1. ¿Toni xa kinemiliaj seki itekitikauan Jehová?

 ¡SEMI kualtsin tikmatiskej ke “Jehová kiyolpaktia tein kichiuaj itekitikauan”! (Sal. 149:4). Sayoj ke, kemansa xa sekin moyolkokouaj uan motajtaniaj: “Nikmati ke Jehová yolpaki ika tein kichiua ixolal, sayoj ke ¿no yolpaki ika tein nejua nikchiua?”. Ne uejkauj miakej itekitikauan Jehová no kinouijmakaya kineltokaskej ke kiyolpaktiayaj toDios (1 Sam. 1:​6-10; Job 29:​2, 4; Sal. 51:11).

2. ¿Akonimej ueli kiyolpaktiaj Jehová?

² Biblia kiyekijtoua ke maski titajtakolejkej uelis tikyolpaktiskej Jehová. ¿Toni moneki tikchiuaskej? Moneki tiknextiskej ke titakuaujtamatij iuan Jesucristo uan timoauiskej (Juan 3:16). Ijkon tiknextiskej ke timoyolpatakej uan ke timotenkaujkej iuan Dios ke tikchiuaskej tein kiyolpaktia (Hech. 2:38; 3:19). Jehová semi yolpaki keman tikchiuaj nejin para kuali timouikaskej iuan. Komo timochikauaj tikchiuaskej tein timotenkaujkej keman timotemaktijkej, tikyolpaktiskej Jehová uan kuali iuan timouikaskej (Sal. 25:14).

3. ¿Toni tiknankiliskej itech nejin tamachtilis?

³ Sayoj ke, ¿keyej sekin kemansa kinemiliaj ke amo kiyolpaktiaj Jehová? ¿Keniuj technextilia ke tikyolpaktiaj? ¿Uan toni techpaleuis maj tikneltokakan ke tikyolpaktiaj?

¿KEYEJ SEKIN KINEMILIAJ KE AMO KIYOLPAKTIAJ JEHOVÁ?

4, 5. Maski kemansa tikmachiliaj ke amo teyi kuali tikchiuaj, ¿toni tikyekmatij?

⁴ Timiakej desde ke katkaj tipilimejok tikmachilianij ke amo akin techtasojta (Sal. 88:15). Se tokniuj akin monotsa Adrián kijtoua: “Nochipa niknemiliani ke amo akin nechtasojta. Nikelnamiki ke keman katka niokichpil, nochipa keman niktataujtiaya Jehová nikiluiaya maj nochankauan  ueli nemikan itech xochital, sayoj ke no niknemiliaya ke nejua amo nechnamikia ompa ninemis”. Tony kijtoua keniuj kiiskaltijkej itatuan akin amo itaixpantijkauan Jehová: “Amo keman nechiluijkej ke yolpakiaj ika tein nikchiuaya, nion ke nechtasojtayaj. Kichiuayaj maj nikmachili ke amo keman nikyekchiuaya teisa”.

⁵ Komo kemansa tiknemiliaj ke amo teyi kuali tikchiuaj, maj tikelnamikikan ke yejua Jehová akin kichiuak maj tipouikan itech ixolal (Juan 6:44). Maski tejuan amo tikmatij, yejua kuali kimati toni kualtsitsin taman tiknextiaj uan kimati keniuj yekmelauj titamatij (1 Sam. 16:7; 2 Crón. 6:30). Yejua ika keman techiluia ke techtasojta, melauj nejon (1 Juan 3:​19, 20).

6. ¿Keniuj momachiliaya Pablo keman kielnamikia ke mopolojka?

⁶ Sekin xa tiksentokaj timotajtakoltiaj ika tein amo kuali tein tikchiujkej achto ke timomachtiskiaj Biblia (1 Ped. 4:3). Oksekin maski miak xiujmejya kitekitilianij Jehová, moneki kisentokaskej kiixnamikiskej tein amo kuali tein kinejnekij. ¿Uan tejuatsin? ¿Tikonmachilia ke Jehová ayamo mitsontapojpoluia? Komo ijkon mitsonpanoua, semi mitsonyolchikauas tikonmatis ke oksekin itekitikauan Jehová ne uejkauj no ijkon momachiliayaj. Kemej tatitanil Pablo, akin kijtoj ke semi teikneltij katka porin semi mopolouaya (Rom. 7:24). Maski moyolpatakaya uan moauijkaya, kisentokaya kinemiliaya ke ‘okachi amo ueyichiujkej katka ke okseki tatitanilmej’ uan ke yejua ‘akin okachi ueyitajtakolej’ katka (1 Cor. 15:9; 1 Tim. 1:15).

7. ¿Toni uelis tikneltokaskej komo timoyolpatakejya?

⁷ ToTajtsin kijtoua ke techtapojpoluis komo timoyolpataj (Sal. 86:5). Yejua ika, komo yekmelauj timoyolpatakejya, uelis tikneltokaskej ke Jehová techtapojpoluijya (Col. 2:13).

8, 9. ¿Toni techpaleuis maj tikitakan ke tein tikchiuaj kiyolpaktia Jehová?

⁸ Tinochin tiknekij kuali tiktekitiliskej Jehová. Sayoj ke oksekin kimachiliaj ke maski semi mochikauaskej ipa amo uelis kiyolpaktiskej Jehová. Amanda kijtoua: “Nochipa niknemiliani ke komo nikneki nikyolpaktis Jehová moneki okachi niktekitilis. Yejua ika miakpa nimochikaua nikchiuas teisa maski amo niueliok. Uan keman amo ueli nikchiua, niknemilia ke amo ueli nikyolpaktia Jehová”.

⁹ ¿Toni techpaleuis maj amo tiknemilikanok ke amo ueli tikyolpaktiaj Jehová? Maj tikelnamikikan ke amo keman techtajtania tein amo ueli tikmakaj. Yeski miak oso tepitsin tein ueli tikchiuaj, yejua semi kitasojkamati. No maj ininka titanemilikan akin kuali kitekitilijkej Jehová. Kemej tein kipanok Pablo. Yejua semi tekitik uan miak xiujmej uejka yajtinemik uan tapaleuij maj mochiuanij miak nechikolmej. Satepan kitsakkej, uan amo uelikok tanojnotsak kemej achto. ¿Amo kiyolpaktiayaok Jehová nejon? Kemaj kiyolpaktiaya. Pablo kisentokak kichiuak tein uelia uan Jehová kisentokak kitatiochiuij (Hech. 28:​30, 31). No ijkon tejuan amo nochipa uelis tiktekitiliskej Jehová kemej tiknekiskiaj, sayoj ke Dios kiita keyej tikchiuaj. Axkan tikitaskej seki taman keniuj Jehová kinextia ke tikyolpaktiaj.

¿KENIUJ KINEXTIA JEHOVÁ KE KIYOLPAKTIA TEIN TIKCHIUAJ?

10. ¿Keniuj techiluia Jehová ke yolpaki ika tein tikchiuaj? (Juan 16:27).

¹⁰ Technextilia ika Biblia. Jehová semi kiuelita kinnextilis itekitikauan  ke kintasojta uan ke kiyolpaktiaj. Itech Biblia ojpa moijtoua ke kiluij Jesús ke katka iKonetsin akin semi kitasojtaya uan ke semi kiyolpaktiaya (Mat. 3:17; 17:5). ¿Tikonuelitaskia maj Jehová mitsonilui ke yolpaki ika tein tikonchiua? Axkan Jehová amo techualnojnotsa desde iluikak. Sayoj ke kemaj technojnotsa ika iTajtol. Keman tikixtajtoltiaj tein Jesús kiniluij imomachtijkauan, tikmachiliaj kemej yeskia Jehová techiluijtoskia tejuan (xikonixtajtolti Juan 16:27). Jesús kichiuak kemej iTajtsin. Yejua ika, keman tikitaj ke Jesús kiniluij imomachtijkauan akin amo keman kikaujkej ke kintasojtaya maski mopolouayaj, uelis tiknemiliskej ke Jehová no techiluijtok nejon (Juan 15:​9, 15).

11. Keman titajyouijtoskej, ¿keyej maj amo tiknemilikan ke nejon kijtosneki ke amo tikyolpaktiaj Dios? (Santiago 1:12).

¹¹ Technextilia ika tein kichiua. Jehová kineki techpaleuis, yejua ika techmaka tein ika timoixpanoltiskej. Sayoj ke kemansa kikaua maj techpano tein amo kuali, ijkon kemej kipanok Job (Job 1:​8-11). Keman techpanos nejon, maj amo tiknemilikan ke amo tikyolpaktiaj Dios, ta ijkuak uelis tiknextiskej ke tiktasojtaj uan ke iuan titakuaujtamatij (xikonixtajtolti Santiago 1:12). Uan keman tikpanotoskej se ouijkayot, tikitaskej keniuj semi techpaleuia uan techtasojta para maj ueli titaxikokan.

12. ¿Toni techmachtia tein kipanok Dimitri?

¹² Maj tikitakan tein kipanok Dimitri, se tokniuj de Asia. Yejua amo kipiayaok tekit. Kemej panok miak metsti uan amo kiajsia okse tekit, kiixtalij okachi tanojnotsas para kinextilis Jehová ke iuan takuaujtamatia. Maski kichiuak nejon, panok miak metsti uan kisentokaya amo kipiaya tekit. Satepan kokolispeuak uan uetstoya. Yejua ika peuak kinemilia ke amo katka se kuali tetat nion se kuali tetakauj uan ke amo kiyolpaktiaya Jehová. Sayoj ke se youak, isiuapil kiuikilij se amat kampa ijkuiliujtoya Isaías 30:15: “Nankipiaskej chikaualis komo nanyolseujtokej uan komo nantakuaujtamatij”. Uan no kiluij: “Paj, keman titayokoxtos, xikelnamiki tein kijtoua nejin texto”. Dimitri kiitak ke kemej Jehová kinpaleuijtoya, ichankauan kipiayaj tein kimajseuaskej, tein motaliliskej uan kani  nemiskej. Yejua kijtoua: “Sayoj monekia maj niksentoka niyolseujto uan maj nitakuaujtamati iuan Jehová”. Komo no ijkon mitsonpanotok, uelis tikonneltokas ke Jehová moka motekipachoua uan ke mitsonpaleuis xiontaxiko.

13. ¿Keniuj Jehová no uelis technextilis ke techtasojta?

¹³ Technextilia ika tokniuan. Jehová uelis kichiuas maj tokniuan techiluikan tein techyolchikauas keman amo kuali timomachiliskej. Ijkon kipanok se tokniuj siuat de Asia. Yejua amo kipiayaok tekit uan no kokolispeuak. Satepan, itakauj ueyi tajtakoj uan amo uelikok tapaleuij kemej tayekankej. Kemej tel amo kuali tein kipanotoya, kijtoj: “Nimotajtaniaya keyej ijkon nechpanotoya. Niknemiliaya ke xa nikchiujka teisa tein amo kuali uan amo nikyolpaktiayaok Jehová”. Nejin tokniuj kitataujtij Jehová maj kinextiliani ke kisentokaya kitasojtaya, uan toTajtsin kinankilij. ¿Keniuj kichiuak? Tokniuj kijtoua: “Tayekananij tajtojkej nouan uan nechpaleuijkej maj nikita ke Jehová kisentokaya nechtasojtaya”. Satepan oksepa kitajtanij Jehová maj kiyolchikauani. Yejua kijtoua tein panok: “Nejon tonal tokniuan nechmakakej se carta tein kijkuilojkaj para nechyolchikauaskej. Keman nikixtajtoltij, nikmatik ke Jehová kemaj nechkakia”. Nejin techmachtia ke Jehová technextilia ke techtasojta keman oksekin techiluiaj tein techyolchikaua (Sal. 10:17).

14. ¿Keniuj no kinextia Jehová ke techtasojta?

¹⁴ Jehová no technextilia ke techtasojta keman kichiua maj se tokniuj techyolmajxiti keman moneki. Ijkon panok ne uejkauj. Dios kichiuak maj tatitanil Pablo kinijkuilouiliani tokniuan 14 cartas.  Ompa kinyolmajxitij porin kintasojtaya. ¿Keyej Jehová kichiuak maj Pablo kinyolmajxitiani tokniuan? Porin semi yolkuali uan tetasojta uan teyolmajxitia “kemej kichiua se tepopaj iuan se konetsin akin kiyolpaktia” (Prov. 3:​11, 12). Yejua ika, komo aksa techyolmajxitia ika Biblia, maj amo tiknemilikan ke amo tikyolpaktiajok Dios. Ta nejon kijtosneki ke kisentoka techtasojta (Heb. 12:6). ¿Toni okseki taman kinextia ke Jehová yolpaki ika tein tikchiuaj?

TEIN NO KINEXTIA KE TIKYOLPAKTIAJ JEHOVÁ

15. ¿Akonimej kinmaka Jehová ichikaualis, uan toni uelis tikneltokaskej?

¹⁵ Jehová kinmaka ichikaualis sayoj akin kiyolpaktiaj (Mat. 12:18). Maj timotajtanikan: “¿Niknextia seki taman tein ichikaualis Dios tepaleuia maj se kinexti?”. ¿Tikonita ke axkan okachi amo tionyolijsiui ke keman ayamo tikonixmatia Jehová? Tein melauj, ijkon kemej okachi tikonnextis tein ichikaualis Dios tepaleuia maj se kinexti, okachi nesis ke tikonyolpaktijtok Jehová. (Xikonita recuadro “ Akin kinixyekana ichikaualis Dios...”).

16. Kemej kijtoua 1 Tesalonicenses 2:​4, ¿akonimej kinixpejpena Jehová para maj kiteixmatiltikan kuali tanauatilmej? ¿Uan keniuj tionmomachilia tikonmatis nejon?

¹⁶ Jehová kinixpejpena maj kiteixmatiltikan kuali tanauatilmej sayoj akin kiyolpaktiaj (xikonixtajtolti 1 Tesalonicenses 2:4). Se tokniuj siuat akin itokay Jocelyn, kiitak ke melauj nejon. Se tonal amo kuali momachiliaya. Yejua kijtoua: “Amo nikpiaya chikaualis uan nikmachiliaya ke amo teyi nichiujkej. Maski ijkon, kemej katka niprecursora, nejon tonal monekia nitanojnotsas. Yejua ika, niktataujtij Jehová uan nitanojnotsato”. Nejon kualkan, Jocelyn iuan tajtoj se siuat akin monotsa Mary, uan yejua kinekik momachtis Biblia. Seki metsti satepan, Mary kiluij Jocelyn ke nejon kualkan keman kinojnotsak, yejua kitataujtijka Dios maj kipaleui. ¿Toni kimachtij Jocelyn tein kipanok? Yejua kijtoua: “Nikmachilij kemej yeskia Jehová nechiluijtoya: ‘Tejua semi tinechyolpaktia’”. Maski amo nochin techkakiskej keman tikinnojnotsaskej, uelis tikneltokaskej ke Jehová kiyolpaktia keman kiita ke timochikauaj titanojnotsaskej.

17. Keman Vicky itech tanemilij keniuj techpaleuia inemilis Jesús tein kitemakak, ¿toni temachtia nejon? (Salmo 5:12).

 ¹⁷ Jehová kichiua maj kinpaleui inemilis Jesús tein kitemakak sayoj akin kiyolpaktiaj (1 Tim. 2:​5, 6). Uan komo tikmachiliaj ke amo tikyolpaktiaj Jehová maski tikneltokaj ke Jesús toka momikilij uan timoauijkejya, ¿toni uelis tikchiuaskej? Maj tikelnamikikan ke toyolo uelis techkajkayauas, sayoj ke Jehová amo keman kichiuas. Komo tikneltokaj ke Jesús toka momikilij, Jehová techita ke tiyolmelaujkej uan motenkaua ke techtatiochiuis (xikonixtajtolti Salmo 5:12; Rom. 3:26). Vicky semi kipaleuij keman itech tanemilij keniuj techpaleuia inemilis Jesús tein kitemakak. Maski kiouijmakaya kineltokas ke Jehová kitasojtaya, satepan yejua kijtoj: “Jehová uejkauak nechnextilij ke amo yolijsiuia nouan [...]. Maski ijkon, nejua kemej yeskia nikiluijtoya: ‘Tejua amo keman uelis tinechtasojtas. Uan amo uelis tinechtapojpoluis ika inemilis mokonetsin tein kitemakak’”. Ijkon kemej Vicky, komo itech titanemiliaj inemilis Jesús tein kitemakak, techpaleuis maj tikneltokakan ke Jehová techtasojta uan ke uelis tikyolpaktiskej.

18. ¿Toni uelis tikneltokaskej komo tiksentokaj tiktasojtaj toTajtsin?

¹⁸ Maski tikchiuaskejya tein nikan timomachtijkej, xa kemansa tiknekiskej timosenkauaskej uan timotajtaniskej ox Jehová yekmelauj techtasojta. Komo ijkon techpanoua, maj tikelnamikikan ke yejua yolpaki ika tein kichiuaj “akin kisentokaj kitasojtaj” (Sant. 1:12). Yejua ika, maj tiksentokakan timotokikan iuan Jehová uan maj tiktemokan tikitaskej toni kichiua yejua tein ika technextilia ke tiksentokaj tikyolpaktiaj. Uan maj amo keman tikelkauakan ke Jehová “amo uejka yetok” de tejuan (Hech. 17:27).