. 1) ¿Keniuj momachiliaj seki tokniuan keman ininkoneuan kiniluiaj ke kinekij moauiskej? 2) ¿Keyej kintajtaniaj akin moauitij ox motemaktijkejya iuan Jiova? (Xikonita taixkopin ipeujyan tamachtilis.)

MARÍA moketsa iniuan oksekin akin no moauitij. Itatuan kiitaj keman chikauak kinankilia ome netajtanilmej tein kinchiuilia akin kitemakatok tanojnots. Tepitsin satepan, nejin siuapiltsin moauia.

² Itatuan tel kuali momachiliaj porin kiixpejpenak motemaktis iuan Jiova uan moauis. Sayoj ke achto, imomaj tepitsin omeyolouaya. Motajtaniaya: “¿Uelis moauisya maski tel siuapilok? ¿Yekmelauj kiajsikamati ke amo auil tein kichiuati? ¿Okachi kuali yeskia maj mochia?”. Miakej tetatmej no motajtaniaj nejin keman ininkoneuan kiniluiaj ke kinekij moauiskej (Ecl. 5:5). Uan taixejekol, porin tein okachi moneki kichiuas se itatojtokakauj Cristo yejua motemaktis uan moauis (xikonita kampa kijtoua “ ¿Tionmotemaktijya iuan Jiova?”).

3, 4. 1) ¿Keniuj kinextij Pedro ke motelneki se moauis? 2) ¿Keyej uelis se kijtos ke neauilis tamati kemej keman mochijchiuak arca?

 ³ Tatitanil Pedro ika tajtoj keman Noé kichijchiuak arca uan kijtoj: “Tikelnamikij ne tonal de keniu makiske nojon chikueyin [...] uan techmakixtij ya [...] ne taauilis” (xikonixtajtolti 1 Pedro 3:20, 21). Arca tapaleuij maj nochin kiitanij ke Noé kiixtalijka kichiuas itanejnekilis Dios. Takuaujtamatia uan kichiuak tein Jiova kinauatij. Nejon tapaleuij maj yejua uan ichankauan makisanij keman tetsaujkakiouik. ¿Toni kinekik tamachtis Pedro?

⁴ Keman taltikpakneminij kiitayaj arca, kimatiaj ke Noé takuaujtamatia iuan Dios. No ijkon, keman taltikpakneminij kiitaj ke aksa moauia, kimatij ke motemaktijya iuan Jiova porin takuaujtamati iuan Cristo akin moajokuik. Ijkon kemej Noé, akin moauiaj kitakamatij Dios uan kichiuaj tekit tein kinmakatok. Jiova kimakixtij Noé keman tetsaujkakiouik. No ijkon, keman ixpoliuis nochi tein amo kuali kinmakixtis itekitikauan akin moauijkejya uan kitakamatij (Mar. 13:10; Apoc. 7:9, 10). Yejua ika motelneki se motemaktis uan se moauis. Akin ayamo moauia maski ueliskiaya uelis amo kiselis nemilis nochipaya.

5. ¿Toni tikitaskej itech nejin tamachtilis?

⁵ Axkan ke tikmatijya ke neauilis amo auil, moneki tiknankiliskej eyi netajtanilmej. Yekinika, ¿toni tamachtia Biblia ika neauilis? Ojpatika, ¿toni moneki se kichiuas achto ke se moauis? Uan expatika, ¿keyej moneki tikelnamikiskej ke neauilis motelneki keman tikinmachtiaj ika Biblia tokoneuan oso okse aksa?

6, 7. 1) ¿Toni kinextiaya neauilis tein kichiuaya Juan? 2) ¿Toni neauilis kinextiaya okse taman, uan keyej?

⁶ Biblia kijtoua ke Juan Taauijkej yejua akin yekinika kinauij oksekin (Mat. 3:1-6). Taltikpakneminij akin yayaj kiitatij Juan maj kinaui ika kinekiaj kinextiskej ke moyolnonotsayaj porin amo kitakamatiaj Tanauatil tein kiselij Moisés. Sayoj ke, neauilis tein okachi moneki tein kichiuak Juan katka taman. Yejua kipiak tatiochiualis kiauis Jesús, iKonetsin Dios (Mat. 3:13-17). Kemej Jesús amo keman tajtakoj, amo monekia moyolnonotsas (1 Ped. 2:22). Tein melauj, moauij porin ijkon kinextij ke kichiuaskia itanejnekilis Dios (Heb. 10:7).

⁷ Keman Jesús tanojnotstinemik, imomachtijkauan no kinauijkej oksekin (Juan 3:22; 4:1, 2). Ika nejon neauilis, taltikpakneminij kinextiayaj ke moyolnonotsayaj porin amo kitakamattoyaj Tanauatil. Sayoj ke, satepan ke momikilij uan moajokuik Jesús, ininneauilis akin kinekiaj yeskij imomachtijkauan kinextiaya okse taman.

8. 1) ¿Toni Jesús kinnauatij imomachtijkauan keman moajokuik? 2) ¿Keyej moneki moauiskej itatojtokakauan Cristo?

⁸ Itech xiuit 33, niman keman Jesús moajokuik monextij ininixpan panoua quinientos takamej, siuamej uan xa konemej. Xa ijkuak kijtoj: “Xiyakan nochi tech in senmanauak uan xikinnextilikan nochi in taltikpakuani ma yejuan no ma mochiuakan nomomachtijkauan. Uan xikinauijtinemikan ika itokaytsin de Toueyitajtsin Dios uan de Ikonetsin Dios uan de in [y]ektikatsin [e]spíritu. Uan xikinmachtikan de ke ma tatakamatikan” (Mat. 28:19, 20; 1 Cor. 15:6). Nesi ke moajsiaj tel miakej itatojtokakauan keman kitemakak nejin tanauatil. Uan no, kijtoj ke akin kinekia kiuikas “yugo” kemej itatojtokakauj monekia moauis (Mat. 11:29, 30). Akin kinekiskiaj kiyolpaktiskej Dios monekia kiajsikamatiskej ke yejuatsin kichiua itanejnekilis itechkopa Jesús. Sayoj ijkuak ueliskiaj moauiskej. Sayoj nejin neauilis kipiaskia itatiochiualis Dios. Itech Biblia, miak taman kinextia ke akin mochiuayaj itatojtokakauan Cristo itech yekinika siglo kiajsikamatiaj ke monekia moauiskej uan amo kinemiliayaj ke monekia mochiaskej uan moauiskej satepan (Hech. 2:41; 9:18; 16:14, 15, 32, 33).

9, 10. ¿Toni techmachtia ineauilis takat kayot Etiopía uan tatitanil Pablo?

⁹ (Xikonixtajtolti Hechos 8:35, 36.) Se takat kayot Etiopía akin kiselijka inintaneltokalis judíos mokeptoya ichan satepan ke kiueyichiuato Dios itech templo ompa Jerusalén. Se ángel kiluij Felipe maj ika kinojnotsa “yankuik Tajtoltsin de Jesús”. ¿Toni kichiuak nejon takat? Kiajsikamatik ke motelnekia kiselis Jesús kemej iTeko. Kemej kinekia kichiuas tein Jiova kinnauatia itatojtokakauan Cristo, niman kinekik moauis.

¹⁰ Axkan maj tikitakan tein kipanok se takat akin kintajyouiltiaya itatojtokakauan Cristo. Yejua katka judío, uan Dios kiixpejpenka xolal kampa pouia kemej iaxka. Sayoj ke, judíos amo kuali mouikayajok iuan Jiova porin amo tatakamatkej. Nejon takat  kiteltayekanaltiaya kichiuas tein kichiuayaj judíos. Sayoj ke Jesús kiualpannojnotsak. Yejua ika, nejin takat kiselij inepaleuil se tokniuj akin monotsaya Ananías, “meuak uan kiauijke” (Hech. 9:17, 18; Gál. 1:14). Nejon judío satepan moixmatik kemej tatitanil Pablo. Yejua moauij niman keman kiajsikamatik keniuj Jesús tapaleuiani maj mochiua itanejnekilis Dios (xikonixtajtolti Hechos 22:12-16).

11. 1) ¿Toni kinolinia akin momachtijtokej Biblia maj moauikan? 2) ¿Keniuj timomachiliaj keman tikitaj ke aksa moauia?

¹¹ Axkan, no ijkon panoua iniuan akin kiselijtokej se nemachtil ika Biblia, yeskij telpochmej oso xiuejkejya. Akin takuaujtamatij uan yekmelauj kipatiuitaj tein tamachtia Biblia kinekij motemaktiskej iuan Jiova uan moauiskej. Itech nochi uejueyi nechikolmej, kinmakaj se kualtsin tanojnots akin moauitij. Tiitaixpantijkauan Jiova semi tiyolpakij keman se akin momachtijtok Biblia moauia. Uan tokniuan tetatmej semi yolpakij keman ininkoneuan moauiaj. Itech xiujtekit 2017, panoua 284,000 moauijkej uan ijkon kinextijkej ke motemaktijkejya iuan Dios (Hech. 13:48, TNM). Yejuan kiajsikamatkej ke nochin itatojtokakauan Cristo moneki moauiskej. Sayoj ke ¿toni monekik kichiuaskej achto ke moauiskej?

12. ¿Toni moneki kichiuas se akin momachtijtok Biblia achto ke moauis?

¹² Achto ke moauis, akin momachtijtok Biblia moneki kiajsikamatis keniuj yekmelauj tamati Dios, tein kiixtalijtok kichiuas uan toni kichiuak tein ika techmakixtis (1 Tim. 2:3-6). Ompa moneki kipias takuaujtamatilis, tein kipaleuis maj kitakamati itanauatiluan Dios uan maj amo kichiuaok tein kitauelita (Hech. 3:19). Nejin motelneki, porin yejuatsin amo kiselia inetemaktilis akin kisentoka kichiua tein amo kuali (1 Cor. 6:9, 10). Sayoj ke amo sayoj moneki maj kitakamati itanauatiluan Dios. No moneki yas nechikolmej, tanojnotsas uan tamachtis. Jesús kijtoj ke imomachtijkauan kichiuaskiaj nejin tekit (Hech. 1:8). Satepan ke peuas kichiuas nochi nejin, uelis kichiuilis Jiova se netataujtil kampa motemaktis iuan, uan satepan moauis.

13. Keman titamachtiaj ika Biblia, ¿keyej moneki tikelnamikiskej ke akin kinekij mochiuaskej itatojtokakauan Cristo moneki moauiskej?

¹³ Keman tikinpaleuiaj tokoneuan uan akin tikinmachtiaj ika Biblia maj kichiuakan nejin, nochipa moneki tikelnamikiskej ke moneki moauiskej komo kinekij yeskij itatojtokakauan Cristo. Ijkon, nochipa tiktemoskej tikiniluiskej ke motelneki se motemaktis uan se moauis. Tiknekij maj kichiuakan nochi tein moneki uan maj moauikan.

14. ¿Keyej amo akin tikchikaujkauiaj maj moaui?

¹⁴ Moneki maj amo akin kichikaujkaui se konetsin oso se akin momachtijtok Biblia maj moaui. Jiova amo akin kichikaujkauia maj kitekitili (1 Juan 4:8). Okachi kuali, keman tikmachtiskej aksa, moneki tikpaleuiskej maj kiajsikamati ke motelneki maj mochiua itasojikniuj Dios. Ijkon, komo yekmelauj kitasojkamati kiixmatis tamachtilis  tein melauak uan yekmelauj kineki kichiuas nochi tein moneki kichiuas se itatojtokakauj Cristo, kinekis moauis (2 Cor. 5:14, 15).

15, 16. 1) ¿Kanachi xiuit moneki se kipias keman se moauis? Xikonmelaua. 2) Maski se akin momachtia Biblia moauijya itech okse taneltokalis, ¿keyej moneki moauis kemej itaixpantijkauj Jiova?

¹⁵ ¿Kanachi xiuit moneki kipias akin moauis? Amo ixyetok kanachi xiuit, porin sekin okachi niman kiajsikamatij tamachtilis ke oksekin. Miakej moauiaj keman telpochmejok, uan kisentokaj kiueyichiuaj Jiova nochi ininnemilis. Oksekin kiixmatij tein tamachtia Biblia keman semi xiuejkejya, sekin hasta kipanauiaj 100 xiujmej, uan ijkuak kiajsikamatij ke moneki moauiskej.

¹⁶ Akin momachtijtokej Biblia moneki moauiskej maski achto moauijkajya itech okse taneltokalis. Jiova sayoj kiselia ineauilis aksa keman senkis kiixmati itanejnekilis. Yejua nejon kipanok se siuatsin akin kiajxitijtoyaya 80 xiujmej. Kemej miakpa moauijkaya itech tataman taneltokalismej kitajtanij tokniuj siuat akin kimachtiaya ox monekia oksepa moauis. Tokniuj siuat kinankilij ika seki tajkuilolmej itech Biblia. Siuatsin kiajsikamatik tein kijtoua Biblia ika neauilis uan tepitsin satepan moauij (xikonixtajtolti Hechos 19:3-5).

17. ¿Itech toni moneki tanemilis akin moauia?

¹⁷ Semi tiyolpakij itech tonal keman aksa moauia. Sayoj ke ijkuak no moneki tanemilis itech nochi chikaujkayot tein monekis kichiuas uan ijkon kichiuas tein kijtoj keman motemaktij iuan Dios. Itatojtokakauan Jesús kitakamatij nejin tajtolmej: “Ma amo moyolpaktijtinemikan ok. Ta, para ke yejuan ma sayo Cristo kitekitilijtinemikan. Porin sayo Yejuatsin momikilij uan oksepa pankisak yoltok” (2 Cor. 5:15; Mat. 16:24).

18. ¿Toni netajtanilmej tikitaskej itech okse tamachtilis?

¹⁸ Itech nejin tamachtilis, tikitakej ke amo auil se mochiuas se itatojtokakauj Cristo. Yejua ika imomaj María motajtanij tein tikitakej ipeujyan nejin tamachtilis. Komo tejuatsin tikonpia konemej, xa tionmotajtaniani: “¿Uelis moauisya nokonetsin? ¿Motemaktia iuan Jiova porin kiixmattokya? ¿Moneki kiselis se ueyi nemachtil uan kitemos se kuali tekit achto ke moauis? ¿Uan komo ueyi tajtakoua satepan ke moauij?”. Tikitaskej nejin netajtanilmej itech okse tamachtilis. No tikitaskej keniuj tetatmej uelis kiitaskej neauilis kemej moneki.