1, 2. ¿Keyej tein kichiuak Pablo uelis kinpaleuis tokniuan tayekananij itech nejin tonalmej?

 TATITANIL Pablo semi kintasojtaya tokniuan uan yejua ika semi mochikauak kinpaleuis (Hech. 20:31). Yejua ika semi kitasojtayaj. Kemej neskayot, se tonal keman tayekananij ompa Éfeso kimatkej ke amo oksepa kiitaskiajok “mochojchoktijke” (Hech. 20:37). No ijkon, tayekananij itech nejin tonalmej kintasojtaj tokniuan uan semi mochikauaj kinpaleuiskej (Filip. 2:16, 17). Sayoj ke kemansa no kipanouaj seki ouijkayomej. ¿Toni uelis kinpaleuis?

² Tokniuan tayekananij akin kipiaj miak tekit semi kinpaleuis komo kiitaj tein kichiuak Pablo (1 Cor. 11:1). Yejua amo uelia kichiuaya tein kichiuaj ángeles, ta katka se taltikpaknenkej tajtakolej akin kemansa monekia semi mochikauas uan ijkon ueliskia kichiuas tein kuali (Rom. 7:18-20). Maski kipiak miak ouijkayomej, amo mosenkauak uan kisentokak yolpakik. Komo tayekananij kichiuaj kemej Pablo, uelis kisentokaskej kitekitiliskej Jiova ika yolpakilis maski kipiaskej ouijkayomej. Maj tikitakan keniuj uelis kichiuaskej.

3. ¿Toni ika titajtoskej itech nejin tamachtilis, uan toni techmachtis?

³ Itech nejin tamachtilis ika titajtoskej naui taman tein xa ouij kinkisa kichiuaskej tokniuan tayekananij: 1) kixeloskej tiempo para tanojnotsaskej uan kichiuaskej okseki tekimej tein kipiaj, 2) kixeloskej tiempo para kinyolchikauaskej tokniuan, 3) amo mosenkauaskej maski mopolouaj uan 4) tekitiskej iniuan oksekin akin no tajtakolejkej. Timomachtiskej keniuj Pablo kiixnamikik sejse ouijkayot uan keniuj tayekananij uelis kichiuaskej kemej yejua.

4. ¿Keyej ueliskia ouij kinkisas tokniuan tayekananij kitayekanaltiskej tanojnotsalis?

⁴ Keyej ouij nejin. Tokniuan tayekananij amo sayoj moneki kikauaskej se kuali neskayot itech tanojnotsalis, ta no moneki kichiuaskej okseki tekimej. Maj tikitakan seki taman tein kichiuaj. Kemansa moneki kiixyekanaskej nechikol tein mochiua itajkotian semana oso kiixyekanaskej Nemachtil ika Biblia itech nechikol. Uan no, moneki kipanoltiskej okseki tamachtilismej oso tanojnotsmej. No kixelouaj miak tiempo para kinmachtiskej tokniuan tapaleuianij uan kinyolchikauaskej tokniuan (1 Ped. 5:2). Seki tayekananij tapaleuiaj keman mochijchiuaj uan moyektaliaj Kalmej kampa tiMosentiliaj uan okseki kalmej kampa titaueyichiuaj. Sayoj ke maski kichiuaj nochi nejin, tokniuan tayekananij okachi kitayekanaltiaj kiteixmatiltiskej iTajtol Dios, ijkon kemej kichiuaj nochin tokniuan tanojnotsanij (Mat. 28:19, 20).

5. ¿Toni kuali neskayot kikauak Pablo itech tanojnotsalis?

⁵ Tein kichiuak Pablo. Itech Traducción del Nuevo Mundo itech Filipenses 1:10 kinextia keyej Pablo semi kuali tanojnotsaya. Itech nejin tajkuilol tayolmajxitij nejin: “Xikyekitakan toni okachi tayekantok”. Yejua no kichiuak tein tayolmajxitij. Pablo kimakakej se tekit: kiteixmatiltis iTajtol Dios. Uan yejua nejon kitayekanaltij miak xiujmej. Yejua kiteixmatiltij iTajtol Dios senteixtenoj uan kajkalpan (Hech. 20:20). Amo sayoj tanojnotsak seki horas oso sayoj se tonal itech semana, ta nochipa tanojnotsaya keman kiitaya ke uelia. Kemej neskayot, se tonal keman Pablo kinchixtoya seki tokniuan ompa Atenas, ika kinnojnotsak iTajtol Dios seki taltikpakneminij akin semi kinixmatiaj uan sekin kuali kikakkej (Hech. 17:16, 17, 34). Hasta keman tsaktoya ichan, kinnojnotsaya ika iTajtol Dios nochin akin kinitaya (Hech. 28:16-24; Filip. 1:13, 14).

6. ¿Keniuj kinmachtij Pablo okseki tokniuan?

⁶ Pablo kuali kikuia itiempo porin nochipa kinyoleuaya oksekin maj iuan tanojnotsatij. Kemej neskayot, keman yekinika yajki tanojnotsato itech okseki altepemej, kiyoleuak Juan Marcos, uan keman ika ojpatika yajki, kiyoleuak Timoteo (Hech. 12:25; 16:1-4). Mochikauak kinmachtis nejin takamej keniuj tapaleuiskej maj kuali motekiti itech se nechikol, keniuj kuali taixyekanaskej uan keniuj kuali tamachtiskej (1 Cor. 4:17).

7. ¿Keniuj tokniuan tayekananij uelis kichiuaskej tein Pablo tayolmajxitij itech Efesios 6:14, 15?

⁷ Tein techmachtia. Tokniuan tayekananij amo sayoj uelis kichiuaskej kemej Pablo keman tanojnotsaj kajkalpan, ta no keman tanojnotsaj nochipa keman kiitaj ke ueli (xikonixtajtolti Efesios 6:14, 15). Kemej  neskayot, uelis tanojnotsaskej keman youij takouatij oso kampa tekitij. Oso komo tapaleuijtokej maj mochijchiua se kali kampa titaueyichiuaj, uelis kinnojnotsaskej akin ompakauin nemij uan akin kintanamakiltiaj. Uan ijkon kemej kichiuak Pablo, keman tanojnotsaj no uelis kinmachtiskej oksekin, kemej tokniuan tapaleuianij.

8. ¿Toni moneki kichiuas kemansa se tokniuj tayekankej?

⁸ Tokniuan tayekananij amo monekiskia kikauaskej maj nochi tekimej tein kipiaj itech nechikol oso itech circuito kichiua maj amo ueli tanojnotsakanok. Komo kinekij kichiuaskej nochi tein moneki, kemansa xa monekis amo kiseliskej okachi tekimej ke tein kipiajya. Satepan ke itech tanemiliskej nejin uan kichiuaskej netataujtil, xa kiitaskej ke komo kichiuaj okse tekit amo uelis kichiuaskejok tein okachi moneki, kemej taueyichiuaskej kemej kalyetouanij nochi semanas, okachi tanojnotsaskej oso kinmachtiskej ininkoneuan keniuj uelis tanojnotsaskej. Sekin ouij kinkisa kiixtopeuaskej keman kinmakaj okseki tekimej, sayoj ke Jiova kiajsikamati ke kemej kinekij kiyekchiuaskej tekimej tein kipiaj, amo ueli kiseliaj okseki.

9. Kemej tokniuan tayekananij kipiaj miak tekit, ¿toni xa ouij kinkisa kichiuaskej?

⁹ Keyej ouij nejin. Kemej tinemij itech itamian tonalmej tiitekitikauan Jiova tikpiaj miak ouijkayomej. Yejua ika tinochin moneki maj techyolchikauakan, maj techpaleuikan uan maj techyolseuikan. Kemansa seki tokniuan moneki maj kinpaleuikan uan ijkon amo kichiuaskej teisa tein amo kuali (1 Tes. 5:14). Tein melauj, tokniuan tayekananij amo uelis kichiuaskej maj amo tikpiakanok ouijkayomej. Sayoj ke Jiova kineki maj mochikauakan kinyekpiaskej uan kinyolchikauaskej itekitikauan. ¿Keniuj tayekananij uelis kinpaleuiskej tokniuan maski kipiaj miak tekit?

10. Kemej kijtoua 1 Tesalonicenses 2:7, ¿keniuj Pablo kinpaleuij tokniuan?

¹⁰ Tein kichiuak Pablo. Yejua nochipa kitemouaya kiniluis tokniuan tein kuali tein kichiuayaj uan kinyolchikauaya. Semi kuali komo tokniuan tayekananij no ijkon kichiuaj uan kinnextiliaj tokniuan ke kintasojtaj (xikonixtajtolti 1 Tesalonicenses 2:7). Pablo senkis kiniluij tokniuan ke Jiova uan yejua semi kintasojtayaj (2 Cor. 2:4; Efes. 2:4, 5). Kinitaya kemej itasojikniuan uan kixelouaya tiempo iniuan yetos. Kinextiaya ke iniuan takuaujtamatia keman kiniluiaya tein kitekipachouaya uan tein ouij kikisaya kichiuas (2 Cor. 7:5; 1 Tim. 1:15). Pablo amo sayoj itech tanemilijtoya kuejmolmej tein yejua kipiaya, ta kitemouaya keniuj kinpaleuis tokniuan.

11. ¿Keyej tatitanil Pablo kinyolmajxitiaya tokniuan?

¹¹ Kemansa, Pablo monekik kinyolmajxitis tokniuan. Sayoj ke amo kichiuak porin kualantoya, ta porin yekmelauj ininka motekipachouaya  uan amo kinekia maj mokuejmolkalakianij. Kitemouaya maj amo ouij kiajsikamatinij tein kinyolmajxitiaya uan maj kichiuanij. Kemej neskayot, keman kintajkuilouilij tokniuan akin nemiaj Corinto senkis kiniluij tein monekia kichiuaskej. Sayoj ke satepan kititanik Tito, porin kinekia kimatis keniuj kiselijkaj tein kinijkuilouilijka. ¡Uan semi yolpakik keman kimatik ke kikakkej uan kichiujkej tein kinyolmajxitijka! (2 Cor. 7:6, 7).

12. ¿Keniuj tayekananij uelis kinyolchikauaskej tokniuan?

¹² Tein techmachtia. Tokniuan tayekananij uelis kichiuaskej kemej Pablo keman kixeloskej tiempo yetoskej iniuan tokniuan. Uelis kichiuaskej nejon komo ajsij achto ke peuas nechikol uan kitemouaj iniuan tajtoskej tokniuan. Miakpa sayoj moneki seki minutos uan ijkon kiyolchikauaskej se tokniuj uan kinextiliskej ke kitasojtaj (Rom. 1:12; Efes. 5:16). Tayekananij akin kichiuaj kemej Pablo kikuij Biblia uan ika kinyolchikauaj tokniuan uan kinmatiltiaj ke Jiova kintasojta. Uan no, kinnextiliaj ke kintasojtaj keman kitemouaj iniuan tajtoskej uan keman kiniluiaj tein kuali tein kichiuaj. Keman se tayekankej kiyolmajxitis se tokniuj, nochipa moneki kichiuas ika iTajtol Dios. Senkis kiluia tein moneki kichiuas, sayoj ke kualtsin kinojnotsa porin kineki maj tokniuj kikaki tayolmajxitilis (Gál. 6:1).

13. ¿Keniuj uelis kiitas se tokniuj tayekankej inepololuan?

¹³ Keyej ouij nejin. Tokniuan tayekananij tajtakolejkej, yejua ika no mopolouaj ijkon kemej tinochin (Rom. 3:23). Kemansa semi moneki mochikauaskej uan ijkon kiitaskej ininnepololuan kemej moneki. Sekin xa amo kuali momachiliaj porin semi itech tanemiliaj ininnepololuan. Oksekin xa kinemiliaj ke ininnepololuan amo uejueykej uan ke amo moneki kipataskej nion teyi.

14. Kemej kijtoua 2 Corintios 4:7, ¿Keniuj yolyemanilis kipaleuij Pablo maj amo semi itech tanemiliani inepololuan?

¹⁴ Tein kichiuak Pablo. Kemej katka yolyemanik kiajsikamatia ke iselti amo ueliskia kichiuas tein kuali. Kimatia ke monekia maj Jiova kipaleui. Achto semi kintajyouiltijka tokniuan. Sayoj ke satepan kiajsikamatik ke amo kuali tein kichiujka uan kiixtalij senkis mopatas (1 Tim. 1:12-16). Jiova kipaleuij maj mochiua se tayekankej akin teikneliaya, teajsikamatia uan katka yolyemanik. Kimatia ke miakpa mopolouaya sayoj ke amo nochipa itech tanemilijtoya nejon, ta takuaujtamatia ke Jiova kitapojpoluiskia (Rom. 7:21-25). Kimatia ke ipa mopoloskia, yejua ika mochikauak okachi kuali kinextis ikualneskayouan Cristo, uan ika yolyemanilis mokauak maj Jiova kipaleui maj kichiua tekit tein yejuatsin  kimakaka (1 Cor. 9:27; xikonixtajtolti 2 Corintios 4:7).

15. ¿Keniuj moneki kiitas se tokniuj tayekankej inepololuan?

¹⁵ Tein techmachtia. Tokniuan takamej kinmakaj tekit kemej tayekananij amo porin amo keman mopolouaj, sayoj ke Jiova kineki maj kiitakan itech toni mopolouaj uan maj kinextikan ikualneskayouan Cristo (Efes. 4:23, 24). Keman tayekananij momachtiskej Biblia moneki kiitaskej toni moneki kipataskej. Komo ijkon kichiuaj, Jiova kinpaleuis maj yolpakikan uan maj kuali kichiuakan tekit tein kinmakatok (Sant. 1:25).

16. ¿Toni uelis panos komo tayekananij sayoj kiitaj ininnepololuan tokniuan?

¹⁶ Keyej ouij nejin. Keman tayekananij tekitij iniuan tokniuan xa okachi niman kiitaj ininnepololuan. Komo amo moyekpiaj xa uelis niman kualaniskej, amo kinnextiliskej tokniuan ke kintasojtaj oso kinijijtoskej. Pablo kiniluij tokniuan ke yejua nejon tein Satanás kineki maj kichiuakan (2 Cor. 2:10, 11).

17. ¿Keniuj kinitaya Pablo tokniuan?

¹⁷ Tein kichiuak Pablo. Yejua nochipa kiitaya tein kuali tein kichiuayaj tokniuan. Nejon amo kijtosneki ke amo kiitaya ke mopolouayaj porin kemansa ininnepololuan kichiuayaj maj amo kuali momachiliani. Sayoj ke kimatia ke keman aksa mopolouaya, amo kijtosnekia ke amo yolkuali katka. Kintasojtaya tokniuan uan okachi kiitaya ininkualneskayouan. Uan komo kiitaya ke se tokniuj ouij kikisaya kichiuas tein kuali, niman kinemiliaya ke yekmelauj kinekia kichiuas tein kuali uan ke sayoj monekia maj tepitsin kipaleuikan.

18. ¿Toni techmachtia kemej Pablo kinpaleuij Evodia uan Síntique? (Filipenses 4:1-3).

¹⁸ Kemej neskayot, maj tikitakan keniuj Pablo kinpaleuij ome tokniuan siuamej itech nechikol ompa Filipos (xikonixtajtolti Filipenses 4:1-3). Nesi ke Evodia uan Síntique amo kuali mouikayaj xa porin panoka teisa tein kichiujka maj mokualantianij. Pablo amo kinajuak nion kinijijtoj, ta okachi kiitak ininkualneskayouan uan ke miak xiujmejya kitekitilijtoyaj Jiova. Kimatia ke Jiova kintasojtaya. Kemej kiitaya tein kuali tein kichiuayaj, kinyolchikauak maj kiyektalianij kuejmol tein kipiayaj uan maj oksepa kuali mouikanij. Kemej Pablo nochipa kiitaya ininkualneskayouan tokniuan, kipaleuij maj kisentokani yolpakini uan maj kisentokani kuali mouikani iniuan tokniuan itech nejon nechikol.

19. 1) ¿Toni kinpaleuis tayekananij maj kiitakan ininkualneskayouan tokniuan? 2) ¿Toni mitsonmachtia taixkopin kampa nesi se tokniuj tayekankej akin tachipaujtok itech Kali kampa tiMosentiliaj?

¹⁹ Tein techmachtia. Tokniuan tayekananij, xikitakan ininkualneskayouan tokniuan. Maski tajtakolejkej, no kipiaj kualneskayomej tein semi kualtsitsin (Filip. 2:3). Tein melauj, kemansa monekis nankimelauaskej se tokniuj.  Sayoj ke, ijkon kemej Pablo, ximochikauakan amo sayoj nankiitaskej keyej nankimelauaj. Okachi xikitakan ke nejon tokniuj kitasojta Jiova, kinextiani taxikolis uan ke uelis kichiuas tein kuali. Tayekananij akin kiitaj ininkualneskayouan tokniuan tapaleuia maj itech nechikol nochin tokniuan motasojtakan.

20. ¿Toni kinpaleuis tokniuan tayekananij maj kisentokakan kichiuakan kemej Pablo?

²⁰ Tokniuan tayekananij semi kinpaleuis komo kisentokaj momachtiaj tein kichiuak Pablo. Kemej neskayot, itech Índice de las publicaciones Watch Tower uelis tikontemos kampa kijtoua “Pablo”, uan ompa kampa kijtoua “ejemplo para los ancianos”. Keman tionmomachtijtos nejin, ueliskia tionmotajtanis: “¿Keniuj tein kichiuak Pablo nechpaleuia maj niksentoka nikchiua ika yolpakilis tekit kemej tayekankej?”.

21. ¿Toni uelis senkis kineltokaskej tayekananij?

²¹ Tokniuan tayekananij, xikelnamikikan ke Jiova amo kichia amo keman ximopolokan, ta kineki xiksentokakan xiktekitilikan (1 Cor. 4:2). Jiova kipatiuitak nochi tein Pablo kichiuak uan porin amo keman kikauak. Uelis senkis nankineltokaskej ke Jiova no kipatiuita tein nankichiuaj, porin kemej kijtoua Hebreos 6:10, yejuatsin “amo keman kelkauatiu de keniu namejuan nanmotekitiltijke para Dios. Uan [...] keniu nankitasojtajtinemij Dios kuak namejuan nankinpaleuijtiualayaj in taneltokani yolchipauke. Uan namejuan nankinpaleuijtiyoue ok”.