1. 1) ¿Katiyejua seki tanauatilmej moajsij itech Biblia? 2) ¿Keniuj techpaleuia tiktakamatiskej?

ITECH Biblia, Jiova techmakatok tanauatilmej tein senkis techpaleuiaj maj tikmatikan toni kineki maj tikchiuakan. Kemej neskayot, yejuatsin techiluia maj amo tikinueyichiuakan tiotsitsin, maj amo titachtekikan, maj amo titauanakan nion maj tiauilnemikan (1 Cor. 6:9, 10). Uan no, Jesús kinmakak imomachtijkauan nejin tanauatil: “Xiyakan nochi tech in senmanauak uan xikinnextilikan nochi in taltikpakuani ma yejuan no ma mochiuakan nomomachtijkauan. Uan xikinauijtinemikan ika itokaytsin de Toueyitajtsin Dios uan de Ikonetsin Dios uan de in [y]ektikatsin [e]spíritu. Uan xikinmachtikan de ke ma tatakamatikan nochi ika in tanextililisme ten namechnajnauatiaj ma no xikchiuakan. Uan xikmatikan ke Nejuatsin niyetos nachipa namouan” (Mat. 28:19, 20). Semi techpaleuia keman tiktakamatij itanauatiluan Jiova. Techpaleuia maj kuali timomachilikan, maj kuali tiyetokan uan maj tiyolpakikan iniuan tochankauan. Sayoj ke tein okachi moneki yejua ke komo tiktakamatij itanauatiluan Jiova kemej tein kijtoua maj se kiteixmatilti iTekiuajyo, tikyolpaktiskej uan techtatiochiuis.

2, 3. 1) ¿Keyej itech Biblia amo moajsij tanauatilmej tein kinextiaj toni moneki tikchiuaskej itech nochi? 2) ¿Toni netajtanilmej tiknankiliskej itech nejin tamachtilis? (Xikonita taixkopin ipeujyan tamachtilis.)

 ² Sayoj ke itech Biblia amo moajsij tanauatilmej tein kinextiaj toni moneki tikchiuaskej itech nochi. Kemej neskayot, amo techiluia toni taken moneki timotaliliskej uan toni amo. Nejin kinextia ke Jiova semi tamatkej. ¿Keyej? Porin itech sejse ueyi altepet, semi tataman kemej motakentiaj taltikpakneminij. Uan no, tein kiuelitaj motaliliskej mopata ijkon kemej panouaj tonalmej. Sayoj ke tein kijtoua Biblia tein techpaleuia maj tikmatikan keniuj timotakentiskej amo keman mopata. Biblia amo no kijtoua toni tekit uelis tikpiaskej uan toni amo, keniuj timopajtiskej oso keniuj timoixpetaniskej, ta Jiova kikaua sejse taltikpaknenkej uan sejse tepopaj maj kiixpejpena tein kichiuas.

³ Xa monekis tikixpejpenaskej se taman tein motelneki uan Biblia amo senkis kitemaka se tanauatil. Yejua ika xa timotajtaniskej: “¿Keniuj kiitas Jiova tein nikixpejpenas? ¿Uelis nikixpejpenas tein yeski taman komo amo niktapanauilia se tanauatil itech Biblia? ¿Keniuj uelis nikmatis ke Jiova kiyolpaktis tein nikixpejpenas?”. Itech nejin tamachtilis tiknankiliskej nejin netajtanilmej.

4, 5. ¿Toni uelis panos ika tein tikixpejpenaskej?

⁴ Sekin kinemiliaj ke uelis kiixpejpenaskej tein yeski uan amo teyi panos. Sayoj ke tejuan tiknekij tikixpejpenaskej tein kiyolpaktis Jiova. Yejua ika, achto ke tikixpejpenaskej teisa, moneki tiknemiliskej toni kijtoua Biblia uan satepan tiktakamatiskej. Kemej neskayot, Biblia kijtoua keniuj Jiova kiita esti. Uan tejuan no ijkon titanemiliaj (Gén. 9:4; Hech. 15:28, 29). Uelis tiktajtaniskej Jiova maj techpaleui maj tikixpejpenakan tein kiyolpaktis.

⁵ Tein tikixpejpenaj uelis techpaleuis oso techijtakos. Komo kuali titaixpejpenaj, okachi kuali timouikaskej iuan Jiova. Komo amo kuali titaixpejpenaj, uelis tikijtakoskej tokuali uikalis iuan. Uan no, tein tikixpejpenaj uelis kinpaleuis oso kinijtakos oksekin. Komo amo kuali titaixpejpenaj, uelis tikinkuejmoloskej tokniuan oso tikchiuaskej maj amo semi takuaujtamatikanok. Amo keman tiknekij tikchiuaskej nejon. Uan amo no tiknekij tikchiuaskej maj tokniuan moxexelokan. Kemej tikitaj, semi moneki maj kuali titaixpejpenakan (xikonixtajtolti Romanos 14:19 uan Gálatas 6:7).

6. ¿Keniuj moneki titaixpejpenaskej?

⁶ Komo Biblia amo techiluia toni moneki tikixpejpenaskej itech se taman, ¿toni moneki tikchiuaskej? Maj amo tikixpejpenakan tein tiknemiliskej ke okachi kuali, ta maj titanemilikan ika nejmachkayot uan maj tikixpejpenakan tein kiyolpaktia Jiova. Ijkon tikyekmatiskej ke yejuatsin techpaleuis uan techtatiochiuis (xikonixtajtolti Salmo 37:5).

7. ¿Keniuj uelis tikmatiskej katiyejua itanejnekilis Jiova komo itech Biblia amo senkis moajsi se tanauatil ika se taman?

⁷ Sayoj ke ¿keniuj uelis tikmatiskej tein kiyolpaktis Jiova? Efesios 5:17 kijtoua: “Xiksentokakan xikajsikamatikan katiyejua  itanejnekilis Jiova”. Kemej tikitaj, komo itech Biblia amo senkis moajsi se tanauatil tein kinextia toni moneki tikchiuaskej itech se taman, moneki tiktemoskej tikajsikamatiskej katiyejua itanejnekilis Dios (xikonita kampa kijtoua “Tein okachi momelaua”). Nejin kijtosneki ke moneki timochikauaskej tikmatiskej toni kineki Jiova maj tikchiuakan. ¿Keniuj uelis tikmatiskej? Komo tiktataujtiaj uan tikauaj maj iespíritu techixyekana.

8. Xikonmelaua ika se neskayot keyej Jesús uelia kimatia katiyejua itanejnekilis Jiova.

⁸ Jesús nochipa mochikauaya kimatis tein Jiova kinekia maj kichiua. Kemej neskayot, Biblia ika tajtoua ome tonal keman Jesús kimiakiltij takual tein ika kintamakak miakej, sayoj ke achto kichiuak netataujtil (Mat. 14:17-20; 15:34-37). Sayoj ke keman mayanak ijkuak moajsia taluakyan uan Amokuali kinauatij maj seki tet kikepa pan, yejua amo kinekik kichiuas (xikonixtajtolti Mateo 4:2-4). ¿Keyej? Porin kuali kiixmatia iPopaj uan kimatia ke amo kiyolpaktiskia maj kitekitilti yektikatsin espíritu kemej sayoj yejua mopaleuiskia. Senkis kimatia ke Dios kiixyekanaskia uan kimakaskia takual keman monekiskia.

9, 10. ¿Toni techpaleuis maj kuali titaixpejpenakan? Xikonijto se neskayot.

⁹ Komo tikchiuaj kemej Jesús uan titakuaujtamatij itech itaixyekanalis Jiova, uelis kuali titaixpejpenaskej. Biblia kijtoua: “Xitakuaujtamati iuan Jiova ika nochi moyolo, uan amo ximopaleui itech motaajsikamatilis. Itech nochi tein tikchiuas xiktemo Dios, uan yejuatsin kimelauas moojuan. Amo ximochiua xitamatkej moixpan. Xikmoujkatoka Jiova uan xiktalkaui tein amo kuali” (Prov. 3:5-7). Keman timomachtiaj Biblia uan tikajsikamatij keniuj tanemilia Jiova, ueli tikmatij tein kineki maj tikchiuakan. Uan ijkon kemej okachi tikajsikamatiskej keniuj tanemilia, okachi amo ouij yeski tikixpejpenaskej tein kiyolpaktis. Uan no, ika nochi toyolo tiknekiskej maj techixyekana (Ezeq. 11:19).

¹⁰ Maj tiktalikan se neskayot. Maj tiknemilikan ke se siuat takoujtok uan kiita seki tekakmej. Semi kualtsitsin, sayoj ke tel patiyojkej. Maski amo yetok iuan inamik, yejua kimati tein kinemiliskia komo kikouaskia teisa tein tel patiyoj. ¿Keniuj kimati? Porin uejkaujya monamiktijkej uan kimati keniuj kinemilia itakauj ke moneki kitekitiltiskej tomin tein kipiaj. No ijkon, keman tikmatij keniuj tanemilia Jiova uan tein kichiuakya ne uejkauj, ueli tikmatij tein kineki maj tikchiuakan itech sejse taman tein tikpanoskej.

11. ¿Toni uelis timotajtaniskej keman tikixtajtoltiskej oso timomachtiskej Biblia? (Xikonita kampa kijtoua “ Keman tionmomachtis Biblia, xionmotajtani”.)

¹¹ ¿Keniuj uelis tikmatiskej tein Jiova kinemilia? Tein okachi techpaleuis yejua komo nochipa tikixtajtoltiaj uan  timomachtiaj Biblia. Keman tikixtajtoltiskej oso timomachtiskej, uelis timotajtaniskej: “¿Toni nechmachtia nejin kemej tanemilia Jiova? ¿Keyej ijkon kichiuak nejin?”. Maj tikchiuakan kemej David uan maj tiktajtanikan Jiova maj techpaleui maj okachi kuali tikixmatikan. David kijkuiloj: “Xinechixmatilti moojuan, Jiova; xinechnextili moojuan. Xikchiua maj ninejnemi itech momelaujkayo uan xinechmachti, porin tejua tinoDios akin temakixtia. Motech nimochia nochi tonal” (Sal. 25:4, 5). Keman tikajsikamatiskej se taman kemej tanemilia Jiova, maj tiknemilikan seki taman kampa uelis tiktekitiltiskej tein timomachtijkej. Uelis timotajtaniskej: “¿Keniuj uelis nikuis nejin iniuan nochankauan, kampa nitekiti, itech kaltamachtiloyan oso itech tanojnotsalis?”. Komo tiknemiliaj kemanian ueliskia tiktekitiltiskej, okachi amo ouij techkisas tikmatiskej tein Jiova kineki maj tikchiuakan.

12. ¿Keniuj techpaleuiaj toamaixuan uan nechikolmej?

¹² ¿Toni okse taman techpaleuis maj tikmatikan tein Jiova kinemilia? Maj tikakikan ika nejmachkayot tein inechikol techmachtia ika Biblia. Kemej neskayot, keman moneki tikixpejpenaskej se taman, Índice de las publicaciones Watch Tower uan Nepaleuil tein ika momachtiaj itaixpantijkauan  Jiova uelis techpaleuiskej maj tikmatikan tein Jiova kinemilia. Okse taman tein no techpaleuis yejua nechikolmej. Komo tikakij ika miak nejmachkayot, titanankiliaj uan titanemiliaj itech tein ompa techmachtiaj, uelis tikixpejpenaskej tein kiyolpaktis Jiova uan tein kitiochiuas.

13. Xikonmelaua ika se neskayot keniuj techpaleuia maj kuali titaixpejpenakan komo tikixmatij keniuj tanemilia Jiova.

¹³ Komo tikixmatij tein Jiova kinemilia uan itech titanemiliaj, uelis techpaleuis maj kuali titaixpejpenakan. ¿Keniuj? Maj tikitakan se neskayot. Maj tiknemilikan ke tiknekij tikchiuaskej tekit kemej precursor. Xa tikpatakejya seki taman tein techpaleuis maj tiuelikan okachi titanojnotsaskej. Sayoj ke timotajtaniajok ox tiyolpakiskej komo amo tikpiaj miak tomin nion miak taman. Melauak ke Biblia amo kijtoua ke sayoj uelis tiktekitiliskej Jiova komo tikchiuaj tekit kemej precursor. Uelis tiktekitiliskej ika nochi toyolo kemej tanojnotsanij. Sayoj ke Jesús tamachtij ke Jiova kintatiochiuia akin motemakaj kikauaskej seki taman porin kinekij okachi kitekitiliskej (xikonixtajtolti Lucas 18:29, 30). Uan no, Biblia kijtoua ke Jiova kiyolpaktia maj tikchiuakan nochi tein tiueliskej tein ika tikueyichiuaskej. Yejuatsin kineki maj tiktekitilikan ika yolpakilis (Sal. 119:108; 2 Cor. 9:7). Komo timotataujtiaj uan titanemiliaj itech nejin, uelis tikixpejpenaskej tein uelis tikchiuaskej uan tein Jiova kitiochiuas.

14. ¿Keniuj uelis tikmatiskej komo se taman kemej timochijchiuaj kiyolpaktia Jiova?

¹⁴ Maj tikitakan okse neskayot. Maj tiknemilikan ke semi tikuelitaj seki taman tilmaj. Sayoj ke tikmatij ke komo timotaliliaj, seki tokniuan itech nechikol uelis amo kuali kiitaskej. Biblia amo kijtoua ke amo uelis timotaliliskej nejon tilmaj. ¿Keniuj uelis tikmatiskej tein Jiova kinemilia? Biblia techyolmajxitia nejin: “Siuame taneltokani ma motakentikan ika taixejekolis san ten kuali san. [...] Uan kuak mokuaxiluiske, ijkuakon ma amo semi kitelpanoltikan. Uan kuak motaliliske oro uan ne tetsitsin ten semi patio ten kiliaj perlas, ijkuakon ma amo sayo ika moueyimatinemikan. Uan nion no ma motakentikan ka ne takemit ten semi patio [...]. Ta, se siuat ma mokualnexti ika ne ichipaukanemilis uan itatakamatilis” (1 Tim. 2:9, 10). Nejin tayolmajxitilis moneki kitakamatiskej amo sayoj tokniuan siuamej, ta no takamej. Komo tiyolyemankej, tikitaskej tein oksekin uelis kinemiliskej ika tilmaj tein timotaliliskej uan kemej timochijchiuaskej. Uan kemej tikintasojtaj tokniuan, timochikauaj amo tikinkuejmoloskej nion tikinkualantiskej (1 Cor. 10:23, 24; Filip. 3:17). Komo titanemiliaj itech tein kijtoua Biblia uan itech tein Jiova kinemilia, uelis tikixpejpenaskej tein kiyolpaktis.

15, 16. 1) ¿Keniuj momachilia Jiova komo tiksentokaj titanemiliaj itech auilnemilis? 2) ¿Keniuj uelis tikyekmatiskej ke tein ika timoixpetaniaj kiyolpaktia Jiova? 3) ¿Toni moneki tikchiuaskej achto ke tikixpejpenaskej teisa tein motelneki?

¹⁵ Biblia tamachtia ke Jiova tayokoya keman taltikpakneminij kichiuaj oso kinemiliaj tein amo kuali (xikonixtajtolti Génesis 6:5, 6). Nejin techajsikamatiltia ke yejuatsin amo kineki maj tiknemilikan ke tiauilnentokej. Komo itech titanemiliskiaj nejon, se tonal ueliskia tikchiuaskej. Yejua ika Jiova kineki maj  titanemilikan itech tein chipauak uan tein kuali. Santiago kijkuiloj: “Nekes ten kipiaj in tamachilis ten ualeutok de Dios, yejuan nojonkes achto kitenextilijtinemij ninchipaukanemilis. Uan de ompa yejuan teyoltaliaj, uan teyeknojnotsaj porin yejuan yolkualime ya. Uan yejuan yolyemanke ya uan kichiuaj ten kuali. Uan yejuan tajtoaj sayo ika ten melau uan amo tekajkayauaj” (Sant. 3:17). Kemej tikitaj, Biblia tamachtia ke moneki amo timoixpetaniskej ika tein kichiuas maj tiknemilikan oso maj tiknekikan tikchiuaskej tein pitsotik uan tein amo kuali. Komo senkis tikajsikamatij tein Jiova kitasojta uan tein kitauelita, amo monekis tikintajtaniskej tokniuan toni amatajkuilolmej, películas oso neauiltilis uelis tikixpejpenaskej. Toselti uelis tikmatiskej.

¹⁶ Keman moneki tikixpejpenaskej teisa, miakpa moajsi miak taman tein uelis tikchiuaskej uan tein kiyolpaktis Jiova. Sayoj ke komo moneki tikixpejpenaskej se taman tein motelneki, xa semi techpaleuis komo titajtouaj iuan se tayekankej oso okse tokniuj akin kinextia kuali taixejekolis (Tito 2:3-5; Sant. 5:13-15). Sayoj ke amo tiktajtaniskej maj techilui toni moneki tikixpejpenaskej, ta titanemiliskej ika nejmachkayot itech tein Biblia tamachtia uan ompa toselti titaixpejpenaskej (Heb. 5:14). Tatitanil Pablo kijtoj ke tisejsemej titanankiliskej iixpan Dios ika tein tikchiuaskej (Gál. 6:5).

17. ¿Keniuj techpaleuia komo tikixpejpenaj tein Jiova kiyolpaktia?

¹⁷ Keman tikixpejpenaj tein kiyolpaktia Jiova, okachi kuali timouikaj iuan, uan yejuatsin techtatiochiuia (Sant. 4:8). Uan nejin kichiua maj okachi mochikaua totakuaujtamatilis. Yejua ika maj titanemilikan itech tein techmachtia Biblia uan ijkon uelis tikajsikamatiskej keniuj tanemilia Jiova. Melauak ke nochipa onkas miak taman tein techpaleuis maj okachi tikixmatikan (Job 26:14). Sayoj ke komo axkan timochikauaj okachi kuali tikixmatiskej, tikpiaskej tamatilis uan uelis kuali titaixpejpenaskej (Prov. 2:1-5). Taltikpakneminij nochipa kipataj tein kinemiliaj uan tein kiixtaliaj, sayoj ke Jiova amo keman mopata. Se takat akin kijkuiloj Biblia kijtoj ke tein Jiova kiixejekoua uan “tanemililmej tein kipia itech iyolo” uejkauaj nochipa (Sal. 33:11). Kemej tikitaj, keman tikmatij titanemiliskej kemej Jiova tanemilia uan tikchiuaj tein kiyolpaktia, okachi kuali titaixpejpenaj.