1. ¿Toni ouijkayomej tikpanouaj tiitekitikauan Jiova?

¿TIKPANOTOKEJ se ouijkayot? Xa se tokniuj itech nechikol techyolkokoj (Sant. 3:2). Oso xa akin iniuan timomachtiaj oso iniuan titekitij techpijpinaujtiaj porin tiktekitiliaj Jiova (1 Ped. 4:3, 4). Uan no, xa se tochankauj kitemoua maj amo tiakanok nechikolmej nion maj titanojnotsakanok (Mat. 10:35, 36). Komo nejon ouijkayot kichiua maj semi titajyouikan, xa tiknekiskej timosenkauaskej. Sayoj ke uelis titakuaujtamatiskej ke maski tein yeski ouijkayot tikpanoskej, Jiova techmakas tamatilis tein techpaleuis maj kuali tikixejekokan toni tikchiuaskej, uan chikaualis tein techpaleuis maj titaxikokan.

2. Kemej kijtoua Romanos 15:4, ¿keniuj uelis techpaleuis tein tikixtajtoltiaj itech iTajtol Dios?

² Jiova kichiuak maj itech Biblia moijkuilouani toni kichiujkej seki taltikpakneminij keman kipanokej ouijkayomej. ¿Keyej? Porin nejon neskayomej uelis techpaleuiskej, kemej kijtoj tatitanil Pablo itech Romanos 15:4 (xikonixtajtolti). Nejin neskayomej uelis techyolseuiskej uan techyolchikauaskej. Sayoj ke komo tiknekij maj techyolseui uan maj techyolchikaua amo sayoj moneki tikixtajtoltiskej Biblia, ta tein tikixtajtoltiaj moneki tikauaskej maj kipata tein tiknemiliaj uan tein tikmachiliaj. Keman amo tikmatiskej toni tikchiuaskej itech se ouijkayot, nejin naui taman uelis techpaleuis keman tikixtajtoltiskej Biblia: 1) maj tiktataujtikan Jiova, 2) maj tiknemilikan ke tejuan tikpanotokej tein tikixtajtoltijtokej, 3) maj tiknemilikan toni techmachtia uan 4) maj tikchiuakan. Axkan maj tikitakan keniuj tikuiskej nejin naui taman itech seki tajkuilolmej kampa ika motajtoua tekiuaj David uan tatitanil Pablo. Sayoj ke achto maj tikitakan toni kijtosneki sejse taman. *

3. ¿Toni moneki tikchiuaskej achto ke tikixtajtoltiskej Biblia, uan keyej?

 ³ 1) Maj tiktataujtikan Jiova. Keman tikixtajtoltitij Biblia, maj tikiluikan ke tiknekij tikitaskej keniuj uelis techpaleuis tein tikixtajtoltitij uan maj tiktajtanikan inepaleuil. Kemej neskayot, komo tikpanotokej se ouijkayot uan tiknekij tikmatiskej toni uelis tikchiuaskej, maj tiktajtanikan Jiova maj techpaleui maj tikajsikan itech iTajtol tayolmajxitilis tein techpaleuis (Filip. 4:6, 7; Sant. 1:5).

4. ¿Toni uelis techpaleuis maj tiknemilikan ke tejuan tikpanotokej tein tikixtajtoltiaj itech Biblia?

⁴ 2) Maj tiknemilikan ke tejuan tikpanotokej tein tikixtajtoltijtokej. Se inetetayokolil Jiova maj ueli kemej yeskia tikitakan seki taman ika totanemilil. Keman tikixtajtoltijtoskej Biblia, maj tiknemilikan ke ompa timoajsij uan ke tejuan taltikpaknenkej akin ika motajtoua itech nejon tajkuilolmej. Maj kemej yeskia tikitakan tein yejua kiitak uan maj tikmachilikan tein xa kimachilij.

5. ¿Itech toni uelis titanemiliskej, uan keniuj uelis tikchiuaskej?

⁵ 3) Maj tiknemilikan toni techmachtia. Tikchiuaj nejin keman kuali itech titanemiliaj tein tikixtajtoltiaj uan keman tiktemouaj keniuj uelis techpaleuis. Itech titanemiliskej tein tikixtajtoltiaj techpaleuia maj tikitakan keniuj mouika tein tikixtajtoltijkej ika tein tikmatiajya uan maj okachi kuali tikajsikamatikan. Keman tikixtajtoltiaj Biblia, sayoj ke amo itech titanemiliaj kemej yeskia keman sayoj tikitstokej se dibujo tein tatejtek, uan amo tiksajsalouaj. Keman itech titanemiliaj tein tikixtajtoltiaj, kemej yeskia tiksajsaloskiaj nejon dibujo uan ijkon uelis tikitaskej ajsitok. Techpaleuis maj itech titanemilikan tein tikixtajtoltiaj komo tiktemouaj itanankililuan netajtanilmej kemej nejin: “¿Keniuj kiyektalij ouijkayot tein kipiaya akin ika motajtojtok itech nejin tajkuilolmej? ¿Keniuj kipaleuij Jiova? ¿Keniuj uelis nechpaleuis maj nitaxiko tein nimomachtij itech nejin tajkuilolmej?”.

6. ¿Keyej moneki tikchiuaskej tein timomachtiaj?

⁶ 4) Maj tikchiuakan tein timomachtiaj. Jesús kijtoj ke komo amo tikchiuaj tein timomachtiaj tikchiujtoskiaj kemej se takat akin kichijchiua ichan kampa onkak xal. Maski semi tekiti, nenkaj tein kichiua. ¿Keyej? Porin keman chikauak taejekas uan chikauak kiouis, kali uetsis (Mat. 7:24-27). No ijkon, maski tikchiuaskej netataujtil, maski tiknemiliskej ke tejuan tikpanotokej tein tikixtajtoltijtokej, uan maski tiknemiliskej toni techmachtia, sayoj ke amo tikchiuaj tein timomachtiaj, nenkaj yeski porin totakuaujtamatilis amo mochikauas. Keman tikpanoskej ouijkayomej oso techixnamikiskej, amo titaxikoskej. Sayoj ke komo timomachtiaj uan tikchiuaj tein timomachtiaj, okachi kuali titaixpejpenaskej, okachi tiyolseujtoskej uan totakuaujtamatilis mochikauas (Is. 48:17, 18). Ika nejin naui taman maj tikitakan toni uelis techmachtis tein kipanok se tonal tekiuaj David.

7. ¿Akoni ika titajtotij?

⁷ ¿Techchiuilij tein amo kuali se akin kuali iuan timouikayaj oso se tochankauj? Komo kemaj, techpaleuis komo timomachtiaj tein kichiuak tekiuaj David keman Absalón, akin katka iokichpil, kiixnamikik uan kitemoj yejua mochiuas tekiuaj (2 Sam. 15:5-14, 31; 18:6-14).

8. ¿Toni uelis tikchiuaskej komo tiknekij maj Jiova techpaleui?

⁸ 1) Maj tiktataujtikan Jiova. Satepan ke tikixtajtoltiskej tajkuilolmej, maj tikiluikan Jiova keniuj timomachiliaj porin techchiuilijkej tein amo kuali (Sal. 6:6-9). Satepan, maj tiktajtanikan maj techpaleui maj tikajsikan  tayolmajxitilis tein techpaleuis maj tikmatikan toni tikchiuaskej.

9. ¿Toni panok iuan David uan Absalón?

⁹ 2) Maj tiknemilikan ke tejuan tikpanotokej tein tikixtajtoltijtokej. Maj itech titanemilikan tein panok uan maj tiknemilikan keniuj momachilij tekiuaj David. Miak xiujmej, Absalón kichiuak miak taman porin kinekia maj taltikpakneminij kitasojtanij (2 Sam. 15:7). Keman kiitak ke kitasojtayajya, kintitanik tapijpianij itech nochi xolal Israel maj kiniluitij taltikpakneminij maj kiselianij kemej inintekiuaj. Hasta kichiuak maj Ahitofel no kiixnamikini David, maski semi kuali mouikaya iuan David uan yejua akin kiyolmajxitiaya. Ompa, Absalón moixtalij kemej tekiuaj uan kitemojtinemik David porin kinekia kimiktis. Ijkuak, David xa semi mokokouaya (Sal. 41:1-9). Keman David kimatik tein Absalón kichiujtoya, kisak Jerusalén uan choloj. Satepan, keman itateuijkauan Absalón moteuijkej iniuan itateuijkauan David, tapolojkej uan Absalón kimiktijkej.

10. ¿Toni ueliskia kichiuas tekiuaj David?

¹⁰ Axkan maj tiknemilikan keniuj xa momachilij David. Maski semi kitasojtaya Absalón uan takuaujtamatia iuan Ahitofel, yejuan kiixnamikkej. Semi kiyolkokojkej uan hasta kinekiaj kimiktiskej. David ueliskia kinemilis ke oksekin akin no kuali iniuan mouikaya no kipaleuiayaj Absalón uan ueliskia amo iniuan takuaujtamatisok. Ueliskia sayoj itech tanemilis tein kimachiliaya uan ueliskia kitemos iselti cholos. Oso kemej amo semi kuali momachiliaya, ueliskia mosenkauas. Sayoj ke David amo kichiuak nejon, ta kixikoj nejon ueyi ouijkayot. ¿Toni kipaleuij maj taxiko?

11. ¿Toni kichiuak tekiuaj David keman kipanok nejon ueyi ouijkayot?

¹¹ 3) Maj tiknemilikan toni techmachtia. ¿Toni uelis techmachtis tein kipanok David? Uelis timotajtaniskej: “¿Toni kichiuak David tein ika kitemoj moyolchikauas?”. Maski mouia, amo kikauak maj nejon kitsakuiliani maj amo kichiuani nion teyi, nion maj amo kinextiani tamatilis uan maj ijsiujka kiixtaliani toni kichiuaskia, ta kitataujtij Jiova uan kitajtanij maj kipaleuiani. No kintajtanij akin kuali iniuan mouikaya maj kipaleuianij. Uan keman kiixtaliaya teisa, niman kichiuaya. Maski semi moyolkokojtoya, nejon amo kichiuak maj kualanini uan maj amo takuaujtamatiniok iniuan oksekin, ta kisentokak takuaujtamatik iuan Jiova uan iniuan akin kuali iniuan mouikaya.

12. ¿Keniuj Jiova kipaleuij David?

¹² ¿Keniuj Jiova kipaleuij David? Komo tiktemouaj okachi tikmatiskej tein panok keman David kipiak nejon ueyi ouijkayot tikmatiskej ke Jiova kimakak chikaualis tein kipaleuij maj taxiko (Sal. 3:1-8; encabezamiento). Keman David kiixtaliaya kichiuas teisa, Jiova kipaleuiaya. Uan Jiova no kinpaleuij akin kuali mouikayaj iuan David keman moteuijkej iniuan akin kiixnamikiaj.

13. ¿Keniuj uelis tikchiuaskej kemej David komo techchiuiliaj teisa tein techyolkokoua? (Mateo 18:15-17).

¹³ 4) Maj tikchiuakan tein timomachtiaj. Maj timotajtanikan: “¿Keniuj uelis nikchiuas kemej David?”. Uelis niman tiktemoskej tikyektaliskej ouijkayot tein tikpiaj. Maski tein yeski panok, ueliskia tikchiuaskej tein Jesús tayolmajxitij itech Mateo capítulo 18 (xikonixtajtolti Mateo 18:15-17). Sayoj ke moneki amo niman tikixtaliskej toni tikchiuaskej komo tikualantokej. Maj tiktajtanikan Jiova maj techpaleui maj tiyolseujtokan uan maj tikmatikan toni tikchiuaskej. Maj tiksentokakan titakuaujtamatikan iniuan akin kuali iniuan timouikaj uan maj tikauakan maj techpaleuikan (Prov. 17:17). Uan tein okachi moneki, maj tikchiuakan tein Jiova techyolmajxitia itech iTajtol (Prov. 3:5, 6).

14. ¿Kemanian uelis techyolchikauas tein kijtoua 2 Timoteo 1:12-16 uan 4:6-11, 17-22?

¹⁴ ¿Techixnamikij tochankauan porin tiktekitiliaj Jiova? ¿Oso tinemij itech se altepet kampa tekiuanij amo techkauaj maj tikchiuakan seki taman tein ika tikueyichiuaj Jiova oso senkis kiixtalijkej maj amo tikchiuakan nion teyi? Komo kemaj, techyolchikauas tikixtajtoltiskej 2 Timoteo 1:12-16 uan 4:6-11, 17-22. * Pablo kijkuiloj nejin tajkuilolmej keman tsaktoya.

15. ¿Toni uelis tiktajtaniskej Jiova?

¹⁵ 1) Maj tiktataujtikan Jiova. Achto ke tikixtajtoltiskej nejon tajkuilolmej, maj tikiluikan Jiova toni ouijkayot tikpiaj uan keniuj timomachiliaj. Maj nochi tiktapouikan. Ompa maj tikiluikan maj techpaleui maj tikajsikan itech nejon tajkuilolmej kampa ika motajtoua Pablo tayolmajxitilis tein techpaleuis maj tikmatikan toni tikchiuaskej.

16. ¿Toni kipanotoya Pablo?

¹⁶ 2) Maj tiknemilikan ke tejuan tikpanotokej tein tikixtajtoltijtokej. Maj tiknemilikan ke tejuan timoajsij itech ouijkayot tein Pablo kipanotok. Pablo tsaktok ompa Roma. Maski achto ipa kitsakkajya, axkan kimati ke kimiktitij. Seki tokniuan kikaujkej uan amo kipiaok chikaualis (2 Tim. 1:15).

17. ¿Toni ueliskia kichiuas Pablo?

¹⁷ Pablo ueliskia kinemilis ke komo amo mochikauani kiteixmatiltis iTajtol Dios, xa amo kitsakuaskiaj. Ueliskia kualantos iniuan takamej akin kikaujkaj akin nemiaj itech xolalmej tein moajsiaj Asia, uan ueliskia amo takuaujtamatisok iniuan oksekin akin kuali iuan mouikayaj. Sayoj ke amo kichiuak nejon. ¿Toni kipaleuij maj kisentokani takuaujtamatini iniuan akin kuali iuan mouikayaj uan iuan Jiova?

18. ¿Toni kichiuak Pablo keman kipanok nejon ouijkayot?

¹⁸ 3) Maj tiknemilikan toni techmachtia. Uelis timotajtaniskej: “¿Toni kichiuak Pablo tein ika kitemoj moyolchikauas?”. Maski kimatia ke amo uejkaua kimiktiskiaj, kisentokak kitayekanaltij kiueyitalis Jiova. Uan no, kisentokak kitemoj keniuj kinyolchikauas oksekin uan kinextij ke takuaujtamatia iuan Jiova keman nochipa kitataujtij (2 Tim. 1:3). Amo sayoj itech tanemilijtoya ke sekin kikaujkaj, ta kijtoj ke semi kitasojkamatia maj tokniuan akin kuali iuan mouikayaj uan amo kikaujkaj kipaleuianij ika netasojtalis. No kisentokak momachtij iTajtol Dios (2 Tim. 3:16, 17; 4:13). Uan tein okachi moneki, kimatia ke Jiova uan Jesús kitasojtayaj, ke amo kikaujkaj uan ke kitatiochiuiskiaj porin nochipa kintekitilij.

19. ¿Keniuj Jiova kipaleuij Pablo?

¹⁹ Jiova kinejmachtijka Pablo ke kitajyouiltiskiaj porin kitekitiliaya (Hech. 21:11-13). ¿Keniuj Jiova kipaleuij Pablo? Kinankilij inetataujtiluan uan kipaleuij maj kipia chikaualis (2 Tim. 4:17). No kimatiltij ke kiseliskia netetayokolil tein mochikaujka kiselis uan kichiuak maj akin kuali iuan mouikayaj kipaleuianij.

20. Ika tein kijtoj Pablo itech Romanos 8:38, 39, ¿keniuj uelis tiknextiskej ke no titakuaujtamatij kemej yejua?

²⁰ 4) Maj tikchiuakan tein timomachtiaj. Maj timotajtanikan: “¿Keniuj uelis nikchiuas kemej Pablo?”. Ijkon kemej kipanok Pablo, tikmatij ke no techtajyouiltiskej porin tiktekitiliaj Jiova (Mar. 10:29, 30). Amo tikauaskej Jiova keman tikpiaskej ouijkayomej komo tiksentokaj tiktataujtiaj uan nochipa timomachtiaj iTajtol. Amo moneki tikelkauaskej ke okachi tayekantok tikueyitaliskej Jiova. Komo tikchiuaj nejin, ijkon kemej Pablo, titakuaujtamatiskej ke Jiova amo keman techkauas uan ke nion akin uelis kichiuas maj amo techtasojtaok (xikonixtajtolti Romanos 8:38, 39; Heb. 13:5, 6).

21. ¿Toni kinpaleuij Aya uan Hector keman kipanokej seki ouijkayomej?

²¹ Tein kipanokej akin ininka motajtoua itech Biblia uelis techpaleuis maj titaxikokan itech tein yeski ouijkayot tein tikpanoskej. Kemej neskayot, Aya, se precursora akin nemi Japón, kijtoua ke ineskayo Jonás kipaleuij maj amo mouiok tanojnotsas kampa miakej panouaj. Hector, se telpoch akin nemi Indonesia akin kitekitilia Jiova maski itatuan amo, kijtoua ke ineskayo Rut kipaleuia maj kineki okachi kiixmatis Jiova uan maj kineki kitekitilis.

22. ¿Keniuj uelis okachi techpaleuis videos, tamouisolmej tein mokaki uan taxelol “Kikaujkej neskayot ika takuaujtamatilis”?

²² Videos, tamouisolmej tein mokaki uan taxelol “Kikaujkej neskayot ika takuaujtamatilis” techpaleuia maj kemej yeskia tikitakan tein tikixtajtoltiaj itech Biblia uan techyolchikauaj. * Achto ke tikitaskej, tikakiskej oso tikixtajtoltiskej nejon tamachtilis tein semi takuaujtamach, maj tiktajtanikan Jiova maj techpaleui maj tikajsikan tayolmajxitilis tein uelis techpaleuis itech tonemilis. Maj tiknemilikan ke tejuan takat oso siuat akin ika motajtojtok. Maj itech titanemilikan tein kichiuak uan keniuj Jiova kipaleuij maj taxikouani keman kipiak ouijkayomej. Ompa, maj tikchiuakan tein techmachtia. Satepan, maj tiktasojkamatilikan Jiova nepaleuil tein techmakani uan maj tiknextikan ke timotasojkamatij keman tiktemoskej tikinyolchikauaskej uan tikinpaleuiskej oksekin.

23. Kemej kijtoua Isaías 41:10, 13, ¿toni kijtoua Jiova ke kichiuas?

²³ Kemej Satanás taixyekantok nikan taltikpak, uelis tikpanoskej uejueyi ouijkayomej uan kemansa amo tikmatiskej toni tikchiuaskej (2 Tim. 3:1). Sayoj ke amo moneki timotekipachoskej nion timouiskej porin Jiova kimati toni tikpanotokej. Keman tikpanouaj ouijkayomej, yejuatsin kijtoua ke techpaleuis ika iyekmay tein kipia miak chikaualis (xikonixtajtolti Isaías 41:10, 13). Senkis titakuaujtamatij ke Jiova techpaleuis uan ke itech Biblia tikajsiskej chikaualis tein techpaleuis maj titaxikokan.