1. ¿Toni tatiochiualis tikpiaj akin tipouij itech inechikol Jehová?

 ¡SEMI kualtsin maj tipouikan itech inechikol Jehová! Maski itech nejin tonalmej okachi mochiua tein amo kuali uan ouij techkisa tiyolpakiskej, Jehová kichiua maj tokniuan techpaleuikan (Sal. 133:1). Kemej Jehová techyekana, techpaleuia maj tiyolpakikan tejuan uan tochankauan (Efes. 5:​33–6:1). No techpaleuia maj timochiuakan titamatinij para amo semi timotekipachoskej uan tiyolpakiskej.

2. ¿Toni moneki tikchiuaskej uan keyej?

² Sayoj ke moneki senkis tikixtaliskej tiksentokaskej tiktekitiliskej Jehová maski yeski ouij. ¿Keyej? Xa porin techyolxokolis tein oksekin kichiuaskej oso kijtoskej. No tiknekiskej timosenkauaskej keman timopolouaj, okachiok komo miakpa. Nejin tamachtilis techpaleuis maj tiksentokakan tiktekitilikan Jehová keman panos nejin: 1) keman se tokniuj techyolxokolis, 2) keman tosiuatsin oso totakatsin techyolxokolia uan 3) keman tiknekij timosenkauaskej porin timopolouaj. Ika titajtoskej eyi itekitikauan Dios tein no ijkon kinpanok uan tikitaskej toni uelis techmachtis.

KEMAN SE TOKNIUJ TECHYOLXOKOLIS

3. ¿Toni ouijkayomej kipiaj itekitikauan Jehová?

³ Tein panoua. Tein melauj, kemansa tein kichiuaj seki tokniuan techkualantia. Oso xa techyolxokoliaj oso techchiuiliaj tein amo kuali. Kemansa tokniuan tayekananij no mopolouaj. Nochi nejin uelis kichiuas maj sekin kinemilikan ox yekmelauj tipouij itech inechikol Dios, yejua ika kiixtaliaj amo kitekitiliskejok Jehová iniuan tokniuan uan xa  amo kinotsajok akin kinyolxokolij oso hasta amo monechikouajok (Sof. 3:9). ¿Kuali yetok tein kichiuaj? Maj ika titajtokan aksa akin no ijkon kipanok uan tikitatij toni uelis techmachtis.

4. ¿Toni ouijkayot kipanok tatitanil Pablo?

⁴ Akin ika tajtoua Biblia. Tatitanil Pablo no kimatia ke tokniuan tajtakolejkej katkaj. Keman peuak monechikoua ompa Jerusalén, miakej kimouiliayaj uan amo iuan takuaujtamatiaj (Hech. 9:26). Satepan sekin peuak kijijtouaj (2 Cor. 10:10). Pablo no kiitak ke se tayekankej kiixtalij kichiuas teisa tein ueliskia kinuejkatilis de Jehová nejon tokniuan (Gál. 2:​11, 12). No kipanok se taman tein amo kichiaya iuan Marcos, semej akin iuan tanojnotsaya (Hech. 15:​37, 38). Pablo ueliskia kinemilis ke amo monekiskia mouikasok iniuan tokniuan akin kiyolxokolijkaj. Maski ijkon, yejua kisentokaya kuali kinitaya tokniuan uan kitekitiliaya Jehová. ¿Toni kipaleuij maj ijkon kichiua?

5. ¿Toni kipaleuij Pablo maj amo kinkaua tokniuan? (Colosenses 3:​13, 14; no xikonita taixkopin).

⁵ Kemej Pablo semi kintasojtaya tokniuan, amo sayoj kiitaya ininnepololuan ta tein kuali tein kichiuayaj. Yejua ika uelik kintapojpoluij, kemej kijtoj maj tikchiuakan itech Colosenses 3:​13, 14 (xikonixtajtolti). Uan yejua kitapojpoluij Marcos. Maski kikaujteuak keman yekinika yajki tanojnotsato, amo iuan kualantoya. Satepan, keman kintajkuilouilij tokniuan de Colosas, kijtoj ke Marcos semi ‘kinpaleuiaya oksekin uan kinyolchikauaya’ (Col. 4:​10, 11). Uan no keman tsaktoya ompa Roma kiluij Marcos maj yani kipaleuiti (2 Tim. 4:11). Pablo kintapojpoluij tokniuan uan kisentokak kuali iniuan mouikak. ¿Toni techmachtia nejon?

6, 7. ¿Toni techpaleuis maj tiksentokakan tikintasojtakan tokniuan maski mopoloskej? (1 Juan 4:7).

⁶ Tein techmachtia. Jehová kineki maj tiksentokakan tikintasojtakan tokniuan (xikonixtajtolti 1 Juan 4:7). Keman tokniuan techchiuiliaj teisa tein amo monekiskia maj kichiuakan, maj tiknemilikan ke amo kinekiaj techyolkokoskej, uan mochikaujtokej kichiuaskej tein Jehová tanauatia (Prov. 12:18). Maski timopolouaj, Jehová semi techtasojta, amo techsenkaua uan amo techelnamikilijtok tein amo kuali tein tikchiujkej (Sal. 103:9). Semi moneki maj tikchiuakan kemej toTajtsin uan maj tikintapojpoluikan oksekin (Efes. 4:​32–5:1).

 ⁷ Maj tikelnamikikan ke amo uejkaua tatamiti, yejua ika moneki maj kuali timouikakan iniuan tokniuan. Tikmatij ke satepan okachi techtajyouiltiskej uan xa hasta techtsakuaskej. Keman techpanos nejon, monekis maj tokniuan techpaleuikan (Prov. 17:17). Ijkon kipanok Josep, a se tayekankej de España. Kemej amo kinekik mochiuas soldado, kitsakkej iniuan okseki tokniuan. Yejua kijtoua: “Kampa titsaktoyaj, tisenolochyetoyaj. Uan kemansa ipa tikualantiayaj aksa. Yejua ika monekia timoxikoskej uan timotapojpoluiskej ika nochi toyolo. Nejon techpaleuij maj kuali timouikakan uan maj timoyekpiakan se iuan okse de oksekin akin amo tokniuan katkaj. Nikelnamiki se tonal keman nimoajkolkokoj, niajkoltetsiliujtoya uan amo uelia nikoliniaya nomay. Kemej amo uelia nikchiuaya nion teyi, se tokniuj nechtapakiaya uan nechpaleuiaya itech okseki taman. Nikitak ke tokniuan yekmelauj nechtasojtayaj keman okachi monekia maj nechpaleuikan”. ¡Semi moneki maj niman tikyektalikan tein yeski kuejmol tein tikpiaskej iniuan tokniuan!

KEMAN TOTAKATSIN OSO TOSIUATSIN TECHYOLKOKOUA

8. ¿Toni kuejmolmej kipiaj akin monamiktijkejya?

⁸ Tein panoua. Ijkon kemej kijtoua Biblia, nochin akin monamiktijkejya ‘kipiaj kuejmolmej’ (1 Cor. 7:28). ¿Keyej? Porin takat uan siuat tajtakolejkej. Uan no tataman tein kiuelitaj. Xa tataman kemej moskaltijkej uan tein momattokej kichiuaskej. Uan xa seki taman amo kimatkej achto ke monamiktiskej. Nochi nejin uelis kichiuas maj kipiakan kuejmolmej. Xa mopapantiskej kuejmolmej tein kipiaj maski nochin omen mopolojkej. Maski nochin omen monekiskia maj kiyektalikan kuejmol, xa hasta kinemiliskej ke moneki mokauaskej oso ika se amat kinextiskej ke mokaujkejya. Sayoj ke ¿yekmelauj kinpaleuia nejon? b Maj tikitakan tein Biblia techtapouia toni kichiuak se akin amo mosenkauak maski kipiaya kuejmolmej iuan itakatsin.

9. ¿Toni ouijkayot kipiak Abigaíl?

⁹ Akin ika tajtoua Biblia. Abigaíl monamiktijka iuan Nabal, se takat akin kijtoua Biblia ke katka yoltakuauak uan amo teikneliaya (1 Sam. 25:3). Xa Abigaíl tel tajyouij keman nemia iuan. Se tonal, Abigaíl ueliskia kikaujteuas Nabal. David, akin tekiuajtiskia ompa Israel, kinekia kimiktis Nabal porin kinuijuikaltij yejua uan itakeualuan (1 Sam. 25:​9-13). Abigaíl ueliskia cholos uan kikauas David maj kichiua tein kiixtalijtoya. Sayoj ke kitataujtij David maj kitapojpoluiani Nabal uan maj amo kimiktiani (1 Sam. 25:​23-27). ¿Keyej kichiuak ijkon?

10. ¿Keyej Abigaíl amo mosenkauak maski kipiaya miak kuejmolmej iuan itakatsin?

¹⁰ Abigaíl kitasojtaya Jehová, yejua ika kiitaya kemej Jehová kinita akin monamiktijkejya. Xa kimatia tein Jehová kijtoj keman kinnamiktij Adán uan Eva (Gén. 2:24). Abigaíl kuali kimatia keniuj Dios kiitaya keman aksa monamiktiaya. Kemej kinekia kiyolpaktis Jehová, kipaleuij itakatsin uan nochin akin iuan nemiaj. Abigaíl niman kichiuak teisa para maj David amo kimiktiani Nabal, uan Abigaíl no  kitajtanij maj kitapojpoluiani maski amo teyi kichiujtoya. Tikmatij ke Jehová semi kitasojtaya Abigaíl akin katka yolchikauak uan motemakaya tapaleuis. ¿Toni uelis kinmachtis akin kipiaj inintakatsin oso ininsiuatsin tein kichiuak Abigaíl? Maj tikitakan.

11. 1) ¿Toni Jehová kineki maj kichiuakan akin monamiktijkejya? (Efesios 5:33). 2) ¿Toni techmachtia tein kichiuak Carmen? (No xikonita taixkopimej).

¹¹ Tein techmachtia. Jehová kineki maj se takat uan isiuatsin kisentokakan senyetokan maski semej de yejuan niman kualani. Jehová semi yolpaki keman kiita ke omen kitemouaj kiyektaliskej ininkuejmoluan uan kisentokaj motasojtaj uan motakachiuaj (xikonixtajtolti Efesios 5:33). Maj tikitakan tein kichiuak Carmen. Kemej chikuasen xiuit satepan ke monamiktij, peuak momachtia Biblia iniuan itaixpantijkauan Jehová uan moauij. Yejua kijtoua: “Notakatsin amo kiuelitak tein nikchiuak. Yejua kualania porin niaya nechikolmej uan amo semi iuan nietoya. Nechuijuikaltiaya uan nechiluiaya ke nechkaujteuaskia”. Maski ijkon, Carmen amo mosenkauak. Kemej 50 xiujmej kisentokak kitemoj kitakachiuas uan kitasojtas itakatsin. Uan no kijtoua: “Ijkon kemej panokej xiujmej, okachi nikajsikamatia keniuj momachiliaya notakatsin uan okachi kualtsin niknojnotsaya. Nikmatia keniuj kinita Jehová akin monamiktiaj. Yejua ika amo keman niknemilij nikauas notakatsin. Kemej niktasojta Jehová, nechpaleuij maj amo nimosenkaua”. c Komo tikonpia kuejmolmej iuan motakatsin oso mosiuatsin, uelis tikonmatis ke Jehová mitsonpaleuis itech nochi.

KEMAN TIKNEKIJ TIMOSENKAUASKEJ PORIN TIMOPOLOJKEJ

12. ¿Keniuj xa timomachiliaj komo titajtakolchiuaj?

¹² Tein panoua. Xa tiknekiskej timosenkauaskej keman titajtakolchiuaj. Biblia kiyekijtoua ke keman titajtakolchiuaj, “toyolo tayokoxtok uan motekipachojtok” (Sal. 51:17). Yejua nejin tein kipanok Robert, se tokniuj akin miak xiujmej mochikaujtoya para mochiuas tapaleuijkej itech nechikol. Tajtakolchiuak uan kimatia ke kiyolkokojka Jehová. Yejua kijtoua: “Keman nikitak tein nikchiuak, notanemilil peuak nechkuejmoloua. Tel amo kuali kemej nimomachiliaya, peuak nichoka uan niktataujtij Jehová. Nikelnamiki ke niknemiliaya ke Dios amo keman  nechkakiskiaok porin nikyolkokojka”. Kemej amo kuali timomachiliaj keman tikchiuaj se ueyi tajtakol, uelis tiknemiliskej ke Jehová techsenkauakya uan amo monekiok maj tiktekitilikan (Sal. 38:4). ¿Kemansa ijkon tionmomachiliani? Komo ijkon, uelis mitsonpaleuis tein kichiuak se itekitikauj Dios akin kisentokak kitekitilij Jehová maski tajtakolchiuak.

13. ¿Toni tajtakol kichiuak Pedro, uan keyej ijkon kichiuak?

¹³ Akin ika tajtoua Biblia. Se youak achto ke kimiktiskiaj Jesús, tatitanil Pedro kichiuak seki taman tein kiuikak maj tajtako. Yekinika, Pedro kinemiliaya ke amo mopoloskia, uan ke amo kikauaskia Jesús maski okseki tatitanilmej kikauaskiaj (Mar. 14:​27-29). Satepan, kampa motanotsa Getsemaní, miakpa kochik (Mar. 14:​32, 37-41). Uan keman kikitskijkej Jesús, Pedro kikaujteuak (Mar. 14:50). Satepan, expa kiyekijtoj ke amo kiixmatia (Mar. 14:​66-71). ¿Keniuj momachilij Pedro keman kiitak ke tajtakolchiujka? Motelyolkokoj uan peuak tayokolchoka (Mar. 14:72). ¿Keniuj tikonnemilia ke momachilij Pedro keman kiitak ke itasojikniuj Jesús pilkatoya itech kouit? Xa semi amo kuali momachilij.

14. ¿Toni kipaleuij Pedro maj kisentoka kitekitili Jehová? (Xikonita taixkopin).

¹⁴ Maski kipanok nejon, kisentokak kitekitilij Jehová. ¿Keniuj kichiuak? Kitemoj maj kipaleuianij iikniuan, uan yejuan kiyolchikaujkej (Luc. 24:33). Uan keman oksepa nemik Jesús, monextij iixpan Pedro, xa para kiyolchikauas (Luc. 24:34; 1 Cor. 15:5). Satepan, Jesús amo kielnamiktij Pedro tein kichiujka, ta kiluij ke kiseliskia okseki uejueyi tekimej (Juan 21:​15-17). Maski Pedro kimatia ke tajtakolchiujka, amo mosenkauak. ¿Keyej? Porin kimatia ke Jesús kisentokaya kitasojtaya, uan ke iikniuan kipaleuiskiaj. Maj tikitakan toni techmachtia tein kichiuak.

15. ¿Toni kineki Jehová maj tikmatikan? (Salmo 86:5; Romanos 8:​38, 39; no xikonita taixkopin).

¹⁵ Tein techmachtia. Jehová kineki maj tikmatikan ke techtasojta uan techtapojpoluia (xikonixtajtolti Salmo 86:5; Romanos 8:​38, 39). Maski kuali yetok maj timotajtakoltikan keman titajtakolchiuaj, maj amo tiknemilikan ke Jehová amo techtasojtaok uan ke amo keman techtapojpoluis, ta moneki niman tiktemoskej maj techpaleuikan. Robert, akin ika titajtojkej itech párrafo 12, kijtoua: “Nitajtakolchiuak porin niknemiliaya ke ueliskia  noselti nikixtopeuas tein amo kuali uan ke amo monekia maj aksa nechpaleui”. Yejua kiitak ke monekia tajtos iniuan tayekananij. Robert kijtoua: “Keman nitajtoj iniuan tayekananij, nechpaleuijkej maj nikita ke Jehová kisentoka nechtasojta. Uan nikitak ke yejuan no nechtasojtaj. Nechnextilijkej ke Jehová amo nechsenkaujka”. Ijkon kemej Robert, uelis tikmatiskej ke Jehová no semi techtasojta uan ke yejua nochipa techtapojpoluia keman timoyolpataj, keman tiktemouaj maj techpaleuikan uan timochikauaj amo ijkon tikchiuaskejok (1 Juan 1:​8, 9). Komo tikneltokaj ke Jehová kisentoka techtasojta uan ke nochipa techtapojpoluia, techpaleuis maj tiksentokakan tiktekitilikan maski timopoloskej.

16. ¿Keyej tikonneki tikonsentokas tikontekitilis Jehová uan amo tionmosenkauas?

¹⁶ Jehová semi kitasojkamati nochi tein tikchiuaj para tiktekitiliskej itech nejin tonalmej keman okachi motaouijkantalia. Yejuatsin techpaleuis maj tiksentokakan tiktekitilikan maski tejuan oso oksekin mopoloskej. Uelis okachi tikintasojtaskej tokniuan uan tikintapojpoluiskej keman techyolkokoskej. Uelis tiknextiliskej Jehová ke semi tiktasojtaj uan timochikauaj niman tikyektaliskej se kuejmol tein tikpiaskej iuan totakatsin oso tosiuatsin. Uan komo titajtakolchiuaj, uelis tiktemoskej maj Jehová techpaleui, tikneltokaskej ke techtasojta uan techtapojpoluia, uan tiksentokaskej tiktekitiliskej. “Yejua ika maj tiksentokakan tikchiujtokan tein kuali”, porin tikmatij ke Jehová semi techtatiochiuis (Gál. 6:9).