1, 2. ¿Toni tatiochiualismej kipia aksa satepan ke moauia?

 SEMI tiyolpakij keman timoauiaj uan timochiuaj ichankauan Jehová. Akin kichiuaj nejin porin kuali mouikaj iuan Jehová kiitaj ke yekmelauj tein kijtoj David. Yejua kijtoj: “Yolpaki akin tikixpejpena uan tikchiua maj mouan motoki para maj nemi mokalixpan” (Sal. 65:4).

² Jehová amo kikaua maj nemi ikalixpan akin yeski. Kemej tikitakej itech okse tamachtilis, toTajtsin kiixtalia motokis iniuan akin kinekij yeskij itasojikniuan (Sant. 4:8). Keman motemaktiaj iuan Jehová uan moauiaj, peua kualtsin mouikaj iuan uan yejuatsin kiniluia: ‘Nankiitaskej ke namechxinilia tatiochiualismej hasta maj amo teyi namechpolo’ (Mal. 3:10; Jer. 17:​7, 8).

3. ¿Toni moneki tikchiuaskej tinochin akin timotemaktijkejya uan timoauijkejya? (Eclesiastés 5:​4, 5).

³ Keman aksa moauia, ijkuak peua kitekitilia Jehová. Satepan ke timoauiaj, tinochin tiknekij tikchiuaskej tein timotenkaujkej iuan Jehová uan amo tikauaskej maski tiknekiskej titajtakolchiuaskej oso tikpiaskej ouijkayomej (xikonixtajtolti Eclesiastés 5:​4, 5). No moneki tikchiuaskej kemej Jesús uan tikchiuaskej tein tanauatij (Mat. 28:​19, 20; 1 Ped. 2:21). Nejin tamachtilis techpaleuis maj ijkon tikchiuakan.

AMO XIKONKAUA JESÚS MASKI TIKONNEKIS TIONTAJTAKOLCHIUAS OSO TIKONPIAS OUIJKAYOMEJ

4. ¿Toni kijtosnekia Jesús keman kijtoj ke ‘mojmostaj moneki titaxikoskej keman titajyouiskej’? (Lucas 9:23).

⁴ Amo xikonnemili ke satepan ke tionmoauis amo tikonpiasok ouijkayomej. Jesús kijtoj ke sejsemej tiitekitikauan  moneki ‘mojmostaj titaxikoskej keman titajyouiskej’ (xikonixtajtolti Lucas 9:23). ¿Kijtojtoya Jesús ke nochipa titajyouijtoskiaj? Amo. Ta kijtojtoya ke maski tikpiaskiaj tatiochiualismej, no tikpiaskiaj ouijkayomej (2 Tim. 3:12).

5. ¿Toni motenkauak Jesús ke kinmakaskia akin kikauaskej miak taman para kipaleuiskej itaixyekanalis Dios?

⁵ Xa mochankauan mitsonixnamikij oso xa tikonkauak seki taman para okachi tikonpaleuis iTaixyekanalis Dios (Mat. 6:33). Komo ijkon, xikonelnamiki ke Jehová kimati tein tikonchiuak (Heb. 6:10). Xa tikonita ke yekmelauj nejin tajtolmej tein Jesús kijtoj: “Namechyekiluia ke akin kikauak ichan, iikniuan takamej, iikniuan siuamej, inan, itat, ikoneuan oso italuan porin notech takuaujtamati uan kineltoka kuali tanauatilmej axkan kiselis, itech nejin tonalmej, se ciento okachi, kalmej, iikniuan takamej, iikniuan siuamej, imomajuan, ikoneuan uan talmej, maski kitajyouiltiskej, uan satepan nemis nochipaya” (Mar. 10:​29, 30). Maski tikonchiuaniya seki taman maski ouij, amo nenkaj, axkan tikonseliani miak tatiochiualismej (Sal. 37:4).

6. ¿Keyej moneki tikonsentokas tikonixtopeuas tein ‘kinejneki monakayo’ satepan ke tionmoauis?

⁶ Satepan ke tionmoauis, monekis tikonsentokas tikonixtopeuas ‘tein kinejneki monakayoʼ (1 Juan 2:16). Uan nejin moneki tikonchiuas porin tikonsentoka tiontajtakolej. Xa kemansa tionmomachilis kemej tatitanil Pablo, akin kijtoj: “Noyolijtik yekmelauj nikuelita itanauatil Dios, sayoj ke itech nonakayo nikita ke yetok okse tanauatil tein moteuia iuan tanauatil tein kiixyekana notanemililuan. Nejin tanauatil yejua tajtakol tein yetok itech nonakayo uan tein kemej yeskia nechkitskia kemej se akin kitsakuatij” (Rom. 7:​22, 23). Xa kemansa tikonnekis tionmosenkauas porin tikonmachilis ke ouij tikonixnamikis tajtakol. Sayoj ke komo tikonelnamiki tein tionmotenkauak keman tionmotemaktij iuan Jehová, mitsonpaleuis amo xikonchiua tein amo kuali. Tein tionmotenkauak keman tionmotemaktij, okachi mitsonpaleuis keman tikonnejnekis tiontajtakolchiuas. ¿Keyej?

7. ¿Keyej keman aksa motemaktia iuan Jehová kipaleuia maj amo kikaua Dios?

⁷ Keman aksa motemaktia iuan Jehová, amo kichiuaok tein yejua kineki. Amo kichiuakok tein yejua kinejneki tein Jehová amo kiyolpaktia (Mat. 16:24). Yejua ika, keman tiknekiskej titajtakolchiuaskej, amo tiknemilijtoskejok ox tiktakamatiskej Jehová oso amo. Tejuan tikixtalijkejya ke amo keman tikauaskej Jehová. Tiknekij tikyolpaktiskej. Komo ijkon tikchiuaj tiyeskij kemej Job. Maski kipiak ouijkayomej kijtoj: “¡Amo keman nikauas Dios hasta maj nimiki!” (Job 27:5).

8. ¿Keyej techpaleuis maj tikixtopeuakan tajtakol komo itech titanemiliaj tein tikijtojkej tikchiuaskej keman timotemaktijkej iuan Jehová?

⁸ Komo itech titanemiliaj ke timotenkaujkej tikchiuaskej tein Jehová kineki, techpaleuis maj tikixtopeuakan tein amo kuali. Maj tiknemilikan nejin: ¿tiknextiskiaj ke tikueuelitaj akin amo tonamik? ¡Amo! Tejuan timotenkaujkejya iuan Jehová, yejua ika nion tiknemiliaj tikchiuaskej nejon. Komo amo tikixualtiaj nejon amo kuali tanejnekilis, satepan amo monekis tiktemoskej timokixtiliskej nejon taman. Nion tepitsin tiknekij tikchiuaskej tein kichiuaj “akin amo yolkualmej” (Prov. 4:​14, 15).

9. ¿Keyej komo itech titanemiliaj tein timotenkaujkej keman timotemaktijkej iuan Jehová techpaleuis maj nochipa tiktekitilikan?

 ⁹ ¿Uan komo techiluiaj ke techmakaskej se tekit tein techtsakuilis maj amo tiakan nechikolmej? Tikmattokejya toni tikchiuaskej. Tikixtalijkajya amo tikseliskej se tekit tein techtsakuilis maj amo tiakan nechikolmej. Yejua ika, amo tikseliskej uan satepan tiktemojtinemiskej keniuj tikueyichiuaskej Jehová. Tein kichiuak Jesús uelis techpaleuis. Yejua kinekia kiyolpaktis iTajtsin, uan tejuan no niman tikixtopeuaskej tein tikmatij ke amo kiyolpaktia Dios akin iuan timotemaktijkej (Mat. 4:10; Juan 8:29).

10. ¿Keniuj techpaleuis Jehová maj nochipa tiktojtokakan Jesús satepan ke timoauiskej?

¹⁰ Komo titaxikouaj keman tikpiaj ouijkayomej uan tikixtopeuaj tajtakol, kinextia ke tikixtalijkejya tiksentokaskej tiktojtokaskej Jesús. Uan tikmatij ke Jehová techpaleuis maj ijkon tikchiuakan, porin Biblia kijtoua: “Dios nochipa kichiua tein kijtoua, uan yejua amo namechkauas xikixnamikikan nejon kuejmol kemej amo uelis nankixikoskej, ta keman namechyoltilanas teisa para ximotajtakolmakakan, yejua namechpaleuis xitaxikokan” (1 Cor. 10:13).

¿TONI MITSONPALEUIS NOCHIPA XIKONTOJTOKA JESÚS?

11. ¿Toni se taman moneki tikonchiuas para tikonsentokas tikontojtokas Jesús? (No xikonita taixkopimej).

¹¹ Jesús kitekitilij Jehová ika nochi iyolo, uan amo keman kikauak porin nochipa kitataujtiaya (Luc. 6:12). Komo tikonchiua tein mitsonpaleuis okachi xionmotoki iuan Jehová, mitsonpaleuis nochipa xikontojtoka Jesús. Biblia kijtoua: “Maski  kuali tiktekitilijtokejya Dios, maj ijkon tiksentokakan tikchiujtokan” (Filip. 3:16). Kemansa tikonkakis ke seki tokniuan kiixtalijkej okachi kitekitiliskej Jehová. Xa kiselijkej Tamachtilis para akin kiteixmatiltiaj iTaixyekanalis Dios oso tapaleuitoj okseko kampa monekij tanojnotsanij. Komo tionueli, xikonixtali no ijkon tikonchiuas. Itekitikauan Jehová nochipa kitemouaj keniuj okachi kitekitiliskej Dios (Hech. 16:9). Sayoj ke, komo ayamo ueli tikonchiua, amo xikonnemili ke amo ueli tiontapaleuia kemej oksekin, porin keman tiktekitiliaj Jehová semi moneki maj se taxiko uan yejua nejon tein okachi moneki (Mat. 10:22). Amo xikonelkaua ke tikonyolpaktia Jehová keman tikonchiua nochi tein tionueli. Ijkon uelis tikonsentokas tikontojtokas Jesús satepan ke tionmoauis (Sal. 26:1).

12, 13. ¿Toni uelis tikonchiuas komo tikonita ke amo semi tionyolpakiok? (1 Corintios 9:​16, 17; no xikonita recuadro “ Toni uelis tikonchiuas para kemej yeskia tikonsentokas tiontsikuinis”).

¹² ¿Toni uelis tikonchiuas komo tikonita ke tein tikoniluia Jehová amo yejua tein tikonmachilia oso ke amo semi mitsonyolpaktiaok tiontanojnotsas nion tikonixtajtoltis Biblia kemej achto? Komo ijkon mitsonpanoua satepan ke tionmoauia, amo xikonnemili ke Jehová amo mitsonpaleuijtok. Kemej titajtakolejkej, kemansa uelis amo semiok tiknekiskej titekitiskej kemej achto. Komo tikonita ke amo semi tionyolpakiok, itech xiontanemili tein kichiuak tatitanil Pablo. Maski semi mochikauaya kichiuas kemej Jesús, kimatia ke kemansa amo semi kinekiskia kichiuas tein kuali (xikonixtajtolti 1 Corintios 9:​16, 17). Kijtoj: “Komo nikchiua maski amo nikneki, ipa yejua nejon tekit tein nechiluijkej maj nikchiua”. Pablo  kiixtalijkaya nochipa kitekitilis Jehová maski kemansa amo kuali momachiliaya.

¹³ Amo xikonixtali tikonchiuas teisa keman amo kuali tionmomachilijtos. Xikonixtali tikonchiuas tein kuali hasta keman amo tikonnekis tikonchiuas. Komo tikonsentoka tikonchiua tein kuali, satepan uelis mopatas tein tikonmachilia. Komo tikonsentoka tionmomachtia moselti, tikontataujtia Jehová, tionyoui nechikolmej uan tiontanojnotsa, mitsonpaleuis nochipa xikontojtoka Jesús satepan ke tionmoauis. Uan tokniuan moyolchikauaskej keman mitsonitaskej ke tikonsentoka tikontekitilia Jehová (1 Tes. 5:11).

“XIKSENTOKAKAN XIMOYEKITAKAN”

14. ¿Toni semi moneki maj kemansa tikyekitakan ox tikchiujtokej uan keyej? (2 Corintios 13:5).

¹⁴ Satepan ke tionmoauis semi moneki xikonita ox yekmelauj tiontakuaujtamati (xikonixtajtolti 2 Corintios 13:5). Xikonita ox mojmostaj tionmotataujtia, tikonixtajtoltia uan tionmomachtia Biblia, tionyoui nechikolmej uan tiontanojnotsa. Xikontemo keniuj okachi mitsonyolpaktis tikonchiuas nejon. Uelis tionmotajtanis: “¿Ueli nikmelaua se tamachtilis tein amo ouij tein kipia Biblia? ¿Keniuj uelis okachi niyolpakis keman nitanojnotsas? Keman niktataujtia Jehová, ¿nikiluia tein yekmelauj niknejneki oso tein nikmachilia uan kinextia ke iuan nitakuaujtamati? ¿Nimochikaua nias nochi nechikolmej? ¿Toni uelis nikchiuas para okachi kuali nitakakis itech nechikolmej uan nitanankilis?”.

15, 16. ¿Toni mitsonmachtia tein kipanok Robert?

¹⁵ No moneki tikonitas toni mitsonouijmaka tikonixtopeuas. Maj tikitakan tein kipanok se tokniuj akin monotsa Robert uan kinextia keyej moneki tikitaskej nejon. Yejua kijtoua: “Keman nikpiaya 20 xiujmej, nitekitia sayoj seki tonalmej. Se tonal satepan den tekit, se siuat akin iuan nitekitia nechyoleuak maj niouj ichan. Nechiluij ke kemej amo akin yetoya, ueliskia ‘tisenyetoskej tepitsin’. Yekinika amo nikyekiluij keyej amo niaskia, sayoj ke satepan, nikiluij ke amo, uan nikmelauilij keyej”. Robert kiixtalij amo yas, uan nejon semi kipaleuij. Sayoj ke satepan kinemilij ke amo ijkon monekia tanankilis. Yejua kijtoua: “Amo niman nikixtopeuak ijkon kemej kichiuak José iuan isiuauj Potifar (Gén. 39:​7-9). Uan amo niknemiliaya ke ouij nechkisaskia nikiluis ke amo. Tein nechpanok nechpaleuij maj  nikita ke monekia okachi kuali nimouikas iuan Jehová”.

¹⁶ Uan maski kemaj uelik tikonixtopeuak se tajtakol, semi mitsonpaleuis komo tikonchiua kemej Robert akin itech tanemilij tein kichiuak. Yejua ika xionmotajtani: “¿Niman nikijtoj ke amo?”. Komo tikonita ke moneki tikonpatas teisa, amo xionmoyolkoko, ta xionyolpaki porin tikonita toni ouij mitsonkisa tikonixtopeuas. Xikonilui Jehová tein mitsonpanoua uan xikonita toni uelis tikonchiuas para nochipa tikonchiuas tein Jehová tanauatia (Sal. 139:​23, 24).

17. ¿Keniuj tein kipanok Robert kinextia ke komo tiktakamatij Jehová tikueyitaliaj yejuatsin?

¹⁷ Robert kisentoka techtapouia tein kipanok. Yejua kijtoua: “Keman nikiluij nejon siuat ke amo niaskia, nechiluij: ‘Takaj amo melauj tein nechiluijkaj’. Niktajtanij keyej. Nechiluij ke se akin katka itaixpantijkauj Jehová kiluijka ke nochin telpochmej akin itaixpantijkauan Jehová kichiuaj tein amo kuali keman amo kinitstokej. Yejua ika nejon siuat kiluij itasojikniuj ke kiitaskia ox nejua no ijkon nikchiuaya. Semi niyolpaki porin nikchiuak maj kuali ika tajtokan Jehová”.

18. ¿Toni tikonixtalijya tikonchiuas satepan ke tionmoauis? (No xikonita recuadro “ Ome tamachtilismej tein semi tapaleuiaj”).

¹⁸ Keman tionmotemaktia iuan Jehová uan tionmoauia, tikonnextia ke tikonneki tikonueyitalis itokay maski ouij mitsonkisas. Uelis tikonneltokas ke Jehová kiita ouijkayomej tein tikonpanoua uan ke tikonixtalia amo tikonchiuas tein amo kuali. Yejua kiita ke tionmochikaua amo tikonkauas uan mitsontatiochiuis. Xikonneltoka ke mitsonpaleuis xikonchiua tein kuali yetok (Luc. 11:​11-13). Jehová mitsonpaleuis xikonsentoka xikontojtoka Jesús satepan ke tionmoauis.