Tein melauj, amo akin ueli senkis kimati keniuj tamatia Pablo. Taixkopimej kampa nesi Pablo itech toamaixuan sayoj neskayomej, porin amo kiajsinij tein kinextia keniuj yekmelauj katka.

Maski ijkon, onkak seki taman tein kinextia keniuj xa tamatia tatitanil. Kemej neskayot, itech amaix Tanejmachtijkej, 1 de marzo de 1902, moijtoj ke itech amatajkuilol Hechos de Pablo y Tecla, tein moijkuiloj kemej itech xiuit 150, tikajsij tein xa okachi kuali kimelaua keniuj tamatia Pablo uan tein okachi miakej kinemiliaj: “Se takat akin amo uejkapantik, kuaxipetstik, metstajtapotok, chikauak, tel ixajmolyoj, iyekatsol tepitsin ueyi”.

Itech se diccionario momelaua ke xa tepitsin melauak tein moijtoua itech amatajkuilol Hechos de Pablo y Tecla (The Oxford Dictionary of the Christian Church [tein mokixtij itech xiuit 1997]). Seki siglo satepan ke moijkuiloj Hechos de Pablo y Tecla, nesi ke miakej kikuiaj, porin moajsij 80 tajkuilolmej itech griego uan okseki itech okseki tajtolmej. Yejua ika, taixkopimej tein mokuij itech toamaixuan iuan mouika tein kijtouaj seki tajkuilolmej tein uejkauj kayomej kampa momelaua keniuj tamatia Pablo.

Sayoj ke, moneki tikelnamikiskej ke moajsi okseki taman tein okachi moneki ke se kimatis keniuj tamatia. Keman tanojnotstinemia, sekin kijijtouayaj, porin yejua kijtoj: “Kijtoaj ke nejua san amo teyi nikuikatinemi uelilis uan no nechtejteneuaj de keniu nitanojnotstinemi” (2 Cor. 10:10). Sayoj ke maj amo tikelkauakan ke mochiuak itatojtokakauj Jesús porin yejua monextij iixpan. No uelis tiknemiliskej tein kichiuak porin Cristo ‘kijitak’, oso kiixpejpenak, maj kiteixmatilti itech “oksekin pueblojme ten amo pouij judíos” (Hech. 9:3-5, 15; 22:6-8). Uan moneki tiknemiliskej keniuj techpaleuiaj amatajkuilolmej tein kijkuiloj ika inepaleuil Dios.

Pablo amo keman kijkuiloj keniuj tamatia nion moueyichiuaya ika tein kichiujka achto ke mochiuaskia itatojtokakauj Cristo (Hech. 26:4, 5; Filip. 3:4-6). Yejua kijtoj: “Amo niueyichiuke keme in oksekin itatitaniluan de Cristo. Uan no hasta amo nechnamiki ma nechpouakan keme itatitanil” (1 Cor. 15:9). Uan satepan kijkuiloj: “Nejua amo teyi nichiuke uan amo nikpixtinemi chikaualis keme ne oksekin itaneltokakauan yolchipauke de Cristo. Pero Totajtsin Dios ika ne iteiknelilis nechtekimaktij ya ika nijin tekit de ke nejua nikinnojnotstinemi ne tagayot ten amo judíos ika ne Tajtoltsin ten kualkui uel miak tatiochiualisme de Cristo” (Efes. 3:8). Tein melauj, tein Pablo kiteixmatiltij okachi moneki ke se kimatis keniuj tamatia.