1, 2. ¿Akonimej uelis kipaleuiskej akin momachtijtok Biblia maj kiixtali moauis?

AMY, akin nemi Fiyi, kijtoj: “Semi nikuelitaya tein nimomachtijtoya itech Biblia”. Uan no kijtoj: “Nikmatia ke tein nimomachtijtoya katka tein melauak, sayoj ke amo nikchiuaya. Semi nechpaleuij maj nikchiuani tein nimomachtijtoya uan maj nimoauiani keman peuak nimosentilia iniuan tokniuan”. Tein kipanok Amy techmachtia se taman tein semi moneki: akin momachtijtok Biblia xa peuas kichiuas tein momachtia uan moauis komo nochin itech nechikol kipaleuiaj.

² Nochin tokniuan itech nechikol uelis tapaleuiskej maj akin momachtijtokej Biblia moauikan (Efes. 4:16). Se precursora akin monotsa Leilani uan nemi Vanuatu, kijtoua: “Miakej taltikpakneminij kijtouaj ke nochin akin nemij itech se xolal tapaleuiaj keman moskaltijtok se konetsin. Niknemilia ke no ijkon panoua keman se kinpaleuia taltikpakneminij maj mochiuakan itatojtokakauan Cristo. Miakpa, moneki maj nochin tokniuan itech nechikol kipaleuikan akin momachtijtok Biblia maj mochiua itekitikauj Jiova”. Keman moskaltijtok se konetsin, kiyolchikauaj uan kimachtiaj miak taman ichankauan, akin kuali mouikaj iniuan ichankauan uan tamachtianij. No ijkon, tokniuan uelis kipaleuiskej akin momachtijtok Biblia maj kiixtali moauis komo kiyolmajxitiaj, komo kiyolchikauaj uan komo kikauiliaj se kuali neskayot (Prov. 15:22).

3. ¿Toni techmachtia tein kijtojkej Ana, Dorín uan Leilani?

³ Komo tikmachtijtokej se taltikpaknenkej, ¿keyej moneki tikauaskej maj okseki tokniuan kipaleuikan? Maj tikitakan tein kijtoua  Ana, se precursora especial akin nemi Moldavia: “Se akin momachtijtok Biblia moneki maj kipaleuikan itech miak taman, uan akin kimachtia xa ouij kikisas kipaleuis itech nochi tein moneki”. Dorín, se precursor especial akin no tapaleuijtok Moldavia, kijtoua: “Miakpa, okseki tokniuan kijtouaj teisa tein kiyololinia akin nikmachtijtok, teisa tein nejua amo niknemilijka”. Leilani no kijtoua okse taman tein kinextia keyej moneki se kikauas maj tokniuan tapaleuikan: “Keman tokniuan kinextiliaj akin momachtijtok Biblia ke kitasojtaj uan ke ika motekipachouaj uelis kipaleuis maj kiajsikamati ke moajsi iniuan akin yekmelauj itekitikauan Jiova” (Juan 13:35).

4. ¿Toni tikitaskej itech nejin tamachtilis?

⁴ Sayoj ke xa timotajtaniaj: “¿Keniuj uelis nikpaleuis akin momachtijtok Biblia komo amo nejua nikmachtia?”. Itech nejin tamachtilis tikitaskej toni uelis tikchiuaskej keman se tokniuj techyoleua maj iuan titamachtitij ika Biblia uan keman se akin momachtijtok Biblia peua youi nechikolmej. No tikitaskej keniuj tokniuan tayekananij uelis kinpaleuiskej akin momachtijtokej Biblia maj kiixtalikan moauiskej.

5. ¿Toni moneki tikelnamikiskej keman se tokniuj techyoleua maj iuan titamachtitij?

⁵ Itech se nemachtil ika Biblia, tokniuj akin tamachtia yejua akin okachi moneki kipaleuis akin momachtijtok maj kiajsikamati iTajtol Dios. Komo tokniuj techyoleuak maj iuan titamachtitij, maj tikelnamikikan ke iuan tiajkej porin tikpaleuitoj (Ecl. 4:9, 10). Komo ijkon, ¿toni uelis tikchiuaskej komo tiknekij kuali titapaleuiskej?

6. ¿Keniuj uelis tikchiuaskej tein kijtoua Proverbios 20:18 keman iuan titamachtitij se tokniuj?

⁶ Maj achto kuali tiknemilikan toni tikijtoskej oso toni tikchiuaskej. Yekinika, maj tiktajtanikan tokniuj akin techyoleuak maj techtapoui seki taman tein techpaleuis maj tikixmatikan akin kimachtijtok (xikonixtajtolti Proverbios 20:18). Uelis tiktajtaniskej katiyejua itaneltokalis, kanachi xiuit kipia oso okseki taman. No uelis tiktajtaniskej katiyejua tamachtilis kiitatij uan toni kineki maj kiajsikamati itech nejon tamachtilis. No ueliskia tiktajtaniskej ox onkak teisa tein monekiskia oso amo monekiskia tikijtoskej oso tikchiuaskej, uan keniuj uelis tikyolchikauaskej akin kimachtijtok maj kiixtali kitekitilis Jiova. Melauj ke tokniuj akin tamachtia amo techtapouis nochi, sayoj ke tein techiluis semi techpaleuis keman iuan tiaskej. Se misionera akin monotsa Joy kintapouia nochi nejin tokniuan akin iuan tamachtitij. Yejua kijtoua: “Nejin kipaleuia tokniuj akin nouan youi maj kineki kipaleuis akin nikmachtijtok uan maj kimati toni kijtos keman timomachtijtoskej”.

7. ¿Keyej moneki achto kuali timomachtiskej?

⁷ Keman se tokniuj techyoleuas maj iuan  titamachtitij, kuali yeskia maj achto timomachtikan tein tikitaskej (Esd. 7:10). Dorín, akin ika titajtojkej itech párrafo 3, kijtoj: “Niktasojkamati maj tokniuj akin nouan youi kuali momachtiani achto, porin ijkon tein kijtos semi tapaleuis”. Uan no, tokniuj akin tamachtijtok uan tokniuj akin iuan yajki kikauiliskej se kuali neskayot akin kimachtijtokej porin xa kiitas ke achto kuali momachtijkej. Uan komo amo ueli timoyekmachtiaj nochi tamachtilis, maj tiktemokan katiyejua tanemililmej tayekantokej.

8. ¿Toni techpaleuis maj tikmatikan toni tikijtoskej keman tikchiuaskej netataujtil itech se nemachtil ika Biblia?

⁸ Netataujtil no semi tayekantok itech se nemachtil ika Biblia. Yejua ika, maj achto kuali tiknemilikan toni tikijtoskej komo tokniuj techiluia maj tikchiuakan netataujtil. Nejon techpaleuis maj tikmattokanya toni tikijtoskej (Sal. 141:2). Hanae, se tokniuj siuat akin nemi Japón, kielnamikiok inetataujtiluan se tokniuj siuat akin iuan yaya tokniuj akin kimachtiaya. Kijtoua: “Nikitaya ke semi kuali mouikaya iuan Jiova, uan niknekia nikchiuas kemej yejua. Uan no, keman nechtokaytiaya itech inetataujtiluan nikmachiliaya ke nechtasojtaya”.

9. Kemej kijtoua Santiago 1:19, ¿keniuj uelis tikpaleuiskej tokniuj akin tamachtito ika Biblia?

⁹ Maj tikpaleuikan tokniuj akin tamachtia. Se precursora especial akin monotsa Omamuyovbi uan nemi Nigeria, kijtoua: “Tokniuj akin kuali tepaleuia keman se tamachtia ika Biblia kuali kikaki tamachtilis. Uan no, maski kijtoua tein tapaleuis amo semi tajtoua porin kiajsikamati ke tokniuj akin kiyoleuak yejua akin kitemaka tamachtilis”. Komo ijkon, ¿kemanian monekiskia titajtoskej uan toni monekiskia tikijtoskej? (Prov. 25:11). Maj kuali tikakikan tein kijtoua tokniuj akin tamachtijtok uan tein kijtoua akin kimachtijtok (xikonixtajtolti Santiago 1:19). Komo tikchiuaj nejin, tikmatiskej toni tikijtoskej komo moneki. Melauj ke moneki kuali tikixejekoskej kemanian uelis titajtoskej, porin ijkon amo semi titajtoskej, amo tiktakotonaltiskej tokniuj uan amo ika titajtoskej okse taman. Sayoj ke uelis tikijtoskej se neskayot, tikchiuaskej se netajtanil oso tikijtoskej okse taman tein tapaleuis maj moajsikamati tein timomachtijtokej. Kemansa xa tiknemiliskej ke amo onkakok toni tikijtoskej itech tamachtilis, sayoj ke komo tikyolchikauaj akin momachtijtok uan ika timotekipachouaj, tikpaleuiskej maj kiixtali kitekitilis Jiova.

10. ¿Keniuj tein tikpanouanij uelis kipaleuis akin momachtijtok Biblia?

¹⁰ Maj tiktapouikan akin momachtijtok Biblia seki taman tein tikpanouanij. Komo tikitaj ke kipaleuis tein tikpanouanij, uelis tiktapouiskej keniuj tikixmatkej Jiova, toni tikchiujkej keman tikpiakej se ouijkayot uan keniuj techpaleuiani Jiova (Sal. 78:4, 7). Tein tiktapouiskej xa kipaleuis maj mochikaua itakuaujtamatilis, maj peua kichiua tein kipaleuis maj moaui uan  maj kimati toni kichiuas komo kipia se ouijkayot (1 Ped. 5:9). Gabriel, se precursor akin nemi Brasil, kielnamiki toni kipaleuij keman momachtijtoya Biblia: “Tein tokniuan nechtapouiayaj nechmatiltij ke Jiova kimati toni ouijkayomej tikpanouaj. Komo yejuan taxikojkej, nejua no uelis nitaxikos”.

11, 12. ¿Keyej moneki kuali tikinseliskej akin momachtijtokej Biblia uan peua youij nechikolmej?

¹¹ Akin momachtijtok Biblia peuas kichiuas tein momachtia uan kiixtalis moauis komo youi nochi nechikolmej. Nejon semi kipaleuis (Heb. 10:24,25). Keman yekinika yas se nechikol itech Kali kampa tiMosentiliaj xa yas porin kiyoleuak akin kimachtia. Keman ompa yetos, tinochin uelis tikyolchikauaskej maj kisentoka youi. ¿Keniuj uelis tikchiuaskej?

¹² Maj kuali tikselikan (Rom. 15:7). Komo tikchiuaj maj akin momachtijtok Biblia kuali momachili keman youi itech Kali kampa tiMosentiliaj, xa kinekis kisentokas yas. Maj kualtsin tiknojnotsakan keman tiktajpaloskej uan maj tikpaleuikan maj kinixmati okseki tokniuan, sayoj ke maj amo tikchiuakan maj amo kuali momachili. Maj amo tiknemilikan ke se tokniuj kiselijya uan ke kipaleuijtok. Akin kimachtia xa ayamo ajsi oso kichiujtok okseki taman. Maj kuali tikakikan uan maj tiknextikan ke ika timotekipachouaj. ¿Keniuj uelis kipaleuis tein tikchiuaskej? Maj tikitakan tein kijtoua Dimitri, akin moauij seki xiujmej achto uan axkan tapaleuijkej itech nechikol. Keman kielnamiki keman yekinika yajka se nechikol, kijtoua: “Nimochiak kaltenoj keman niajsik itech Kali kampa tiMosentiliaj uan semi niyolmouia. Se tokniuj takat nechitak uan nechyoleuak maj iuan nikalakini. Miakej nechtajpalokoj uan nejon semi nikmoujkaitak. Nochi nejon semi nikuelitak. Hasta niknekia maj mojmostaj mochiuanij nechikolmej. Amo keman nikpanotoya nejon”.

13. ¿Keniuj uelis tikinpaleuiskej akin momachtijtokej Biblia ika tein tikchiuaskej?

¹³ Maj tikauakan se kuali neskayot. Tein tikchiuaskej uelis tapaleuis maj akin momachtijtok Biblia kineltoka ke tein momachtijtok yejua tein melauak (Mat. 5:16). Vitali, se precursor akin tapaleuijtok Moldavia, kijtoua: “Keman nikitak keniuj nemiaj tokniuan itech nechikol, keniuj tanemiliayaj uan tein kichiuayaj, nikneltokak ke itaixpantijkauan Jiova yejuan taneltokalis tein melauak”.

14. ¿Keniuj toneskayo uelis kipaleuis akin momachtijtok Biblia maj kisentoka kichiua tein momachtia?

¹⁴ Komo akin momachtijtok Biblia kineki moauis, moneki kichiuas tein momachtijtok. Nejon xa ouij kikisas. Sayoj ke keman kiitas ke tejuan semi techpaleuia keman tikchiuaj tein Biblia kijtoua, xa no kinekis kichiuas (1 Cor. 11:1). Maj tikitakan ineskayo Hanae, akin ika titajtojkej itech párrafo 8. Yejua  kielnamiki: “Tokniuan kichiujtoyajya tein nejua nimomachtijtoya. Ininneskayo nechpaleuij maj nikinyolchikauani oksekin, maj nitetapojpoluiani uan maj niknextiani netasojtalis. Nochipa kuali ininka tajtouayaj oksekin. Uan nejua niknekia nikchiuas kemej yejuan”.

15. Ika tein kijtoua Proverbios 27:17, ¿keyej monekiskia kuali timouikaskej iniuan akin momachtijtokej Biblia uan youij nechikolmej?

¹⁵ Maj tiktemokan kuali timouikaskej iuan. Nochipa keman akin momachtijtok Biblia yas nechikolmej, maj tiknextikan ke ika timotekipachouaj (Filip. 2:4). Uelis tiktemoskej okachi tikixmatiskej. Xa ueliskia tiktajtaniskej keniuj yetokej ichankauan, keniuj kiyoui itech tekit oso itech inemachtil ika Biblia. Sayoj ke maj amo tiktajtanikan tein kichiuas maj mopinaujmati. No uelis tikiluiskej ke semi techyolpaktia tikitaskej ke mochikaujtok kichiuas tein momachtia. Nejon techpaleuis maj peua timouikakan iuan uan maj tikpaleuikan maj kiixtali moauis (xikonixtajtolti Proverbios 27:17). Hanae, akin axkan precursora regular, kijtoua keniuj momachiliaya keman peuak youi nechikolmej: “Kemej okachi nimouikaya iniuan tokniuan itech nechikol, okachi niknekia nias nechikolmej. Nochipa niaya maski semi nisioujtoya. Nikuelitaya nietos iniuan akin yankuixtok peujka iniuan nimouika uan nejon nechpaleuij maj amo nimouikaniok iniuan akin amo kitekitiliayaj Jiova. Kemej niknekia okachi kuali nimouikas iuan Jiova uan iniuan tokniuan, nikixtalij nimoauis”.

16. ¿Keniuj no uelis tikpaleuiskej akin momachtijtok Biblia maj kuali momachili itech nechikol?

¹⁶ Ijkon kemej akin momachtijtok Biblia kichiujtias seki taman tein momachtijtok, maj tikchiuakan maj kimachili ke no tikitaj kemej semej tokniuan akin moajsij itech nechikol. Nejin uelis tikchiuaskej komo tikyoleuaj maj touan kichiua seki taman (Heb. 13:2). Denís, se tokniuj takat akin tapaleuijtok Moldavia, kielnamiki tonalmej keman momachtijtoya Biblia uan kijtoua: “Miakpa, tokniuan techyoleuayaj nonamik uan nejua maj iniuan timosentilianij. Techyolchikauayaj keman techtapouiayaj keniuj kinpaleuijka Jiova. Iniuan timosentiliskej techpaleuij maj tiknekinij tiktekitiliskej Jiova uan maj senkis tikneltokanij ke satepan kualtsin tinemiskej”. Keman akin momachtijtok Biblia mochiuas tanojnotskej, uelis tikyoleuaskej maj touan tanojnotsati. Diego, se tokniuj takat kayot Brasil, kijtoua: “Miakej tokniuan nechyoleuayaj maj iniuan nitanojnotsati. Nejon nechpaleuij maj okachi kuali nikinixmatini. No nimomachtij miak taman uan nechpaleuij maj okachi nimotokiani iuan Jiova uan Jesús”.

17. ¿Keniuj tokniuan tayekananij uelis kinpaleuiskej akin momachtijtokej Biblia?

¹⁷ Maj iniuan tajtokan akin momachtijtokej Biblia. Tayekananij, keman nankinextiaj ke nankintasojtaj  akin momachtijtokej Biblia uan ke ininka nanmotekipachouaj, uelis nankinpaleuiskej maj kiixtalikan moauiskej. ¿Uelis iniuan nantajtoskej keman yaskej nechikolmej? Yejuan kiitaskej ke ininka nanmotekipachouaj komo nankielnamikij inintokay, okachiok keman peua tanankiliaj. ¿Kemansa uelis nanyaskej iuan se tokniuj akin kimachtiti se taltikpaknenkej? Nejin uelis semi kipaleuis akin tokniuj kimachtiti. Jackie, se precursora akin nemi Nigeria, kijtoua: “Miakej akin nikinmachtia amo ueli kineltokaj keman nikiniluia ke tokniuj akin nouan yajka keman nikinmachtito se tayekankej. Se takat akin nikmachtia iniuan ichankauan, nechiluij: ‘Nopastor amo keman kichiuaskia nejon. Yejua sayoj kinitati akin tominpiaj uan sayoj youi komo kitaxtauiaj’”. Axkan nejin takat yajtok nechikolmej.

18. ¿Keniuj tayekananij uelis kichiuaskej tein kijtoua 1 Pedro 5:2?

¹⁸ Maj kinpaleuikan tokniuan maj kuali tamachtikan uan maj kinyolchikauakan. Tayekananij, namejuan moneki nankinpaleuiskej tokniuan maj kuali tanojnotsakan uan maj kuali tamachtikan (xikonixtajtolti 1 Pedro 5:2). Komo se tokniuj kimouilia tamachtis keman iuan nanyouij, xikiluikan ke namejuan uelis nantamachtiskej. Jackie, akin achto ika titajtojkej, kijtoua: “Miakpa, tokniuan tayekananij ininka nechtajtaniaj akin nikinmachtia ika Biblia. Keman nimoajsi ika se ouijkayot keman nitamachtia, nechyolmajxitiaj”. Tayekananij uelis semi kinyolchikauaskej tokniuan (1 Tes. 5:11). Jackie no kijtoua: “Niyolpaki keman tayekananij nechyolchikauaj uan nechiluiaj ke kipatiuitaj tein nikchiua. Inintajtoluan kemej yeskiaj at sesek tein nechamikseuia keman semi tona. Inintajtoluan nechyolchikauaj porin nechpaleuiaj maj nikita ke nikchiujtok se kuali tekit uan maj okachi niyolpaki keman nitamachtia” (Prov. 25:25).

19. ¿Toni kichiuas maj semi tiyolpakikan?

¹⁹ Maski axkan xa amo akin tikmachtijtokej ika Biblia, uelis tikpaleuiskej se akin momachtijtok maj kiixtali moauis. Uelis tikpaleuiskej tokniuj akin tamachtiti keman tikijtoskej seki taman tein semi tapaleuis maski amo semi titajtoskej. Maj tiktemokan kuali timouikaskej iniuan akin momachtijtokej Biblia keman yaskej nechikolmej, uan maj tikinkauilikan se kuali neskayot. Uan tayekananij uelis kinyolchikauaskej akin momachtijtokej keman iniuan tajtoskej, uan no uelis kinyolchikauaskej tokniuan keman kinpaleuiskej maj kuali tamachtikan uan keman kiniluiskej ke kuali tein kichiuaj. Semi tiyolpakij keman tikitaj ke no tepitsin tikpaleuijkej se taltikpaknenkej maj peuani kitasojta toTajtsin Jiova uan maj kiixtaliani kitekitilis.