1. Kemej kijtoua 1 Pedro 3:8, ¿keyej kuali timomachiliaj iniuan akin toka motekipachouaj uan kinekij maj kuali tiyetokan?

TINOCHIN kuali timomachiliaj keman timoajsij iniuan akin toka motekipachouaj uan kinekij maj kuali tiyetokan. Yejuan mochikauaj kiajsikamatiskej tein tiknemiliaj uan tein tikmachiliaj. Kiitaj tein techpoloua uan kitemouaj techpaleuiskej maski amo tikiniluiskej. Tikinpatiuitaj akin ijkon kichiuaj, * ijkon kemej kijtoua 1 Pedro 3:8 (xikonixtajtolti).

2. ¿Keyej uelis techouijmakas tikajsikamatiskej tein oksekin kimachiliaj?

² Tinochin akin tikchiuaj kemej Cristo tiknekij tikajsikamatiskej tein oksekin kimachiliaj. Sayoj ke, uelis techouijmakas tiknextiskej. ¿Keyej? Se taman porin titajtakouanij uan moneki timochikauaskej amo sayoj totech titanemiliskej (Rom. 3:23). Uan no, sekin techouijmaka porin tataman kemej techiskaltijkej uan tein tikpanouanij. No, porin tinemij itamian tonalmej kampa miakej sayoj yejuan motasojtaj uan amo motekipachouaj ininka oksekin, nejon uelis kichiuas maj no ijkon tikchiuakan (2 Tim. 3:1, 2). ¿Toni uelis techpaleuis maj ininka timotekipachokan oksekin?

3. 1) ¿Toni techpaleuis maj okachi titeajsikamatikan? 2) ¿Toni tikitatij itech nejin tamachtilis?

³ Tikajsikamatiskej tein oksekin kimachiliaj komo tikchiuaj kemej Jiova uan iKonetsin, Jesucristo. Yejuatsin semi tetasojta uan techkauilia se tel kuali neskayot (1 Juan 4:8). Jesús kichiua tein iPopaj kichiua (Juan 14:9). Keman moajsia nikan taltikpak, kinextij ke taltikpakneminij ueli teikneliaj.  Itech nejin tamachtilis, yekinika tikitatij keniuj Jiova uan Jesús motekipachouanij ika tein oksekin kimachiliaj uan satepan tikitaskej keniuj uelis no ijkon tikchiuaskej.

4. ¿Keniuj kinextia Isaías 63:7-9 ke Jiova kitekipachoua tein kimachiliaj itekitikauan?

⁴ Biblia kijtoua ke Jiova kitekipachoua tein itekitikauan kimachiliaj. Kemej neskayot, maj tikitakan keniuj momachilij keman israelitas kipanokej ouijkayomej. ITajtol Dios kijtoua: “Keman yejuan tajyouijtoyaj yejua no tajyouiaya” (xikonixtajtolti Isaías 63:7-9). Satepan, Jiova kijtoj itechkopa tanauatijkej Zacarías ke keman kitajyouiltiayaj ixolal, kemej yeskia yejua kitajyouiltiayaj. Kiniluij itekitikauan: “Akin namechmatoka kimatoka noixtololo” (Zac. 2:8). ¡Nejin tajtolmej kinextiaj ke Jiova ika motekipachoua ixolal!

5. Xikonijto se neskayot tein kinextia keniuj Jiova kinpaleuiani itekitikauan keman tajyouiaj.

⁵ Keman itekitikauan Dios tajyouiaj, yejuatsin amo sayoj kiniknelia, ta no kichiua tein moneki tein ika kinpaleuia. Maj tikitakan se neskayot. Keman israelitas kinteltekitiltiayaj ompa Egipto, Jiova kimachilij inintajyouilis uan nejon kiolinij maj kinmakixti. Kiluij Moisés: “Yekmelauj nikitani keniuj tajyouijtok noxolal [...] uan nikakini inintayokoltsajtsilis [...] nejua kuali nikmati tekokojkayot tein kijyouijtokej. Nitemoti uan ijkon nikinmakixtis ininmako egipcios” (Éx. 3:7, 8). Kemej kiniknelij, kinmakixtij. Miak xiujmej satepan, keman moajsiajya itech Tal tein yejuatsin motenkaujka kinmakas, altepemej tein ompakauin moajsiaj kinixnamikkej. ¿Toni kichiuak Dios? Biblia kijtoua ke “semi kiyolkokouaya keman yejuan motsajtsiliayaj” porin kintajyouiltiayaj. Kemej kimachiliaya tein yejuan kipanotoyaj, kinmakixtij inintechkopa tamelauanij (Juec. 2:16, 18).

6. Xikonijto se neskayot kampa Jiova kiajsikamatik tein kimachiliaya aksa akin mopolojtoya.

⁶ Jiova kiajsikamati tein kimachiliaj itekitikauan maski mopolouaj. Maj tikitakan tein kipanok tanauatijkej Jonás. Dios kititanik Nínive maj kiniluiti akin ompa nemiaj ke yaya kintatsakuiltiti. Sayoj ke,  kemej moyolnonotskej, yejuatsin kintapojpoluij. Nejon amo kiyolpaktij Jonás uan ‘tel kualanik’ porin amo mochiuak tein yejua kiniluijka. Sayoj ke, Jiova amo iuan kualanik uan kipaleuij maj kipata itanemilil (Jon. 3:10–4:11). Satepan, Jonás kiajsikamatik tein Jiova kinekia kimachtis uan yejuatsin kinauatij maj kijkuilo tein kipanok uan ijkon tejuan ueliskia techpaleuis (Rom. 15:4). *

7. ¿Toni techmatiltia tein Jiova kichiuani ininka itekitikauan?

⁷ Kemej Jiova kinpaleuij nejin itekitikauan ijkon kemej oksekin kipaleuij, techmatiltia ke kiajsikamati tein kimachiliaj. Yejuatsin kiita tein tikijyouiaj tisejsemej uan kuali kiixmati “iyolo taltikpaknenkej” (2 Crón. 6:30). Kiajsikamati tein tiknemiliaj uan tein tikyolmachiliaj ijkon kemej tein amo ueli tikchiuaj. Motenkaua ke ‘amo kikauas maj tikpiakan tayejyekolis tein amo uelis tikxikoskej’ (1 Cor. 10:13, TNM). ¿Melauj ke techyolseuia tikmatiskej nejon?

8-10. ¿Toni kichiuak maj Jesús ininka motekipachouani oksekin?

⁸ Keman Jesús moajsia nikan taltikpak, kinextij ke semi ininka motekipachouaya oksekin. Eyi taman kipaleuij maj kichiua. Yekinika, kemej tikitakejya, Jesús kichiua tein iPopaj kichiua. Ijkon kemej Jiova, yejua kintasojtaya taltikpakneminij. Maski kiyolpaktij kipaleuis iPopaj maj kichijchiua nochi tein onkak, okachi kintasojtak taltikpakneminij (Prov. 8:31). Yejua ika motekipachoj ika tein kimachiliayaj.

⁹ Ojpatika, ijkon kemej Jiova, Jesús uelia kimatia tein taltikpakneminij kimachiliayaj oso tein kinoliniaya maj kichiuakan teisa (Mat. 9:4; Juan 13:10, 11). Yejua ika, kemej kinajsikamatia, kinyolseuiaya keman kiitaya ke tayokoxtoyaj uan motekipachojtoyaj (Is. 61:1, 2; Luc. 4:17-21).

¹⁰ Expatika, Jesús no kipanok seki ouijkayomej tein kipiayaj taltikpakneminij. Kemej neskayot, nesi ke ikalyetouanij kipanouayaj tatasojtilis. Kemej tekitik iuan José akin kiiskaltij, momachtij kichiuas tekimej kampa monekia motelchikauas (Mat. 13:55; Mar. 6:3). Uan kemej José xa momikilij tepitsin achto ke Jesús kipeualtiskia itekiyo Dios, xa no kimachilij tekokojkayot tein se kimachilia keman momikilia aksa akin tiktasojtaj. Uan no, kimatik toni se kimachilia keman se ikalyetouanij amo kineltokaj Jiova (Juan 7:5). Nejon tein kipanok uan okseki taman kipaleuij maj kiajsikamati kuejmolmej tein kipiayaj oksekin uan kemej momachiliayaj.

11. ¿Kemanian Jesús okachi kinextij ke teajsikamatia? (Xikonita taixkopin ipeujyan amaix.)

¹¹ Keman Jesús kichiuak mouiskatekimej okachi kinextij ke teajsikamatia. Amo kichiuak porin monekia kichiuas, ta porin kinikneliaya akin tajyouiayaj (Mat. 20:29-34; Mar. 1:40-42). Kemej neskayot, maj tiknemilikan tein kimachilij keman kiuikak se takat akin amo takakia kampa amo onkaskiaj miakej uan ijkon kipajtiskia oso keman oksepa kimakak nemilis iyoj konetsin se siuat akin amo nemiaok inamik (Mar. 7:32-35; Luc. 7:12-15). Jesús kimachilij tein  yejuan kipanotoyaj uan kinejnekik kinpaleuis.

12. Kemej kijtoua Juan 11:32-35, ¿keniuj Jesús kinextij ke kiajsikamatia Marta uan María?

¹² Keman Lázaro momikilij, Jesús kinextij ke kiajsikamatia Marta uan María. Keman kiitak ke moyolkokouayaj, “peuak mochojchoktia” (xikonixtajtolti Juan 11:32-35). Amo sayoj chokak porin amo tajtoskiaok iuan itasojikniuj, ta kimatia ke yaya oksepa kimakati nemilis. Chokak porin kiitak ke itasojikniuan siuamej semi moyolkokouayaj.

13. ¿Keyej techyolchikaua tikmatiskej ke Jesús teajsikamati?

¹³ Semi techpaleuia tikmatiskej ke Jesús teajsikamatia uan tiktasojtaj porin kiniknelij taltikpakneminij (1 Ped. 1:8). Techyolchikaua tikmatiskej ke axkan taixyekantokya kemej Tekiuaj itech iTekiuajyo Dios uan ke amo uejkaua kitamis nochi tajyouilis. Kemej Jesús nemik kemej se taltikpaknenkej, yejua akin okachi uelis techpaleuis maj tikelkauakan nochi tajyouilis tein kiualkuini itaixyekanalis Satanás. Semi techyolpaktia tikpiaskej se Tekiuaj akin uelis “techyoliknelijtiyas” (Heb. 2:17, 18; 4:15, 16).

14. ¿Toni techolinia maj tikchiuakan Efesios 5:1, 2?

¹⁴ Keman timomachtiaj keniuj Jiova uan Jesús teajsikamatij, techolinia maj okachi tikinajsikamatikan oksekin (xikonixtajtolti Efesios 5:1, 2, TNM). Kemej titajtakouanij amo senkis ueli tikmatij tein oksekin kimachiliaj kemej Jiova uan Jesús kichiuaj, sayoj ke kemaj uelis timochikauaskej tikajsikamatiskej tein kimachiliaj uan tein kinpoloua (2 Cor. 11:29). Amo tikchiuaj kemej akin sayoj kitemouaj yejuan mopaleuiskej, ta tikchiuaj tein Pablo kijtoj: “Amo xiktemojtinemikan de keniu nanmopaleuijtinemiske namejuan san. Ta, kachi ok xiktemojtinemikan de keniu xikinpaleuijtiyakan oksekin” (Filip. 2:4).

15. ¿Akonimej okachi moneki kinextiskej ke teajsikamatij?

¹⁵ Tayekananij itech nechikol okachi moneki kinextiskej ke teajsikamatij. Kimatij ke Jiova kintajtanis ox kinyekpiaj ichkamej tein yejuatsin iaxkauan (Heb. 13:17). Komo kinekij tapaleuiskej moneki kinajsikamatiskej oksekin. ¿Keniuj uelis kichiuaskej?

16. ¿Toni kichiuaj tayekananij akin teajsikamatij uan keyej moneki nejon?

¹⁶ Tayekananij akin teajsikamatij kikuij inintiempo uan kinpaleuiaj tokniuan. Kichiuaj netajtanilmej uan kikakij ika nejmachkayot tein kiniluiaj. Nejin okachi moneki komo semej iichkauan Jiova kineki kintapouis tein kimachilia sayoj ke amo kimati keniuj kichiuas (Prov. 20:5). Keman tayekananij ijkon kichiuaj, tokniuan okachi iniuan takuaujtamatij, okachi kuali mouikaj uan motasojtaj se iuan okse (Hech. 20:37).

17. ¿Toni tein kichiuaj tayekananij okachi kipatiuitaj tokniuan? Xikonijto se neskayot.

¹⁷ Miakej tokniuan kijtouaj ke tein okachi kipatiuitaj yejua maj tayekananij kitemokan kiajsikamatiskej tein oksekin kimachiliaj. ¿Keyej? Adelaide kijtoua: “Amo ouij titajtos iniuan porin tikmati ke mitsajsikamatiskej”. No kijtoua: “Tikita ke kimachiliaj tein tikpanotok ika tein kichiuaj keman tikinnojnotsa”. Uan se tokniuj kijtoua: “Keman niktapouijtoya se tayekankej se kuejmol tein nikpiaya, yejua peuak choka. Amo keman nikelkauas nejon” (Rom. 12:15).

18. ¿Keniuj uelis tiknextiskej ke titeajsikamatij?

 ¹⁸ Tein melauj, tinochin uelis tiknextiskej ke titeajsikamatij, amo sayoj tayekananij. ¿Keniuj uelis tikchiuaskej? Maj timochikauakan tikajsikamatiskej ouijkayomej tein kipanouaj tokalyetouanij uan okseki tokniuan. Maj ininka timotekipachokan telpochmej, ichpochmej, akin mokokouaj, akin xiuejkejya uan akin tajyouijtokej porin momikiliani se akin kitasojtayaj. Maj tikintajtanikan keniuj yetokej uan maj tikakikan ika nejmachkayot tein techiluiskej. Maj tiknextikan ke yekmelauj tikajsikamatij tein kipanotokej. Maj tikinpaleuikan ika tein tiueliskej. Keman ijkon tikchiuaj tiknextiaj ke yekmelauj titetasojtaj (1 Juan 3:18).

19. ¿Keyej moneki tikpataskej tein monekis keman tikinpaleuiskej oksekin?

¹⁹ Keman tiktemoskej tikinpaleuiskej oksekin, maj tikpatakan tein monekis porin tataman kemej kiixnamikij kuejmolmej. Sekin amo kinouijmaka ika tajtoskej, sayoj ke oksekin kemaj. Yejua ika, maski tiktemouaj tikinpaleuiskej, amo tikintajtaniskej teisa tein ika mopinaujmatiskej (1 Tes. 4:11). Uelis panos ke keman aksa techtapouis tein kimachilia, amo tikuelitaskej tein techiluis. Sayoj ke moneki tikajsikamatiskej ke yejua ijkon momachilia. Yejua ika, moneki tikakiskej ika nejmachkayot uan amo niman titajtoskej (Mat. 7:1; Sant. 1:19).

20. ¿Toni tikitaskej itech okse tamachtilis?

²⁰ Ijkon kemej moneki tikinnextiliskej tokniuan ke tikinajsikamatij, no moneki tiknextiskej ke titeajsikamatij itech tanojnotsalis. ¿Keniuj uelis tikchiuaskej keman titanojnotsaskej uan tikinmachtiskej oksekin? Tikitaskej itech okse tamachtilis.