1, 2. ¿Toni moneki tikchiuaskej achto ke timoauiskej?

 ITECH makuil xiuit tein panokya, panoua se millón moauijkej para mochiuaskej itaixpantijkauan Jehová. Miakej kiixmatkej Jehová keman katkaj konemejok, ijkon kemej Timoteo (2 Tim. 3:​14, 15). Sekin kiixmatkej Jehová keman katkaj uejueykej, oso keman tel xiuejkejya. Se siuat akin kimachtijkej ika Biblia moauij keman kipiaya 97 xiujmej.

² Komo tionmomachtijtok Biblia xa tikonnemilijtokya tionmoauis. Oso komo motatuan itaixpantijkauan Jehová xa tiknemilijtok no tikchiuas nejon. ¡Semi kuali komo nansejsemej nankiixtaliaj ijkon nankichiuaskej! Sayoj ke achto moneki tikonchiuas se taman: moneki tionmotemaktis iuan Jehová. Nejin tamachtilis kimelauas toni kijtosneki maj se motemakti iuan Dios. No timomachtiskej keyej amo moneki tionmouis tionmotemaktis uan tionmoauis komo tikonnemilia ke uelisya tikonchiuas.

¿TONI KIJTOSNEKI SE MOTEMAKTIS IUAN DIOS?

3. Xikonijto akonimej motemaktijkej iuan Dios ne uejkauj.

³ Biblia kijtoua ke keman aksa motemaktia iuan Jehová, peua kikui inemilis para kichiuas tein Dios kineki. Nochi xolal Israel motemaktijka iuan Jehová. Sayoj ke seki israelitas motemaktijkaj para kichiuaskej sayoj seki tekimej. Kemej Aarón, keman Jehová kiixpejpenak maj yeskia se tayekankatiopixkat. Yejua ika, tein ika kuatsaktoya, iixkuako kipiaya se tepos kanauak de oro “tein  kinextiaya ke Dios kixeloj” (Lev. 8:9). Nazareos no motemaktijkaj iuan Jehová para kichiuaskej se tekit. Itech hebreo tajtol nazareo moijtoua nazír, tein kijtosneki “kixelojkej” oso “motemaktij”. ITanauatil Moisés kijtouaya ke yejuan monekia kitakamatiskej seki tanauatilmej (Núm. 6:​2-8).

4. 1) ¿Toni kijtosneki timotemaktiskej iuan Jehová? 2) ¿Toni kijtosneki timoixtopeuaskej? (No xikonita taixkopin).

⁴ Keman tejuan timotemaktiaj iuan Dios kijtosneki ke tikixtaliaj tikchiuaskej kemej Jesús uan tiktayekanaltiskej tikchiuaskej tein Dios kiyolpaktia. ¿Keniuj tikchiuaj nejon? Jesús kijtoj: “Komo aksa kineki nechtojtokas, maj moixtopeua” (Mat. 16:24). Tajtolmej “maj moixtopeua” no kijtosneki “maj amo nemiok para yejua”, uan nejon kinextia ke aksa moneki kiixtopeuas tein kinejneki. Keman tejuatsin tionmotemaktis iuan Jehová, monekis tikonixtopeuas tein amo kiuelita (2 Cor. 5:​14, 15). No moneki tikonixtopeuas tein ‘kinejneki monakayo’, kemej auilnemilis (Gál. 5:​19-21; 1 Cor. 6:18). Komo tikontasojta Jehová uan tikonneltoka ke tein mitsonnauatia, semi mitsonpaleuis amo mitsonouijmakas tikonchiuas nejin (Sal. 119:97; Is. 48:​17, 18). Se tokniuj takat akin monotsa Nicholas kijtoua: “Uelis tikitas ke itanauatiluan Jehová kemej se cárcel kampa amo mitskauaj xikchiua tein tikneki, oso kemej tein ika kitsakuaj se león para maj amo mitskua”.

5. 1) ¿Keniuj motemaktia aksa iuan Jehová? 2) ¿Keniuj taman kijtosneki se motemaktis iuan Dios uan se moauis? (No xikonita taixkopimej).

⁵ ¿Keniuj aksa motemaktia iuan Jehová? Kichiua se netataujtil, uan motenkaua ke nochipa kiueyichiuas sayoj  toTajtsin uan ke nochipa kichiuas tein kiyolpaktia. Ijkon, motenkaujtok iuan Jehová ke nochipa kitasojtas ika nochi iyolo, ika nochi inemilis, ika nochi itanemilil uan ika nochi ichikaualis (Mar. 12:30). Keman tionmotemaktia amo akin kimati, sayoj tejuatsin uan Jehová. Uan keman tionmoauis, kemaj miakej kiitaskej ke tionmotemaktijya iuan Jehová. Tein timotenkaujkej iuan Jehová amo moneki tikauilmatiskej. Tejuatsin tikonneki tikonchiuas ijkon kemej tionmotenkauak, uan Jehová no kineki xikonchiua nejon (Ecl. 5:​4, 5).

¿TONI MITSONPALEUIS XIONMOTEMAKTI IUAN JEHOVÁ?

6. ¿Keyej aksa motemaktia iuan Jehová?

⁶ Kemej tikontasojta Jehová kichiuas xionmotemakti iuan. Uan okachi tikontasojtatiuj Jehová ijkon kemej okachi tikonixmattiuj tein yejuatsin kineki uan tein kichiuas (Col. 1:9). Keman tionmomachtij Biblia, tikonitak ke 1) Jehová yekmelauj nemi, 2) ika ichikaualis kichiuak maj moijkuilo Biblia, uan 3) kikui inechikol para kichiuas tein kineki.

7. ¿Toni moneki kichiuas akin kineki motemaktis iuan Jehová?

⁷ Komo aksa kineki motemaktis iuan Jehová, moneki kiixmatisya tein ika se peua se momachtia Biblia. No moneki nemis kemej Dios tanauatia, uan kiteixmatiltijtos tein kineltoka nochipa keman uelis (Mat. 28:​19, 20). Uan no moneki maj kitasojta Jehová uan maj kiueyichiujto. ¿Uan tejuatsin tikonchiujtokya nejin? Komo semi tikontasojta Jehová, amo tionmotemaktis nion tionmoauis  porin tikonneki tikonyolpaktis akin mitsonmachtia ika Biblia. Uan komo titelpoch, amo sayoj tiknekis tikchiuas porin tikneki tikinyolpaktis motatuan oso porin motasojikniuan moauijkejya.

8. ¿Keyej komo timotasojkamatij techpaleuis maj timotemaktikan iuan Dios? (Salmo 116:​12-14).

⁸ Komo tikonnemilia nochi tein Jehová moka kichiuani, tikonnekis tikontasojkamatilis uan nejon kichiuas iuan xionmotemakti (xikonixtajtolti Salmo 116:​12-14). Biblia kijtoua ke Jehová techmaka “nochi tatiochiualismej tein kuali uan tein amo teyi kinpoloua” (Sant. 1:17). Semej tein techtayokoliaj, yejua iKonetsin, Jesús, akin toka momikilij. Nejon techpaleuia maj kuali timouikakan iuan uan maj ueli tinemikan nochipaya (1 Juan 4:​9, 10, 19). Nejon kinextia ke Jehová semi mitsontasojta. Komo tionmotemaktia, tikonnextis ke tikontasojkamatilia nejon uan nochi tein moka kichiuani (Deut. 16:17; 2 Cor. 5:15). Yejua nejon ika motajtoua itech amaix Tiyolpakiskej nochipaya, tamachtilis 46, punto 4, kampa no uelis tikonitas video Tein uelis tiktayokoliskej Dios.

¿UELISYA TIONMOTEMAKTIS IUAN DIOS UAN TIONMOAUIS?

9. ¿Keyej amo akin moneki kimachilis ke kichikaujkauiaj maj motemakti iuan Jehová?

⁹ Xa tikonnemilia ke ayamo uelis tionmotemaktis uan tionmoauis. Xa monekis tikonpatasok seki taman para uelis tikontakamatis Jehová, oso xa moneki maj panook tiempo para okachi tiontakuaujtamatis iuan (Col. 2:​6, 7). Xikonelnamiki ke amo nochin akin momachtijtokej Biblia niman peua kitekitiliaj Dios. Uan amo nochin telpochmej niman takuaujtamatij iuan Jehová kemej oksekin. Xikonita tein tejuatsin ueli tikonchiua uan tein tikonpanotok, uan amo xikonita tein oksekin ueli kichiuaj (Gál. 6:​4, 5).

10. ¿Toni uelis tikonchiuas para tikonitas ke ayamo uelis tionmotemaktis uan tionmoauis? (No xikonita recuadro “ Komo motatuan itaixpantijkauan Jehová”).

¹⁰ Komo tikonita ke ayamo ueli tionmotemaktia iuan Jehová, xikonsentoka xionmochikaua para uelis tikonchiuas. Xikontajtani Jehová maj mitsonpaleui xikonpata tein moneki (Filip. 2:13; 3:16). ToTajtsin kikakis keman tikontataujtis uan mitsonnankilis (1 Juan 5:14).

¿KEYEJ SEKIN AYAMO MOTEMAKTIAJ UAN MOAUIAJ?

11. ¿Keniuj Jehová techpaleuia para maj amo keman tikauakan?

¹¹ Maski sekin ueliskiajya motemaktiskej uan moauiskej, ayamo kinekij kichiuaskej. Xa mouij kichiuaskej se tajtakol uan maj kinkalankixtikan. Sayoj ke Biblia kijtoua ke Jehová kinmakas itekitikauan nochi tein monekis para maj ‘nemikan kemej moneki nemiskej akin kitekitiliaj uan ijkon kiyolpaktiskej itech nochi’ (Col. 1:10). Yejua ika, uelis tikonneltokas ke Jehová mitsonmakas chikaualis para tikonchiuas tein kuali porin ipa kinpaleuianiya miakej (1 Cor. 10:13). Nejin se kiita porin amo miakej kinkalankixtiaj de nechikol. Jehová techpaleuia akin tiktekitiliaj para maj amo tikauakan.

12. ¿Toni techpaleuis maj amo titajtakolchiuakan?

¹² Kemej titajtakouanij, kemansa tiknejnekij tikchiuaskej tein amo kuali (Sant. 1:14). Sayoj ke keman tikonnejnekis tiontajtakolchiuas, tejuatsin tikonmati ox  tikonchiuas oso amo. Miakej kijtouaj ke amo ueli se motsakuilia, sayoj ke nejon amo melauak. Uelis tiktsakuiliskej tein tikmachiliaj uan tein tiknejnekij. Onkak seki taman tein uelis techpaleuis maj amo titajtakolchiuakan kemej: tiktataujtiskej Jehová, timomachtiskej Biblia toselti, tiaskej nechikolmej uan titanojnotsaskej. Komo nochipa tikchiuaj nejin, Jehová techpaleuis maj tikchiuakan tein timotenkaujkej. Maj tikelnamikikan ke amo toselti tietokej, ta Jehová techpaleuijtok (Gál. 5:16).

13. ¿Toni techmachtia tein kichiuak José?

¹³ Komo achto tiknemiliaj toni tikchiuaskej keman tiknejnekiskej titajtakolchiuaskej, techpaleuis maj nochipa tiktakamatikan Jehová. Biblia ininka tajtoua sekin akin ijkon kichiujkej, maski yejuan no katkaj tajtakolejkej kemej tejuan. Semej katka José. Isiuauj Potifar miakpa kiluij maj iuan moteka, sayoj ke yejua kiixtalijkaya keniuj kinankilis. Biblia kijtoua ke José “amo kinekia” uan kiluiaya: “Amo keman nikchiuaskia nejin tein tel amo kuali uan ika nikixnamikis Dios” (Gén. 39:​8-10). Nesi ke achto ke isiuauj Potifar kiluiskia maj iuan moteka, José ipa kimatiaya keniuj tanankilis. Yejua ika niman uelik kijtoj ke amo.

14. ¿Keniuj uelis tikixtopeuaskej nochi tein Jehová kitauelita?

¹⁴ ¿Keniuj uelis tikchiuaskej kemej José uan amo tikauaskej Jehová? Komo tiknemiliaj desde axkan toni tikchiuaskej keman tiknekiskej titajtakolchiuaskej. Maj niman tikixtopeuakan nochi tein Jehová kitauelita uan maj nion tepitsin itech titanemilikan (Sal. 97:10; 119:165). Nejon techpaleuis maj amo titajtakolchiuakan keman tiknekiskej porin niman tikmatiskej toni tikchiuaskej.

15. ¿Keniuj uelis tikonnextis ke tikontemoua Jehová ika nochi moyolo? (Hebreos 11:6).

¹⁵ Xa tikonneltoka ke tein timomachtiaj yejua tein melauak, uan tikonneki tikontekitilis Jehová ika nochi moyolo. Sayoj ke, ¿teisa mitsontsakuilia xionmotemakti uan xionmoaui? Uelis tikonchiuas tein kichiuak tekiuaj David uan xikontataujti Jehová: “Xinechita, noDios, uan xikixmati noyolo. Xinechita, uan xikixmati notanemililuan tein nechtekipachouaj. Uan xikita ox onkak notech  se ojti tein teyolkokoj, uan xinechyekana itech ojti tein amo keman tami” (Sal. 139:​23, 24). Keman tikonchiuas tein moneki para tionmotemaktis uan tionmoauis, kinextis ke yekmelauj tikontemoua Jehová. Uan Biblia kijtoua ke yejuatsin kintatiochiuia akin ijkon kichiuaj (xikonixtajtolti Hebreos 11:6).

XIKONSENTOKA XIONMOTOKI IUAN JEHOVÁ

16, 17. ¿Keniuj kichiua Jehová maj iuan motokikan ininkoneuan tokniuan? (Juan 6:44).

¹⁶ Jesús kijtoj ke Jehová kichiua maj iuan motokikan (xikonixtajtolti Juan 6:44). ¡Tel kualtsin tein kichiua! ¿Toni kijtosneki nejon para tejuatsin? Keman Jehová kichiua maj aksa iuan motoki, kiita tein kuali tein kipia iyolijtik. Jehová kiita ke sejse itekitikauj yejua “iaxka” uan semi kipatiuita (Deut. 7:6). Uan tejuatsin no ijkon mitsonita.

¹⁷ Telpoch, komo motatuan mitsmachtijtokej Biblia, xa tiknemilis ke tiouj nechikol porin motatuan mitsuikaj uan amo porin Jehová kichiuak ximotoki iuan. Biblia kijtoua nejin: “Ximotokikan iuan Dios uan yejua motokis namouan” (Sant. 4:8; 1 Crón. 28:9). Nejin kijtosneki ke komo tejuan iuan timotokiaj, yejuatsin no touan motokis. Jehová amo kinemilia ke amo teyi tichiujkej. Nochin tokniuan akin yetokej itech nechikol Jehová kichiuak maj sejsemej iuan motokikan. Uan no ijkon kichiuak iniuan ininkoneuan tokniuan. Uan keman aksa kiixtalia kichiuas seki taman para motokis iuan Jehová, yejuatsin kichiua tein moneki ijkon kemej kijtoua Santiago 4:8 (no xikonita tein kijtoua 2 Tesalonicenses 2:13).

18. ¿Toni tikitaskej itech okse tamachtilis? (Salmo 40:8).

¹⁸ Keman Jesús moauij kiluij Jehová ke kichiuaskia nochi tein kitajtaniskia (xikonixtajtolti Salmo 40:8; Heb. 10:7). Keman tionmotemaktis iuan Jehová uan tionmoauis, tikonchiujtos kemej Jesús. Itech okse tamachtilis tikitaskej tein mitsonpaleuis xikonsentoka xikontekitili Jehová satepan ke tionmoauis.