NIMOSKALTIJ itech xolal Graz (Austria). Keman nikpiaya chikome xiuit nechtitankej se kaltamachtiloyan kampa tamachtiayaj taneltokalis. Ompa semi nikmoujkaitak maj tiopixkamej auilneminij iniuan monjas. Yejua ika, nikiluij nomomaj maj nechkixtiani keman ayamo ajsia se xiuit.

Satepan niyajki se kaltamachtiloyan kampa no nimokauaya. Se youak, nopopaj nechtemoto uan nechuikak kampa ueliskia timomatampauiskej, porin kitamottoyaj bombas ompa Graz. Timomatampauitoj itech xolal Schladming. Keman tiajsikej, tikpanauijkej se puente, uan tepitsin satepan kimotkej. Okse tonal, akin yayaj itech seki aviones tein amo uejkapan kinpatanaltiayaj techtatoponilijkej noueyinan uan nejua tokalixpan. Keman tamik neteuilis tikmachilijkej ke taneltokalis uan tekiuajyomej amo kichiujkaj tein tikchiayaj.

Itech xiuit 1950, se siuat akin katka itaixpantijkauj Jiova peuak kitapouia nomomaj tein Biblia tamachtia. Nejua nikakia tein kijtouayaj uan hasta niyaya seki nechikolmej iuan nomomaj. Kemej kineltokak ke itaixpantijkauan Jiova tamachtiayaj tein melauak, moauij itech xiuit 1952.

Nechikol kampa tiyayaj nikitaya kemej kampa sayoj mosentiliayaj siuamej akin xiuejkejya. Sayoj ke satepan tiyajkaj se nechikol kampa moajsiaj miakej telpochmej. ¡Nejon amo moitaya kemej kampa sayoj mosentiliayaj siuamej akin xiuejkej! Keman timokepkej Graz, peuak niyouj nochi nechikolmej uan tepitsin satepan no nikneltokak ke tein nimomachtijtoya katka tein melauak. Uan nikajsikamatik ke Jiova se Dios akin amo keman kinkaua itekitikauan. Hasta keman tikmachiliaj ke toselti tiyetokej keman tikpanotokej uejueyi ouijkayomej, yejuatsin touan yetok (Sal. 3:5, 6).

Niknekia nikintapouis oksekin tein nimomachtijka uan nipeuak iniuan nokniuan. Naui nokniuan siuamej akin tayekanayaj okseko tekititoyaj  kemej tamachtianij. Niyajki itech xolalmej kampa nemiaj uan nikinyoleuak maj momachtikan Biblia. Satepan, nochin nokniuan mochiujkej itaixpantijkauan Jiova.

Itech ojpatika semana ke nitanojnotstinemia kajkalpan, nitajtoj iuan se siuat akin kipiaya panoua treinta xiujmej uan peuak nikmachtia ika Biblia. Yejua kiixtalij kitekitilis Jiova uan moauij. Satepan no moauijkej inamik uan nochin ome ikoneuan. Nejon nemachtil kichikauak notakuaujtamatilis. ¿Keyej? Porin nejua amo keman nikselijka se nemachtil ika Biblia uan monekia kuali nimomachtis. Achto ke nikmachtiskia teisa akin nikmachtijtoya, monekia nejua nikajsikamatis. Nejon nechpaleuij maj okachi kuali nikajsikamati tamachtilis tein melauak. Nimotemaktij iuan Jiova uan itech metsti abril xiuit 1954 nimoauij.

Itech xiuit 1955 niyajki uejueyi nechikolmej kampa mosentilijkej akin ualeuayaj itech tataman uejueyi altepemej ompa Alemania, Francia uan Inglaterra. Keman niyetoya Londres, nikixmatik Albert Schroeder, akin tamachtiaya Galaad uan satepan pouik iniuan Oloch Taojtokaltianij. Tiixmatitoj Museo Británico uan tokniuj Schroeder technextilij seki amatajkuilolmej tein ne uejkauj mochijchiujkaj. Techiluij ke kipiayaj itokay Dios itech tajtol hebreo uan ke motelnekiaj. Nejon kichiuak maj okachi niktasojta Jiova uan kichikauak notakuaujtamatilis. Axkan okachi niknekia nikteixmatiltis tein melauak tein tamachtia iTajtol Dios.

Nimochiuak niprecursora itech tonal 1 metsti enero xiuit 1956. Naui metsti satepan, nechyoleujkej maj nitapaleui kemej precursora especial ompa Austria uan nechtitankej Mistelbach, kampa amo onkayaj itaixpantijkauan Jiova. Sayoj ke no onkaya okse ouijkayot: tokniuj siuat akin iuan nitanojnotsaskia uan nejua titeltamamej tikatkaj. Nejua yaya nikajxititi 19 xiujmej uan yejua kipiaya 25. Nejua katka nikayot itech se ueyi xolal uan yejua itech se xolalkonet. Nejua nikuelitaya tajkajya nimeuas uan yejua kualkan. Uan keman tayouaya, nejua niknekia niijsatos uan yejua kinekia kochitiuj. Sayoj ke, kemej tikchiujkej tein Biblia tayolmajxitia, tikyektalijkej nejon uan techyolpaktij tisentanojnotsaskej.

Tein melauj, tikpanokej okseki ouijkayomej. Hasta ueliskia se kijtos ke ‘techikantokatinenkej’, sayoj ke Jiova nochipa techpaleuij (2 Cor. 4:7-9). Nikelnamiki se tonal keman titanojnotstoyaj itech se xolalkonet uan taltikpakneminij kinkajkaujkej itskuimej. Niman techyoualokoj uejueyi itskuimej tein techuajuiayaj uan nanalkayaj. Timomakitskijkej uan nejua hasta niktajtanij Jiova maj niman techmiktianij komo techkejtsomayaj. Sayoj ke kemej se metro achto, motsakuilijkej, peuak mokuitapiloliniaj uan yajkej. Tikmachilijkej ke Jiova techmatampauij. Satepan ke panok nejon, titanojnotskej itech nochi xolal, uan semi techyolpaktij porin tel kuali techkakkej. Xa kimoujkaitakej maj itskuimej amo teyi techchiuilianij oso porin amo timosenkaujkej satepan ke tikpanokej nejon tein semi techmoujtij. Sekin mochiujkej itaixpantijkauan Jiova.

Sayoj ke se tonal tikpanokej okse taman tein tamouilil. Takat akin iaxka kali kampa tinemiaj iuintitiualaya uan kijtojtiualaya ke techmiktiskia porin tikinkuejmolojtinemiaj taltikpakneminij.  Inamik kitemoj kiyolseuis, sayoj ke amo uelik. Tejuan tiyetoyaj ajko, kampa tikochiaj, uan tikaktoyaj nochi. Niman tiktsakuilijkej puerta ika seki sillas uan peuak timotakuijkuiliaj. Keman titatapojkej, tikitakej ke takat tejkoka uan maktiyaya se ueyi cuchillo. Tikiskej taikankopa uan uejka tiojtokakej ika nochi tein tikpiayaj, tikmattoyaj ke amo timokepaskiajok.

Timokauatoj itech se hotel. Satepan, timokaujkej ompa ajsitoyaya se xiuit, uan nejon techpaleuij itech tanojnotsalis. Kemej hotel yetoya tatajko itech xolal, sekin akin tikinmachtiayaj kinekiaj ompa momachtiskej. Niman peuak tikchiuaj nechikol kampa timokauayaj, kampa timomachtiayaj se amatajkuilol uan amaix Tanejmachtijkej. Timosentiliayaj kemej kaxtol.

Titapaleuijkej Mistelbach panoua se xiuit. Satepan nechtitankej Feldbach, inakastan xolal Graz. Nitanojnotsaskia iuan okse tokniuj siuat, sayoj ke ompa no amo onkaya se nechikol. Kampa tinemiaj semi tsikitsin katka uan moajsia ikuapan se kaltsin tein chijchiujtoya ika kouit. Ejekat panouaya koujtsalan uan monekia tiktsakuaskej ika periódico. Uan no, monekia tikixtiskej at itech se atekoch. Sayoj ke nochi nejon amo nenkajtik. Seki metsti satepan peuak moajsi se tein ayamo nechikol. Uan satepan, kemej treinta taltikpakneminij akin pouiaj itech seki kalyetouanij akin tikinmachtiayaj mochiujkej itaixpantijkauan Jiova.

Nochi nejin kichiuak maj okachi nikpatiuitani ueyi nepaleuil tein Jiova kinmaka akin kitayekanaltiaj iTekiuajyo. Maski tiknemiliskej ke amo akin uelis techpaleuis, Jiova nochipa techpaleuis (Sal. 121:1-3).

Itech xiuit 1958 moixtalij mochiuas ompa Nueva York se ueyi nechikol kampa mosentiliskiaj akin ualeuayaj itech tataman uejueyi altepemej, itech Estadio de los Yankees uan Polo Grounds. Niktitanik se amat kampa nitajtania niyas, uan tokniuan itech sucursal tein moajsia Austria nechtajtanijkej ox nikuelitaskia nikselis tamachtilis Galaad tapoual 32. ¿Keniuj ueliskia nikijtos ke amo? Niman nitanankilij: “¡Kemaj!”.

Itech tamachtilis nimotaliaya inakastan Martin Poetzinger. Yejua kipanok uejueyi ouijkayomej kampa nazis tetsakuayaj uan tetajyouiltiayaj. Satepan pouik iniuan Oloch Taojtokaltianij. Kemej  tiomen titajtouayaj alemán uan motamachtiaya itech tajtol inglés, yejua kemansa nechichtakailuiaya: “Erika, ¿toni kijtosneki nejon?”.

Itajkotian tamachtilis, tokniuj Nathan Knorr techmatiltij kani titapaleuiskiaj. Nejua niyaskia Paraguay. Kemej niichpochok nikatka, monekia maj nopopaj nechkauani uan ijkon ueliskia niyas nejon ueyi altepet. Yejua nechkauak, uan itech metsti marzo xiuit 1959 niajsik Paraguay. Ninemiskia itech kali kampa nemiaj misioneros ompa Asunción, uan nitanojnotsaskia iuan okse tokniuj siuat.

Tepitsin satepan nikixmatik Walter Bright, se misionero akin kiselij tamachtilis 30. Timonamiktijkej uan tiksenixnamikkej ouijkayomej. Nochipa keman tikpanouayaj ouijkayomej tikixtajtoltiayaj Isaías 41:10, kampa kijtoua: “Amo ximoui, porin nejua niyetok mouan. Amo ximotekipacho, porin nejua nimoDios. Nejua nimitschikauas”. Nejin netenkaualis techelnamiktiaya ke komo timochikauayaj tiktakamatiskej Jiova uan tiktayekanaltiskej iTekiuajyo, yejuatsin amo keman techkauaskia.

Satepan techtitankej maj titapaleuitij itech se xolal tein monamikia iuan Brasil. Ompa, tiopixkamej kiniluijkej telpochmej maj kitetemanij kali kampa tinemiaj, tein amo yekchijchiujtoya. Keman Walter peuak kimachtia ika Biblia akin kinixyekanaya policías, yejua kiitak maj itech se semana seki policías tajpianij ompa. Satepan amo akinok techkuejmoloj. Tepitsin satepan tinemitoj itech se okachi kuali kali tein moajsia oksekopa. Nejon semi tapaleuij, porin uelik tikchiujkej nechikolmej ompa Paraguay uan Brasil. Achto ke okseko tiyaskiaj titapaleuitiuij moajsiajya ome nechikolmej tein amo uejueyi.

Tapajtianij nechiluijkaj ke amo keman ueliskia nikinpias konemej, yejua ika xiknemilikan keniuj timomachilijkej keman itech xiuit 1962 nikmatik ke nikokoxkayetoya. Timokaltalitoj Hollywood, ompa Florida (Estados Unidos), kampa ika nemiaj ichankauan Walter. Seki xiujmej monekik tikinyekpiaskej nochankauan uan amo uelik tiksentokakej kemej precursores. Maski ijkon, tiksentokakej tiktayekanaltijkej tanojnotsalis (Mat. 6:33, TNM).

Keman tiajsikej Florida itech metsti noviembre xiuit 1962, semi tikmoujkaitakej tein panotoya. Kemej taltikpakneminij kiitayaj ke monekia amo senyetoskej akin tataman kemej ixtamatiaj, tokniuan akin ixchijchipaujkej uan tokniuan akin tiltik ininnakayo seseko mosentiliayaj uan seseko tanojnotsayaj. Sayoj ke Jiova amo techikoita uan itech nechikolmej niman peuak kipataj nejon. Senkis moitak ke Jiova tapaleuij porin axkan moajsij tel miak nechikolmej ompa.

Nechtayokoltia nikijtos ke Walter momikilij itech xiuit 2015 porin kikuik cáncer itech ikuatixyo. Ninemik iuan cincuenta y cinco xiujmej uan katka se tel kuali takat, kitasojtak Jiova uan kinpaleuij miakej tokniuan. Niktelneki oksepa nikitas keman moajokuis uan amo kipiasok kokolis (Hech. 24:15).

Nimotasojkamati porin nikchiuani tekit kemej precursora panoua cuarenta xiujmej uan porin nikpanouani miak taman tein kuali uan nikseliani miak tatiochiualismej. Kemej neskayot, Walter uan nejua uelik tikitakej keman moauijkej 136 akin tikinmachtijkej ika Biblia. Melauak ke tikpanokej ouijkayomej, sayoj ke amo keman tikitakej ke ueliskia tikauaskej Jiova, toDios akin amo tekaua. Ijkuak, okachi timotokiayaj iuan uan titakuaujtamatiaj ke kiyektaliskia tein tikpanotoyaj kemej monekiskia uan keman monekiskia. Uan nochipa ijkon kichiuani (2 Tim. 4:16, 17).

Niktelelnamiki Walter, sayoj ke niyeski niprecursora nechpaleuia maj nitaxiko. Nikitani ke nikinmachtis oksekin tein melauak nechpaleuia, okachiok keman nikintapouia ke mikemej moajokuiskej. Yekmelauj Jiova amo keman nechkauani. Nechyekpiani ika okachi miak taman ke tein ueli nikijtoua. Kemej yejuatsin motenkauak, nechpaleuiani, nechchikauani uan nechkitskiani ika iyekmay “tein kipia melaujkayot” (Is. 41:10).