1, 2. 1) ¿Kemanian, kani uan keyej Pablo kintajkuilouilij tokniuan de Éfeso? 2) ¿Toni tiknankiliskej itech nejin tamachtilis?

 PABLO kinekia kinyolchikauas tokniuan keman tsaktoya ompa Roma, sayoj ke kemej amo ueliaok kinkalpanouaya, kinijkuilouilij miak cartas. Uan se kintitanilij tokniuan de Éfeso itech xiuit 60 oso 61 (Efes. 1:1; 4:1).

² Majtakti xiuit achtoya, ompa Éfeso Pablo kitetapouito kuali tanauatilmej uan tamachtito (Hech. 19:​1, 8-10; 20:​20, 21). Yejua semi kintasojtaya tokniuan uan kinekia kinpaleuis maj amo kikauakan Jehová. Sayoj ke, ¿keyej ika kinnojnotsak tayouayanilot uan tanex tokniuan taijitalmej? ¿Uan toni techmachtia tinochin tiitekitikauan Dios tein kinyolmajxitij nejon tokniuan? Yejua nejon tiknankiliskej itech nejin tamachtilis.

AMO XIYETOKANOK KAMPA TAYOUAYAN TA KAMPA TANESTOK

3. ¿Toni ika tajtoj Pablo itech Efesios capítulo 5?

³ Pablo kiniluij tokniuan akin nemiaj ompa Éfeso: “Achto nanyetoyaj kampa tayouayan, sayoj ke axkan nanyetokej kampa tanestok” (Efes. 5:8). Pablo kikuik tajtolmej tayouayanilot uan tanex para kinextis keniuj tokniuan akin nemiaj Éfeso mopatakajya. Yekinika maj tikitakan keyej kiniluij “achto nanyetoyaj kampa tayouayan”.

4. ¿Keyej tein kineltokayaj tokniuan de Éfeso kinextia ke kemej yeskia yetoyaj kampa tayouayan?

 ⁴ Keman kineltokayaj tein amo melauak kemej yeskia yetoyaj tayouayan. Achto ke momachtiskiaj uan mochiuaskiaj tokniuan, akin nemiaj Éfeso kineltokayaj miak taman tein amo melauak uan no naualot. Ompa Éfeso, itech templo yetoya tatadios Diana. Hasta kijtouayaj ke yejua katka se taman tein okachi kualtsin tein kichijchiujkaj. Miakej yayaj itech templo para kinueyichiuaskej tatadiosmej. Uan akin kinchijchiuayaj tiopantsitsin de Diana kitaniaj miak tomin (Hech. 19:​23-27). Uan miakej akin ompa nemiaj katkaj naualmej (Hech. 19:19).

5. ¿Keyej kemej nemiaj tokniuan de Éfeso kinextiaya ke yetoyaj kampa tayouayan?

⁵ Keman amo chipaujkanemiaj kemej yeskia yetoyaj tayouayan. Akin nemiaj Éfeso tel auilnemiaj uan amo ixpinauayaj kichiuaskej nejon. Kamanalouayaj ika auilnemilis keman mosentiliayaj uan keman iluichiuayaj (Efes. 5:3). Miakej akin ompa nemiaj ‘amo teyi ika mopinaujmatiajok’, nejin kijtosneki ke amo kinyolkokouayaok keman kichiuayaj tein amo kuali (Efes. 4:​17-19). Achto ke momachtiskiaj toni kiyolpaktia Jehová uan toni amo, nochipa kichiuayaj tein amo kuali uan amo kinemiliayaj keniuj momachiliaya Jehová. Pablo kijtoj ke “inintanemilil kemej yeskia moajsi kampa tayouayan uan amo kikauaj maj Dios kichiua maj nemikan”.

6. ¿Keyej Pablo kiniluij tokniuan de Éfeso ke kemej yeskia yetoyajya kampa tanestok?

⁶ Sayoj ke sekin akin nemiaj Éfeso amo kichiuayajok nejon, uan yejua ika Pablo kiniluij: “Axkan nanyetokej kampa tanestok porin nanpouij iuan toTekotsin” (Efes. 5:8). Peujkajya nemiaj kemej kijtoua iTajtol Jehová, tein katka kemej se tanex tein kinixyekanaya (Sal. 119:105). Amo kineltokayajok tein amo melauak uan amo auilnemiajok. Kichiuayaj kemej Dios uan mochikauayaj kiueyichiuaskej uan kiyolpaktiskej (Efes. 5:1).

7. ¿Keniuj tejuan no techpanok kemej tokniuan de Éfeso?

 ⁷ Tejuan no kemej yeskia tietoyaj kampa tayouayan porin achto ke timomachtiskiaj, tikneltokayaj tein amo melauak uan amo tichipaujkanemiaj. Tisekimej xa tikiniluichiuiliayaj tatadiosmej uan xa tiauilnemiaj. Sayoj ke keman tikixmatkej Jehová, tikpatakej kemej tinemiaj uan peuak tikchiuaj tein Dios kiyolpaktia. Nochi nejin semi techpaleuiani (Is. 48:17). Sayoj ke kemansa techouijmaka amo tikchiuaskejok seki taman tein amo kuali uan tiksentokaskej tinemiskej itech tanex. Maj tikitakan toni techpaleuis maj nochipa ijkon tinemikan.

MAJ AMO TIETOKAN KAMPA TAYOUAYAN

8. Kemej kijtoua Efesios 5:​3-5, ¿toni monekia amo kichiuaskej tokniuan de Éfeso?

⁸ (Xikonixtajtolti Efesios 5:​3-5). Tokniuan de Éfeso monekia kiixtopeuaskej tein Jehová amo kiuelitaya para amo yetoskiaj kampa kemej yeskia tayouayan. Amo sayoj auilnemiaj, ta no fiero kamanalouayaj. Pablo kinelnamiktij ke monekia kikauaskej nochi nejon komo kinekiaj ‘kalakiskej itech iTaixyekanalis Cristo uan Dios’.

9. ¿Keyej semi moneki timoyekpiaskej para amo tiauilnemiskej?

⁹ Tejuan no moneki semi timoyekpiaskej para amo tikchiujtoskej “tein amo tapaleuia tein poui kampa tayouayan” (Efes. 5:11). Keman aksa kikaki, kiita oso tajtoua de auilnemilis oso tein pitsotik, okachi ijsiujka kichiua tein amo kuali (Gén. 3:6; Sant. 1:​14, 15). Itech se altepet, miakej tokniuan peuak motajkuilouiliaj itech redes sociales. Keman peuak motajkuilouiliaj, ika tajtouayaj Jehová uan tein tamachtia Biblia. Satepan, yolik peujkej tajtouaj de auilnemilis. Satepan, miakej kijtojkej ke nejon kichiuak maj auilnemikan.

10. ¿Toni kineki Satanás maj tikchiuakan? (Efesios 5:6).

¹⁰ Satanás kitemoua kichiuas maj amo tikmatikan toni kuali yetok uan toni amo (Is. 5:20; 2 Cor. 4:4). Yejua ika, amo tikmojkaitaj maj miakej kitemokan maj tikneltokakan ke amo tajtakol tein Jehová kijtoua ke pitsotik oso auilnemilis (2 Ped. 2:19). Itech películas, itech televisión uan itech internet kijtouaj miak taman tein Jehová techiluia ke amo kuali yetok maj tikchiuakan. Satanás kineki maj tiknemilikan ke kuali yetok tein kichiuaj tein pitsotik uan nochi taman auilnemilis uan uelis ika timoyolpaktiskej (xikonixtajtolti Efesios 5:6).

11. ¿Keniuj tein kipanok Angela techmachtia ke moneki tikchiuaskej tein kijtoua Efesios 5:7? (No xikonita taixkopimej).

¹¹ Satanás kineki maj iniuan timouikakan akin amo techpaleuiaj maj tiktakamatikan tein Jehová technauatia. Yejua ika, Pablo kinyolmajxitij akin nemiaj Éfeso maj amo iniuan mouikanij akin kichiuayaj tein amo kuali. Kiniluij: “Amo xikchiuakan tein yejuan kichiuaj” (Efes. 5:7). Tejuan moneki okachi timoyekpiaskej ke nejon tokniuan. ¿Keyej? Porin axkan amo sayoj ueli iniuan tietokej oksekin keman tikinitaj ta no itech redes sociales. Angela, a se tokniuj siuat de Asia kijtoua keniuj kiitak ke semi tamouilil redes sociales: “Amo tikita keniuj yolik peua kipataj kemej se tanemilia. Niman peuak kuali nimouikaya  iniuan akin amo kitakamatiaj tein kijtoua Biblia. Hasta peuak niknemilia ke kuali yetok maj se kichiua seki taman tein Jehová amo kiuelita”. Sayoj ke tayekananij kuali kipaleuijkej Angela para maj kipatani tein kichiuaya. Yejua kijtoua: “Axkan okachi niktekitilia Jehová uan itech nitanemilia tein kiyolpaktia uan amo sayoj niknemilijtok nikuis redes sociales”.

12. ¿Toni moneki tikchiuaskej komo tiknekij tiktakamatiskej tein Jehová technauatia?

¹² Maski miakej kijtoskej ke kuali yetok maj se auilnemi, moneki amo tikneltokaskej porin tikmatij ke amo melauak (Efes. 4:​19, 20). Maj timotajtanikan: “Nimochikaua amo semi nikinnojnotsas akin iniuan nitekiti oso akin iniuan nimomachtia oso iniuan oksekin akin amo kitakamatij Jehová? ¿Niyolchikauak uan nikchiua tein Jehová kijtoua ke kuali yetok maski oksekin kijtoskej ke amo teyi nikuelita?”. Uan kemej kijtoua 2 Timoteo 2:​20-22, no moneki kuali tikinixpejpenaskej akonimej iniuan timouikaskej itech nechikol. Maj tikelnamikikan ke amo nochin techpaleuiskej maj tiksentokakan tiktekitilikan Jehová.

MAJ TIKSENTOKAKAN ‘TINEMIKAN ITECH TANEX’

13. ¿Toni kijtosneki maj ‘tiksentokakan tinemikan itech tanex’? (Efesios 5:​7-9).

¹³ Satepan ke Pablo kinyolmajxitij tokniuan de Éfeso maj amo yetokanok kampa kemej yeskia tayouayan, kiniluij: “Xiksentokakan xinemikan itech tanex” (xikonixtajtolti Efesios 5:​7-9). ¿Toni kijtosneki nejon? Ke tein tikchiuaskej moneki kinextis ke yekmelauj tikchiuaj kemej Cristo. Komo tikixtajtoltiaj uan timomachtiaj Biblia uan toamaixuan, uelis tikchiuaskej nejon. Keman timomachtiskej, maj itech titanemilikan tein Jesús kichiuak uan tein tamachtij, akin “kemej yeskia tanex tein kinpaleuia oksekin para tachiaskej” (Juan 8:12; Prov. 6:23).

14. ¿Keniuj uelis techpaleuis ichikaualis Dios?

¹⁴ No moneki maj techpaleui ichikaualis Dios komo tiknekij ‘tiksentokaskej  tinemiskej itech tanex’. ¿Keyej? Porin tel ouij techkisa tikchiuaskej tein kuali kampa okachi miakej kichiuaj tein semi amo kuali (1 Tes. 4:​3-5, 7, 8). Ichikaualis Dios techpaleuis maj amo titanemilikan kemej akin amo tanemiliaj kemej Jehová. No uelis techpaleuis maj tiyolkualmej, maj tiyolmelaujkej uan maj timelaujkanemikan (Efes. 5:9).

15. ¿Toni uelis tikchiuaskej para tikseliskej ichikaualis Dios? (Efesios 5:​19, 20).

¹⁵ Jesús kijtoj ke Jehová “kinmakas ichikaualis akin kitajtaniaj” (Luc. 11:13). Yejua ika moneki maj tiktataujtikan Jehová maj techmaka ichikaualis. Keman timosentiliaj iniuan tokniuan itech nechikolmej, Jehová no techmaka ichikaualis (xikonixtajtolti Efesios 5:​19, 20). Nejon chikaualis techpaleuis maj tikchiuakan tein kiyolpaktia Jehová.

16. ¿Toni techpaleuis maj kuali titaixpejpenakan? (Efesios 5:​10, 17).

¹⁶ Keman tikixpejpenaskej teisa tein motelneki, moneki tikajsikamatiskej “toni kineki Jehová” uan ijkon tikchiuaskej (xikonixtajtolti Efesios 5:​10, 17). Keman tikpiaj se kuejmol uan tiktemouaj itech Biblia toni uelis techpaleuis, tein melauj tiktemojtokej tein Jehová kinemilia. Komo tikchiuaj tein timomachtiaj, techpaleuis maj kuali titaixpejpenakan.

17. ¿Keniuj uelis kuali tikuiskej totiempo? (Efesios 5:​15, 16; no xikonita taixkopin).

¹⁷ Pablo no kinyolmajxitij tokniuan de Éfeso maj kuali kikuinij inintiempo (xikonixtajtolti Efesios 5:​15, 16). “Amokuali” Satanás kinekiskia maj tikchiujtokan miak taman uan maj amo tiuelikanok tiktekitilikan Dios (1 Juan 5:19). Uelis sayoj tiktemojtoskej tomin, timomachtiskej oso titeltekitiskej uan amo tiktemoskej tiktekitiliskej Jehová. Komo ijkon tikchiuaskiaj tiknextiskiaj ke no peuaya titanemiliaj kemej oksekin. Maski nejin amo tajtakol, amo yejua tein  okachi moneki tiktemoskej tikchiuaskej. Para ‘tiksentokaskej tinemiskej itech tanex’ moneki ‘kuali tikuiskej totiempo’, nejin kijtosneki tikchiuaskej tein okachi moneki.

18. ¿Toni kichiuak Donald para kuali kikuis itiempo?

¹⁸ Maj tiktemokan keniuj uelis okachi tiktekitiliskej Jehová. Yejua nejon tein kichiuak Donald de Sudáfrica. Yejua kijtoua: “Nikitak tein nikchiujtoya uan niktataujtij Jehová maj nechpaleuiani maj okachi niktekitili. Niktajtanij Jehová maj nikajsi se tekit tein nechpaleuiskia maj okachi nitanojnotsa. Uan kemaj nechpaleuij maj nikajsi. Satepan, nosiuatsin uan nejua peuak tiktekitiliaj Jehová miak tonalmej”.

19. ¿Toni moneki tikchiuaskej para tiksentokaskej ‘tinemiskej itech tanex’?

¹⁹ Tein Pablo kinijkuilouilij tokniuan de Éfeso semi kinpaleuij para maj amo kikauanij Jehová, uan tejuan no uelis techpaleuis. Tikitakejya ke techpaleuia maj kuali tikixpejpenakan toni ika timoixpetaniskej uan akonimej iniuan timouikaskej. No techyolchikaua maj kuali timomachtikan Biblia para maj ika timoixyekanakan tein tamachtia. No techelnamiktia ke moneki maj techpaleui ichikaualis Dios para tiknextiskej tein kuali. Komo tikchiuaj tein Pablo tayolmajxitij, uelis tikixpejpenaskej tein kiyolpaktis Jehová. Komo tikchiuaj nejin, techpaleuis maj amo tietokan kampa kemej yeskia tayouayan ta kampa tanestok.