1-3. 1) ¿Toni uelis techouijmakas tikpataskej satepan ke timoauijkejya? 2) Komo tikpataskej seki taman techouijmaka okachi ke tein tikchiayaj, ¿toni xa timotajtaniskej? (Xikonita taixkopimej ipeujyan tamachtilis.)

ACHTO ke mochiuaskia itaixpantijkauj Jiova, Kevin miak xiujmej mauiltij ika tomin, tachichinak, tel tauanak uan kikuik drogas. ^[1] Keman momachtij keniuj tamati Jiova, kinekik kuali iuan mouikas. Sayoj ke achto ke moauiskia, monekik kipatas miak taman itech inemilis. Uelik mopatak ika inepaleuil Jiova uan iTajtol, Biblia (Heb. 4:12).

² Satepan ke moauij, Kevin monekia kisentokas mopatas uan ijkon okachi kinextiskia ikualneskayouan Cristo (Efes. 4:31, 32). Kemej neskayot, kiitak ke kitelouijmakaya amo niman kualanis. Yejua kijtoua ke okachi kiouijmakak kipatas nejon ke okseki taman tein amo kuali tein kichiuaya achto  ke moauiskia. Yejua ika kitataujtij Jiova maj kipaleuiani uan kiixtalij momachtis Biblia ika nejmachkayot. Nejon kipaleuij maj ueli mopata.

³ Achto ke timoauiskiaj, timiakej no monekik tikpataskej miak taman. Ijkon uelik tikchiujkej tein Biblia kijtoua. Sayoj ke xa tikitaj ke moneki tiksentokaskej timochikauaskej tikyektaliskej tein ika timopolouaj uan ijkon okachi tiknextiskej ikualneskayouan Dios uan Cristo (Efes. 5:1, 2; 1 Ped. 2:21). Kemej neskayot, xa tikitaj ke nochipa tikijtouaj tein amo tikinuelitiliaj oksekin oso tikinijijtouaj. Oso xa kemansa amo tikchiuaj tein kuali porin tikmouiliaj tein oksekin kijtoskej oso kinemiliskej. Xa miak xiujmejya timochikauanij timopataskej, sayoj ke tiksentokaj tikchiuaj nejon nepololmej. Yejua ika xa timotajtaniskej: “¿Keyej nechtelouijmaka nimopatas? ¿Toni moneki nikchiuas tein nechpaleuis maj niksentoka nimopata ijkon kemej kijtoua Biblia?”.

4. ¿Keyej amo nochipa ueli tikyolpaktiaj Jiova?

⁴ Akin tiktekitiliaj Dios tiktasojtaj uan tiknekij tikyolpaktiskej ika nochi toyolo. Sayoj ke amo nochipa tiuelij, porin titajtakouanij. Miakpa timomachiliaj kemej tatitanil Pablo, akin kijtoj ke kinekia kichiuas tein kuali, sayoj ke amo nochipa uelia kichiuaya (Rom. 7:18; Sant. 3:2).

5. 1) ¿Toni monekik amo tikchiuaskejok uan ijkon uelik timoauijkej? 2) ¿Keniuj kisentokaj techijtakouaj tonepololuan?

⁵ Monekik amo tikchiuaskejok miak taman tein Jiova kitauelita uan ijkon uelik timoauijkej uan timochiujkej tiitaixpantijkauan (1 Cor. 6:9, 10). Sayoj ke kemej tiksentokaj titajtakouanij, tiksentokaj timopolouaj, maski uejkaujya timoauijkej (Col. 3:9, 10). Xa kemansa tikpiaj se tanemilil oso se tanejnekilis tein amo kuali, oso xa techouijmaka amo tikchiuaskej teisa tein ika timopolouaj. Tein melauj, uelis yeski ke miak xiujmejya timochikaujtokej tikpataskej nejon.

6, 7. 1) ¿Keyej ueli kuali timouikaj iuan Jiova maski titajtakouanij? 2) ¿Keyej moneki tiksentokaskej tiktajtaniskej Jiova maj techtapojpolui?

⁶ Maski titajtakouanij, uelis kuali timouikaskej iuan Jiova uan tiktekitiliskej. Maj amo tikelkauakan ke ueli kuali iuan timouikaj porin yejuatsin kiitak ke tiknextiaj se taman tein kuali uan kinekik maj tikixmatikan (Juan 6:44). Yejuatsin kimatia ke titajtakouanij uan ke yejua ika timopolouaj. Maski ijkon, Jiova kinekik maj kuali iuan timouikakan.

⁷ Kemej Jiova semi techtasojta, techmakak se netetayokolil tein kipia miak ipatiuj. Kiualtitanik iKonetsin maj toka momikiliki uan maj kiixtauaki totajtakoluan (Juan 3:16). Keman timopolouaj, ueli tiktajtaniaj Jiova maj techtapojpolui. Ika inemilis Jesús tein kitemakak, Dios techtapojpoluia uan ueli tiksentokaj kuali iuan timouikaj (Rom. 7:24, 25; 1 Juan 2:1, 2). Maj tikelnamikikan ke Jesús ininka momikilij akin moyolnonotsaj. Yejua ika, komo tiknemiliaj ke tel amo kuali tein tikchiujkej, maj tiksentokakan tiktajtanikan Jiova maj techtapojpolui. Komo amo tiktajtaniskiaj maj techtapojpolui, kemej yeskia amo tiknekiskiaj timomapajpakaskej keman timasokiyojkej. ¿Melauj ke tiktasojkamatij maj Jiova techkaua maj kuali iuan timouikakan maski titajtakouanij? (Xikonixtajtolti 1 Timoteo 1:15.)

8. ¿Keyej moneki timochikauaskej tikyektaliskej tein ika timopolouaj?

 ⁸ Sayoj ke maj amo tiknemilikan ke amo moneki tikyektaliskej tein ika timopolouaj. Jiova techiluiani akonimej kinselia kemej itasojikniuan (Sal. 15:1-5). Yejua ika, komo tiknekij kuali iuan timouikaskej, moneki tiksentokaskej timochikauaskej tikchiuaskej kemej yejuatsin uan iKonetsin. No moneki timochikauaskej tiktsakuiliskej amo kuali tanejnekilis uan timoijkuaniliskej tein tiueliskej. Yeski yankuixtok oso uejkaujya timoauijkej, moneki tiksentokaskej timochikauaskej okachi kuali tiknextiskej ikualneskayouan Cristo (2 Cor. 13:11).

9. ¿Keniuj tikmatij ke uelis tiksentokaskej timotakentijtoskej ika “yankuik talnamikilis”?

⁹ Tatitanil Pablo tayolmajxitij: “Ximokixtilijtiyakan ne namosoltiktalnamikilis de tajtakol uan xiksekokautiyakan ne pitsotik nemilis ten nankualkuitiualayaj ne achtopa ya. [...] Uan namejuan ipa nannentinemiaj tech in tajtakol porin nanmokajkayautiuitse ika namotanejnekilis ten amokuali”. Uan no kijtoj: “Moneki ximoyankuikatalijtiyakan ika kuali tech namoyolojuan uan tech namotanemililisuan. Uan ximotakentijtiyakan ika ne yankuikatalnamikilis ten [...] kinejneuilia Dios iyolchipaualis. Uan ika ne yankuik talnamikilis xiknextijtiyakan ne chipaukanemilis ika nochi ne yolchipaualis” (Efes. 4:22-24). Nejin kijtosneki ke moneki tiksentokaskej timochikauaskej timopataskej uan timotakentiskej ika “yankuik talnamikilis”. Yejua ika, yeski miak xiujmejya tiktekitilianij Jiova oso yankuixtok, nochipa uelis okachi tikixmatiskej ikualneskayouan. Uan Biblia uelis techpaleuis maj tiksentokakan timopatakan uan ijkon okachi tiknextiskej ikualneskayouan Jiova.

10. 1) ¿Toni moneki tikchiuaskej komo tiknekij maj Biblia kisentoka techpaleui maj timopatakan? 2) ¿Toni uelis timotajtaniskej?

¹⁰ Tinochin tiknekij tiktakamatiskej tein Biblia kijtoua. Sayoj ke komo tiknekij tiksentokaskej timopataskej, moneki tikchiuaskej se ueyi chikaujkayot. ¿Keyej motelneki? ¿Amo ueli kichiua Jiova maj amo semi techouijmaka tikchiuaskej tein kuali?

11-13. ¿Keyej Jiova kichia maj timochikauakan tikyektaliskej tein ika timopolouaj?

¹¹ Keman titanemiliaj itech nochi itachijchiualis Jiova, amo tiomeyolouaj ke yejuatsin kipia chikaualis tein ika kichiua tein yeski taman. Maj titanemilikan itech Tonaltsin. Sejse segundo kikixtia tel miak tit. Maski sayoj tepitsin nejon tit ejko nikan taltikpak, sayoj yejua tein moneki tein tapaleuia maj onka nemilis (Sal. 74:16; Is. 40:26). Jiova no kinmaka chikaualis itekitikauan nikan taltikpak keman kinpoloua (Is. 40:29). Yejua ika sekin xa motajtaniaj keyej Jiova amo kichiua maj amo techtelouijmaka tikyektaliskej tein ika timopolouaj.

 ¹² Jiova techkaua maj toselti titaixpejpenakan. Yejuatsin techkaua maj tikixtalikan ox tiktakamatiskej oso amo. Keman tikixtaliaj tiktakamatiskej uan timochikauaj tikchiuaskej tein yejuatsin kineki, tiknextiliaj ke tiktasojtaj uan tiknekij tikyolpaktiskej. Satanás kijtoua ke Jiova amo kinamiki techixyekanas. Sayoj ke keman tiktakamatij Dios, tiknextiaj ke tiknekij maj yejuatsin techixyekana. Uan toTajtsin tetasojtakej kitelpatiuita chikaujkayot tein tikchiuaj (Job 2:3-5; Prov. 27:11). Kemej Jiova amo kichiua maj amo techouijmaka tikyektaliskej tein ika timopolouaj, chikaujkayot tein tikchiuaj tapaleuia maj tiknextilikan ke sayoj yejuatsin tiknekij tikyolpaktiskej uan ke tiknekij maj techixyekana.

¹³ Jiova techiluia ke moneki timochikauaskej tiknextiskej ikualneskayouan (Col. 3:12; xikonixtajtolti 2 Pedro 1:5-7). Yejuatsin kichia maj timochikauakan tiktsakuiliskej tein amo kuali tein tiknemiliaj uan tein tikmachiliaj (Rom. 8:5; 12:9). Komo tikchiuaj nochi tein tiuelij porin tiknekij timopataskej uan ueli ijkon tikchiuaj, semi tiyolpakiskej.

14, 15. ¿Toni uelis tikchiuaskej tein techpaleuis maj tiknextikan kualneskayomej tein Jiova kiyolpaktia? (Xikonita kampa kijtoua “ Biblia uan netataujtil kinpaleuij maj kipatakan inintanemilil”.)

¹⁴ ¿Toni moneki tikchiuaskej tein techpaleuis maj tikpiakan kualneskayomej tein kiyolpaktiaj Jiova? Moneki amo toselti tikixtaliskej toni moneki tikpataskej, ta timokauaskej maj Jiova techyekana. Romanos 12:2 kijtoua: “Amo xinentinemikan  ijkon keme in taltikpakuani namechnajnauatia. Ta, ximotekauilikan iuan Dios para ma Yejuatsin namechtamachilispatatiu para ijkon namechyankuikatilijtiyas ika yankuik tamachilis. Ijkuakon namejuan nankiyekajsikamatitiue ya ne tekit ten Dios kimonekiltia xikchiutiyakan. Uan nankajsikamatiske ten kuali; uan no nankajsikamatiske de keniu nankiyolpaktijtiyaske Dios”. Komo tiknekij tikmatiskej tein Jiova kiyolpaktia, moneki kuali tikuiskej nepaleuil tein techmaka. Moneki mojmostaj tikixtajtoltiskej Biblia, titanemiliskej itech tein tikixtajtoltiaj uan tiktajtaniskej iyektikatsin espíritu (Luc. 11:13; Gál. 5:22, 23). Komo ijkon tikchiuaj, Jiova techpaleuis maj tikajsikamatikan tein kiyolpaktia, uan tikmatiskej titanemiliskej kemej yejuatsin. Ijkon, tein tiknemiliskej, tein tikijtoskej uan tein tikchiuaskej okachi kiyolpaktis Jiova. Sayoj ke, monekis tiksentokaskej timochikauaskej tikyektaliskej tein ika timopolouaj (Prov. 4:23).

¹⁵ Maski moneki mojmostaj tikixtajtoltiskej Biblia, no moneki timomachtiskej ika amaixmej kemej Tanejmachtijkej uan ¡Despertad! Miak tamachtilismej tein kiualkuij nejin amaixmej techmachtiaj keniuj tiknextiskej ikualneskayouan Jiova uan keniuj uelis tikyektaliskej tein ika timopolouaj. Xa seki tamachtilismej oso seki tajkuilolmej tein mokixtiaj itech Biblia semi techpaleuiskej. Uelis tikintaliskej kampa satepan uelis oksepa tikinixtajtoltiskej.

16. ¿Keyej moneki amo timosenkauaskej komo amo ueli ijsiujka timopataj kemej tiknekiskiaj?

 ¹⁶ Amo ijsiujka ueli se kinextia ikualneskayouan Jiova. Yejua ika, maj amo tiyolijsiuikan. Maj amo timosenkauakan komo tikmachiliaj ke amo ueli ijsiujka timopataj kemej tiknekiskiaj. Xa yekinika monekis timochikaujkauiskej tikchiuaskej tein kijtoua Biblia. Sayoj ke ijkon kemej okachi timochikauaskej titanemiliskej uan tikchiuaskej tein Jiova kineki, okachi amo ouij techkisas titanemiliskej kemej yejuatsin uan tikchiuaskej tein kuali (Sal. 37:31; Prov. 23:12; Gál. 5:16, 17).

17. ¿Keniuj tinemiskej satepan komo tiksentokaj tiktekitiliaj Jiova?

¹⁷ Tiktelnekij maj ejko tonal keman amo tikpiaskejok tajtakol uan tiktekitiliskej Jiova nochipaya. Ijkuak, amo teyi ika timopoloskejok. Okachi amo ouij yeski titanemiliskej kemej Jiova. Sayoj ke maski axkan titajtakouanij, ueli tikueyichiuaj porin techpaleuia inemilis Jesús tein kitemakak. Komo tiksentokaj timochikauaj tikyektaliskej tonepololuan uan tiktakamatiskej tein Jiova techmachtia itech Biblia, uelis tikyolpaktiskej.

18, 19. ¿Toni kinextia ke Biblia kipia chikaualis tein techpaleuia maj tiksentokakan tikpatakan totanemilil?

¹⁸ Itech yekinika párrafos ika titajtojkej Kevin, se tokniuj akin kiouijmakaya amo niman kualanis. Yejua tanemilij itech tein kiixtajtoltij itech Biblia uan mochikauak mopatas. Uan no, kikakik tein kiyolmajxitiayaj okseki tokniuan. Satepan ke panokej seki xiujmej, uelik mopatak uan mochiuak tapaleuijkej itech nechikol. Uan itech 20 xiujmej tein tiualpanouanij tekiti kemej tayekankej itech nechikol. Sayoj ke kimati ke moneki kisentokas kiyektalis tein ika mopoloua.

¹⁹ Kemej Kevin, tejuan no uelis tiksentokaskej tikyektaliskej tein ika timopolouaj. Komo ijkon tikchiuaj, okachi kuali timouikaskej iuan Jiova (Sal. 25:14). Maj timochikauakan timopataskej kemej kiyolpaktia, uan yejuatsin techpaleuis. Uelis tikyekmatiskej ke ika inepaleuil Biblia uelis tiksentokaskej tikpataskej totanemilil (Sal. 34:8).